အတိုင်ပင်ခံ

November 10, 2022

သမ္မတဦး၀င်းမြင့်နှင့်အတိုင်ပင်ခံတို့အပေါ် ပြစ်ဒဏ်ချပြီးသားအမှုများ နှစ်ဖက် အယူခံတင်ထား

စစ်ကောင်စီက အာဏာသိမ်းပြီးနောက် သမ္မတဦး၀င်းမြင့်နဲ့ နိုင်ငံတော်အတိုင်ပင်ခံ ပုဂ္ဂိုလ်ဒေါ်အောင်ဆန်စုကြည်တို့အပေါ် ပုဒ်မမျိုးစုံနဲ့ စွပ်စွဲတရားစွဲဆိုပြီး အမိန့်ချပြီးသားအမှုတွေကို စွပ်စွဲခံရသူတွေရဲ့ ရှေ့နေတွေနဲ့ စစ်ကောင်စီ လက်အောက်ခံ ဥပဒေရေးရာဌာနတို့က အမှုတွေနဲ့ပတ်သက်ပြီး ပြည်ထောင်စုတရားလွှတ်တော်ချုပ်ကို ပြင်ဆင်ချက်တွေ၊ အယူခံတွေ တင်ထားတယ်လို့ တရားရေးနဲ့ပတ်သက်တဲ့ အသိုင်းဝိုင်းကနေ သိရပါတယ်။

“အရင်အမိန့်ချထားတဲ့ ဆက်သွယ်ရေးပုဒ်မ၊ ပို့ကုန်သွင်းကုန်ပုဒ်မ၊ သဘာဝဘေးပုဒ်မ၊ ၅၀၅(ခ)အမှုတွေကို ပြင်ဆင်မှုတက်ထားတာ။ အဲဒါ ဒီနေ့ ပြည်ထောင်စုတရားလွှတ်တော်ချုပ် တပါးထိုင်က လက်ခံထားတယ်” လို့ တရားရေးနဲ့နီးစပ်သူတဦးက ပြောပါတယ်။

ဒါအပြင် နေပြည်တော်ရှိ ဒေါ်ခင်ကြည်ဖောင်ဒေးရှင်းကလုပ်တဲ့ လရောင်တောစီမံကိန်း မြေနေရာချထားပေးမှု၊ ရန်ကုန်ရှိ ဒေါ်ခင်ကြည်ဖောင်ဒေးရှင်းရုံချုပ်မြေနေရာ ငှားရမ်းမှုတွေနဲ့ ပတ်သက်တဲ့ အမှုလေးမှုကို အယူခံတက်ထားသလို စစ်ကောင်စီလက် အောက်ခံ ဥပဒေရေးရာဌာနကလည်း ဒီအမှုလေးမှုနဲ့ပတ်သက်ပြီး ပြင်ဆင်မှုတက်ထားတယ်လို့ သိရပါတယ်။

“နေပြည်တော်လရောင်တောက သုံးမှု၊ ရန်ကုန်ဒေါ်ခင်ကြည်ဖောင်ဒေးရှင်းရုံးချုပ် မြေနေရာအမှု အဲဒါတွေကို ဒီနေ့ အယူခံတက်တာ လက်ခံပေးဖို့ ဒီအမှုတွေက မှားယွင်းတယ်ဆိုပြီး လျှောက်တယ်၊ လျှောက်တာကို လက်ခံတယ်။ အဲလိုပဲ တဖက် ဥပဒေရေးရာဌာနကလည်း အဲအမှုတွေမှာ ပစ္စည်းတွေကို ပြည်သူပိုင်အဖြစ် မသိမ်းလို့ဆိုပြီး ပြင်ဆင်မှုတက်တယ်။ အဲဒါကို သူတို့ကလည်း လက်ခံပေးဖို့ လျှောက်တယ်။ သူတို့တက်တဲ့ ပြင်ဆင်မှု သုံးမှုကိုလည်း လက်ခံတယ်။ ဒီဘက်က တက်တဲ့ အယူခံလေးမှုကိုလည်း လက်ခံတယ်။ အဲဒါ နှစ်ဖက် ခေါ်မယ် ကြားနာမယ်” လို့ အဆိုပါ နီးစပ်သူက ပြောပါတယ်။

စီးပွားရေးလုပ်ငန်းရှင်ဦးမောင်ဝိတ်က ဒေါ်ခင်ကြည်ဖောင်ဒေးရှင်းကို လှူဒါန်းတာနဲ့ပတ်သက်တဲ့ အမှုနှစ်ကိုလည်း နှစ်ဖက် ပယ်ဖျက်ပေးဖို့နဲ့ ပြင်ဆင်မှုတင်ထားတွေကိုတော့ ပြည်ထောင်စု တရားလွှတ်တော်ချုပ်က ပယ်ချလိုက်တယ်လို့ သိရပါတယ်။

“ဦးမောင်ဝိတ်နဲ့ပတ်သက်တဲ့ အမှုနှစ်ခုရဲ့အမိန့်ကို ပယ်ဖျက်ပေးဖို့တက်တယ်။ အဲလိုပဲ သူတို့ဘက်ကလည်း အမှုနံပါတ်လေးမှာ သူတို့က စွပ်စွဲတာက ဒေါ်လာ ငါးသောင်း တကြိမ်၊ နှစ်သိန်းခွဲ တကြိမ် ပေါင်း သုံးသိန်းဆိုပြီး သူတို့က စွပ်စွဲတာ။ ဒါပေမယ့် ဦးမောင်ဝိတ်ကိုယ်တိုင် ရုံးချိန်းတွေမှာ ဒေါ်ခင်ကြည်ဖောင်ဒေးရှင်းကို လှူတာပါ ငါးသောင်း တကြိမ်လှူတာပါ။ နှစ်သိန်း တကြိမ် လှူတာပါလို့ ထွက်ထားတော့ ငါးသောင်းက ပျောက်နေတယ်။ အဲပျောက်နေတဲ့ ငါးသောင်းကို ထပ်ပြီးတော့ ထည့်ပေးပါဆိုပြီး ပြင်ဆင်မှုတခု တက်တယ်။ ဒါပေမယ့် နှစ်ဖက်လုံးက တက်တာကို ပယ်လိုက်တယ်၊ ပလပ်လိုက် တာပေါ့” လို့ တရားရုံးနဲ့နီးစပ်သူက ပြောပါတယ်။

လာမယ့် နို၀င်ဘာ ၁၆ ရက်နေ့မှာ ဦးမောင်ဝိတ်နဲ့ပတ်သက်တဲ့အမှုတွေကို အယူခံတက်မယ်လို့ သိရပါတယ်။ ဒါ့အပြင် ဒေါက် တာမျိုးအောင်နဲ့ ဦးရဲမင်းဦးတို့အပေါ်ချထားတဲ့ အမိန့်တွေနဲ့ ပတ်သက်လို့ အယူခံတက်ထားတာကိုလည်း နို၀င်ဘာ ၁၆ ရက်နေ့ ကြားနာမယ်လို့ သိရပါတယ်။

3 months Ago

October 4, 2022

ဦးမောင်ဝိတ်ငွေလှူမှုနှင့်ပတ်သက်သည့်အမှုများ အမိန့်ချမည်၊ အပြစ်မရှိကြောင်း အတိုင်ပင်ခံပုဂ္ဂိုလ်ထွက်ဆို

စစ်ကောင်စီက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုစွဲဆိုထားတဲ့ ဦးမောင်ဝိတ်ငွေလှူတာနဲ့ ပတ်သက်တဲ့အဂတိအမှု နှစ်မှုကို အောက်တိုဘာ ၄ ရက်က နေပြည်တော် အချုပ်ထောင်၊ အထူးတရားရုံးမှာ ရုံးထုတ်စစ်ဆေးခဲ့ပြီး နှစ်ဖက် အပြီးသတ်လျှောက်လဲချက်တင်ခဲ့ကြတာပါ။

ဒီအမှု နှစ်မှုအတွက် အောက်တိုဘာ ၁၂ ရက်နေ့မှာ အမိန့်ချဖို့ တရားရုံးက ဆုံးဖြတ်ခဲ့တယ်လို့ တရားရုံးနဲ့နီးစပ်သူတယောက်ကပြောပါတယ်။

"အပြီးသတ်လျှောက်လဲချက်တင်တယ်။ လာမယ့် အပတ် ဗုဒ္ဓဟူးနေ့အမိန့်ချမယ်။ ၁၂ရက်နေ့။"။ စက်တင်ဘာ ၂၀ ရက် ရုံးချိန်းတုန်းက ဦးမောင်ဝိတ်ငွေလှူတဲ့အမှုတွေအတွက် သူ့အမှာ အပြစ်မရှိကြောင်း နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကိုယ်တိုင် ထွက်ဆိုခဲ့ပါတယ်။

"ဒီနေ့လျှောက်လဲချက်မှာ အတိုင်ပင်ခံပုဂ္ဂိုလ်ကသူ့မှာအပြစ်မရှိဘူး။ သူ့ကိုလွှတ်ပေးရမယ်ပေါ့။ ဒါပဲတင်ရတာပေါ့။ ဒါတွေက အန်တီ့ကို ပေးတာတွေမဟုတ်ဘူး။ ဒါတွေက လှူတာလေ။ ဒေါ်ခင်ကြည်ဖောင်ဒေးရှင်းကို မောင်ဝိတ်ကလှူတဲ့ကိစ္စလေ။  သွားအလှူခံတာလည်းမဟုတ်ဘူး။ သူ့ဘာသာ လာလှူတဲ့ကိစ္စလေ။ အဲ့ဒီငွေတွေကလည်း ဒေါ်ခင်ကြည်ဖောင်ဒေးရှင်းကို ပေးလိုက်တာဆိုတော့အပြစ်မရှိဘူး။ လွှတ်ပေးရမှာပေါ့။ ဒီကိစ္စမှာလှူတဲ့မောင်ဝိတ်ကလည်း တရားစွဲတာမရှိဘူး။ သူ့သဘောနဲ့သူထားတာလေ။ သူ့ပိုက်ဆံနဲ့သူလုပ်တာလေ။"လို့ တရားရုံးနဲ့နီးစပ်သူတစ်ယောက်က ပြောပါတယ်။

စီးပွားရေးလုပ်ငန်းရှင်ဦးမောင်ဝိတ်က ငွေလှူတာနဲ့ပတ်သက်တဲ့ အဂတိမှု နှစ်ခုမှာ စစ်ကောင်စီကတင်သွင်းထားတဲ့လိုပြသက်သေနှစ်ယောက်ကို စက်တင်ဘာ ၁၉ ရက်နေ့ ရုံးချိန်းမှာ တရားရုံးက ပယ်ချခဲ့ပါတယ်။

ဩဂုတ် ၁၃ရက်၊ ဩဂုတ် ၁၆ ရက်၊ စက်တင်ဘာ ၅ ရက်နဲ့ ၁၂ ရက်နေ့ရုံးချိန်းတွေကို လိုပြသက်သေ နှစ်ယောက်မလာခဲ့တဲ့အတွက် ဒီအမှုတွေနဲ့ပတ်သက်ပြီး ရုံးချိန်း ၄ ခုဆက်တိုက် တရားရုံးက စစ်ဆေးဖို့ပျက်ကွက်ခဲ့တာကြောင့်  လိုပြသက်သေတွေကို ပယ်ချခဲ့တာဖြစ်ပါတယ်။

ဦးမောင်ဝိတ်ဆီကနေ အမေရိကန်ဒေါ်လာ ငါးသိန်းခွဲကို နှစ်ခါခွဲပြီး လက်ခံခဲ့တယ်လို့ စွပ်စွဲပြီး နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက အဂတိလိုက်စားမှုတိုက်ဖျက်ရေးဥပဒေ အမှု နှစ်ခုနဲ့ တရားစွဲဆိုခဲ့တာပါ။

ဦးမောင်ဝိတ်ကတော့ ငွေကြေးတွေကို ပရဟိတအတွက် အလှူငွေပေးအပ်ခဲ့တာသာဖြစ်တယ်လို့ တရားရုံးမှာထွက်ဆိုခဲ့ပါတယ်။ 

ဒီအဂတိအမှု နှစ်မှုအတွက် စစ်ကောင်စီတရားရုံးက အတိုင်ပင်ခံပုဂ္ဂိုလ်ကို စွဲချက်တင်ကြောင်း ဇူလိုင် ၂၅ ရက်နေ့ရုံးချိန်းမှာ အမိန့်ချခဲ့ပါတယ်။

ဒီအဂတိနှစ်မှုကို ဇူလိုင် ၁၃ ရက်နေ့မှာ အတိုင်ပင်ခံရဲ့ရှေ့နေအဖွဲ့က တရားလွှတ်တော်ချုပ်မှာ ချေဖျက်ခွင့်တင်ခဲ့ပေမယ့် စစ်ကောင်စီတရားရုံးက ပယ်ချခဲ့ပါတယ်။

၂၀၂၂ ဇွန်လအထိ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက စွဲဆိုခဲ့တဲ့ အမှုစုစုပေါင်း ၁၉ မှုရှိခဲ့ပြီး အဲ့ဒီအထဲက ၁၂ မှုအတွက် စစ်ကောင်စီတရားရုံးက ကနဦး ထောင်ဒဏ် ၂၃ နှစ် ချမှတ်ထားပါတယ်။

အတိုင်ပင်ခံပုဂ္ဂိုလ်ဟာ ရဟတ်ယာဉ်ဝယ်ယူမှုနဲ့ပတ်သက်တဲ့အဂတိအမှု ၅ မှု၊ ဒေါ်ခင်ကြည်ဖောင်ဒေးရှင်းနဲ့ ပတ်သက်တဲ့အဂတိအမှု ၂ မှု၊ စုစုပေါင်း ၇ မှုကို ရင်ဆိုင်ဖို့ ကျန်နေပါသေးတယ်။

4 months Ago
More News
Up