အတည်ပြလူနာ

June 19, 2020

ထိုင်းနှင့်မလေးရှားက ပြန်လာသူ ၂၃ ဦးတွင် ကိုဗစ်-၁၉ ရောဂါပိုး တွေ့ရှိ

ဇွန် ၁၈ ရက်နေ့အတွက် ဓာတ်ခွဲနမူ ၂,၄၂၂ ခုအား နှစ်သုတ်ခွဲ စစ်ဆေးချက်အရ ထိုင်းနဲ့ မလေးရှားက ပြန်လာသူ ကိုဗစ်-၁၉ အတည်ပြုလူနာသစ် ၂၃ ဦးအထိ စံချိန်တင် တွေ့ရှိခဲ့တယ်လို့ ကျန်းမာရေးဝန်ကြီးဌာနက ဒီနေ့မနက် ထုတ်ပြန်ပါတယ်။ အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်) က ဓာတ်ခွဲနမူနာ ၁,၃၂၇ ခု၊ ဆေးသုတေသနဦးစီးဌာနက ဓာတ်ခွဲနမူနာ ၂၄၀ ခု၊ ရန်ကုန်မြို့၊ အမှတ် (၁) တပ်မတော်ဆေးရုံကြီး၊ ခုတင် (၁၀၀၀) က ဓာတ်ခွဲနမူနာ ၂၀၃ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန(မန္တလေး) က ဓာတ်ခွဲနမူနာ ၃၇၀ ခုနဲ့ ပြည်သူ့ကျန်းမာရေးဓာတ်ခွဲမှုဆိုင်ရာဌာန(မော်လမြိုင်) က ဓာတ်ခွဲနမူနာ ၂၈၂ ခု၊ စုစုပေါင်း ၂,၄၂၂ ခုအား စစ်ဆေးခဲ့ပြီး လူနာသစ် ၂၃ ဦး တွေ့ရှိခဲ့တာပါ။ အခုတွေ့ရှိတဲ့ လူနာသစ် ၂၃ ဦးဟာ မလေးရှားက ပြန်လာသူ ၄ ဦးနဲ့ ထိုင်းက ပြန်လာသူ ၁၉ ဦးတို့ဖြစ်ပြီး ကိုဗစ်-၁၉ အတည်ပြုလူနာတွေနဲ့ ထိတွေ့မှုမရှိခဲ့ဘူးလို့ဆိုပါတယ်။ လူနာသစ် ၂၃ ဦးလုံးဟာ ကရင်ပြည်နယ် ဘားအံမြို့မှာ အသွားအလာကန့်သတ် စောင့်ကြည့်ထားသူတွေဖြစ်ပြီး ဝေဘာဂီအထူးကုဆေးရုံကြီးမှာ ဆေးကုသမှု ခံယူစေမယ်လို့ ဆိုပါတယ်။ မြန်မာနိုင်ငံမှာ ဒီနေ့မနက် ၈ နာရီအထိ ကိုဗစ်-၁၉ အတည်ပြုလူနာ ၂၈၆ ဦး၊ သေဆုံးသူ ၆ ဦး၊ ဓာတ်ခွဲအတည်ပြု လူနာဟောင်းတွေထဲက လူနာအမှတ် ၁၃၃ နဲ့ ၂၃၁ တို့မှာ ၂ ကြိမ်ဆက်တိုက် ပိုးမတွေ့ရှိတာကြောင့် ရောဂါပိုးကင်းစင်လာသူ စုစုပေါင်း ၁၈၇ ဦးရှိပါတယ်။ အဲဒီထဲက ၁၇၂ ဦးအား ဆေးရုံမှဆင်းခွင့်ပြုခဲ့ပြီး သတ်မှတ်နေရာတွေမှာ အသွားအလာ ဆက်လက်ကန့်သတ် စောင့်ကြပ်ကြည့်ရှုနေတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။

9 months Ago