ကက်စ်ပီယံပင်လယ်ထဲက အဇာဘိုင်ဂျန် ကမ်းလွန် သဘာဝဓာတ်ငွေ့ တူးဖော်ရေးစင်တွေ ဘေးကင်းတယ်လို့ အစိုးရ စွမ်းအင်ကုမ္ပဏီ ဆိုကာက ဇူလိုင် ၅ ရက်မှာ ပြောတယ်လို့ ရိုက်တာက ဖော်ပြထားပါတယ်။

ဒီနေရာတွေမှာ မီးအကြီးအကျယ် လောင်နေတယ်လို့ မီဒီယာတွေက အစောပိုင်းမှာ အစီရင်ခံခဲ့တာပါ။ ကမ်းလွန်ပင်လယ်ပြင်ကနေ မီးခိုးတွေထွက်နေပုံ ရုပ်သံတွေ ဓာတ်ပုံတွေကိုလည်း အွန်လိုင်းပေါ် ဖြန့်ချိခဲ့ပါတယ်။

ရွှံ့တွေ ပေါက်ကွဲတာက ဒီဖြစ်ရပ်အတွက် အဖြစ်နိုင်ဆုံး အကြောင်းရင်းလို့ ဆိုကာကို ကိုးကားပြီး ရုရှားအခြေစိုက် ရီယာသတင်းဌာနက ဖော်ပြပေမဲ့ ဘယ်လိုလုပ် မီးလောင်တယ် ဆိုတာကိုတော့ ရှင်းမပြခဲ့ပါဘူး။

“ဆိုကာက ထိန်းချုပ်ထားတဲ့ လုပ်ငန်းတွေနဲ့ ကမ်းလွန်လုပ်ကွက်တွေမှာ ဘယ်လို မတော်တဆမှ မဖြစ်ခဲ့ဘူး။ အလုပ်တွေ ပုံမှန်လုပ်နေတယ်” လို့လည်း ဆိုကာရဲ့ ပြောခွင့်ရက ပြောပါတယ်။

အဇာဘိုင်ဂျန်ရဲ့ ဓာတ်ငွေ့ထုတ်ကုန် အဓိကရင်းမြစ်တွေဟာ ကမ်းလွန်လုပ်ကွက်တွေ ဖြစ်ပြီး ဆိုဗီယက်ယူနီယံ လက်အောက်ခံဟောင်း အဇာဘိုင်ဂျန် နိုင်ငံထွက် ဓာတ်ငွေ့တွေကို ဥရောပဆီ တင်ပို့ပါတယ်။