အစ္စရေးစစ်တပ်

September 6, 2022

သတင်းထောက် အဘူအာခလေ အသတ်ခံရမှုနှင့် ပတ်သက်သည့် အစ္စရေးစစ်တပ်၏ အစီရင်ခံစာကို အယ်လ်ဂျာဇီးရား ရှုတ်ချ

ရုပ်သံသတင်းထောက် အသတ်ခံရမှုနဲ့ ပတ်သက်တဲ့ အစ္စရေးစစ်တပ်ရဲ့ စုံစမ်းစစ်ဆေးမှု အစီရင်ခံစာဟာ မသေချာမရေရာမှုတွေနဲ့ လှည့်ဖြားမှုတွေကို အတည်ဖြစ်စေဖို့ ကြိုးပမ်းနေတယ်လို့ အယ်လ်ဂျာဇီးရားသတင်းဌာနရဲ့ အနောက်ဘက်ကမ်း မန်နေဂျာက ပြောလိုက်ပါတယ်။

မေလတုန်းက အယ်လ်ဂျာဇီးရား ရုပ်သံသတင်းထောက် ရှာရင်းအဘူအာခလေ အသတ်ခံရတဲ့ အမှုနဲ့ ပတ်သက်ပြီး စုံစမ်းစစ်ဆေးရာမှာ သူ့ကို အစ္စရေးစစ်သားတစ်ဦးက မရည်ရွယ်ဘဲ ပစ်သတ်ခဲ့တာ ဖြစ်နိုင်ပြီး  တမင်ပစ်မှတ်ထားတာ မဟုတ်ဘူးလို့ အစ္စရေးစစ်တပ်က အစီရင်ခံစာထုတ်ပြန်ခဲ့ ပါတယ်။

အယ်လ်ဂျာဇီးယားရဲ့ ရာမာလာဒေသ ဗျူရိုအကြီးအကဲ ဝါလစ် အဘူအိုမာရီက  “ဒါတွေအားလုံးဟာ လိမ်ညာမှုတွေ၊ အကောင့်တွေ၊ ဗီဒီယိုတွေနဲ့ မျက်မြင်သက်သေတွေ အားလုံးက သူတို့ရဲ့ ပြောဆိုမှုတွေကို ငြင်းဆိုထားတယ်" လို့ ရိုက်တာသတင်းဌာနကို ပြောပါတယ်။

အမေရိကန်- ပါလက်စတိုင်းနိုင်ငံသား  သတင်းထောက် အဘူအာခလေဟာ သိမ်းပိုက်ခံ အနောက်ဘက်ကမ်းဒေသက မငြိမ်မသက်ဖြစ်နေတဲ့ ဂျိနင်းမြို့မှာ အစ္စရေးစစ်တပ်က စစ်ဆင်ရေး ဆောင်ရွက်နေချိန် မေလ ၁၁ ရက်က ပစ်သတ်ခံခဲ့ရတာပါ။

တပ်ဖွဲ့ဝင်တွေက ဘက်ပေါင်းစုံကနေ အပြင်းအထန် ပစ်ခတ်ခဲ့ပြီး သူတို့နေရာကနေ မီတာ ၂၀၀  အကွာမှာ အဘူအာခလေ ရပ်နေတဲ့နေရာဆီ ပြန်ပစ်ခတ်ခဲ့ပါတယ်။ ဒါပေမဲ့ သူ ဘယ်သူဘယ်ဝါဆိုတာ မဖော်ထုတ်နိုင်ခဲ့ဘူးလို့ အစ္စရေးစစ်တပ်က ပြောပါတယ်။

3 months Ago

July 25, 2022

ပါလက်စတိုင်းစစ်သွေးကြွ ၂ ဦးကို အစ္စရေးစစ်တပ် ပစ်သတ်

ပါလက်စတိုင်းနယ်မြေ အနောက်ဘက်ကမ်းမှာ ဇူလိုင် ၂၄ ရက် မနက်စောစော သေနတ် ပစ်ခတ်မှုအတွင်း ပါလက်စတိုင်း စစ်သွေးကြွ ၂ ယောက်ကို အစ္စရေးစစ်တပ်က ပစ်သတ်လိုက်တယ်လို့ ပါလက်စတိုင်းနဲ့ အစ္စရေး အရာရှိတွေက ပြောပါတယ်။ 

ပါလက်စတိုင်း အမျိုးသား ၂ ယောက် သေဆုံးသွားပြီး ၆ ယောက် ဒဏ်ရာရတယ်လို့ ပါလက်စတိုင်း ကျန်းမာရေး ဝန်ကြီးဌာနကလည်း အတည်ပြုထားပါတယ်။

ပါလက်စတိုင်းမြို့  နာဘလူးစ်မြို့မှာရှိတဲ့ နေအိမ်ခြံဝင်းအတွင်း ဖြစ်ခဲ့တဲ့ ပစ်ခတ်မှုအတွင်း သေဆုံးသွားသူတွေဟာ သူတို့အဖွဲ့က ဖြစ်တယ်လို့ အစ္စရေး စစ်သွေးကြွအဖွဲ့တဖွဲ့က ကြေညာပါတယ်။ 

အစ္စရေး လုံခြုံရေးတပ်ဖွဲ့တွေက အလိုရှိတဲ့ လူတယောက်အား အိမ်ထဲဝင်ဖမ်းစဉ်မှာ သေနတ်ပစ် ခုခံတဲ့အတွက် ရှင်းလင်းခဲ့ရတယ်လို့ အစ္စရေးရဲတပ်ဖွဲ့က ဆိုပါတယ်။ 

အမေရိကန်က ကြားဝင်စေ့စပ်ပေးတဲ့ အစ္စရေးနဲ့ ပါလက်စတိုင်း ငြိမ်းချမ်းရေးဟာ ၂၀၁၄ ခုနှစ်ကတည်းက ပျက်ပြားနေတာ အခုအချိန်ထိ ဖြစ်ပါတယ်။ 

ဒီလပိုင်းတွေအတွင်း အနောက်ဘက်ကမ်းမှာ  နေထိုင်တဲ့ အမျိုးသားတွေက အစ္စရေး လမ်းမတွေပေါ်မှာ လူအသေအပျောက်ရှိတဲ့ တိုက်ခိုက်မှုတွေကို လုပ်ခဲ့တဲ့နောက်ပိုင်း အစ္စရေး လုံခြုံရေးတပ်ဖွဲ့တွေကလည်း အနောက်ဘက်ကမ်းမှာ လူဖမ်းပွဲတွေကို အရှိန်မြှင့်လာတာ ဖြစ်ပါတယ်။ 

5 months Ago
More News
Up