အစီအမံ

September 1, 2022

ဘယ်လ်ဂျီယံတွင် စွမ်းအင်စျေးနှုန်းမြင့်တက်မှု ဖြေရှင်းမည့် အစီအမံများ ကြေညာ

ဘယ်လ်ဂျီယံနိုင်ငံဟာ မြင့်တက်လာတဲ့ စွမ်းအင်စျေးနှုန်းတွေကို ကိုင်တွယ်ဖြေရှင်းဖို့အတွက် အများသူငါ အဆောက်အဦတွေရဲ့ ဓာတ်အားသုံးစွဲမှုကို ဖြတ်တောက်တာနဲ့ Engie နဲ့ TotalEnergies တို့လို စွမ်းအင်ကုမ္ပဏီတွေရဲ့ ပိုလျှံအမြတ်အစွန်းတွေကို အခွန်ကောက်ခံဖို့ အဆိုပြုချက်တွေ အပါအဝင် အစီအမံတွေကို သြဂုတ် ၃၁ ရက်က ကြေညာခဲ့ပါတယ်။

အများသူငါ အဆောက်အဦတွေမှာ အပူချိန်ကို ၁၉ ဒီဂရီ စင်တီဂရိတ်သာ ထားရှိဖို့ ကန့်သတ်ထားမှာဖြစ်ပြီး လေအေးပေးစက် အသုံးပြုမှု လျှော့ချသွားမှာဖြစ်ကြောင်းနဲ့ ရုံးခန်းတွေနဲ့ အထိမ်းအမှတ်နေရာတွေမှာ မီးထွန်းတာတွေကိုလည်း ည ၇ နာရီမှာ မီးပိတ်မယ်လို့ ဘယ်လ်ဂျီယံဝန်ကြီးချုပ် Alexander De Croo က ပြောပါတယ်။

အဝေးပြေးလမ်းတွေနဲ့ မြို့ကြီးတွေမှာ သတ်မှတ်နာရီအချိန်တွေမှာ မီးပိတ်ထားရေးကိစ္စတွေကို ဆွေးနွေးပွဲတွေမှာ ဆက်လက် ဆုံးဖြတ်သွားမှာဖြစ်ပါတယ်။

စွမ်းအင်ကုမ္ပဏီတွေရဲ့ ပိုလျှံတဲ့အမြတ်အစွန်းတွေကို အခွန်ကောက်ခံမယ့် အဆိုပြုချက်ကို စက်တင်ဘာလကုန်မှာ တင်ပြမှာဖြစ်ကြောင်းလည်း ဖက်ဒရယ်အစိုးရက ပြောကြားခဲ့ပါတယ်။

“ဒီနိုင်ငံမှာ နျူကလီးယားကဏ္ဍက ပိုလျှံနေတဲ့ အမြတ်အစွန်းအပေါ် အခွန်ကောက်ခံမှုက ရှိပြီးသားပါ။ အဆိုပြုချက်အသစ်ရဲ့ ရည်ရွယ်ချက်ကတော့ အမြတ်အစွန်းတွေ အရမ်းများနေတဲ့ စွမ်းအင်ကဏ္ဍမှာရှိတဲ့ တခြားကုမ္ပဏီတွေကို ဒီအစီအမံ တိုးချဲ့ဖို့ဖြစ်ပါတယ်” လို့ De Croo က ဒေသဆိုင်ရာ နိုင်ငံရေးခေါင်းဆောင်တွေနဲ့ တွေ့ဆုံအပြီးမှာ သတင်းထောက်တွေကို ပြောပါတယ်။

ဖေဖော်ဝါရီလကုန်ပိုင်းမှာ စတင်ခဲ့တဲ့ ယူကရိန်းကို ရုရှားရဲ့ကျူးကျော်မှုဟာ ဘယ်လ်ဂျီယံအနေနဲ့ သဘာဝဓာတ်ငွေ့ကို ပိုအားထားရေးနဲ့ ၂၀၂၅ ခုနှစ်မှာ နျူကလီးယားစွမ်းအင်ကို လုံးဝမသုံးတော့ဖို့ အစီအစဉ်တွေကို ပြန်စဉ်းစားဖို့ ဖြစ်လာခဲ့ပါတယ်။

3 months Ago

November 22, 2021

ကိုဗစ်ကာကွယ်ရေး အစီအမံများ တိုးချဲ့မည်ဟု စင်ကာပူ ကြေညာ

စင်ကာပူ အစိုးရဟာ ကိုဗစ်-၁၉ ကာကွယ်ဆေး မထိုးရသေးတဲ့လူတွေ ကူးစက်မခံရအောင်နဲ့ ပြင်းပြင်းထန်ထန် နေမကောင်းမဖြစ်ရအောင် ကာကွယ်ဖို့ ဘေးကင်းတဲ့ စီမံခန့်ခွဲမှုဆိုင်ရာ အစီအမံတွေကို တိုးချဲ့ဆောင်ရွက်သွားမယ်လို့ စင်ကာပူဝန်ကြီးဌာနပေါင်းစုံ လုပ်ငန်းအဖွဲ့က နိုဝင်ဘာ ၂၀ ရက်မှာ ကြေညာလိုက်ပါတယ်။

ဒီဇင်ဘာ ၁ ရက်ကစပြီး ကာကွယ်ဆေး အပြည့်ထိုးပြီးသားလူတွေကို အမျိုးသားစာကြည့်တိုက် ဘုတ်အဖွဲ့အောက်က စာကြည့်တိုက်တွေကို ဝင်ခွင့်ပြုတော့မှာပါ။ ပြည်သူ့အဖွဲ့အစည်းအောက်က ရပ်ရွာအသင်းတွေမှာ ရွေးချယ်ထားတဲ့ လှုပ်ရှားမှုတွေမှာလည်း ပါဝင်ခွင့်ရမယ်လို့ လုပ်ငန်းအဖွဲ့က ပြောပါတယ်။

အစိုးရဟာ အရင်က ကာကွယ်ဆေးမထိုးရသေးတဲ့လူတွေကို ဟော်ကာ စင်တာတွေ၊ ကော်ဖီဆိုင်တွေ၊ ကုန်တိုက်တန်းတွေနဲ့ ကမ္ဘာလှည့်ခရီးသည်တွေ သွားရောက်လည်ပတ်လေ့ရှိတဲ့ နေရာတွေကို ဝင်ခွင့်မပြုဖို့ အောက်တိုဘာ ၁၃ ရက်က စတင်ပိတ်ပင်ခဲ့တာပါ။

လာမယ့်နှစ် ဇန်နဝါရီ ၁ ရက်ကစပြီး ကာကွယ်ဆေး မထိုးထားသူတွေဟာ ကူးစက်မခံထားရကြောင်း စမ်းသပ်ချက် ရလဒ်ရှိထားရင်တောင် အထက်ဖော်ပြပါ နေရာတွေကို ဝင်ရောက်ဖို့ ဆက်ခွင့်ပြုမှာမဟုတ်ဘူးလို့လည်း လုပ်ငန်းအဖွဲ့က ပြောပါတယ်။

နိုဝင်ဘာ ၂၄ ရက်ကစပြီး နောက်ဆုံး ကာကွယ်ဆေး ထိုးထားတာ ၅ ပြည့်တဲ့လူတွေအားလုံး ဆေးအာနိသင် ဆက်ထိန်းထားဖို့ အားမြှင့်ပေးတဲ့ ထိုးဆေးကို ထိုးနှံထားရမယ်လို့ ဆိုပါတယ်။

စင်ကာပူမှာ ပြည်သူ ၉၄ ရာခိုင်နှုန်းဟာ ကိုဗစ်-၁၉ ကပ်ရောဂါ ကာကွယ်ဆေးကို အပြည့်အဝ ထိုးနှံပြီးစီးထားပြီး ၂၂ ရာခိုင်နှုန်းက ဆေးအာနိသင် မြှင့်တင်ရေး ထိုးဆေးတွေကို ထပ်ထိုးပြီးပြီလို့ ရိုက်တာက ဖော်ပြထားပါတယ်။

စင်ကာပူမှာ နိုဝင်ဘာ ၂၀ ရက်နေ့တရက်တည်း ကိုဗစ်-၁၉ အသစ်ကူးစက်ခံ  ၁,၉၃၁ ယောက်ရှိပြီး စုစုပေါင်း ကူးစက်ခံ ၂၅၀,၅၁၈ ယောက် ရှိလာပါတယ်။ ကူးစက်ခံ သေဆုံးသူ ၁၃ ဦး ထပ်တိုးလာလို့ စုစုပေါင်း ကူးစက်ခံ သေဆုံးသူ ၆၅၄ ယောက်ရှိတယ်လို့ ကျန်းမာရေးဝန်ကြီးဌာနက ပြောပါတယ်။

1 year Ago
Up