အစိုးရဆန့်ကျင်ရေးဆန္ဒပြပွဲ

November 30, 2019

ကိုလံဘီယာအစိုးရ ဆန့်ကျင်ဆန္ဒပြပွဲတွင် လူငယ်နှင့်ဌာနေတိုင်းရင်းသားများ ပူးပေါင်းပါဝင်

ကိုလံဘီယာနိုင်ငံ မြို့တော် ဘိုကိုတာမှာ နိုဝင်ဘာလ ၂၉ ရက်က လုပ်တဲ့ အစိုးရဆန့်ကျင်ရေးဆန္ဒပြပွဲတွေမှာ လူငယ်တွေနဲ့ ဌာနေတိုင်းရင်းသားတွေ စုပေါင်းပါဝင်ခဲ့ပါတယ်။ သမ္မတ ဒူကေး ဆန့်ကျင် ဆန္ဒပြပွဲ စီစဉ်သူတွေက လက်ဝဲဝါဒီသူပုန်တွေနဲ့ ငြိမ်းချမ်းရေးဆွေးနွေးပွဲ  ပြန်စရေး အပါအဝင် သတ်မှတ်ချက်အသစ်တွေ တောင်းဆိုခဲ့ပါတယ်။  အစိုးရရဲ့ စီးပွားရေး အစီအမံတွေနဲ့ ပတ်သက်ပြီး ပြီးခဲ့တဲ့ ၈ ရက်လုံးလုံး ချီတက်ဆန္ဒပြခဲ့ကြတာပါ။ ဆန္ဒပြပွဲတွေကို တုံ့ပြန်တဲ့အနေနဲ့ သမ္မတဒူကေးက စီးပွားရေး ခေါင်းဆောင်တွေ၊  ကျောင်းသားအဖွဲ့တွေ၊ သမဂ္ဂတွေနဲ့ ခဏတာ တွေ့ဆုံခဲ့ပါတယ်။  ဒါပေမဲ့ သမ္မတဒူကေးဆီ ရေးသားပေးပို့တဲ့ စာထဲမှာ အမျိုးသားသပိတ်မှောက်ကော်မတီက သမ္မတနဲ့ တွေ့ဆုံဆွေးနွေးရေးဟာ အနည်းဆုံး လိုအပ်ချက်တွေနဲ့ မကိုက်ညီဘူးလို့ ဆိုပါတယ်။  ဌာနေတိုင်းရင်းသား ခေါင်းဆောင်တဦးကလည်း ကိုလံဘီယာ ELN ပြောက်ကျားတွေက   တွေ့ဆုံဆွေးနွေးရေး ပြန်လုပ်ချင်ရင် သမ္မတဒူကေးအနေနဲ့လည်း တွေ့ဆုံဆွေးနွေးဖို့ လိုအပ်တယ်လို့ ပြောခဲ့ပါတယ်။ သူက ဌာနေတိုင်းရင်းသားတွေဟာ ငြိမ်းချမ်းရေးကို တကယ်လိုလားပြီး အထက်တန်းလွှာတွေကတော့ စစ်ပွဲကိုပဲ တိုးမြှင့်လုပ်လိုတယ်လို့ ပြောခဲ့ပါတယ်။ ပြီးခဲ့တဲ့ ဇန်နဝါရီလက မြို့တော် ဘိုကိုတာရှိ ရဲသင်တန်းကျောင်းကို ELN သူပုန်တွေ ဗုံးခွဲ တိုက်ခိုက်တာကြောင့် ၂၂ ယောက် သေဆုံးခဲ့ပါတယ်။ အဲဒီနောက်ပိုင်း ကိုလံဘီယာအစိုးရနဲ့ သူပုန်တွေအကြား တွေ့ဆုံဆွေးနွေးရေး ပြန်စမယ့် မျှော်လင့်ချက်တွေ အဆုံးသတ်သွားခဲ့ပါတယ်။
2 years Ago

November 15, 2019

အီရတ်အစိုးရအား ဆန္ဒပြပွဲအတွင်း ၂ ဦးသေဆုံး၊ ၃၅ ဦး ဒဏ်ရာရ

အီရတ်နိုင်ငံ ဘဂ္ဂဒက်မြို့မှာ နိုဝင်ဘာ ၁၄ ရက်နေ့ အစိုးရဆန့်ကျင်ရေးဆန္ဒပြပွဲတွေအတွင်း လုံခြုံရေးတပ်ဖွဲ့ဝင်တွေရဲ့ လက်ချက်ကြောင့် ဆန္ဒပြသူ ၂ ယောက်သေဆုံးခဲ့ပြီး ၃၅ ယောက် ဒဏ်ရာရခဲ့တယ်လို့ ရဲတပ်ဖွဲ့က ပြောပါတယ်။  မျက်ရည်ယို ဓာတ်ငွေ့ဘူး ခေါင်းကိုထိမှန်လို့ ဆန္ဒပြသူတယောက် အခင်းဖြစ်နေရာမှာ သေဆုံးခဲ့ပြီး ဒဏ်ရာရတဲ့ ဆန္ဒပြသူ နောက်ယောက်ကတော့ ဆေးရုံရောက်မှ သေဆုံးသွားခဲ့တယ်လို့ သတင်းရင်းမြစ်တွေက ပြောပါတယ်။  လုံခြုံရေးတပ်ဖွဲ့ဝင်တွေဟာ မျက်ရည်ယိုဓာတ်ငွေ့တွေအပြင် ကျည်အစစ်တွေ၊ ရော်ဘာကျည်တွေ သုံးပြီး ရာချီတဲ့ ဆန္ဒပြလူအုပ်ကို ဖြိုခွင်းဖို့ ကြိုးစားခဲ့တာပါ။   မျက်ရည်ယိုဓာတ်ငွေ့တွေနဲ့ ရော်ဘာကျည်တွေကြောင့် ဒဏ်ရာရသူတွေကို နီးစပ်ရာဆေးရုံ ပို့ပေးခဲ့တယ်လို့ ဆေးဘက်ဆိုင်ရာ သတင်းရင်းမြစ်တွေက ပြောပါတယ်။  တိုင်းပြည်စီးပွားရေး ကျဆင်းတာ၊ အလုပ်အကိုင်နည်းပါးတဲ့ပြဿနာ၊ ဆင်းရဲနွမ်းပါးမှုနဲ့ အကျင့်ပျက်ခြစားမှုတွေကြောင့် အီရတ်နိုင်ငံတွင်း ထိန်းမနိုင်သိမ်းမရ ဆန္ဒပြပွဲတွေ ဖြစ်နေတာပါ။  ကြမ်းတမ်းတဲ့ ဆန္ဒပြပွဲတွေအတွင်း အောက်တိုဘာ ၁ ရက်နေ့ကတည်းက လက်ရှိအချိန်ထိ သေဆုံးသူ အယောက် ၃၀၀ကျော် ရှိလာပြီ။  ဒီအခြေအနေဟာ လက်ရှိအာဏာရသူတွေအတွက်တော့ အာဏာရှင် ဆာဒန်ဟူစိန်ကျဆုံးတဲ့ ၂၀၀၃ ခုနှစ်နောက်ပိုင်း အရှုပ်ထွေးဆုံးနဲ့ အကြီးဆုံးစိန်ခေါ်မှုတွေထဲကတခု ဖြစ်တယ်လို့ ရိုက်တာသတင်းဌာနက ဖော်ပြပါတယ်။ 
2 years Ago
Up