အင်းတော်မြို့နယ်

July 14, 2022

အင်းတော်မြို့နယ်၌ စစ်ကောင်စီတပ်က ပြည်သူ့ နေအိမ်နှင့် ပစ္စည်းများကို ဖျက်ဆီး

စစ်ကိုင်းတိုင်း၊ အင်းတော်မြို့နယ်၊ အလယ်ဆိပ်ကျးရွာကို  စစ်ကောင်စီတပ်က ဇူလိုင် ၁၃ ရက်မှာ ဝင်ရောက်ပြီး ပြည်သူလူထုတွေရဲ့  နေအိမ်တွေနဲ့ ပိုင်ဆိုင်တဲ့ပစ္စည်းတွေကို ဖျက်ဆီးသွားတယ်လို့ ဒေသခံတွေထံက သိရပါတယ်။

အလယ်ဆိပ်ကျးရွာကို စစ်ကောင်စီတပ်အင်အား ၇၀ လောက်နဲ့ ဝင်ရောက်လာပြီး PDF နဲ့ NLD ပါတီ ထောက်ခံတဲ့နေအိမ်တွေလို့ စွပ်စွဲပြီး  ပြည်သူတွေပိုင်ဆိုင်တဲ့ ဆိုင်ကယ်အပါအဝင် အသုံးအဆောင်ပစ္စည်းတွေကို  ဖျက်ဆီးသွားတာ ဖြစ်ပါတယ်။

ဒေသခံတဦးက “ရွာထဲဝင်လာပြီး ဆိုင်ကယ်တွေ မီးရှို့သွားတယ်။ အသုံးအဆောင်ပစ္စည်းတွေကိုလည်း ရိုက်နှက်ဖျက်ဆီးသွားတယ်။ NLD နဲ့ PDFကို ထောက်ခံလို့ဆိုပြီး ဖျက်ဆီးသွားတာ။ NLD နဲ့ PDF ကိုထောက်ခံတဲ့အိမ်တွေဆိုပြီး ဒလန်က သတင်းပေးလိုက်တာထင်တယ်"လို့ ပြောပါတယ်။

အိမ်ခြေ ၂၀၀ ကျော်ရှိတဲ့ အလယ်ဆိပ်ကျေးရွာကို လာရောက်ဖျက်ဆီးသွားတဲ့ စစ်တပ်ဟာ မဲဇာရဲစခန်းမှာ စခန်းချတဲ့ စစ်ကောင်စီတပ်တွေဖြစ်ပြီး လူနေအိမ် ၁၀၀ လောက်နဲ့ ပျက်စီးဆုံးရှုံးခဲ့ကာ ဆိုင်ကယ် သုံးစီး မီးရှို့ခံခဲ့ရပါတယ်။

စစ်ကောင်စီတပ်တွေ ဝင်ရောက်လာတဲ့အတွက် ဒေသခံရွာသား ၁၀၀၀ လောက်ဟာ ဘေးလွတ်ရာ ထွက်ပြေးတိမ်းရှောင်နေကြရတယ်လို့လည်း အင်းတော်အခြေစိုက် တော်လှန်ရေးတပ်ဖွဲ့  Indaw Revolution(IR)က ထုတ်ပြန်ပါတယ်။

1 month Ago

June 26, 2022

အင်းတော်မြို့နယ်၌ နှစ်ရက်ဆက် တိုက်ပွဲပြင်းထန်

စစ်ကိုင်းတိုင်း အင်းတော်မြို့နယ် မော်တိတ်ဒေသ မံထုံတောင်ကြီးဘက်ကို ဇွန် ၂၃ ရက်နဲ့ ၂၄ ရက် နှစ်ရက်ဆက် စစ်ကြောင်းထိုးလာတဲ့ စစ်ကောင်စီအင်အား ၁၅၀ လောက်ကို ကေအိုင်အေနဲ့ ဒေသကာကွယ်ရေး PDF ပူးပေါင်းတပ်တွေက တိုက်ခိုက်ရာမှ တိုက်ပွဲအပြင်းအထန် ဖြစ်ပွားခဲ့တယ်လို့ ဒေသခံတွေက ပြောပါတယ်။

“စစ်ကောင်စီတပ်သား‌တွေ အကျအဆုံးများတယ်။ ဇွန် ၂၄ ရက်နေ့ မနက်ပိုင်းကလည်း စစ်ကောင်စီတပ်ဖွဲ့ဝင်တွေ မင်းကုန်းရွာထဲဝင်မွှေကာ အိမ်တွေကို ဖျက်ဆီးသွားပြီး ဈေးဆိုင်တွေက ပစ္စည်းတွေ၊ အိမ်ထဲက ပစ္စည်းတွေကို အိတ်တွေနဲ့ ကြုံးထည့်သွားတယ်” လို့ ဒေသခံတဦးက ပြောပါတယ်။

ဇွန် ၂၃ ရက်နေညနေပိုင်းမှာလည်း အင်းတော်မြို့နယ် မော်တိတ်ဒေသ မံထုံ၊ တောင်ကြီးဘက်ကို စစ်ကြောင်းထိုးလာတဲ့ စစ်ကောင်စီတပ်နဲ့ တိုက်ပွဲဖြစ်ပွားခဲ့တယ်လို့  Indaw Revolution-IR အဖွဲ့ တာဝန်ရှိသူတဦးက ဒီဗွီဘီကို ပြောပါတယ်။

“စကစ ဘက်က ၃၀ ထက်မနည်းသေဆုံးနိုင်တယ်။ (စ..) တွေရဲ့ လက်နက်ကြီးကျည်ကြောင့် မိမိတို့ဘက်မှ ရဲဘော် ၂ ဦး ဒဏ်ရာရရှိခဲ့ပေမယ့် မစိုးရိမ်ရပါဘူး။ စစ်ကောင်စီဘက်က ညပိုင်းအချိန် ပတ်ဝန်းကျင်ကို လက်နက်ကြီးနဲ့ ရမ်းထုကာ အလောင်းကောက်ပြီး အနီးနားရွာတွေက ဖိုးသမားတွေကို မြေမြှုပ်သင်္ဂြိုဟ်ခိုင်းတယ်။”

စစ်ကောင်စီတပ်တွေက မင်းကုန်းရွာထဲဝင်မွှေကာ အိမ်ခြေ ၁၆၀ တဲ့အနက် ၁၀၀ ကျော် မီးရှို့ဖျက်ဆီးပြီး ဖုန်းတွေအပါအဝင် ပစ္စည်းတွေ အကုန်ယူသွားတယ်လို့ ရွာခံတွေက ပြောပါတယ်။

မီးရှို့ ဖျက်ဆီးခံရတဲ့ မင်းကုန်းကျေးရွာက ဒေသခံတွေ ဘေးလွတ်ရာထွက်ပြေးနေကြရပြီး အကူအညီတွေ လိုအပ်နေတယ်လို့ သိရပါတယ်။

တိုက်ပွဲအတွင်း တပ်ဖွဲ့ဝင်တွေ ထိခိုက်ကျဆုံးအခြေအနေကို စစ်ကောင်စီက သတင်းထုတ်ပြန်တာမရှိသေးပါဘူး။

2 months Ago
More News
Up