အင်းစိန်ထောင်

December 28, 2021

ကျန်းမာရေးမကောင်းသည့် သရုပ်ဆောင်ရဲတိုက်ကို အင်းစိန်ထောင်တွင်း အမှုဆက်လက်စစ်ဆေး

ကျန်းမာရေးမကောင်းတဲ့ သရုပ်ဆောင်ရဲတိုက်ကို အင်းစိန်ထောင်တွင်းတရားရုံးမှာ ၄ ရက်ဆက်တိုက် အမှုစစ်ဆေးဖို့ စီစဉ်နေပြီး နာမည်ကျော်အနုပညာရှင်အားလုံးကိုလည်း ထောင်ဒဏ်တွေ မြန်မြန်ထောင်ချနိုင်အောင် အမှုစစ်နေတယ်လို့  အကျိုးဆောင် ရှေ့နေတစ်ဦးကပြောပါတယ်။ 

ဦးနှောက်ကျုံ့ဝေဒနာကြောင့် အင်းစိန်ထောင်တွင်းတရားခွင်မှာ မေ့လဲခဲ့တဲ့ သရုပ်ဆောင်ရဲတိုက်ကို ဒီဇင်ဘာ ၂၇ ရက်မှ  ၃၀ ရက်အထိ ၄ ရက်ဆက်တိုက် ရုံးချိန်းခေါ်ပြီး အမှုစစ်နေတယ်လို့ သူ့ရဲ့ရှေ့နေဦးခင်မောင်မြင့်က ပြောပါတယ်။

ရဲတိုက်ကို လသာမြို့မရဲစခန်းကစွဲဆိုထားတဲ့ ရာဇသတ်ကြီး ပုဒ်မ  ၅၀၅(က) အမှုကို အထက်အမိန့်ကြောင့်  တရားသူကြီးနဲ့ ဥပဒေအရာရှိက ဆက်တိုက်စစ်ဆေးနေတာလို့ဆိုပါတယ်။ 

ရှေ့နေဦးခင်မောင်မြင့်က "ဒီနေ့ကတော့ ကိုရဲတိုက်ရဲ့ သက်သေတစ်ယောက်ကို စစ်တယ်။ မနက်ဖြန်ထပ်စစ်မယ်။ ၃၀ ရက်နေ့ ထပ်စစ်မယ်။ ကိုရဲတိုက်  သက်သေတွေစုံအောင် အပြီးဆက်စစ်ပါမယ်။ လသာကဟာကိုပဲ နေ့တိုင်းစစ်နေတာ။ ၂၇၊ ၂၈၊ ၂၉၊ ၃၀ လေးရက် ဆက်တိုက် စစ်နေတယ်။ ကျနော့်မှာ တစ်နေ့ကို ၄၊ ၅၊ ၆ မှု။ သက်သေဆိုလည်း ၄၊ ၅ ယောက်ခေါ်ခိုင်းပြီး အတင်းကို တွန်းစစ်နေတာ။"လို့ ပြောပါတယ်။

ရုပ်ရှင်သရုပ်ဆောင်ရဲတိုက်ဟာ ဒီဇင်ဘာ ၁၅ ရက်က အင်းစိန်ထောင်တွင်းအထူးတရားရုံး တရားခွင်မှာ ဦးနှောက်ကျုံ့တဲ့ဝေဒနာကြောင့် ရုတ်တရက်မေ့လဲခဲ့တာပါ။

တရားခွင်ကို ရောက်လာချိန်မှာ သရုပ်ဆောင်ရဲတိုက်ဟာ ကိုယ်ပူချိန်မြင့်မားပြီး ဖျားနာနေခဲ့တာ ဖြစ်ပါတယ်။ ဒီနေ့ ဒီဇင်ဘာ ၂၈ ရက်နေ့ ရုံးချိန်းမှာတော့ ရဲတိုက်ဟာ ပြန်လည်သက်သာလာပေမဲ့ အင်းစိန်ထောင်ဆေးရုံမှာ တင်ထားရဆဲ ဖြစ်ပါတယ်။ 

သရုပ်ဆောင်ရဲတိုက်လိုပဲ ဖမ်းဆီးခံထားရတဲ့ သရုပ်ဆောင်လူမင်း၊ ပြေတီဦး၊ အိန္ဒြာကျော်ဇင်၊ အဆိုတော်ပိုပို၊ ဆယ်လီ ဝင်းမင်းသန်းတို့ရဲ့ အမှုတွေကိုလည်း အင်းစိန်ထောင်တွင်းတရားရုံးမှာ နေ့စဉ်ဆက်တိုက်စစ်နေတယ်လို့ သိရပါတယ်။ 

မူလက မှုခင်းစီမံခန့်ခွဲရေးအစည်းအဝေး မှတ်တမ်းတွေအတိုင်း မဆောင်ရွက်ဘဲ စစ်ကောင်စီရဲ့ ညွှန်ကြားချက်အသစ်နဲ့ အနုပညာရှင်တွေကို ထောင်မြန်မြန်ချနိုင်အောင် အမှုမြန်မြန်စစ်နေတာလို့ ရှေ့နေဦးခင်မောင်မြင့်က ဝေဖန်ပါတယ်။

“မင်းသားရဲတိုက် ကျန်းမာရေးက လတ်တလောတော့ ကောင်းပါတယ်။ လုံးဝအကောင်းကြီးတော့ မဟုတ်ဘူးပေါ့လေ။ ထောင်ထဲက ဆေးရုံမှာ တင်ထားရတယ်။ အဖျားဘာညာတော့ မရှိတော့ပါဘူး။ လူကတော့ နည်းနည်းချိသွားတာပေါ့။ ပြောရင်တော့ဗျာ။ သွားနေတဲ့လမ်းက မြန်မြန်စစ်ပြီးတော့ မြန်မြန်ထောင်ချချင်တဲ့သဘောမျိုးကို သွားနေတာပဲ။ ဘယ်နေ့မှာ ဘယ်လိုစစ်မယ်ဆိုတာ ကြိုတင်လုပ်ထားတဲ့ အစည်းအဝေးမှတ်တမ်းတော့ ရှိတာပေါ့။ ဒါပေမဲ့ အပေါ်ကနေ ညွှန်ကြားချက်အရဆိုပြီး ဥပဒေအရရှိနဲ့ တရားသူကြီးက စစ်မယ်ဆိုရင် ကျနော်က ငြင်းပိုင်ခွင့်မရှိဘူး။ မသွားပြန်ရင်လည်း ကိုယ့်လူက နစ်နာမယ်။ ကျန်တဲ့အနုပညာရှင်တွေလည်း အတူတူပဲ။ သူတို့လည်း တွန်းစစ်နေတာပဲ။ ကိုလူမင်း၊ ပိုပိုရော ဝင်းမင်းသန်းတို့ရော အခုက တွန်းစစ်နေတာ။ အကုန်လုံးနေ့တိုင်းရုံးချိန်းရှိတယ်။”

သပိတ်တွေမှာ ပါဝင်ခဲ့တဲ့ သရုပ်ဆောင်ပိုင်တံခွန်ကိုတော့ ဒီဇင်ဘာ ၂၇ ရက် အင်းစိန်ထောင်တွင်းအထူးတရားရုံးက အလုပ်ကြမ်းနဲ့ထောင်ဒဏ် ၃ နှစ်ချမှတ်ခဲ့ပါတယ်။ နာမည်ကျော် ပရဟိတသမား စာရေးဆရာမ သန်းမြင့်အောင်ကိုလည်း ဒီဇင်ဘာ ၂၇ ရက်နေ့မှာပဲ အလုပ်ကြမ်းနဲ့ ထောင်ဒဏ် ၃ နှစ် ချမှတ်ခဲ့ပါတယ်။ 

ပိုင်တံခွန်နဲ့ ဆရာမသန်းမြင့်အောင်တို့ကို ထောင်ဒဏ်တွေချမှတ်ရာမှာ ဥပဒေလုပ်ထုံးလုပ်နည်း၊ လုပ်ငန်းစဉ်တွေကို ဘောင်ကျော်ပြီး တရားသူကြီးက အမိန့်ချမှတ်ခဲ့တယ်လို့ ရှေ့နေအသိုင်းအဝိုင်းက ဝေဖန်နေကြပါတယ်။

3 weeks Ago

December 15, 2021

အင်းစိန်ထောင်တွင်း သပိတ်မှောက်ကျောင်းသားများကို သံခြေချင်းခတ်ပြီး ထောင်မကြီးဘက် ပြောင်းရွှေ့ထား

ဒီဇင်ဘာ ၁၀ ရက်နေ့က  အင်းစိန်ထောင်တွင်းသပိတ်ကို စစ်ကောင်စီက အကြမ်းဖက်ဖြိုခွင်းပြီး တိုက်ပိတ် ရိုက်တာနှက်တာတွေ ရှိခဲ့ပေမဲ့ အသေးစိတ်အခြေအနေတွေကို မသိရသေးဘူးလို့ အင်းစိန်ထောင်နဲ့ နီးစပ်တဲ့ နိုင်ငံရေးအမှုလိုက် ရှေ့နေတစ်ယောက်က ပြောပါတယ်။

နိုင်ငံတကာလူ့အခွင့်အရေးနေ့ ဒီဇင်ဘာ ၁၀ ရက်နေ့မှာ တနိုင်ငံလုံး ငြိမ်သက်သပိတ်မှာ အင်းစိန်ထောင်တွင်းက နိုင်ငံရေးလှုပ်ရှားသူတွေလည်း ပါဝင်ခဲ့တာကြောင့် စစ်ကောင်စီက အကြမ်းဖက်ဖြိုခွင်းတာ၊ တိုက်ပိတ် ရိုက်နှက်တာတွေ ရှိခဲ့တယ်လို့ ရှေ့နေတစ်ယောက်က ပြောပါတယ်။ 

အင်းစိန်ထောင် အသံတိတ်သပိတ်မှာပါဝင်ခဲ့တဲ့ ဗကသများအဖွဲ့ချုပ်ဒုဥက္ကဋ္ဌ ကိုဝေယံဖြိုးမိုး၊ ရန်ကုန်ပညာရေးတက္ကသိုလ်ကျောင်းသားများသမဂ္ဂဒုဥက္ကဋ္ဌ  ကိုဇော်ထက်နိုင်(ခ)ဆစ်နိုင်၊ ရန်ကုန်တက္ကသိုလ်ကျောင်းသားများသမဂ္ဂမှဗဟိုအလုပ်အမှုဆောင် ကိုလေပြေစိုးမိုးတို့အပါအဝင် ၈၉ ဦးကို တိုက််ပိတ်ထားပြီး  ကိုလေပြေစိုးမိုးဟာ ကျောမှာ အရိုက်ခံရတဲ့ ဒဏ်ရာရထားပြီး ကိုဆစ်နိုင်မှာလည်း  မူးလဲတဲ့အထိရိုက်ခံထားရတယ်လို့ သတင်းတွေထွက်ပေါ်နေပါတယ်။

သပိတ်မှာပါဝင်ခဲ့သူတွေကို ထောင်မကြီးဘက်ပြောင်းပြီး ခြေကျင်းခတ် တိုက်ပိတ်ထားတယ်လို့ သတင်းကြားရပေမယ့် အတိအကျအခြေအနေကိုတော့ ဒီဇင်ဘာ ၁၄ ရက် အထိ မသိရသေးဘူးလို့ ဆိုပါတယ်။

နိုင်ငံရေးရှေ့နေတစ်ဦးက “ဖြစ်စဉ်ဖြစ်တာက ဒီဇင်ဘာ ၁၀ ရက်နေ့ ကျနော်တို့က  ဒီဇင်ဘာ ၁၄ ရက်နေ့မှ အထူးတရားရုံးကိုသွားတာ။ အကြမ်းဖျင်းက ဒီဇင်ဘာ ၁၀ ရက်နေ့က သီးသန့်ထောင် အိပ်ဆောင် ၁ နဲ့ ၂က အကျဉ်းသား ၉၀ လောက်က အသံတိတ်သပိတ်လုပ်ကြတယ်လို့ ပြောတယ်။ တချို့က အစာငတ်ခံဆန္ဒပြတယ်လို့ ပြောတယ်။ အဲ့ဒါကို အကျဉ်းထောင်ဘက်က ရိုက်နှက်ပြီးတော့ အကြမ်းဖက်ဖြိုခွဲတယ်လို့ ကြားတယ်။ ပါဝင်တဲ့သူတွေကိုလည်း ခြေချင်းခတ်၊ ဒေါက်ခတ်ပြီးတော့မှ ထောင်မကြီးဘက်ကို ပြောင်းရွှေ့ပြီး တိုက်တွေထဲပါ ထည့်ထားတယ်လို့ လို့ အကြမ်းဖျင်းသိပါတယ်။”

ဇွန်လမတိုင်ခင်တုန်းက ဖမ်းဆီးသူတွေကို ပုဒ်မ ၅၀၅(က)နဲ့ပဲ တရားစွဲခဲ့ပေမယ့် ဇွန်လ ၃၀ ရက် နောက်ပိုင်းမှာတော့ PDF တွေနဲ့ဆက်သွယ်တယ်ဆိုပြီး ပေါက်ကွဲစေတတ်သောပစ္စည်းများဥပဒေ ဖောက်ခွဲ(၃)၊ ဖောက်ခွဲ (၅)တို့နဲ့ပါ စစ်ကောင်စီက ပူးတွဲတရားစွဲခဲ့ပါတယ်။

NUG၊ CRPH တို့နဲ့ ဆက်သွယ်တယ်လို့ ယူဆရသူတွေကိုတော့ အကြမ်းဖက်မှုတိုက်ဖျက်ရေးဥပဒေ ၅(က)၊ ၅(ည)၊ ၅၂(က) တို့နဲ့ပါ စစ်ကောင်စီက တရားစွဲဆိုခဲ့ပါတယ်။

အင်းစိန်ထောင်ထဲမှာ အာဏာသိမ်းပြီးနောက်ပိုင်းကနေ လက်ရှိအချိန်အထိ ဖမ်ဆီးတရားစွဲခံထားရသူ စုစုပေါင်း ၃၅၀၀ ကျော် ၄၀၀၀ နီးပါးရှိနိုင်တယ်လို့ ရှေ့နေတစ်ဦးက ခန့်မှန်းပါတယ်။

နိုင်ငံရေးအမှုလိုက် ရှေ့နေတယောက်က “ဆိုလိုတာက ၅၀၅(က) သည် အမြင့်ဆုံးပြစ်ဒဏ် ၃နှစ်ပဲ ပေးနိုင်တယ်။ ဒီနောက်ပိုင်းမှာ ၅၀၅(က)နဲ့ အစွဲခံရသူတွေကို အနည်းဆုံးပြစ်ဒဏ် ၇ နှစ်ကနေ အများဆုံးပြစ်ဒဏ် သေဒဏ်အထိချနိုင်တဲ့ ပြစ်မှုမျိုးတွေနဲ့ ပူးတွဲပြီး တရားစွဲလာတာကတော့ ထူးခြားချက်လို့ပြောလို့ရပါတယ်”လို့ ပြောပါတယ်။

ဇွန်လ ၃၀ ရက်နေ့မှာ အင်းစိန်ထောင်ထဲက ၅၀၅(က)နဲ့ အစွဲခံထားရသူ ၇၀၀ ကျော်ကို စစ်ကောင်စီက ပြန်လွှတ်ပေးခဲ့ပေမယ့်  အဖမ်းခံရသူ ၃၀၀၀ နီးပါး ကျန်နေခဲ့ပါတယ်။ 

ဇူလိုင် ၂၃ ရက် မနက်ကလည်း  အင်းစိန်ထောင်အတွင်းက နိုင်ငံရေးသမားတွေကိုထားတဲ့ သီးသန့်ထောင်မှာ နိုင်ငံရေးကြွေးကြော်သံတွေနဲ့ ဆန္ဒထုတ်ဖော်မှုဖြစ်ခဲ့ပါတယ်။

အဲဒီဖြစ်စဉ်မှာ စစ်ကောင်စီက အကြမ်းဖက်ဖြိုခွဲတာကြောင့် သေဆုံးဒဏ်ရာရသူတွေရှိခဲ့တယ်လို့ သတင်းတွေထွက်ပေါ်ခဲ့ပေမယ့် စစ်ကောင်စီက သတင်းအမှောင်ချခဲ့တာကြောင့် အတည်မပြုနိုင်ခဲ့ပါဘူး။

အာဏာသိမ်းပြီးနောက်ပိုင်းကနေ လက်ရှိအချိန်အထိ စစ်ကောင်စီက အင်းစိန်ထောင်တွင်းမှာ အထူးတရားရုံး ၃၈ ရုံး၊ စစ်ခုံရုံး ၆ ရုံး ဖွင့်လှစ်ခဲ့ပြီး ၅၀၅(က) နဲ့ အဖမ်းခံရသူတွေကို စစ်ဆေးခဲ့ပါတယ်။

အင်းစိန်ထောင်အပါအဝင် မြန်မာနိုင်ငံက ဗဟိုအကျဉ်းထောင်ကြီးတွေဟာ အကျဉ်းသား၊ အချုပ်သား ကျား၊ မ စုစုပေါင်း ၅၀၀၀ အထိပဲထားဖို့ အဆောက်အအုံတွေ တည်ဆောက်ထားတာ ဖြစ်ပေမဲ့ ပုဒ်မ ၅၀၅(က)နဲ့ အဖမ်းခံရသူတွေ ထပ်ရောက်လာတဲ့အတွက် အကျဉ်းထောင်မှာ  အကျဉ်းသား ၁၂၀၀၀ ဝန်းကျင်အထိ ထိန်းသိမ်းနေရပါတယ်။

1 month Ago
More News
Up