အင်အားအလုံးအရင်း

July 1, 2021

ငါန်းဇွန် NLD ရပ်ကျေး ဥက္ကဋ္ဌနှင့်အုပ်ချုပ်ရေးမှူးတို့ကို အင်အားအလုံးအရင်းဖြင့် လာဖမ်း

မန္တလေးတိုင်း ငါန်းဇွန်မြို့နယ် မင်းဂြိုဟ်စံပြရွာက NLD ပါတီ ရပ်ကျေး ဥက္ကဋ္ဌ နဲ့ အုပ်ချုပ်ရေးမှူးတို့ကို ဇွန် ၃၀ ရက် ည ၈ နာရီကျော်က အာဏာသိမ်းစစ်ကောင်စီရဲ့ အကြမ်းဖက်လက်နက်ကိုင်တွေ အင်အားအလုံးအရင်းနဲ့ လာရောက်ဖမ်းဆီးခဲ့တယ်လို့ သိရပါတယ်။

ဒီလိုလာရောက်ဖမ်းဆီးပေမယ့် နှစ်ဦးလုံး ရှောင်တိမ်းနေတဲ့အတွက် မဖမ်းမိတာကြောင့် NLD ပါတီ ရပ်ကျေး ဥက္ကဋ္ဌရဲ့ ယောက်ဖဖြစ်သူကို ဖမ်းသွားတယ်လို့ သိရပါတယ်။

ဒေသခံတစ်ဦးက “NLD ရပ်ကျေး ပါတီ ဥက္ကဋ္ဌ နဲ့ ရပ်ရွာအုပ်ချုပ်ရေးမှူးကို လာဖမ်းတာ၊ NLD ရပ်ကျေးပါတီ ဥက္ကဋ္ဌ ဆို နေမကောင်းဖြစ်နေတာ ကျန်းမာရေးချူခြာနေတာကြပြီ။ အဲဒါကိုလာဖမ်းကြတယ်။ ရပ်ကျေးအုပ်ချုပ်ရေးမှူးဟောင်းက အမျိုးသမီး။ အိမ်တွေကို လာဝိုင်းတယ်။ သေနတ် ဖောက်တယ်။” လို့ ပြောပါတယ်။

သေနတ်ဖောက်သံကြားတဲ့အတွက် နေအိမ်မိသားစုဝင်တချို့လည်း ထွက်ပြေးတိမ်းရှောင်ကြပြီး ရပ်ကျေးအုပ်ချုပ်ရေးမှူးဟောင်း အမျိုးသမီးရဲ့ ယောကျ်ားကို နားထင် သေနတ်နဲ့ထောက်ကာ စစ်ဆေးမေးမြန်းတာတွေ လုပ်တယ်လို့ သိရပါတယ်။

ဒါ့အပြင် ဒီကနေ့ ဇူလိုင် ၁ ရက်နေ့မှာလည်း အာဏာသိမ်းစစ်ကောင်စီရဲ့ အကြမ်းဖက်လက်နက်ကိုင်တွေ အင်အားအလုံးအရင်းနဲ့ လာရောက်ပြီး သေနတ်ပစ်ဖောက်တာတွေ လုပ်ခဲ့ကြပါတယ်။

5 months Ago

May 3, 2021

မန္တလေးတပ်ပေါင်းစု သပိတ်စစ်ကြောင်း အင်အားအလုံးအရင်းဖြင့် ချီတက်ဆန္ဒပြ

မနေ့က အကြမ်းဖက်စစ်အုပ်စုရဲ့ ဖြိုခွင်းဖမ်းဆီးတာတွေခံရတဲ့ စစ်အာဏာရှင်စနစ်တိုက်ဖျက်ရေး အထွေထွေသပိတ်တပ်ပေါင်းစု သပိတ်စစ်ကြောင်းဟာ ဒီကနေ့ မေ ၃ ရက်နေ့ မနက်ပိုင်းမှာ စစ်အာဏာရှင်စနစ်ပြုတ်ကျရေးအတွက် မန္တလေးမြို့ က လမ်းတွေပေါ် အင်အားအလုံးအရင်းနဲ့ ချီတက်ဆန္ဒပြခဲ့ကြပါတယ်။

စစ်ကြောင်းမှာ အခြေခံပညာ ပညာရေးဝန်ထမ်းတွေ၊ အထွေထွေသပိတ်ကော်မတီ (BEGSC) ရဲ့ အလံတော်အသစ်နဲ့အတူ ပညာရေးမိသားစုသပိတ်စစ်ကြောင်းအပါဝင်၊ ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ်၊ ဒေါင်းစစ်သည်သပိတ်စစ်ကြောင်း၊ တမ္ပဝတီလူထုသပိတ်စစ်ကြောင်း၊ ဘုရားကြီး ငြိမ်းချမ်းရေးသပိတ်စစ်ကြောင်း၊ အောင်မြေသာစံမြို့နယ် အခြေခံပညာကျောင်းသားများ သမဂ္ဂ (ဗ.က.သများအဖွဲ့ချုပ်)၊ အမပူရမြို့နယ်သမဂ္ဂ(ဗ.က.သများအဖွဲ့ချုပ်)၊ အထက-၇ (မန်း)ကျောင်းသား/သူဟောင်းများသပိတ်စစ်ကြောင်း၊ စိန်ပန်းသပိတ်စစ်ကြောင်း တို့ ပူးပေါင်းပါဝင်ခဲ့ပါတယ်။

ချီတက်ရာမှာလည်း စစ်အာဏာရှင်အမြစ်ဖျက်ချေမှုန်းရေး၊ စစ်ကျွန်ပညာရေး စနစ်ဆန့်ကျင်ရေး၊ ဖက်ဒရယ်ဒီမိုကရေစီရရှိရေး၊ ဖက်ဒရယ်ပညာရေးစနစ်ပေါ်ပေါက်ရေး စတဲ့ ကြွေးကြော်သံတွေနဲ့ ငြိမ်းချမ်းစွာ ဆန္ဒပြခဲ့ကြတာပါ။

စစ်အာဏာရှင်စနစ်တိုက်ဖျက်ရေး အထွေထွေသပိတ်တပ်ပေါင်းစု သပိတ်စစ်ကြောင်းဟာ ပြီးခဲ့တဲ့ရက် မေလ ၂ ရက်နေ့က စတင်ချီတက်နေတဲ့အချိန်မှာပဲ အာဏာသိမ်းစစ်ကောင်စီရဲ့အကြမ်းဖက်လက်နက်ကိုင်အဖွဲ့တွေ ရောက်လာပြီး ကားနဲ့ တိုက်ကာ ဖြိုခွင်းခံခဲ့ရပါတယ်။ ဆန္ဒပြသူ ၅ ဦး ဖမ်းဆီး ထိမ်းသိမ်းခံလိုက်ရပြီး ဒဏ်ရာရသူတွေလည်း ရှိတယ်လို့ သိရပါတယ်။

7 months Ago
Up