အင်အားဖြည့်

September 17, 2021

မုံးကိုးနှင့်ပန်ဆိုင်းတွင် စစ်ကောင်စီတပ်များ အင်အားဖြည့်၊ တိုက်ပွဲဖြစ်မည်ကို ဒေသခံများစိုးရိမ်

မြန်မာ-တရုတ်နယ်စပ် ကြူကုတ်(ပန်ဆိုင်း)မြို့နဲ့ မုံးကိုးဘက်ကို စစ်ကောင်စီတပ်တွေ စက်တင်ဘာ ၁၆ ရက်ညနေပိုင်းမှာ အင်အားဖြည့်တင်းလာနေတာကြောင့် တိုက်ပွဲပြင်းထန်လာမှာကို ပြည်သူတွေ စိုးရိမ်နေကြတယ်လို့ သိရပါတယ်။

 ဒေသခံတဦးက “ကြူကုတ် (ပန်ဆိုင်း) ဘောလုံးကွင်းမှာ စစ်ကားတွေ နားနေကြတယ်။ တင့်ကားတော့ စစ်တပ်ထဲမှာ။ စစ်ကားအစီး ၃၀ ကျော်။ ခု နောက်ထပ် Vego နဲ့ ၆ စီး။ Vego ထဲက စစ်သားတွေက အရက် အရမ်းမူးနေကြတယ်” လို့  ပြောပါတယ်။  

စစ်ကြောင်းမရောက်ခင် စက်တင်ဘာ ၁၆ ရက် မနက် ၁၀ နာရီလောက်ကတည်းက ကြူကုတ် (ပန်ဆိုင်း) မြို့ဘက်လျှပ်စစ်မီးတွေ ဖြတ်တောက်ထားတယ်လို့ ဒေသခံက ပြောပါတယ်။

ကြူကုတ် (ပန်ဆိုင်း) မြို့ကနေ စစ်ကောက်စီတပ်တွေ ထွက်လာတာနဲ့ တိုက်ပွဲ ပြင်းထန်လာနိုင်ကြောင်း၊ စစ်ကောင်စီတပ်နဲ့ ကိုးကန့် MNDAA တို့ နှစ်ဘက် တိုက်ပွဲပြင်းထန်လာမှာကို စိုးရိမ်နေကြတယ်လို့ ကြူကုတ် (ပန်ဆိုင်း) အနီးကရွာမှာ နေထိုင်သူတဦးက ပြောပါတယ်။

မျက်မြင်တွေ့သူ နမ့်တောင်းဒေသခံက “စစ်ကား ၂၀ ကျော်၊ ခြေကျင် ၂၀၀ ကျော် နဲ့ တင့်ကား နှစ်စီးပါတယ်။ ညနေ ၄ နာရီက စဖြတ်လာတယ်။ တစ်သုတ်ပြီး တစ်သုတ် မိုးမချုပ်မီ သွားလိုက်ကြတယ်” လို့  ပြောပါတယ်။

စက်တင်ဘာလ ၁၆ ရက်က စစ်ကြောင်းမှာတော့ စစ်ကောင်စီတပ်ဖွဲ့ဝင် ၁၀၀ ကျော်လောက်နဲ့အတူ ဒေသခံ တာမိုးညဲပြည်သူ့စစ်၊ မြို့မပြည်သူ့စစ်၊ ပန်ဆေးပြည်သူ့စစ်၊ ကျင်းစန်းကျော့ပြည်သူ့စစ်အဖွဲ့တွေ ပါကြောင်းလည်း သိရပါတယ်။

မူဆယ် ဒေသခံတဦးက  “မနေ့ည ၁၀၅ မိုင်မှာ လာနားတဲ့သူတွေ မူဆယ် ဗိုလ်တဲကုန်းနဲ့ စုပေါင်းရုံးဘက် လာနားပြီး ဒီညနေ ၃ နာရီခွဲလောက်က ၁၀၅ မိုင်ဘက် ချက်ချင်း ပြန်လှည့်သွားပြီ။ တင့်ကား နှစ်စီးပါတယ်။ မနေ့က ၁၀၅ မိုင်မှာ ဝင်တဲ့ စစ်ကားက ၄၄ စီး” လို့ ပြောပါတယ်။ 

မုံးကိုးအနီးက နော့ဂူရွာမှာလည်း အင်အား ၅၀ လောက် ရွာထဲမှာ စခန်းချနေတာကြောင့် တိုက်ပွ်ဖြစ်လာမှာစိုးရိမ်ပြီး တိမ်းရှောင်ဖို့ပြင်ဆင်နေတဲ့ ရွာခံတွေအား တိမ်းရှောင်တဲ့လူတွေကို ပစ်မယ်ဆိုပြီး ခြိမ်းခြောက်နေတယ်လို့ အမည်မဖော်လိုသူ ဒေသခံတစ်ဦးက ပြောပါတယ်။ 

၁၀၅ မိုင် အကျော်နားက နမ့်ဟွယ်ရွာမှာလည်း စစ်ကောင်စီတပ်ဖွဲ့က နေအိမ်တချို့ကို မွှေနှောက်စစ်ဆေးသွားတယ်လို့ ဒေသခံတစ်ဦးက ပြောပါတယ်။  

ဇူလိုင် ၃ ရက်ကနေ စက်တင်ဘာ လဆန်းပိုင်းအထိ ကြူကုတ် (ပန်ဆိုင်း) နဲ့ မုံးကိုး၊ ဖောင်းဆိုင်တို့ဘက်မှာ စစ်ကောင်စီနဲ့ MNDAA တို့အကြား တိုက်ပွဲ ပြင်းထန်ခဲ့ပြီး စစ်ကောင်စီ ဘက်က အကျအဆုံးများတယ်လို့ ဒေသခံတွေက ပြောပါတယ်။

တိုက်ပွဲကြောင့် လက်နက်ကြီး ကျည်ထိမှန် သေဆုံးတဲ့ အရပ်သား ပြည်သူ ၆ ဦးရှိပြီး ဒေသခံပြည်သူ ၂၀၀၀ ကျော် ထွက်ပြေးတိမ်းရှောင်နေကြရတယ်လို့ ဆိုပါတယ်။

3 months Ago

August 23, 2021

ကေအန်ယူ တပ်မဟာ ၂ နယ်မြေအတွင်းကို စစ်ကောင်စီတပ် အင်အားဖြည့်ဝင်ရောက်လာ

ကရင်ပြည်နယ်၊ ဘောကလိမြို့ ကေအန်ယူ တပ်မဟာ ၂ ထိန်းချုပ်နယ်မြေအတွင်းကို စစ်ကောင်စီရဲ့တပ်တွေ လူအင်အား​​ဖြည့်တင်းပြီး ဝင်ရောက်လာတယ်လို့ ကေအန်ယူက ဒီနေ့ သတင်းထုတ်ပြန်ထားပါတယ်။

ဒီကနေ့ မနက် ၉ နာရီလောက်က  တောင်ငူကနေ သံတောင်မြို့မှတဆင့် ဘောကလိမြို့ တပ်မဟာ ၂ ထိန်းချုပ်နယ်မြေအတွင်းကို စစ်ကောင်စီရဲ့ ကားကြီး ၂၄ စီး၊ ကားငယ် ၂ စီးနဲ့အတူ လူအင်အား၊ လက်နက်ခဲယမ်းအပြည့်နဲ့ အင်းအားဖြည့်တင်းပြီး ဝင်ရောက်လာတယ်လို့ ဒေသခံတွေက ဆိုပါတယ်။

ဇူလိုင်လက စတင်ပြီး ကေအန်အယ်လ်အေ တပ်မဟာ ၂ နဲ့ စစ်ကောင်စီရဲ့ တပ်တွေ တိုက်ပွဲဖြစ်ပွားပြီးနောက်ပိုင်း စစ်ကောင်စီဘက်က လူအင်အား လက်နက်ခဲယမ်း ပိုမိုဖြည့်တင်းလာပြီး စစ်ရေးပိုမိုလှုပ်ရှားလာတာပါ။

ဒါအပြင် ဂျက်တိုက်လေယာဉ်တွေနဲ့ ကေအန်အယ်လ်အေ တပ်ရင်း ၅၊ တပ်ရင်း ၆ နယ်မြေတွေမှာ နေ့စဉ်ပျံသန်းတာတွေ ပြုလုပ်လာတယ်လို့ ကေအန်ဒီအို တပ်ရင်း ၄ ရုံးထိုင်မှူးက အတည်ပြုပြောဆိုပါတယ်။

စစ်ကောင်စီဘက်က အင်အားပိုမိုဖြည့်တင်းပြီး နယ်မြေတိုးချဲ့လှုပ်ရှားလာတဲ့အပေါ် တိုက်ပွဲတွေပို မိုဖြစ်ပွားလာမှာကို ဒေသခံတွေက စိုးရိမ်နေကြပါတယ်။

စစ်ကောင်စီရဲ့ တပ်တွေဟာ တပ်မဟာ ၅ လက်အောက်ခံ ဂယ်ကော်တပ်ရင်း နယ်မြေကို စစ်အင်အားတိုးချဲ့ ချီတက်ရာမှာ တောင်ငူဘောဂလိလမ်းကို အသုံးပြုခဲ့တယ်လို့ ကေအန်ယူက သတင်းထုတ်ပြန်ထားပါတယ်။

သြဂုတ်လဆန်းပိုင်းက ဖာပွန်ခရိုင် တပ်မဟာ ၅ နယ်မြေကို ဘားအံမြို့နယ် ဝါးဘိုးတောလမ်းဆုံကနေ ကမမောင်းလမ်းအတိုင်း လူအင်အား လက်နက်အင်အားဖြည့်တင်းပြီး ကား ၁၀စီ းနီးပါးနဲ့ ဝင်ရောက်ခဲ့တယ်လို့ ဒေသခံတွေက ဆိုပါတယ်။

4 months Ago
Up