အဂတိလိုက်စားမှု

February 12, 2021

အဂတိလိုက်စားမှုဖြင့် အင်းစိန် BPI ဆေးဝါးစက်ရုံမှူးကို စွဲထားသည့်အမှု ရုပ်သိမ်းလွှာတင်

အဂတိလိုက်စားမှုတိုက်ဖျက်ရေးဥပဒေနဲ့ တရားစွဲဆိုခံထားရတဲ့ အင်းစိန်BPI ဆေးဝါးစက်ရုံမှူး ဒေါက်တာအောင်ဇော်ရဲ့ အမှုကို တရားလိုဘက်က အမှုရုပ်သိမ်းလွှာတင်သွင်းလိုက်ပါတယ်။

အဂတိလိုက်စားမှုတိုက်ဖျက်ရေးကော်မရှင် တာဝန်ရှိသူ  ဦးမိုးနိုင်က တရားလိုပြုလုပ်တရားစွဲဆိုထားတဲ့ အင်းစိန် BPI ဆေးဝါးစက်ရုံမှူး ဒေါက်တာအောင်ဇော်အမှုကို ဖေဖော်ဝါရီ ၁၁ ရက်နေ့က တိုင်းတရားရုံးမှာ အမှုရုပ်သိမ်းလွှာတင်သွင်းခဲ့တာပါ။

လတ်တလောအမှုတွဲက နေပြည်တော်ကိုရောက်ရှိနေတဲ့အတွက် ဒေါက်တာအောင်ဇော်ကို ချက်ချင်းလွှတ်မပေးနိုင်သေးဘဲ အမှုတွဲပြန်လည်ရောက်ရှိလာမယ့် နောက်အပတ်ရုံးချိန်း ဖေဖော်ဝါရီ ၂၃ ရက်နေ့မှသာ လွှတ်ပေးနိုင်မှာဖြစ်တယ်လို့ ဒေါက်တာအောင်ဇော်ဘက်က လိုက်ပါဆောင်ရွက်ပေးနေတဲ့ တရားလွှတ်တော်ရှေ့နေ ဦးထင်ဇော်လတ်က ပြောပါတယ်။

အင်းစိန် BPI ဆေးဝါးစက်ရုံမှူး ဒေါက်တာအောင်ဇော်ကို အဂတိတိုက်ဖျက်ရေးကော်မရှင်က သတ်မှတ်ချက်နဲ့မညီတဲ့ ကော်စေ့ ၂၆ တန် သွေးကြောသွင်းဆေးရည်ဘူး တစ်သိန်းကျော်တင်သွင်းရာမှာ လုပ်ထုံးလုပ်နည်းနဲ့မညီဘဲ အဂတိလိုက်စားကြောင်း စစ်ဆေးပေါ်ပေါက်ခဲ့တဲ့ အတွက် အဂတိလိုက်စားမှုဥပဒေ ပုဒ်မ ၅၆ နဲ့ စက်တင်ဘာ ၆ ရက်နေ့က စတင် တရားစွဲဆိုထားတာပါ။

4 months Ago

January 11, 2021

လေကြောင်းပို့ဆောင်ရေးဌာန အထွေထွေမန်နေဂျာကို အဂတိလိုက်စားမှုဖြင့် အရေးယူ

အမေရိကန်ဒေါ်လာ ၇၂၀၀၀ ကျော်လာဘ်ငွေ ရယူခဲ့တယ်ဆိုပြီး လေကြောင်းပို့ဆောင်ရေး ညွှန်ကြားမှုဦးစီးဌာနမှ အထွေထွေမန်နေဂျာ ဦးစိုးပိုင်ကို အဂတိလိုက်စားမှုတိုက်ဖျက်ရေးဥပဒေနဲ့ အမှုဖွင့်လှစ် အရေးယူထားကြောင်း အဂတိလိုက်စားမှုတိုက်ဖျက်ရေးကော်မရှင်က   ဇန်နဝါရီ ၁၁ ရက်မှာ ထုတ်ပြန်ပါတယ်။

လေကြောင်းပို့ဆောင်ရေးညွှန်ကြားမှု ဦးစီးဌာနမှာ ဌာနဆိုင်ရာ အကြီးအကဲရာထူးနဲ့ လုပ်ပိုင်ခွင့်အာဏာကို အသုံးချပြီး ကိုယ်ကျိုးစီးပွားရှာ မမှန်မကန် ဆောင်ရွက်နေတာကို အရေးယူပေးဖို့  တိုင်ကြားချက်အရ ကော်မရှင်က စုံစမ်းစစ်ဆေးရေးအဖွဲ့ ဖွဲ့စည်း စစ်ဆေးအရေး ယူခဲ့တာလို့ ဆိုပါတယ်။

အထွေထွေမန်နေဂျာ ဦးစိုးပိုင်ဟာ တာဝန်ထမ်းဆောင်စဉ် ကိုယ်ပိုင်စီးပွားရေးအသွင် ဆောင်ရွက်ကာ ပြည်ပ Agent (operator)တွေထံနေ လေကြောင်းဖြတ်ကျော် ပျံသန်းခွင့်ပါမစ် အမြန်ရရှိအောင် ဆောင်ရွက်ခအနေနဲ့ permit နံပါတ်တစ်ခုကို USD 100, USD 60, USD 40 စသဖြင့် ပေးဖို့ ဦးစိုးပိုင် အမည်နဲ့ ဖွင့်ထားတဲ့ email ကို အသုံးပြု၍ အကြောင်းကြားခဲ့တာ စစ်ဆေးတွေ့ရှိတယ်လို့ဆိုပါတယ်။

 ပြည်ပ Agent (operator) ၁၂ ခု တို့က အလီလီ ပေးပို့တဲ့ အမြန်ဆောင်ရွက်ခ အပါအဝင် အမေရိကန် ဒေါ်လာ ၇၂၀၆၆ ကို ဦးစိုးပိုင် အမည်နဲ့ ဖွင့်လှစ်ထားတဲ့ ပြည်ပနိုင်ငံရှိ Bank အကောင့်သို့ ပေးသွင်းစေခဲ့ခြင်း၊ ငွေကြေးတွေ လက်ခံရယူခဲ့ခြင်းတို့ ဆောင်ရွက်ခဲ့တာ စစ်ဆေးပေါ်ပေါက်ခဲ့တယ်လို့လည်း ဆိုပါတယ်။

ဒါ့ကြောင့် ဦးစိုးပိုင် အပေါ် အဂတိ လိုက်စားမှု တိုက်ဖျက်ရေးဥပဒေ ပုဒ်မ ၅၆ အရ ရန်ကုန်တိုင်း၊ မင်္ဂလာဒုံ မြို့မရဲစခန်းမှာ ဇန်နဝါရီ ၁၁ ရက်က  ပထမသတင်းပေး တိုင်ကြားချက် ဖွင့်လှစ် တရားစွဲဆို အရေးယူနိုင်ရေး ဆောင်ရွက်နေတယ်လို့ ကော်မရှင် ထုတ်ပြန်ချက်အရ သိရပါတယ်။

5 months Ago
More News
Up