အဂတိလိုက်စားမှု

June 21, 2019

တွံတေးအုပ်ချုပ်ရေးမှူးကို အဂတိလိုက်စားမှုတိုက်ဖျက်ရေးဥပဒေဖြင့် အမှုဖွင့်လှစ်

ရန်ကုန်တိုင်း၊ တွံတေးမြို့နယ်အုပ်ချုပ်ရေးမှူး ဦးမိုးခိုင်ထွန်းကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၆ နဲ့ အမှုဖွင့်လှစ် အရေးယူထားတယ်လို့ ကော်မရှင်က ဒီနေ့ ထုတ်ပြန်ပါတယ်။ တွံတေးမြို့နယ်၊ ခလောက်ချိုက်ကွင်း ကျေးရွာအုပ်စု၊ ကွင်းအမှတ် ၁၅၂၊ ခလောက်ချိုက်ကွင်း၊ ဦးပိုင် (၈/က) ဧရိယာ ၂၀.၈၂ ဧကကို မြေပိုင်ဆိုင်မှု အငြင်းပွားခဲ့တာနဲ့ ပတ်သက်ပြီး မြို့နယ်အုပ်ချုပ်ရေးမှူး ဖွဲ့စည်းတဲ့ စစ်ဆေးရေးအဖွဲ့နဲ့ စစ်ဆေးခဲ့ရာမှာ စစ်ဆေးရေးအဖွဲ့ရဲ့ ရေးသားချက်တွေ အမှန်ဖြစ်စေရေးအတွက် ငွေကျပ် သိန်း ၁၂၀  ပေးခဲ့ရခြင်းနဲ့ မြို့နယ်အုပ်ချုပ်ရေးမှူးနဲ့အဖွဲ့ဟာ မှန်မှန်ကန်ကန် ဆောင်ရွက်ပေးခဲ့ခြင်း မရှိတဲ့အပြင် အသက်အန္တရာယ်ရှိကြောင်း ခြိမ်းခြောက်ပြောဆိုခြင်းအား အရေးယူပေးဖို့ ကော်မရှင်ကို နစ်နာသူက တိုင်ကြားခဲ့တာပါ။ တိုင်ကြားစာအရ အဂတိလိုက်စားမှုတိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ရာ တွံတေးမြို့နယ်အုပ်ချုပ်ရေးမှူး ဦးမိုးခိုင်ထွန်းဟာ နစ်နာသူထံမှ ၁၅-၅-၂၀၁၈ ရက်နေ့မှာ တိုင်ကြားစာရေးသားပေးဖို့ ငွေကျပ် ၅ သိန်းနဲ့ တင်ပြလိုတဲ့ သက်သေထွက်ဆိုချက်တွေကို စစ်ဆေးရေးအစီရင်ခံစာမှာ ထပ်မံထည့်သွင်းပေးဖို့အတွက် ၂၅-၆-၂၀၁၈ ရက်နေ့မှာ ငွေကျပ် သိန်း ၁၂၀ တို့ကို တောင်းခံရယူခဲ့ကြောင်း စစ်ဆေးပေါ်ပေါက်တယ်လို့ ဆိုပါတယ်။ တွံတေးမြို့နယ် အုပ်ချုပ်ရေးမှူး (ပ/၅၃၈၃) ဦးမိုးခိုင်ထွန်းကို အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၆ အရ တွံတေးမြို့မရဲစခန်းမှာ ဇွန် ၂၁ ရက်နေ့မှာ ပထမသတင်းပေး တိုင်ကြားချက်ဖွင့်လှစ်ပြီး တရားစွဲဆို အရေးယူနိုင်ရေး ဆောင်ရွက်နေတယ်လို့ အဂတိလိုက်စားမှုတိုက်ဖျက်ရေးကော်မရှင်က သတင်းထုတ်ပြန်ထားပါတယ်။
2 years Ago

အဂတိလိုက်စားမှုတိုက်ဖျက်ရေးအဖွဲ့ အမည်ခံရုံးခန်းဖွင့်လှစ်မှု ကော်မရှင်နှင့်မသက်ဆိုင်ဟု ထုတ်ပြန်

မြို့နယ်တချို့မှာ အဂတိလိုက်စားမှုတိုက်ဖျက်ရေးအဖွဲ့ အမည်ခံ ရုံးခန်းဖွင့်လှစ်တာတွေဟာ ကော်မရှင်နဲ့ သက်ဆိုင်မှု မရှိသလို အဂတိလိုက်စားမှုတိုက်ဖျက်ရေးဥပဒေနဲ့လည်း အကျုံးဝင်မှု မရှိကြောင်း အဂတိလိုက်စားမှုတိုက်ဖျက်ရေးကော်မရှင်က ဇွန် ၂၀ ရက်မှာ ထုတ်ပြန်ပါတယ်။ နိုင်ငံတော်ပိုင်ပစ္စည်းတွေ၊ လူ့အဖွဲ့အစည်းနဲ့ နိုင်ငံသားများ အခွင့်အရေးနဲ့ အကျိုးစီးပွားများကို ထိခိုက်မှုမရှိစေရေးအတွက် အကာအကွယ်ပေးဖို့ အဂတိလိုက်စားမှု တိုက်ဖျက်ရေးဥပဒေကို ၇-၈-၂၀၁၃ ရက်နေ့မှာ ပြဋ္ဌာန်းခဲ့ပြီး အဂတိလိုက်စားမှု တိုက်ဖျက်ရေး ကော်မရှင်ကို ယင်းဥပဒေ အခန်း(၃) ပုဒ်မ-၅၊ ပုဒ်မ ၁၄ အထိ ပြဋ္ဌန်းချက်များနှင့်အညီ ဖွဲ့စည်းခဲ့ပါတယ်။ ကော်မရှင်ဟာ အဂတိတိုက်စားမှု တိုက်ဖျက်ရေးဥပဒေ ပုဒ်မ-၁၆ နှင့် ပုငဒ်မ-၁၇ ပါ ပြဋ္ဌာန်းချက်အရ တာဝန်နဲ့ လုပ်ပိုင်ခွင့်တွေကို ကျင့်သုံးပြီး အသိပညာပေးရေး အဂတိတိုက်စားမှု တားဆီးကာကွယ်ရေးနဲ့ စုံစမ်းစစ်ဆေးအရေးယူတဲ့ လုပ်ငန်းတွေကို ချမှတ်ပြီး အစိုးရ အဖွဲ့အစည်းတွေ ကုလသမဂ္ဂနှင့် အပြည်ပြည်ဆိုင်ရာ အဖွဲ့အစည်းတွေ၊ စီးပွားရေးလုပ်ငန်းအဖွဲ့ အစည်းတွေ၊ သတင်းမီဒီယာတွေအပါအဝင် ပြည်သူတရပ်လုံး ပူးပေါင်းဆောင်ရွက်နေတယ်လို့ ဆိုပါတယ်။ အဂတိလိုက်စားမှု တိုက်ဖျက်ရေး ကော်မရှင်ဟာ ကော်မရှင်ရုံးအား နေပြည်တော်မှာ ဖွင့်လှစ်ထားပြီး ကော်မရှင်ရုံးခွဲ (ရန်ကုန်) နဲ့ ကော်မရှင်ရုံးခွဲ (မန္တလေး) တို့ကိုသာ လက်ရှိအချိန်အထိ တိုးချဲ့ဖွင့်လှစ်ပြီး ဥပဒေနဲ့အညီ ဆောင်ရွက်နေပါတယ်။ အဂတိလိုက်စားမှု တိုက်ဖျက်ရေးဥပဒေပါ တာဝန်နဲ့ လုပ်ပိုင်ခွင့်တွေအား အဂတိလိုက်စားမှု တိုက်ဖျက်ရေးကော်မရှင်ကိုသာ အပ်နှင်းထားတာကြောင့် ကော်မရှင်ရုံးခွဲတွေ ဖွင့်လှစ်တာနဲ့ ကော်မရှင်ရဲ့ လုပ်ငန်းများ ဆောင်ရွက်တာတွေကို ဥပဒေပါ ပြဋ္ဌာန်းချက်အရ ကော်မရှင်ကသာ တရားဝင်ဆောင်ရွက်နိုင်ခွင့်ရှိတဲ့ ကိစ္စရပ်များ ဖြစ်ကြောင်း ထုတ်ပြန်ချက်မှာ ဖော်ပြထားပါတယ်။
2 years Ago

May 21, 2019

မြောင်းမြမြို့နယ် မြန်မာ့လယ်ယာဖွံ့ဖြိုးရေးဘဏ်ခွဲ မန်နေဂျာကို အဂတိလိုက်စားမှုဖြင့် အရေးယူ

မြောင်းမြမြို့နယ် မြန်မာ့လယ်ယာဖွံ့ဖြိုးရေးဘဏ်ခွဲ မန်နေဂျာ (ယခု ကျောင်းကုန်းမြို့နယ် မြန်မာ့လယ်ယာဖွံ့ဖြိုးရေးဘဏ်) ဒေါ်မာလာတင်ကို အဂတိလိုက်စားမှု တိုက်ဖျက်ရေး ဥပဒေနဲ့ အမှုဖွင့် အရေးယူလိုက်တယ်လို့ အဂတိလိုက်စားမှုတိုက်ဖျက်ရေး ကော်မရှင်က  သတင်းထုတ်ပါတယ်။ ဧရာဝတီတိုင်း၊ မြောင်းမြမြို့နယ်ရှိ တောင်သူလယ်သမားတွေရဲ့ စိုက်ပျိုးစရိတ်ချေးငွေ ထုတ်ချေးရာမှာ ဘဏ်မန်နေဂျာ ဒေါ်မာလာတင်ဟာ တောင်သူလယ်သမားတွေရဲ့ အခက်အခဲအပေါ် အခွင့်ကောင်းယူကာ လာဘ်ငွေရယူခဲ့တယ်ဆိုပြီး အရေးယူပေးဖို့ တိုင်ကြားခဲ့တဲ့အမှု ကော်မရှင်က အရေးယူလိုက်တာ ဖြစ်ပါတယ်။ တိုင်ကြားစာအရ ကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ရာမှာ ၂၀၁၆ ခုနှစ် မိုးစပါးစိုက်ပျိုးစရိတ်မှ ချေးငွေပေးဆပ်ဖို့ ကျန်တဲ့ တောင်သူ ၁၁ ဦးရဲ့ တဦးချင်း ပြန်ပေးဆပ်တဲ့ ချေးငွေ ကျပ် ၁၅၄၁၁၀၀၀ နဲ့ ငါးရာခိုင်နှုန်းအတိုး အပိုဆောင်းပေးရငွေ ကျပ် ၇၇၀၅၅၀ ကို မန်နေဂျာ ဒေါ်မာလာတင်က ကိုယ်ကျိုးအတွက် လက်ခံရယူ အဂတိလိုက်စားမှု ကျူးလွန်ခဲ့ကြောင်း စစ်ဆေးပေါ်ပေါက်တယ်လို့ ကော်မရှင် ထုတ်ပြန်ချက်မှာ ဖော်ပြပါတယ်။ မြောင်းမြမြို့နယ် မြန်မာ့လယ်ယာဖွံ့ဖြိုးရေးဘဏ်ခွဲ မန်နေဂျာ ဒေါ်မာလာတင်အပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၆ အရ မြောင်းမြမြို့မရဲစခန်းမှာ မေလ ၂၁ ပထမသတင်းပေး တိုင်ကြားချက်ဖွင့်လှစ်ပြီး တရားစွဲဆို အရေးယူဖို့ ဆောင်ရွက်နေတယ်လို့ ကော်မရှင် ထုတ်ပြန်ချက်မှာ ဖော်ပြပါတယ်။
2 years Ago
More News
Up