အခွန်

January 7, 2022

မိုဘိုင်းဆင်းမ်ကတ် အခွန်ကောက်သည့်အပေါ် ပြည်သူများဝေဖန်

အာဏာသိမ်းစစ်ခေါင်းဆောင်က မိုဘိုင်းဆင်းမ်ကတ်တွေကို လူတိုင်း အလွယ်တကူ ကိုင်ဆောင်ခွင့် မရအောင် ထိန်းချုပ်ဖို့နဲ့ ဒေတာသုံးစွဲမှုကို လျှော့ကျဖို့ ရည်ရွယ်ချက်နဲ့ အခွန်အကောက်တွေကို တိုးမြှင့်လိုက်တာလို့ အခွန်နဲ့စာရင်းအင်းဆိုင်ရာသုတေသီတွေက ပြောပါတယ်။

အာဏာသိမ်းစစ်ခေါင်းဆောင်ရဲ့ ညွှန်ကြားချက်အရ မြန်မာနိုင်ငံမှာ ဆင်းမ်ကတ် ရောင်းချမှုနဲ့ ဆင်းမ်ကတ်ကို စတင်အသုံးပြုနိုင်ဖို့ ဆောင်ရွက်ပေးရတဲ့ ဝန်ဆောင်မှုအပေါ် ဆင်းမ်ကတ်တခုကို ကျပ် နှစ်သောင်းနှုန်းနဲ့ ကုန်သွယ်လုပ်ငန်းခွန် တကြိမ်တည်း ကျသင့်စေရမယ်လို့ ဆိုပါတယ်။

ဒီ့အပြင် အင်တာနက်ဝန်ဆောင်မှုလုပ်ငန်းမှ ရငွေအပေါ် ၁၅ ရာခိုင်နှုန်းနဲ့ ကုန်သွယ်လုပ်ငန်းခွန် ကျသင့်စေရမယ်လို့ ထပ်မံ တင်းကျပ်ထားပါတယ်။

ဒါကြောင့် စက်စစ်ကောင်စီခေါင်းဆောင်ရဲ့ လုပ်ရပ်က ပြည်တွင်းမှာ လွယ်လင့်တကူ ကိုင်ဆောင်ခွင့်ရရှိနေတဲ့ မိုဘိုင်းဆက်သွယ်ရေးကွန်ရက်ကို ထိန်းချုပ်ဖို့ ပြင်ဆင်လာတာလို့ ဆိုနိုင်ပါတယ်။

အခွန်နဲ့စာရင်းအင်းဆိုင်ရာ သုတေသီတဦးက “အင်တာနက်ကို လွယ်လွယ်ကူကူသုံးလို့မရအောင် ကန့်သတ်လိုက်တဲ့ သဘောမဖြစ်ဘူးလားဆိုတော့ ဖြစ်တာပေါ့။ အင်တာနက်ကလည်း များသောအားဖြင့် ဆိုရှယ်မီဒီယာနဲ့ပဲ ချိတ်ဆက်ပြီး သုံးကြတာလေ။ ဒီအပေါ် ကုန်ကျစရိတ် မြင့်လိုက်တဲ့အတွက် သုံးစွဲမှုလျှော့ကျသွားအောင်လုပ်တဲ့ သဘောပါ။ ဒါကြောင့်ပဲ ကုန်သွယ်လုပ်ငန်းခွင်ကို တိုးမြှင့်ကောက်လိုက်တာလို့ မြင်တယ်။ သာမန်လူတန်းစားတချို့က အခုဆိုရင် ဖေ့စ်ဘွတ်ခ် ဘာတွေ မကြည့်တော့ဘူးလို့ ကြားရတယ်။ ဘာလို့လဲ မိုဘိုင်းဒေတာက စားတာကို။ ဒီ့အပြင် ဖိုက်ဘာကလည်း အင်တာနက်ဝန်ဆောင်မှုလုပ်ငန်းဆိုတော့ ဒီဟာတွေလည်း ပါမယ်ထင်တယ်။ ပြည်တွင်းအခွန်များဦးစီးဌာနက ဘယ်ဟာတွေတော့ ပါမယ်ဆိုတဲ့ ညွှန်ကြားချက် ထွက်လာဖို့ရှိတယ်။ အဲ့ဒါကို စောင့်ကြည့်ရမယ်။ ပြီးတော့ သူတို့ အခွန်အကောက်ဥပဒေမှာတော့ အသစ်လုပ်တဲ့ မိုဘိုင်းဆင်းမ်ကတ်တွေ အတွက်ပဲ ကျပ် နှစ်သောင်း ပေးရမယ်ပြောတယ်။ ဒါပေမဲ့ တခုရှိတာက လက်ရှိသုံးနေတဲ့ မိုဘိုင်းဆင်းမ်ကတ်တွေကို ပိတ်လိုက်ပြီး သုံးချင်ရင် နှစ်သောင်းပေးမှ သုံးရမယ်လို့ ဒါမျိုးလည်း လုပ်လာနိုင်တယ်နော်။ အင်တာနက်ဝန်ဆောင်မှု လုပ်ငန်းကရတဲ့ ကုန်သွယ်လုပ်ငန်းခွင်ဝင်ငွေက အရင်က ၅ ရာခိုင်နှုန်းပဲ ရှိတာ။ အခုတော့ ၁၅ ရာခိုင်နှုန်းအထိ တိုးမြှင့်လိုက်တယ်။ ဦးသိန်းစိန်လက်ထက်တုန်းကတော့ ၅ ရာခိုင်နှုန်းသတ်မှတ်ဖို့အတွက် ဆားဗစ်ပရိုဗိုက်တာတွေနဲ့  အရင်ဦးဆုံး အကြိတ်အနယ် ဆွေးနွေးပြီးမှ သတ်မှတ်ခဲ့ရတာ။ အခုတော့ ၁၅ ရာခိုင်နှုန်းဆိုပြီး သူတို့ဘာသာ သတ်မှတ်လိုက်ပုံရတယ်” လို့ ဒီဗွီဘီကို ပြောပါတယ်။

နိုင်ငံတိုင်းလိုလိုမှာ အခွန်စနစ်ကို လက်ခံကျင့်သုံးကြပေမယ့် သုံးစွဲတဲ့နေရာမှာ မှန်ကန်မှု ရှိ မရှိဆိုတာက ကျင့်သုံးတဲ့ နိုင်ငံအပေါ် ကွဲပြားခြားနားမှုရှိစေပါတယ်။

ဘတ်ဂျက်ရေးရာကျွမ်းကျင်သူတဦးကလည်း “အခွန်ကောက်ယူတဲ့ ရည်ရွယ်ချက်က ကိုယ့်ရဲ့ပြည်သူပြည်သားတွေအတွက် ပြန်သုံးတာပဲနော်။ ဒါက ယေဘုယျအားဖြင့် ပြောတာပါ။ ဘယ်နိုင်ငံပဲ ဖြစ်ဖြစ်ဗျာ။ အခွန်ကောက်တယ်ပေါ့။ အခွန်ရလို့ရှိရင် ဒီအခွန်ရရှိတဲ့ငွေအပေါ် ကိုယ့်တိုင်းပြည် ကြွယ်ဝချမ်းသာ ရေးအတွက် ပြန်သုံးကြတယ်နော်။ ဒါက ပြည်သူပြည်သားတွေ အေးချမ်းမှုနဲ့ သာယာဝပြောမှုအတွက် ပြန်သုံးကြတာလေ။ အခုကတော့ ကျနော်တို့ဆီမှာ ဒီဟာတွေကို ဘယ်မှာ သုံးမလဲဆိုတာက ရသုံးမှန်းခြေ (ဘတ်ဂျက်) စာရင်းထွက်လာရင် ပေါ်လာမှာပါ။ ဒါပေမဲ့ စစ်ကောင်စီလက်ထက်မှာ ဒီဘတ်ဂျက်စာရင်းကလည်း ဘယ်လောက် မှန်ကန်မှု ရှိ မရှိ ဆိုတာကတော့ လူတိုင်းသိပြီးသားပါ” လို့ ပြောပါတယ်။

ဆင်းမ်ကတ်ရောင်းချနေတဲ့ လူငယ်တဦးက “ကျနော်တို့ ဆင်းမ်ကတ်တွေကို ၁၅၀၀ ကျပ်နဲ့ အပြင်မှာ လွယ်လွယ်ကူ ကူဝယ်လို့ရတယ်လေ။ အဲ့လို ဝယ်ပြီးသုံးတဲ့အခါမှာ တချို့ဆို သုံးပြီးတာနဲ့ လွှင့်ပစ်လိုက်တာလည်း ရှိတယ်နော်။ ဘာလို့လဲ ဆိုသူက ပေါပေါလေးနဲ့ ရတာကိုး။ ၁၅၀၀ ကျပ်ဆိုတော့လေ။ အခုတော့ တခါလုပ်ရင် ဆင်းမ်ကတ် တခု နှစ်သောင်းကျပ် ဆိုတော့ အရင်လို လွယ်လင့်တကူ လွှင့်ပစ်ဖို့က ခက်သွားပြီပေါ့။ ပြီးတော့ နောက်တချက် ကိုယ့်နံပါတ်တခုကိုပဲ စွဲစွဲမြဲမြဲ ကိုင်အောင် လုပ်ချင်တဲ့ ရည်ရွယ်ချက်လည်း ရှိမယ်” လို့ဆိုပါတယ်။

စစ်ကောင်စီရဲ့ ညွှန်ကြားချက်အရ ပြည်တွင်းမှာ မိုဘိုင်းဒေတာအသုံးပြုမှုနှုန်းထားနဲ့ ဖုန်းခေါ်ဆိုမှုနှုန်းထားတွေကို ၂၀၂၁ ခုနှစ်၊ ဒီဇင်ဘာ ၈ ရက် ကစပြီး တိုးမြှင့်ပြောင်းလဲ သတ်မှတ်ခဲ့ပါသေးတယ်။

ဒါကြောင့် အခုပြင်ဆင်လိုက်တဲ့နှုန်းထားတွေအရ Telenor နဲ့ Ooredoo အော်ပရေတာတို့က internet package အတွက် 1 GB ကို ၁၉၉၀ ကျပ်ရှိပြီး MPT အော်ပရေတာက 935 MB ကို ၁၇၉၉ ကျပ်နဲ့ စစ်ကောင်စီပိုင် Mytel အော်ပရေတာက 512 MB ကို ၉၆၈ ကျပ်နဲ့ အသီးသီးစျေးနှုန်းတွေကို ပြင်ဆင်ခဲ့ပါတယ်။

အရင်ကတော့ Telenor နဲ့ Ooredoo အော်ပရေတာတို့က internet package အတွက် 925 MB ကို ၉၉၉ ကျပ်သာရှိခဲ့ပြီး MPT က 935 MB ကို ၉၉၉ ကျပ်နဲ့ စစ်ကောင်စီပိုင် Mytel ကလည်း 920 MB ကို ၉၆၈ ကျပ်သာရှိတာကြောင့် အခုပြင်ဆင်လိုက်တဲ့နှုန်းက ယခင်ကထက် နှစ်ဆနီးပါးမြှင့်တက်နေပါတယ်။

မြန်မာနိုင်ငံမှာ မိုဘိုင်းဖုန်းအသုံးပြုသူဦးရေက MPT က၂၃ သန်း၊ Telenor က ၁၇ သန်း၊ Ooredoo က ၁၅ သန်းနဲ့ စစ်တပ်ပိုင် Mytel က ၁၀ သန်းရှိတယ်လို့ မိုဘိုင်းအော်ပရေတာတွေက ထုတ်ပြန်တဲ့ကိန်းဂဏန်းအချက်အလက်တွေ အရ သိရပါတယ်။

3 weeks Ago

December 13, 2021

နမ့်ခမ်းဈေးသူဈေးသားများဆန္ဒပြနေသော်လည်း အခွန်ဆက်ကောက်မည်ဟု TNLA ပြော

ရှမ်းပြည်မြောက်ပိုင်း၊ မူဆယ်ခရိုင်၊ နမ့်ခမ်းမြို့မဈေးကြီးထဲမှာ PSLA/TNLA တပ်ဖွဲ့က ဈေးဆိုင်တွေကို အတင်းအဓမ္မ ဆက်ကြေးကောက်ခံခြိမ်းခြောက်နေတဲ့အပေါ်  ဈေးသူ ဈေးသားတွေဟာ ဒီကနေ့ ဒီဇင်ဘာ ၁၃ ရက်မှ ၁၇ ရက်အထိ ၅ ရက်တိုင် ဆိုင်ခန်းတွေပိတ်ထားပြီး ကန့်ကွက်ဆန္ဒပြနေကြပါတယ်။

နမ့်ခမ်းဈေးသူဈေးသားတွေဟာ နိုင်ငံရေးကြောင့်ရော၊ ကိုဗစ်-၁၉ ကူးစက်ရောဂါကြောင့်ပါ ဈေးမရောင်းရလို့ အခက်အခဲဖြစ်နေရတဲ့အထဲ PSLA/TNLA တပ်ဖွဲ့က အခွန်လို့ပြောပြီး ဆက်ကြေးတွေ မတရားကောက်နေလို့ ပြီးခဲ့တဲ့ ၁၁ ရက်နေ့က နမ့်ခမ်းဘုန်းကြီးကျောင်းဝင်း တစ်ခုမှာအစည်းအဝေးလုပ်ပြီး ဆန္ဒပြဖို့ ဆုံးဖြတ်ခဲ့တာလို့ ဈေးသည် တယောက်က  ဒီဗွီဘီကို ပြောပါတယ်။ 

“ကျမတို့ဈေးသည်တွေက ဘာမှပြဿနာမရှိချင်လို့ အရင်ကလည်း သူတို့ပိုက်ဆံလာ တောင်းတိုင်း ပေးခဲ့ပါတယ်။ ဒီနှစ်က တကယ်ခက်ခဲနေတာ၊  အရင်က တနှစ်မှ တခါလာကောက်တယ်၊ ဒီနှစ် ခဏခဏ လာတယ်။ ၁၀ ရက်နေ့က စစ်အာဏာရှင်ကို ဆန္ဒပြတဲ့အနေနဲ့ ဈေးပိတ်တယ်၊ ၁၁ ရက်နေ့မှာ ဈေးပြန်ဖွင့်တယ်။ ပလောင်စစ်သား နှစ်ယောက် ဈေးထဲလာပြီး ခင်ဗျားတို့ကို လိပ်စာကတ်ပေးထားတာ ဘာလို့မဆက်သွယ်လဲဆိုပြီး လာပြောသေးတယ်၊ အခွန်နည်းနည်းလျှော့ပေးပါလို့ ပြောတာကို မလျှော့နိုင်ဘူး၊ ပိုတောင်တောင်းဦးမယ်တဲ့။  အဲဒါကြောင့် ဈေးသည်တွေတိုင်ပင်ပြီး ဆိုင်ပိတ်ပြီး ဆန္ဒပြမယ်လို့ ဆုံးဖြတ်ခဲ့တာပါ။” 

ဒီကိစ္စနဲ့ ပတ်သက်ပြီး PSLA/TNLA  ပြောရေးဆိုခွင့်ရှိသူ ဗိုလ်မှူးမိုင်းအိုက်ကျော်ကတော့ သူတို့ဟာ TNLA တပ်စဖွဲ့ကတည်းက လှုပ်ရှားနယ်မြေတွေမှာ အခွန်ကောက်ခဲ့ကြောင်း၊ ကိုဗစ်-၁၉ ကာလမှာ ပြည်သူတွေအခက်အခဲကိုနားလည်လို့ အခွန်အခလျော့ပေးတာတွေရှိကြောင်း၊ နှစ်နဲ့ချီ အခွန်ကောက်လာပြီး ခုမှဆန္ဒပြခံရတာတော့ သွေးထိုးသူတွေရဲ့ပယောဂကြောင့်သာ ဖြစ်ပြီး ဆန္ဒပြခံ ရပေမဲ့ အခွန်ကတော့ ဆက်ကောက်သွားမယ်လို့ ဒီဗွီဘီကို ပြောပါတယ်။ 

“ကျနော်တို့က အဖွဲ့စတည်ထောင်ကတည်းက လှုပ်ရှားနယ်မြေတိုင်းမှာ အခွန်ကောက်ပါ တယ်။  တနှစ်မှ တခါပဲ ကောက်တယ်၊ အထူးသဖြင့် စီးပွားရေးလုပ်ငန်းရှင်တွေကို ဦးတည်ကောက် တယ်။  လမ်းဘေးဈေးသည်တွေ မကောက်ပါဘူး၊ ကောက်ရင်လည်း သူတို့တတ်နိုင်လောက်တဲ့ ပမာဏပဲ ကောက်တာပါ၊ ကိုဗစ်-၁၉ ကာလမှာလည်း အခွန်လျှော့တောင်းဖို့ ပြောထားတယ်။ ဘယ်လောက်လျှော့လဲတော့ မသိဘူး။ အခွန်ကောက်တဲ့ဘက်ကဘဲ သိမယ်၊ ကျနော်တို့ ကောက်နေတာ ကြာပြီ၊ အခုမှဆန္ဒပြတာတွေ ဘာတွေဖြစ်လာတာကတော့ သွေးထိုးလှုံ့ဆော်ခံရတဲ့ ပယောဂတွေကြောင့်ပဲလို့ ထင်ပါတယ်။ ဘယ်လိုပဲဖြစ်ဖြစ် ကျနော်တို့ကတော့ အခွန်ဥပဒေ အတိုင်း ဆက်လုပ်သွားမှာပဲ”

အခွန်မဆောင်တဲ့သူတွေပေါ်ခြိမ်းခြောက်တာတွေတော့ မရှိကြောင်း၊ ပထမပိုင်းမှာ သတိပေး စာထုတ်ပြီး လိုက်နာမှုမရှိရင်တော့ နန်းမိုဟွမ်လို ဖမ်းဆီးထိန်းသိမ်းတာတွေရှိတယ်လို့ TNLA က ပြောသွားပါတယ်။ 

နမ့်ခမ်းဈေးသည်တွေကတော့ ဆိုင်ခန်း ၁ ခန်းကို ၃ သိန်းအထက်၊ ရွှေဆိုင် ၁ ဆိုင် ၁၅ သိန်း၊ ကုန်စုံဆိုင်ကြီးတွေ သိန်း ၃၀ အထက်ပေးရတာ တတ်နိုင်တဲ့ပမာဏ မဟုတ်ကြောင်း၊ ဈေးလျှော့ပေးတယ်ဆိုတာ လူကိုယ်တိုင်သွားဆစ်မှရတာဖြစ်ပြီး ပြောရဲဆိုရဲ ဆစ်ရဲသူတွေသာ ရကြောင်း၊ အခွန်မပေးလို့ အဖမ်းခံရသူတွေဟာ နန်းမိုဟွမ် တယောက်တည်းမဟုတ်ဘဲ လူမသိ သူမသိ အဖမ်းခံရတာ မကြာခဏဖြစ်ပြီး  အဖွဲ့အစည်းတွေက လိုက်ပြောပေးရင် မူးယစ်ဆေး ရောင်းဝယ်မှုသံသယနဲ့ လူမှားဖမ်းမိတာပါ ဆိုပြီး ပြန်လွှတ်ပေးတာလည်း ရှိတယ်လို့ ပြောပါတယ်။ 

နမ့်ခမ်းမြို့မဈေးကြီးဟာ မြို့လယ်ကောင် ကောင်းနောင်မိုရပ်ကွက်ထဲမှာ တည်ရှိပြီး ဆိုင်ခန်း ပေါင်း ၁၀၀၀ ကျော် ၂၀၀၀ နီးပါးရှိပါတယ်။

အခုလို လက်နက်ကိုင်အဖွဲ့က အခွန်ကောက်နေတာနဲ့ပတ်သက်ပြီး စစ်ကောင်စီလက်အောက်ခံ မြို့နယ်အုပ်ချုပ်ရေးမှူးရုံး၊ စည်ပင်နဲ့ ရဲတပ်ဖွဲ့တွေဘက်က တစုံတရာ တုံ့ပြန်ထုတ်ပြန်တာတွေ မရှိကြောင်း၊ ဒါဟာ တရားဥပဒေစိုးမိုးမှု မရှိတာကို ပြနေတာဘဲလို့ နမ့်ခမ်း ဒေသခံက ပြောပါတယ်။ 

1 month Ago
More News
Up