အခြေခံလူတန်းစားများ

May 30, 2021

စစ်အာဏာရှင်လက်ထက် အခြေခံလူတန်းစားများ ထမင်းတစ်နပ်သာစားနိုင်သည့် အခြေအနေ ရောက်လာ

စစ်အာဏာရှင်လက်ထက်မှာ ရန်ကုန်က အခြေခံလူတန်းစားပြည်သူတချို့ဟာ စားဝတ်နေရေး ပိုမို ကျပ်တည်းလာပြီး တစ်ရက်ကို ထမင်းတစ်နပ်ဘဲ စားနိုင်တော့တဲ့ အခြေအနေကို ရောက်နေပြီလို့  လူမှုအကူအညီပေးနေတဲ့ ပရဟိတအဖွဲ့တွေက ပြောပါတယ်။

ကိုဗစ်-၁၉ ကြောင့် အခြေခံလူတန်းစား မိသားစုတွေဟာ တစ်နှစ်နီးပါး စီးပွားရေး အခက်အခဲ တွေ့ခဲ့ရာက ဖေဖော်ဝါရီ ၁ရက်နေ့ စစ်အာဏာသိမ်းပြီးနောက်မှာတော့ စားဝတ်နေရေး ပိုဆိုးတဲ့အခြေအနေတွေနဲ့ ရင်ဆိုင်လာရပါတယ်။

စစ်အာဏာသိမ်းလိုက်တဲ့အတွက် နိုင်ငံခြားသားရင်းနှီးမြှုပ်နှံတဲ့ စက်ရုံ အလုပ်ရုံတွေ အလုပ်ပိတ်သိမ်းနေရပ်ပြန်ကုန်ကြလို့ မြန်မာအလုပ်သမားတွေ အလုပ်လက်မဲ့ဖြစ်ကုန်ပြီး အခြေခံလူတန်းစားတချို့ဟာ တရက်ကို ထမင်းတစ်နပ်ပဲစားနိုင်တဲ့ အခြေအနေကို ရောက်နေတယ်လို့ အကူအညီပေးနေတဲ့ ပရဟိတအဖွဲ့ Bokashi Myanmar မှ ကိုအင်းဒါးအောင်စိုးက ပြောပါတယ်။

စစ်အာဏာသိမ်းပြီးနောက်မှာ နာရေးကူညီမှုအသင်း(ရန်ကုန်)လို ပရဟိတလူမှုကူညီရေး အသင်းအဖွဲ့တွေကို စစ်ကောင်စီ အကြမ်းဖက်အဖွဲ့ကဖျက်သိမ်းပစ်တာ၊  လူမှုကူညီပေးနေတဲ့ ပရဟိတသမားတွေကို ပစ်သတ်တာ၊ ဖမ်းဆီးတာ၊ ခြိမ်းခြောက်တွေလည်း ရှိခဲ့ပါတယ်။

Clean Yangon ပရဟိတအဖွဲ့မှ ကိုထူးမြတ်အောင်က “ပရဟိတအဖွဲ့တွေဟာ အခြေခံ ပြည်သူတွေကို အလှူသွားလုပ်ရင်တောင် ပေါ်ပေါ်တင်တင်လုပ်ဖို့ အခြေအနေမပေးတော့ပါဘူး။ ဒီအခြေအနေမှာ ပြည်သူတွေအချင်းချင်းကူ ညီဖေးမတဲ့နည်းလမ်းပဲရှိတော့တယ်”လို့   ပြောပါတယ်။

ရန်ကုန် လှိုင်သာယာ၊ ရွှေပြည်သာ၊ တောင်ဒဂုံ၊ မြောက်ဒဂုံတို့လို မြို့သစ်တွေနဲ့ ကျူးကျော်ရပ်ကွက်တွေမှာနေထိုင်တဲ့ အခြေခံလူတန်းစားပြည်သူတွေဟာ စားဝတ်နေရေးအတွက် ကြုံသလိုဖြေရှင်းနေရပြီး  အခြေအနေပိုဆိုးနေတယ်လို့လည်း သိရပါတယ်။

စစ်အာဏာသိမ်းပြီး နောက်မှာ အလုပ်တွေက အပြီးရပ်ဆိုင်းကုန်တာဖြစ်တဲ့အတွက် အခြေခံ လူတန်းစား အလုပ်လက်မဲ့ ပြည်သူတွေရဲ့ အခက်အခဲက ရှေ့ဆက်ပိုဆိုးဖို့ပဲရှိတော့တယ်လို့ အကူအညီပေးနေသူတွေက ပြောပါတယ်။

အန်အယ်လ်ဒီအစိုးရလက်ထက် ကိုဗစ်ကာလတုန်းကတော့ အလုပ်တွေက ခဏရပ်နားခဲ့ပေမဲ့ အလုပ်သမားတွေကို လူမှုဖူလုံကြေးထုတ်ပေးတာ၊ အခြေခံလူတန်းစာပြည်သူတွေအတွက်  ငွေကြေးနဲ့ စားနပ်ရိက္ခာကူညီထောက်ပံ့တာတွေရှိခဲ့ပါတယ်။

လက်ရှိ အာဏာသိမ်းစစ်ကောင်စီအကြမ်းဖက်အဖွဲ့အနေနဲ့ ပြည်သူတွေကို အလားတူ ကူညီပေးဖို့ အစီအစဉ်မရှိဘူးလို့ စစ်ကောင်စီပြောရေးဆိုခွင့်ရှိသူက ပြီးခဲ့တဲ့ နေပြည်တော် သတင်းစာရှင်းလင်းပွဲမှာ ပြောကြားထားပါတယ်။

လာမယ့် ၆လအတွင်း မြန်မာနိုင်ငံက လူဦးရေ သုံးသန်းခွဲလောက် အငတ်ဘေးကြုံတွေ့ရနိုင်ပြီး အကူအညီပေးဖို့ပြင်ဆင်နေတယ်လို့ စစ်အာဏာသိမ်းပြီး ၃လအကြာမှာ ကုလသမဂ္ဂ စားနပ်ရိက္ခာအဖွဲ့ WFP က ခန့်မှန်းထုတ်ပြန်ထားပါတယ်။

5 months Ago

November 10, 2020

အခြေခံလူတန်းစားများအတွက် အိမ်ထောင်စုတစုကို ကျပ် ၄၀,၀၀၀ နှုန်း ထပ်မံပံ့ပိုးပေးမည် 

အခြေခံလူတန်းစားတွေအတွက် အိမ်ထောင်စုတစုကို ကျပ် ၄၀၀၀၀ နှုန်း  ထပ်မံ ပံ့ပိုးပေးဖို့ စီစဉ်နေတယ်လို့ မြို့နယ်အထွေထွေ အုပ်ချုပ်ရေးမှူးတွေဆီက သိရပါတယ်။ ဒါက ကိုဗစ်-၁၉ ကပ်ဘေးကာလအတွင်း ပုံမှန်ဝင်ငွေမရှိတဲ့ အခြေခံလူတန်းစားတွေအတွက်  အစိုးရရဲ့ စတုတ္တအကြိမ်မြောက် ပံ့ပိုးမှုအစီအစဉ်ဖြစ်ပါတယ်။  နိုင်ငံတော်ရဲ့ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း အခြေခံလူတန်းစားတွေအတွက် ပံ့ပိုးမှုအစီအစဉ်ကို အခု သီတင်းပတ်ကနေ စတင်လုပ်ဆောင်သွားမယ်လို့ ရွေးကောက်ပွဲအပြီး နိုဝင်ဘာ ၉ ရက်နေ့က ကိုဗစ်-၁၉ အခြေအနေနဲ့ ပက်သက်ပြီး ပြည်သူကို ပြောကြားတဲ့မိန့်ခွန်းမှာ ထည့်သွင်းပြောကြားခဲ့ပါတယ်။ အခုလိုပံ့ပိုးပေးရာမှာ ပထမအကြိမ်က ကောက်ခံထားတဲ့ အိမ်ထောင်စုစာရင်းတွေကို အခြေခံပြီး၊ ထပ်မံ စီစစ်ဆာင်ရွက်ထားတဲ့ စာရင်းအတိုင်း ပံ့ပိုးပေးသွားမယ်လို့ မင်္ဂလာတောင်ညွှန့် မြို့နယ်အထွေထွေ အုပ်ချုပ်ရေးမှူး ဦးအောင်ဝင်းက ပြောပါတယ်။ ကိုဗစ်-၁၉ ကာလအတွင်း အခြေခံလူတန်းစားတွေကို ပထမအကြိမ် ထောက်ပံ့မှုအနေနဲ့ ရိံက္ခာငါးမျိုးကို လူဦးရေ ၅ ဒသမ ၃ သန်းထိ အစိုးရက ဖြန့်ဝေပေးခဲ့ပါတယ်။  အဲဒီနောက် ဒုတိယအကြိမ်မှာ တစ်အိမ်ထောင်ကို ငွေကျပ် ၂၀,၀၀၀ နှုန်းနဲ့  အိမ်ထောင်စုပေါင်း ၅ ဒသမ ၄ သန်းကျော်၊ တတိယအကြိမ် မြောက်မှာလည်း တစ်အိမ်ထောင်ကို ငွေကျပ် ၂၀,၀၀၀ နှုန်းနဲ့  အိမ်ထောင်စုပေါင်း ၅ ဒသမ ၆ သန်းကျော်ကို ပံ့ပိုးပေးခဲ့ပါတယ်။  သတင်း- စိုးချစ်ချစ်ပိုင်
11 months Ago
More News
Up