အချုပ်သားများ

December 11, 2020

အချုပ်သားများတွင် ကိုဗစ်-၁၉ ပိုးတွေ့သဖြင့် ပဲခူး အမှတ် ၂ ရဲစခန်းကို Lockdown ချ

ပဲခူးတိုင်းဒေသကြီး၊ ပဲခူးမြို့ရှိ အမှတ် ၂ ရဲစခန်းမှာ တပ်ဖွဲ့ဝင် တစ်ယောက်ရဲ့ ဇနီးအပါအဝင် အချုပ်သား ၆ ယောက်မှာ ကိုဗစ်-၁၉ ရောဂါပိုးတွေ့ရှိတဲ့အတွက် ရဲစခန်း တစ်ခုလုံးကို အသွားအလာကန့်သတ် Lockdown ချလိုက်ပါတယ်။ ဒီဇင်ဘာ ၁၀ ရက်နေ့က ပဲခူးမြို့ အမှတ် ၂ ရဲစခန်းက တပ်ဖွဲ့ဝင် တစ်ယောက်ရဲ့အမျိုးသမီး အနံ့မရတော့ဘူးဆိုတဲ့အတွက် လင်မယား နှစ်ယောက်စလုံးကို Bago Fever Clinic မှာ သွားရောက်စစ်ဆေးတဲ့အခါ  အမျိုးသမီးမှာ ပိုးတွေ့ရှိခဲ့တာပါ၊  အမျိုးသားဖြစ်သူက စခန်းမှာ ကင်းတာဝန်ယူရတဲ့သူဖြစ်လို့ အချုပ်သားတွေကိုပါ စစ်ဆေးတဲ့အခါ အချုပ်သား ၆ ယောက်မှာ ထပ်မံရောဂါပိုးတွေ့ရှိခဲ့ပြန်ပါတယ်။ အဲဒီအတွက် အမှတ်၂ ရဲစခန်း တစ်ခုလုံးကို  ဒီဇင်ဘာ ၁၀ ရက် ညနေပိုင်းကစပြီး ၁၄ ရက် အသွားအလာ ကန့်သတ်ထားလိုက်တယ်လို့ ပဲခူးခရိုင်ကျန်းမာရေးဦးစီးမှူး ဒေါက်တာသီဟ ကပြောပါတယ်။ လတ်တလောမှာတော့ အမှတ် ၂ ရဲစခန်ရဲ့ အလုပ်ကိစ္စတွေကို အမှတ် ၃ ရဲစစခန်းမှာ ဆောင်ရွက်နေပါတယ်။ အဲဒီ အချုပ်သားတွေကို ကလိဆေးရုံကို ပို့ဆောင်ကုသစေပြီး သူတို့က အချုပ်သားတွေ ဖြစ်တဲ့အတွက် တခြားလူနာတွေနဲ့ ရောမထားပဲ ထွက်ပြေးတာတွေဖြစ်မှာစိုးတဲ့အတွက် သီးသန့် အဆောင်မှာထားပြီး အပြင်မှာတော့ ရဲတပ်ဖွဲ့ဝင် ၉ ဦးက လုံခြုံစောင့်ဆိုင်းပေးထားတယ်လို့ ဆိုပါတယ်။ အခုနောက်ပိုင်း အချုပ်သားတွေကို အချုပ်ခန်း ထဲမထည့်ခင်နဲ့ ထောင်ကိုပို့မယ်သူတွေ ဆိုရင်လည်း ထောင်အပြင်မှာ  ကျန်းမာရေးဌာနကနေ ကိုဗစ်-၁၉ ရောဂါပိုးရှိမရှိ စစ်ဆေးပေးတာတွေကိုလည်း လုပ်ဆောင်ပေးနေတယ်လို့ ပဲခူးမြို့နယ်ကျန်းမာရေးဦးစီးမှူးက ပြောပါတယ်။ ပဲခူးမြို့နယ်မှာတော့ နေ့စဉ်ပိုးတွေ့လူနာတွေ နေ့စဉ်တိုးနေပြီး ခုဆို ပဲခူးမြို့မှာ ကိုဗစ်-၁၉ အတည်ပြုလူနာပေါင်း ၁၆၀၀ နီးပါးရှိကာ အဲဒီထဲက ၁၁ ဦးသေဆုံးခဲ့ပါတယ်။ နေ့စဉ်ပိုးတွေ့ရှိမှု မြင့်တက်နေတဲ့အတွက် ခုဆိုပဲခူးမြို့က ပိုးတွေ့ရှိမှုများတဲ့ လမ်း ၁၀ လမ်းကိုလည်း Semi Lockdown ချထားပါတယ်။ သတင်း - အောင်စိုးမိုး
2 years Ago

October 21, 2020

ချီကာဂိုထောင်တွင် အချုပ်သားများ ကြိုတင်မဲပေး

အမေရိကန်ရွေးကောက်ပွဲအတွင်း နိုင်ငံသားအများအပြားက သူတို့ရဲ့စာတိုက်ကနေ ပေးပို့တဲ့ ကြိုတင်ဆန္ဒမဲတွေကို ရွေးကောက်ပွဲမှာ ရေတွက်ပါ့မလားဆိုတာ စိတ်ပူနေချိန်မှာ ချီကာဂို ထောင်ထဲက စီရင်ချက်ချတာ မခံရသေးတဲ့ အချုပ်သားတွေကတော့ အချုပ်ခန်းထဲမှာ ကြိုတင်မဲပေးခဲ့ကြပါတယ်။ ကွတ်ခ်မြို့နယ်ထဲက ထောင်ထဲမှာ စီရင်ချက်ချတာ မခံရသေးတဲ့ အကျဉ်းသား အယောက် ၂,၀၀၀၀ လောက်ဟာ ကြိုတင်မဲပေးခဲ့ကြပြီး ထောင်ထဲကနေ ထည့်တဲ့ မဲအားလုံးရဲ့ ၅၀ ရာခိုင်နှုန်း ရှိတယ်လို့ ငြိမ်ဝပ်ပိပြားရေးအရာရှိ တွမ်ဒါ့တ်က အောက်တိုဘာ ၁၇ ရက် သတင်းစာရှင်းလင်းပွဲမှာ ပြောပါတယ်။ ထောင်သားတွေကို ရိုးရိုးတန်းတန်း မဲပေးခွင့်ပြုတာမဟုတ်ဘဲ မဲမပေးခင် သင်တန်းပေးခဲ့တာကြောင့် ပညာတတ်အဖြစ်ဆုံး မဲရှင်တွေ ဖြစ်လာအောင် ကူညီလိုက်နိုင်တယ်လို့ ဒါ့တ်က ပြောပါတယ်။ တရားရုံးမှာ အမှုရင်ဆိုင်နေဆဲ အကျဉ်းသားတယောက်က “ဒါ အင်မတန်ကောင်းတယ်။ ကျနော့်ထင်မြင်ချက်ကို ကျနော် ထုတ်ပြနိုင်တယ်။ ကျနော်တို့ဟာ လူသားတွေပဲ ဖြစ်လို့ ဒီမဲက ရေတွက်ရမယ်ဆိုတာ လူတိုင်းကို သိခွင့်ပေးလိုက်တာပဲ” လို့ ပြောပါတယ်။ တရားစီရင်ခံရဖို့ စောင့်နေတဲ့ ထောင်သားအများအပြားကတော့ မဲမပေးနိုင်ကြသေးဘူး။ သူတို့ အများစုဟာ အာမခံနဲ့ လွတ်ခွင့်ရဖို့ ဘဏ္ဍာရေးမတတ်နိုင်လို့ ထောင်ကျခံနေရသူတွေလို့ ရိုက်တာ သတင်းဌာနက ဖော်ပြထားပါတယ်။ အမေရိကန်မှာ ကြီးလေးတဲ့ပြစ်မှုကို ကျူးလွန်မှုအတွက် ပြစ်ဒဏ်စီရင်ခံရသူတွေဟာ မဲပေးခွင့်မရဘဲ တချို့ကတော့ ရာသက်ပန် မဲပေးခွင့် ဆုံးရှုံးပါတယ်။ ဒီလိုကိစ္စအတွက် ဥပဒေအရ မဲပေးခွင့် ကန့်သတ်ခံရလို့ မဲပေးနိုင်တဲ့ အမေရိကန် နိုင်ငံသား ၅ သန်းကျော်တယ်လို့ အမေရိကန် တရားစီရင်ရေးမူဝါဒ ပြုပြင်ပြောင်းလဲဖို့ ဆော်သြနေတဲ့ Sentencing Project အဖွဲ့က ပြောပါတယ်။
2 years Ago
Up