အချုပ်သား

August 8, 2021

မိုးမိတ်မြို့တွင် အချုပ်သား ၈၀ နှင့်ပြည်သူများကို ကိုဗစ်ကာ​ကွယ်ဆေးထိုး

ရှမ်းပြည်နယ်မြောက်ပိုင်း မိုးမိတ်မြို့မှာ သြဂုတ် ၇ ရက်က အချုပ်သား ၈၀ အပါအဝင် ပြည်သူတွေကို ကိုဗစ်-၁၉ ရောဂါကာကွယ်ဆေးထိုးပေးခဲ့တယ်လို့ ပရဟိတ အသင်းတစ်ခုက သိရပါတယ်။ 

အချုပ်သား ၈၄ ဦးရှိရာ ၄ ဦးက ထိုးပြီးသားဖြစ်တာကြောင့် ကျန်နေတဲ့ အယောက် ၈၀ နဲ့ စာရင်းကောက်ခံထားတဲ့ ပြည်သူတွေကို ထိုးပေးခဲ့တယ်လို့ဆိုပါတယ်။

ပရဟိတအသင်းတခုရဲ့ တာဝန်ရှိသူတဦးက “ပထမအကြိမ် ကိုဗစ်ကာကွယ်ဆေးထိုးပေးတာက အာဏာမသိမ်းခင်ကနေ ထိုးပေးနေတာ။ ခုကသက်ကြီးရွယ်အိုတွေ၊ ဝန်ထမ်းတွေ၊ ဝန်ထမ်းမိသားစုတွေ၊ စျေးရောင်းစျေးဝယ်တွေနဲ့ စာရင်းကောက်ထားတဲ့သူတွေကို ထိုးပေးနေတယ်” လို့ ပြောပါတယ်။

မိုးမိတ်မြို့မှာ ကိုဗစ် ကာကွယ်ဆေးထိုးပြီးသူ ၃၀၀၀ ကျော်ရှိနေပြီး တရုတ်က ထုတ်ထားတဲ့ ကိုဗစ်ကာကွယ်ဆေးတွေကိုထိုးပေးနေတာဖြစ်ကာ ပထမအကြိမ်က လာရောက်ထိုးသူ နည်းခဲ့ပြီး အခုချိန်မှာတော့ ထိုးချင်သူများနေပြီး စာရင်းကောက်ဆောင်ရွက်နေရတယ်လို့သိရပါတယ်။ 

မိုးမိတ်မြို့မှာ တတိယကိုဗစ်ကာလအတွင်း သြဂုတ် ၇ ရက်အထိ ကိုဗစ် ပိုးတွေ့လူနာ ၂၀၀ ကျော်ရှိလာပြီဖြစ်ပြီး သေဆုံးသူ ၁၁ ဦးထိရှိလာပြီလို့ သိရပါတယ်။

1 month Ago

July 31, 2021

ခန္တီးတွင် အချုပ်သား ၁ ဦး ကိုဗစ်ရောဂါဖြင့် သေဆုံး၊ အချုပ်သား ၁၀၀ ကျော်ကူးစက်ခံထားရ

စစ်ကိုင်းတိုင်း ခန္တီးမြို့မှာ ဇူလိုင် ၃၁ ရက်နေ့ နေ့လယ်ပိုင်းက အချုပ်သား ၁ ဦး ကိုဗစ်-၁၉ ရောဂါနဲ့ သေဆုံးသွားတယ်လို့ သိရပါတယ်။

ခန္တီးဆေးရုံ တာဝန်ရှိသူတစ်ဦးက “ခန္တီးရဲစခန်းက အချုပ်သားပါ။ ဒီမနက် ဆေးရုံကိုလာပို့ခဲ့တယ်၊ အခုနေ့လယ် ၁ နာရီက ခန္တီးဆေးရုံမှာ ကုသရင်း သေဆုံးသွားတယ်” လို့ ပြောပါတယ်။

သေဆုံးသွားတဲ့ အချုပ်သားဟာ ပြီးခဲ့တဲ့ ဇူလိုင် ၂၇ ရက်နေ့က ကိုဗစ်ပိုးတွေ့ရှိခဲ့ပြီး အချုပ်ထဲမှာ ဆေးကုသထားရာက အခြေနေဆိုးလာတာကြောင့် ဒီနေ့မနက် ခန္တီးဆေးရုံ ပို့ဆောင်ကုသစဉ် သေဆုံးသွားခဲ့တာပါ။

ခန္တီးမြို့ အချုပ်ခန်းမှာ အချုပ်သား ၁၀၀ ကျော် ကိုဗစ်ကူးစက်ခံထားရပြီး အဲဒီအချုပ်သားတွေကို အချုပ်ခန်းထဲမှာပဲ ဆေးကုသပေးနေတာလို့ သိရပါတယ်။

ကိုဗစ်ကြောင့်သေဆုံးသွားတဲ့ အချုပ်သားဟာ အသက် ၂၇ နှစ်အရွယ် မောင်ဖိုးပြူးဖြစ်ပြီး ဟုမ္မလင်းမြို့နယ် မာလုံကျေးရွာကလို့ သိရပါတယ်။

ခန္တီးမြို့ အချုပ်ခန်းမှာ ဇူလိုင် ၂၇ ရက်နေ့ကလည်း အချုပ်သား ၁ ဦး ကိုဗစ်-၁၉ ရောဂါနဲ့ သေဆုံးခဲ့ပါတယ်။ခန္တီးမြို့မှာ ဇူလိုင် ၃၀ ရက်အထိ ကိုဗစ်-၁၉ အတည်ပြုလူနာ ၂၅၄ ဦး၊ သေဆုံးသူ ၈ ဦးရှိပြီလို့ သိရပါတယ်။

2 months Ago
More News
Up