အခက်အခဲကြုံ

August 27, 2020

အသွားအလာကန့်သတ်မှုကြောင့် လည်ပတ်သူမရှိတော့၍ ထိုင်းဘေးမဲ့တော အခက်အခဲကြုံ

ကိုရိုနာဗိုင်းရပ်စ် ကပ်ဘေးကြောင့် ထိုင်းနိုင်ငံက နယ်စပ်တွေကို ပိတ်ပစ်ပြီး အသွားအလာ အဝင်အထွက် တင်းပြည့်ကြပ်ပြည့် ကန့်သတ်ခဲ့အပြီးမှာ နိုင်ငံအလယ်ပိုင်းက သားရဲဘေးမဲ့တောကို လာရောက်လည်ပတ်သူမရှိတော့လို့ ဝင်ငွေ ဆိုးဆိုးကျဆင်းခဲ့တာကြောင့် ဆက်လက်ရပ်တည်ရေး အခက်အခဲကြုံတွေ့နေတယ်လို့ သိရပါတယ်။ သစ်ထုတ်စခန်းကို လာရောက်လည်ပတ်တဲ့ ကမ္ဘာလှည့်ခရီးသည်တွေအပေါ် အဓိက မှီခို နေရတာပါ။ ပြီးခဲ့တဲ့ ၆ လလုံး လာရောက်လည်ပတ်သူ လုံးဝ မရှိတော့တာမို့ ဝင်ငွေ ၇၅ ရာခိုင်နှုန်း ဆုံးရှုံးခဲ့တယ်လို့ သားရိုင်းမိတ်ဆွေများ ဖောင်ဒေးရှင်းတည်ထောင်သူက ပြောပါတယ်။ ဘန်ကောက်အနောက်တောင်ဘက် ၁၀၆ မိုင်အကွာက ဘေးမဲ့တောအတွက် မြေနေရာကို အနားက ဘုန်းတော်ကြီးကျောင်းက လှူထားတာပါ။ တိရစ္ဆာန်ကောင်ရေ ၈၀၀ ကျော်ရှိတဲ့ ဘေးမဲ့တောအတွက် တလကို အမေရိကန်ဒေါ်လာ လေးထောင် ကုန်ကျစရိတ်ရှိပြီး များသောအားဖြင့် စေတနာ့ဝန်ထမ်းတွေကို မှီခိုခဲ့တာပါ။  ခုတော့ တိရစ္ဆာန်အစားအစာတွေ တရက် ၂ ကြိမ် ပြင်ဆင်ပေးနေတဲ့ စေတနာ့ဝန်ထမ်း တယောက်သာ ကျန်ပါတော့တယ်။  ကပ်ဘေးကာလအတွင်း ပိုင်ရှင်တွေက ဆက်ပြီး မစောင့်ရှောက်နိုင်တော့တဲ့ မျောက်နဲ့ဆင် ကောင်ရေ လေးဆယ်လောက်ကိုလည်း လက်ခံပေးထားရပါသေးတယ်။  ပုဂ္ဂလိက အလှူရှင်တွေ၊ အစိုးရ မဟုတ်တဲ့ အဖွဲ့အစည်းတွေနဲ့ ထိုင်းအစိုးရတို့ဆီက ရတဲ့ ရန်ပုံငွေနဲ့လည်း မလောက်ငတော့ဘူးလို့ ဆိုပါတယ်။  ထိုင်းနိုင်ငံထဲကို ၂၀၁၉ ခုနှစ်က ကမ္ဘာလှည့်ခရီးသည် ဦးရေ ၃၉ ဒသမ ၈ သန်း စံချိန်တင် ဝင်ရောက်ခဲ့တာပါ။  ဒါပေမယ့် နယ်စပ်တွေကို ပိတ်အပြီး ၂၀၂၀ မှာတော့ ကမ္ဘာလှည့်ခရီးသည် ၈ သန်းသာ လာမယ်လို့ မျှော်လင့်ထားပါတယ်။  နိုင်ငံရဲ့ စီးပွားရေးဟာလည်း ၁၉၉၈ နောက်ပိုင်းမှာ အကြီးဆုံး ကျဆင်းခဲ့ပါတယ်။ 
1 year Ago

August 17, 2020

စိတ်ကျန်းမာရေးမကောင်းသည့် မြန်မာအမျိုးသမီး ၁ ဦး တရုတ်နိုင်ငံတွင် အခက်အခဲကြုံနေ

တရုတ်နိုင်ငံထဲမှာ ရောက်နေတဲ့ မြန်မာအမျိုးသမီးဦးဟာ စိတ်ကျန်းမာရေးအခြေအနေ ကြောင့် ဘယ်သူဘယ်ဝါ မစိစစ်နိုင်ဘဲ သိရှိသူတွေအနေနဲ့ အကြောင်းကြားပေးဖို့ တရုတ်နိုင်ငံဆိုင်ရာ မြန်မာသံရုံးက အကူအညီတောင်းထားပါတယ်။ တရုတ်နိုင်ငံ ကျန်ရှီးပြည်နယ်၊ ဖန်းချောင်မြို့မှာ မြန်မာနိုင်ငံသားလို့ ယူဆရတဲ့ အမျိုးသမီးတယောက်ကို ဇူလိုင် ၉ ရက်က ဖန်းချောင်မြို့ ပြည်ဝင်ပြည်ထွက် စီမံခန့်ခွဲရေးဌာနက တွေ့ခဲ့တာပါ။ သူ့မှာ နာမည်၊ လိပ်စာ၊ နိုင်ငံသားအထောက်အထား တခုမှ မပါဘဲ စိတ်ကျန်းမာရေး အခြေအနေကြောင့် ဖန်းချောင်မြို့ ဆေးရုံမှာ ထိန်းသိမ်းစောင့်ရှောက်ထားပါတယ်။ စကားပြန်က တဆင့်မေးမြန်းရာမှာတော့ မြန်မာစကား နည်းနည်းပြောတတ်တာကြောင့် မြန်မာနိုင်ငံသားလို့ ယူဆပြီး မြန်မာသံရုံးက ဖုန်းနဲ့ ဆက်သွယ်မေးမြန်းရာမှာလည်း နာမည်ကိုတော့ မဖြေနိုင်ခဲ့ဘူးလို့ ဆိုပါတယ်။ ကိုဗစ်-၁၉ ကန့်သတ်ချက်တွေကြောင့် မြန်မာသံရုံးတာဝန်ရှိသူတွေအနေနဲ့ လူကိုယ်တိုင်သွားနိုင်ဖို့ အကန့်အသတ်ဖြစ်နေပြီး ဖုန်းနဲ့ပဲ အကြိမ်ကြိမ်မေးခဲ့ရာမှာလည်း မကွေးတိုင်းကလာတယ်၊ မူဆယ်က လာတယ်လို့ ဖြေကြားနေတယ်လို့ ဆိုပါတယ်။ ဒီအမျိုးသမီးကို သိရှိသူ၊ သူနဲ့ပတ်သက်တဲ့ သတင်းအချက်တွေ သိရှိသူတွေအနေနဲ့ ပေကျင်းမြို့ မြန်မာသံရုံးဖုန်း +၈၆ ၀၁၀ ၆၅၃ ၂၄ ၅၅၄ နဲ့ +၈၆ ၁၃၂၆ ၀၁၁ ၃၈၉၉ တို့ကို ဆက်သွယ်ပေးဖို့ သံရုံးက ထုတ်ပြန်ထားပါတယ်။
1 year Ago
More News
Up