အခက်ကြုံ

December 2, 2022

လျှပ်စစ်မီးပြတ်တောက်မှု ၅ ရက်ခန့်ရှိပြီဖြစ်၍ ကလေးဒေသခံများ အခက်ကြုံ

စစ်ကိုင်းတိုင်း ကလေးမြို့မှာ  လျှပ်စစ်မီးအချိန်ကြာမြင့်စွာပြတ်‌ တောက်နေတာ၊ လျှပ်စစ်မီးကို နာရီပိုင်းနဲ့သာ ရရှိနေတာကြောင့် ကလေးမြို့ခံတွေဟာ ထမင်းဟင်းချက်ပြုတ်ရာမှာ လျှပ်စစ်မီး အစား ထင်း၊မီးသွေးကိုသာ အသုံးပြုနေကြရတယ်လို့ မြို့ခံတွေကပြောပါတယ်။

ကလေးမြို့ခံ အိမ်ရှင်မက "မီးက အမြဲလိုလို ပျက်တယ်။ အခုလည်း လုံးဝ မီးမလာတာ ၅ ရက် လောက်ရှိပြီ။ ပုံမှန်ဆို ညပိုင်းတော့ ကောင်းကောင်းရတယ်။ နေ့ခင်းဆို တရက်ကို ရပ်ကွက်အလိုက် အလှည့်ကျ ၃ နာရီ ပဲရတယ်။"လို့ ဆိုပါတယ်။

မြို့ပေါ်မှာ ထင်းရှားပြီး အသုံးနည်းကာ မီးသွေးကိုသာ အသုံးများတာကြောင့်  ရိုးရိုးမီးသွေး တအိတ်ကို အရင်ကျပ် ၄၀၀၀ မှ အခု ၈၅၀၀ ကျပ်အထိ၊ ကျို့သား(ရှယ်)မီးသွေး တအိတ်ကို အရင် ကျပ် ၆၀၀၀ ဝန်းကျင်ကနေ အခု ၁၂၀၀၀ လောက်အထိ မြင့်တက်နေတယ်လို့ သိရပါတယ်။

မီးသွေးဈေးမြင့်တက်ရတာဟာ ဝယ်ယူသုံးစွဲသူ များလာတာကြောင့် မဟုတ်ဘဲ မီးသွေးဖုတ်တဲ့ လုပ်ငန်းခွင်မှာ လုပ်သားစရိတ် မြင့်တက်တာတွေ၊ ဝေးလံခေါင်ဖြားတဲ့ တောတောင်တွေမှာ လုပ်ကိုင်ရတာတွေ၊ သယ်ယူစရိတ်(တန်ဆာခ) များပြားတာကြောင့် ဈေးမြှင့်ရောင်းရတာလို့ မီးသွေးလုပ်ငန်း ရောင်းဝယ်လုပ်ကိုင်တဲ့သူ တဦးက ပြောပါတယ်။

"သစ်တောတွေ ရှားလာတယ်။ မီးသွေး ဖုတ်ရတာကလည်း မလွယ်ဘူး။ သစ်ပင် ထိန်းရတယ်။ ဖြတ်ရတယ်။ မြေကျင်းတူးရတယ်။ လူလုပ်အား လိုအပ်တယ်။ ခေတ်ကာလက မကောင်းတော့ တောင်တောင်ထဲမှာ မီးသွေးဖုတ်ရတာလည်း မလွယ်ပါဘူး။"

လျှပ်စစ်မီးဟာ နိုဝင်ဘာ ၂၈ ရက်က စတင်ပြတ်တောက်နေတာဖြစ်ပြီး မကွေးတိုင်း၊ ပေါက်မြို့နယ်ဘက်မှာ ၂၃၀ ကေဗွီ ဓာတ်အားလိုင်းပြတ်တောက်နေတာကြောင့် ပြုပြင်တဲ့ လုပ်ငန်း တွေ စတင်နေပြီလို့ ကလေးမြို့လျှပ်စစ်ရုံးက တာဝန်ရှိသူ တဦးက သူ့ရဲ့ လူမှုကွန်ရက် စာမျက်နှာမှာ‌‌အသိပေးထားပါတယ်။

ဓာတ်အားလိုင်း ပြတ်တောက်နေတာကြောင့် စစ်ကိုင်းတိုင်းက ကလေးမြို့အပါအဝင် တမူး၊ ကလေးဝ၊ ရာဇဂြိုလ်၊ ခမ်းပါတ်မြို့‌‌တွေနဲ့ ချင်းပြည်နယ်က မြို့တွေပါ ပြတ်တောက်နေတာ ဖြစ်ပါတယ်။

ဓာတ်ပုံ-Crd(လူမှုကွန်ယက်)

2 months Ago

October 19, 2022

နေပြည်တော်တွင် နိုင်ငံကူးလက်မှတ်လုပ်သူများလာ၊ အချိန်ကြန့်ကြာမှုကြောင့် အခက်ကြုံ

နေပြည်တော်မှာ ပြည်ပထွက်အလုပ်လုပ်ဖို့အတွက် နိုင်ငံကူးလက်မှတ် ပတ်စ်ပို့ပြုလုပ်ရာမှာ ကြန့်ကြာမှုတွေ၊ အဆင်မပြေမှုတွေ အရင်ကထက်များလာတယ်လို့ ဒေသခံတွေက ပြောပါတယ်။

စစ်အာဏာသိမ်းတဲ့ ၂၀၂၁ ဖေဖော်ဝါရီနောက်ပိုင်း မြန်မာနိုင်ငံကနေ ပြည်ပထွက်အလုပ်လုပ်သူဦးရေ မြင့်တက်လာခဲ့ပြီး နေပြည်တော်ဒေသအတွင်းက လူငယ်လူရွယ်တွေလည်း အပါအဝင်ဖြစ်ပါတယ်။

ပုဗ္ဗသီရိမြို့နယ်နေ အမျိုးသမီးတဦးက "အဓိကကတော့ ပြည်တွင်းအလုပ်အကိုင်ရှားပါးတာရယ်၊ လခနည်းတာရယ်ပေါ့။ ဒီမှာက ဝင်ဝင်ချင်းဆို အလွန်ဆုံးရမှ ၂ သိန်းလောက်ရတာ။ ဒီကုန်ဈေးနှုန်းနဲ့ ဘယ်လိုသွားသုံးမလဲ။ ဒီတော့ အကုန် မလေးတို့၊ ထိုင်းတို့ သွားကြတာပေါ့။ အိမ်က သား ၂ ယောက်လုံးလည်း မလေးမှာပဲလေ" လို့ ပြောပါတယ်။

ပြည်ပထွက် အလုပ်လုပ်လိုသူများပြာလာတဲ့အတွက် နိုင်ငံကူးလက်မှတ်ပြုလုပ်သူ အရေအတွက် သိသိသာသာများပြားလာတယ်လို့ ဆိုပါတယ်။ 

ပတ်စ်ပို့ကို ကိုယ်တိုင်ပြုလုပ်ပါက ၆ သောင်းခွဲ ၇ သောင်းဝန်းကျင်သာကုန်ကျမှာဖြစ်ပေမယ့် ပွဲစားနဲ့ အမြန်ပြုလုပ်သူများပြားလာတဲ့အတွက် ပြင်ပပေါက်ဈေး ၂ သိန်းဝန်းကျင်ခန့် ဖြစ်နေတယ်လို့ ပတ်စ်ပို့ပြုလုပ်လိုသူ ပျဉ်းမနားမြို့နယ်နေ လူငယ်တဦးက ပြောပါတယ်။

"ကျနော်အရင်က ကိုယ်တိုင်လုပ်မယ်ဆိုပြီး လုပ်ထားတာ။ အဲ့တာ ၂ လလောက်ခွာပြီးချိန်းတယ်။ လူတွေ အရမ်းများနေလို့တဲ့။ အဲ့တာ အခု သူတို့ပြောတဲ့ရက်ရောက်လို့ လာတော့လည်း နာမည်စာရင်း မပါဘူးပြောတယ်။ အခုပွဲစားနဲ့ လုပ်မယ်ဆိုတော့လည်း ၂ သိန်းလောက်ကုန်မယ်။ အချိန်အတိအကျတော့ ပြောမရဘူး။ အတတ်နိုင်ဆုံး အမြန်ရအောင်လုပ်ပေးမယ်လို့တော့ ပြောတာပဲ။”

မြန်မာနိုင်ငံကနေ ပြည်ပထွက်အလုပ်လုပ်လိုသူ အများစုဟာ ဒေသတွင်း ထိုင်း၊ စင်ကာပူ၊ မလေးရှား အစရှိတဲ့ နိုင်ငံတွေကို သွားရောက်ကြတာဖြစ်ပြီး ကုန်ကျစရိတ်ကတော့ ဒေါ်လာဈေးအခြေအနေပေါ်မူတည်တယ်လို့လည်း ဆိုပါတယ်။ 

ထိုင်းနိုင်ငံကို သွားရောက်လုပ်ကိုင်မယ့်သူတွေအနေနဲ့ အလုပ်ပေါ်မူတည်ပြီး ကျပ်ငွေ ၁၇ သိန်းလောက်ကနေ ၂၄ သိန်းဝန်းကျင် ကုန်ကျနိုင်ပြီး မလေးရှားကို သွားရောက်လိုသူတွေကတော့ အနည်းဆုံး ၃၅ သိန်းလောက်ကနေ ၄၅ သိန်းဝန်းကျင်လောက် ကုန်ကျနိုင်တယ်လို့ သိရပါတယ်။

3 months Ago
More News
Up