အကြမ်းဖက်စစ်အုပ်စု

August 25, 2022

စစ်အုပ်စု ဗုံးကြဲတိုက်ခိုက်မှုကြောင့် ကျဆုံးခဲ့သည့် ကောလင်းဒေသခံ ၄ ဦးအပါအဝင် ကျဆုံးပြည် သူ ၂၂၄၀ ခန့် ရှိလာ

မြန်မာနိုင်ငံမှာ အာဏာသိမ်း ၁ နှစ်ခွဲကျော်အကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူ ၂,၂၃၉ ယောက်နဲ့ ဖမ်းဆီးထိန်းသိမ်းခံရသူပေါင်း ၁၅,၂၁၆ ယောက်ထိရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ ဩဂုတ် ၂၄ ရက်အထိ အေအေပီပီက ကောက်ယူမှတ်တမ်းပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြပါ တယ်။

နွေဦးတော်လှန်ရေးကာလအတွင်း ဒီနေ့အထိ ၁၂,၁၁၉ ယောက် လက်ရှိ ချုပ်နှောင်ခံထားရဆဲဖြစ်ပြီး အဲဒီထဲက ၁,၄၀၁ ယောက်ကတော့ ထောင်ဒဏ် ချမှတ်ခံထားရပါတယ်။

တော်လှန်ရေးနဲ့ ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေထဲ ထိန်းသိမ်းခံနေရသူအရေတွက်ကတော့ ၈၃ ယောက်ရှိနေပြီး မျက်ကွယ် သေဒဏ်ချမှတ်ခံထားရသူ ၄၂ ယောက်အပါအဝင် ၁၂၁ ယောက်ကတော့ မျက်ကွယ်ပြစ်ဒဏ်ချမှတ်ခံထားရတာကြောင့် သေဒဏ်ချမှတ်ခံထားရသူ စုစုပေါင်း ၁၂၅ ယောက် ရှိလာခဲ့ပြီဖြစ်ပါတယ်။

လတ်တလောအချိန်ထိ အာမခံနဲ့ လွတ်မြောက်သူ ၂၂ ယောက်ရှိပြီး ပြန်လည်လွတ်မြောက်လာသူဦးရေကတော့ ၃,၀၇၅ ယောက် ရှိခဲ့တယ်လို့ ဆိုပါတယ်။ ဒါ့အပြင် အေအေပီပီကနေ လက်လှမ်းမီသမျှ မှတ်တမ်း ပြုစုထားချက်အရ အာဏာသိမ်းချိန်ကနေ ပြီးခဲ့တဲ့ ဇူလိုင်လကုန်ထိ အကြမ်းဖက်စစ်အုပ်စုက မတရားချိပ်ပိတ်သိမ်းဆည်းခဲ့တဲ့ နေအိမ်၊ အဆောက်အဦ အရေအတွက် စုစုပေါင်း ၇၀၉ ခုထက်မနည်းရှိခဲ့တယ်လို့ ဆိုပါတယ်။

ပဲခူးတိုင်း၊ ကျောက်ကြီးမြို့နယ်၊ ကျွန်းပင်ဆိပ်ကျေးရွာမှာ တပ်စွဲထားတဲ့ အကြမ်းဖက်စစ်အုပ်စုရဲ့ ခမရ-၆၀၃ တပ်က စာဘူးတောင်းကျေးရွာသား စောမေထူးနဲ့ မဲမဲကျေးရွာသား စောကြီးငေး တို့ကို ဩဂုတ် ၁၅ ရက် က ဖမ်းဆီးခဲ့ပြီးနောက် ညှဉ်းပန်းနှိပ်စက်ခဲ့ကြပါတယ်။ ဩဂုတ် ၁၇ ရက်မနက် ၁၀ နာရီအချိန်မှာတော့ အဆိုပါရွာသား ၂ ယောက်ကို သတ်ဖြတ်ခဲ့တယ်လို့ သိရပြီး သူတို့ ၂ ယောက်ဟာ ကျေးရွာတွင်း ကျန်ရှိခဲ့တဲ့ အိမ်မွေးတိရစ္ဆာန်တွေကို ပြန်ကြည့်ချိန်မှာ ဖမ်းဆီးခံခဲ့ရတာလို့ ဆိုပါတယ်။

ဒါ့အပြင် ဩဂုတ် ၂၃ ရက်ည ၁၁ နာရီ ၄၁ မိနစ်အချိန်က စစ်ကိုင်းတိုင်း၊ ကောလင်းမြို့အနောက်ဘက်ခြမ်းက သစ်ဆိမ့်ကုန်းကျေးရွာကို အကြမ်းဖက်စစ်အုပ်စုက လေကြောင်းနဲ့ ဗုံးကြဲတိုက်ခိုက်ခဲ့တာကြောင့် ကျေး ရွာအတွင်းရှိ ဒေသခံ ၄ ယောက်ဟာ နေရာတင် သေဆုံးခဲ့ပြီး ၁ ယောက်ဒဏ်ရာရရှိခဲ့တယ်လို့ သိရပါတယ်။ သေဆုံးခဲ့တဲ့ ဒေသခံတွေကတော့ အသက် ၆ နှစ်ခွဲအရွယ် မောင်ပြည့်စုံ၊ ကိုမိုးအောင်၊ ဇနီးမောင်နှံ ၂ ယောက်ဖြစ်တဲ့ ကိုဇင်မျိုးထွန်းနဲ့ မဖြူဇာဝင်း တို့ဖြစ်ပြီး မဖြူဇာဝင်းမှာ ကိုယ်ဝန် ကိုးလလွယ်ထားရတယ်လို့ သိရပါတယ်။

အရပ်ဘက်အဖွဲ့အစည်းတွေက ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်းသမားတွေ၊ CDM လှုပ်ရှားနေတဲ့ ဝန်ထမ်းတွေ စတဲ့ နယ်ပယ်အသီးသီးမှ ဘယ်သူမဆို ဖမ်းဆီး၊ ထိန်းသိမ်း၊ တရားစွဲဆိုခံထားရတာတွေနဲ့ ပတ်သက်လို့ နွေဦးတော်လှန်ရေး ကာလအတွင်း ကျဆုံးသွားသူတွေရဲ့ အချက်အလက်တွေကို သိရှိပါက အေအေပီပီကို ဆက်သွယ်အသိပေး အကြောင်းကြားနိုင်ပါတယ်။

ဒါ့အပြင် ကျဆုံးအချက်အလက်တွေကို ဖော်ပြပါ [email protected] အီးမေးလ်နဲ့ အဖမ်းအဆီး အချက်အလက်တွေကို [email protected] အီးမေးလ်တွေဆီလည်း တိုက်ရိုက်ပေးပို့ ဆက်သွယ်အကြောင်းကြားနိုင်ကြောင်း အသိပေးထားပါတယ်။

Photo-AAPP

5 months Ago

March 6, 2022

အကြမ်းဖက်စစ်အုပ်စုက မွေးရာပါနိုင်ငံသားတွေကို နိုင်ငံသားဖြစ်ခွင့်မှ ပယ်ဖျက်နိုင်သလား

အကြမ်းဖက်စစ်အုပ်စုက မြန်မာနိုင်ငံမှာ မွေးဖွားကြီးပြင်းခဲ့တဲ့ မြန်မာနိုင်ငံသား ၁၁ ဦးကို ၁၉၈၂ နိုင်ငံသား ဥပဒေပုဒ်မ ၆၇ ပါ ဗဟိုအဖွဲ့ လုပ်ပိုင်ခွင့်အရ၊ ဥပဒေပုဒ်မ ၁၆ နဲ့အညီ နိုင်ငံသားအဖြစ်မှ ရပ်စဲတယ်ဆိုပြီး မတ်လ ၅ ရက်နေ့ ဝါဒဖြန့်သတင်းစာမှာ ဖော်ပြထားတယ်။ မွေးရာပါ မြန်မာနိုင်ငံသား ပုဂ္ဂိုလ်တွေကို စကစအုပ်စုက ဒီလို ရပ်စဲပိုင်ခွင့် ရှိသလား။  ၁၉၈၂ မြန်မာနိုင်ငံသားဥပဒေကိုပဲ ကိုးကားပြီး  မွေးရာပါမြန်မာနိုင်ငံသားတွေကို နိုင်ငံသားအဖြစ်ရပ်စဲမှု အမိန့်ထုတ်နိုင်အောင် အဲဒီ ၁၉၈၂ ဥပဒေက နိုင်ငံသားဖြစ်မှု ပယ်ဖျက်ခွင့်ကို လွယ်လွယ်ပဲ ပေးထားသလား။  

အခန်း (၂) နိုင်ငံသားဖြစ်ခြင်း၊ ပုဒ်မ (၃) မှာဖော်ပြထားတာက ‘နိုင်ငံတော်တွင် ပါဝင်သော နယ်မြေတခုခု၌ မြန်မာသက္ကရာဇ် (၁၁၈၅) ခုနှစ်၊ ခရစ်သက္ကရာဇ်(၁၈၂၃) ခုနှစ်မတိုင်မီကာလမှစ၍ ပင်ရင်းနိုင်ငံအဖြစ် အမြဲနေထိုင်ခဲ့သော ကချင်၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်း စသည့် တိုင်းရင်းသားများနှင့် "မျိုးနွယ်စုများ"သည် မြန်မာနိုင်ငံသား ဖြစ်သည်၊

ပုဒ်မ (၄)- မည်သည့်မျိုးနွယ်စုသည် တိုင်းရင်းသားဖြစ်သည် မဖြစ်သည်ကို နိုင်ငံတော်ကောင်စီက ဆုံးဖြတ်သည်၊ (စာရေးသူ၏စကားချပ်.. မဆလခေတ်က ပြဋ္ဌာန်းခဲ့တဲ့ ဥပဒေမို့ တိုင်းရင်းသားဖြစ်ခြင်း မဖြစ်ခြင်းကို နိုင်ငံတော်ကောင်စီက ဆုံးဖြတ်တယ်၊ ယခုခေတ် ဘယ်နိုင်ငံမှာမဆို ရွေးချယ်ခံ တရားဝင် ပြည်ထောင်စုအစိုးရအဖွဲ့ကသာ အတည်ပြုနိုင်တာပါ)။

ပုဒ်မ(၅)- တိုင်းရင်းသားတိုင်းလည်းကောင်း၊ တိုင်းရင်းသားမိဘနှစ်ပါးမှ မွေးဖွားသူတိုင်းသည်လည်းကောင်း၊ မွေးရာပါနိုင်ငံသားဖြစ်သည်။

ပုဒ်မ(၆) ဤဥပဒေအာဏာတည်သည့်နေ့တွင် နိုင်ငံသားဖြစ်ပြီးသူသည် နိုင်ငံသားဖြစ်သည်။

ပုဒ်မ(၈) (က) နိုင်ငံတော်ကောင်စီသည် နိုင်ငံတော်၏ အကျိုးငှာ မည်သူမဆို နိုင်ငံသား၊ သို့မဟုတ် ဧည့်နိုင်ငံသား ၊သို့မဟုတ် နိုင်ငံသားပြုခွင့်ရသူအဖြစ် သတ်မှတ်နိုင်သည်၊

(ခ)  နိုင်ငံတော်ကောင်စီသည် နိုင်ငံတော်၏ အကျိုးငှာ "မွေးရာပါနိုင်ငံသား " မှအပ မည်သူကိုမဆို နိုင်ငံသား၊ သို့မဟုတ် ဧည့်နိုင်ငံသား၊ သို့မဟုတ် နိုင်ငံသားပြုခွင့်ရသူအဖြစ်မှ ရုပ်သိမ်းနိုင်သည်။ (စာရေးသူ စကားချပ်- မွေးရာပါနိုင်ငံသားကို နိုင်ငံသားဖြစ်ခွင့်မှ ရုပ်သိမ်းနိုင်ခွင့်မရှိ)

ပုဒ်မ(၁၄)- နိုင်ငံသားတစ်ဦးဦးသည် နိုင်ငံတော်ပါဝင်နေသော စစ်မက်ကာလအတွင်း  နိုင်ငံသားအဖြစ်ကို စွန့်လွှတ်ခွင့်မရှိစေရ " ၊

ပုဒ်မ(၁၆)- နိုင်ငံသားတစ်ဦးသည် နိုင်ငံတော်မှ  အပြီးအပိုင်ထွက်ခွာလျှင်ဖြစ်စေ၊ အခြားနိုင်ငံ၏ နိုင်ငံသားအဖြစ်ခံယူလျှင် သို့မဟုတ် မှတ်ပုံတင်လျှင်ဖြစ်စေ၊ အခြားနိုင်ငံကူးလက်မှတ် သို့မဟုတ် အလားတူလက်မှတ်ကို ထုတ်ယူလျှင်ဖြစ်စေ၊ နိုင်ငံသားအဖြစ်မှရပ်စဲသည်၊

ပုဒ်မ(၁၇)- မွေးရာပါနိုင်ငံသားတစ်ဦးကို  ပုဒ်မ (၁၆) ပါ ပြဋ္ဌာန်းချက်နှင့် ငြိစွမ်းသဖြင့် နိုင်ငံသားအဖြစ်မှ ရပ်စဲသည့် ကိစ္စမှတစ်ပါး အခြားမည်သည့်အခြေအနေတွင်မျှ နိုင်ငံသားအဖြစ်မှ ရုပ်သိမ်းခြင်းမရှိစေရ …

စသည် ဖော်ပြထားပါတယ်။

၁၉၈၂ နိုင်ငံသားဥပဒေကို ဆက်လက်ကျင့်သုံးနေဆဲဖြစ်တဲ့အတွက် အထက်ပါပုဒ်မများကလည်း တည်ဆဲ ဖြစ်ပါတယ်။ ယခု နစက မှထုတ်ပြန်ကြေညာလိုက်တဲ့ မွေးရာပါနိုင်ငံသား (၁၁) ဦးအား နိုင်ငံသားအဖြစ်မှ ရပ်စဲခြင်းဆိုတာက အဆိုပါတည်ဆဲ လဝကဥပဒေတွေကို ၎င်းတို့လိုသလို အသုံးပြုသုံးစွဲခြင်းသာ ဖြစ်တယ်လို့ မှတ်ယူရပါမယ်။ အဆိုပါပုဂ္ဂိလ် ၁၁ ဦးက ပြည်ပနိုင်ငံများသို့ အပြီးအပိုင် ထွက်ခွာမှု မဟုတ်ပါပေ။  နိုင်ငံ့အကျိုးငှာ နိုငံသားတစ်ဦး၏ တာဝန်ကို ထမ်းဆောင်ခြင်း သို့မဟုတ် နိုင်ငံရေးလုပ်ဆောင်နေခြင်း ဖြစ်ပါတယ်။ သို့ကြောင့်  ၁၉၈၂ နိုင်ငံသားဥပဒေ၊ ပုဒ်မ (၁၆) ကို ချိုးဖောက်ကျုးလွန်မှု မရှိပါပေ။ အခြားနိုင်ငံသားအဖြစ် သူတို့ခံယူပါမှ မြန်မာနိုင်ငံသားအဖြစ် ပယ်ဖျက်ခွင့် ရှိပါတယ်။

ပုဒ်မ (၆၇) အရ နိုင်ငံတော်ဗဟိုအဖွဲ့ရဲ့  ပုဒ်မ (၆၈) ဆိုင်ရာ လုပ်ပိုင်ခွင့်တွေကို နစကအဖွဲ့က တလွဲအသုံးချ လုပ်ဆောင်မှုသာလျှင်ဖြစ်ပါပေသည်၊။  မြန်မာနိုင်ငံသား ၁၁ ဦးရဲ့ လူ့ဂုဏ်သိက္ခာကို ညှိးနွမ်းအောင် ၁၉၈၂ နိုင်ငံသားဥပဒေကို ချိုးဖောက် ကျုးလွန် လုပ်ကိုင်ခြင်းသာ ဖြစ်တယ်။ ဥပဒေကျူးလွန်ဖောက်ဖျက်သူတွေ အနေနဲ့ တချိန်မှာ ပြန်လည်တရားရင်ဆိုင်ရမှာ ဖြစ်ပါတယ်။ စစ်ကောင်စီတို့ လက်ကိုင်ပြုနေဆဲဖြစ်တဲ့ ဖွဲ့စည်းပုံအခြေခံဥပဒေ၊ ပုဒ်မ(၄၄) မှာလည်း လူ့ဂုဏ်သိက္ခာ ညှိုးနွမ်းသေးသိမ်စေသည့် ပြစ်ဒဏ်ပြဋ္ဌာန်းခွင့် မရှိစေရ ဆိုတာ ပါရှိပါတယ်။

နောက်ပြီး နိုင်ငံသားတွေရဲ့ တရားဝင် ဥပဒေနဲ့အညီ ပိုင်ဆိုင်ထားပါသော အိုးအိမ်အဆောက်အဦများအား ချိတ်ပိတ်သိမ်းယူမှုနှင့် ပစ္စည်းပစ္စယများကို လုယူ သိမ်းယူ၊ ဖျက်ဆီး မီးရှို့မှုတွေက ၎င်းတို့ တသသဖြစ်နေတဲ့ ဖွဲ့စည်းပုံအခြေခံဥပဒေပါ ပြဋ္ဌာန်းချက်တွေကို ၎င်းတို့ကိုယ်တိုင် ချိုးဖောက်နေခြင်းသာ ဖြစ်ပါတယ်။ ပုဒ်မ (၃၅၆)- နိုင်ငံတော်သည် နိုင်ငံသားများ၏ တရားဝင်ရရှိပိုင်ဆိုင်ထားသော ရွှေ့ပြောင်းနိုင်သောပစ္စည်း၊ မရွှေ့ပြောင်းနိုင်သော ပစ္စည်းများနှင့်စပ်လျဉ်း၍ ဥပဒေအရကာကွယ်ပေးရမည် ဆိုတာ ပါရှိပါတယ်။

အထက်ပါ အချက်တွေကို ကြည့်ရင် စစ်ကောင်စီအကြမ်းဖက်အဖွဲ့က ၎င်းတို့လက်ကိုင်ပြုနေတဲ့ ၁၉၈၂ နိုင်ငံသားဥပဒေကိုလည်း အလွဲသုံးပြီး မွေးရာပါနိုင်ငံသားတွေကို နိုင်ငံသားအဖြစ်မှ ပယ်ဖျက်နေသလို၊ ၎င်းတို့ ပြဋ္ဌာန်းထားတဲ့ ၂၀၀၈ အခြေခံဥပဒေကိုလည်း ချိုးဖောက်လုပ်ကိုင်နေတဲ့အတွက် မြန်မာနိုင်ငံမှာ ဥပဒေမဲ့ အုပ်ချုပ်မှုသာ ရှိတယ်လို့ပဲ ဆိုရပါမယ်။ ဥပဒေမဲ့အုပ်ချုပ်မှုအောက်မှာ မှန်ကန်မျှတတဲ့ တရားစီရင်ရေး၊ တရားဝင် အမိန့်အာဏာတို့ လုံးဝမရှိနိုင်ပါ။ အာဏာကို တရားမဝင်လုယူထားတဲ့ နစကရဲ့ တောရိုင်းဥပဒေ စိုးမိုးမှုအောက်မှာ မြန်မာနိုင်ငံသားတွေရဲ့ လွတ်လပ်မှု လုံခြုံမှု လုံးဝဆိတ်သုဉ်းနေပါတယ်။

မြန်မာနိုင်ငံသားတွေ လွတ်လပ်မှု၊ လုံခြုံမှု ဥပဒေစိုးမိုးမှု၊ မှန်ကန်တဲ့တရားစီရင်မှု အမြန်ဆုံး ပြန်လည် ရရှိပါစေ…။

ရွှေဟင်္သာ

11 months Ago
More News
Up