အကြမ်းဖက်စစ်ကောင်စီ

November 8, 2022

အကြမ်းဖက်စစ်‌ကောင်စီ၏ ယုတ်မာမှုတိုင်းသည် ပြည်သူ့တော်လှန်ရေးအတွက်‌ တွန်းအားပေးလောင်စာ (သို့) ခေတ်ပြောင်းစွမ်းအား

အသိဉာဏ်ခေါင်းပါးပြီး မိုက်ရိုင်းရမ်းကားတတ်တဲ့ သတ္တဝါတွေဆိုတာ လက်နက်အားကိုး အစွယ်သွား လက်သည်းခွန်အားသာလျှင် အဖြေလို့ ထင်မှတ်ပြီး ဗိုလ်ကျ အနိုင်ကျင့်တတ်ကြတယ်။ အဲ့ဒီသတ္တဝါတွေဟာ အကြောက်တရားကိုဖန်တီးလို့ တခြားသတ္တဝါတွေအပေါ် စိုးမိုးအနိုင်ယူဖို့ ကြိုးစားရင်း သူတို့ကိုယ်၌က အကြောက်တရားကြီးစွာ ရှင်သန်ကြရတယ်။

အခုလည်း ယုတ်ညံ့သိမ်ဖျင်းလှတဲ့ အကြမ်းဖက်စစ်‌ကောင်စီဟာ ပြည်သူ့ဘဏ္ဍာနဲ့ ဝယ်ထားတဲ့ လက်နက်တွေ အားကိုးပြီး ပြည်သူကို ရက်ရက်စက်စက်နှိပ်ကွပ်လို့ အကြောက်တရား ဖန်တီးရင်း သူတို့မှာ အကြောက်တရားတွေကြီးစိုးလို့ ထိတ်လန့်နေကြပြီဖြစ်ပါတယ်။

ဒီတခေါက် စစ်အာဏာရှင်စနစ် ဖြိုဖျက်ရေး နောက်ဆုံးအဆင့်မှာ မြန်မာပြည်သူတွေ ပေးဆပ်ရတဲ့ အရင်းအနှီးဟာ ကြီးမားလွန်းလှပါတယ်။ သမိုင်းတွင်ရစ်လောက်အောင် စွန့်လွှတ်ပေးဆပ်ရတဲ့ ပြည်သူတိုင်းရဲ့ အသက်တွေ၊ ဘဝ‌တွေ၊ အိုးအိမ်တွေ၊ ဥစ္စာစီးပွားတွေ၊ လွတ်လပ်မှု‌တွေ၊ တန်ဖိုးရှိတဲ့အချိန်တွေ စတဲ့ အရင်းအနှီးတွေ ကြီးမားလေလေ ပြည်သူလူထု ပြန်ရမယ့်အရာတွေကလည်း တန်ဖိုး အလွန်ကြီးမားမှာ ဖြစ်ပါတယ်။

ယမ်းမှုန်လေးတမှုန်ဟာ မီးတောက်သေးသေးလေးသာ ဖြစ်ပေါ်စေနိုင်ပေမဲ့ ယမ်းမှုန်ပေါင်းများစွာဟာ ကြီးမားတဲ့ ပေါက်ကွဲမှုကြီးတွေ ဖြစ်ပေါ်စေနိုင်ပါတယ်။ အမှန်တရားကို မြတ်နိုးကြတဲ့ မြန်မာပြည်သူ သန်း ၅၀ ကျော်ဟာ ယမ်းမှုန်ပေါင်း သန်း ၅၀ ဖြစ်ပါတယ်။

နိုင်ငံသူနိုင်ငံသားတွေက လက်မခံဘဲ တိုင်းပြည်အာဏာကို လုယူထားတဲ့ စစ်အကြမ်းဖက်ကောင်စီရဲ့ လူမဆန်တဲ့ ယုတ်မာရက်စက်မှုတိုင်းဟာ ပြည်သူလူထုကို ယမ်းပုံမီးကျဖြစ်စေလို့ နွေဦးတော်လှန်ရေးအတွက် လောင်စာတွေဖြစ်လာပြီး သမ္မတရူး မင်းအောင်လှိုင်နဲ့ ဓားပြအုပ်စုအတွက် ကိုယ့်သေတွင်း ကိုယ်တူးနေသလို ဖြစ်လာနေပါပြီ။ သူတို့ရက်စက်လေလေ စစ်အာဏာရှင်တော်လှန်ရေး မီးတောက်ကြီးက ကြီးမား အရှိန်ရလာလေလေ ဖြစ်ပါတယ်။

ဒါကြောင့်လည်း ပြီးခဲ့တဲ့ အောက်တိုဘာလ ၂၃ ရက်ည ဖားကန့်ဒေသ အင်နန်းပါ (Nnang Pa) ရွာမှာ စတိတ်ရှိုးလုပ်နေစဉ် စစ်အကြမ်းဖက်တပ်က တမင်ရည်ရွယ်ချက်ရှိရှိနဲ့ တိုက်လေယာဉ်ပျံ‌တွေနဲ့ ဗုံးကြဲပြီး ပြည်သူလူထုကို အစုလိုက်အပြုံလိုက် သတ်ဖြတ်မှုနဲ့ ပတ်သက်ပြီး ကေအိုင်စီဒုဥက္ကဋ္ဌ ဗိုလ်ချုပ်ဂွန်မော်ကနေ အားလုံးရဲ့ ဝမ်းနည်းကြေကွဲမှုနဲ့ မျက်ရည်တွေဟာ တန်ဖိုးမဖြတ်နိုင်တဲ့ ရင်းနှီးမှုတွေ ဖြစ်လာမှာလို့ ပြောဆိုခဲ့တာ ဖြစ်ပါတယ်။

မြန်မာပြည်သူတွေဟာ ဖက်ဆစ်စစ်ဘီလူးတွေရဲ့ ရမ်းကားရက်စက်မှုတွေကြောင့် အစားထိုးမရနိုင်တဲ့ မိမိတို့ရဲ့ ဆုံးရှုံးရမှု၊ ဝမ်းနည်းကြေကွဲရမှုတွေကို တော်လှန်ရေးခွန်အားအဖြစ် အရှိန်မြှင့်နေကြပြီ ဖြစ်ပါတယ်။

ဒီမိုကရေစီရေး၊ လူ့အခွင့်အရေးနဲ့ စစ်အာဏာရှင်စနစ် အကြွင်းမဲ့ဖျက်သိမ်းရေးအတွက် လွန်ခဲ့တဲ့ နှစ်ပေါင်း ၆၀ ကျော်အတွင်းမှာ တိုင်းရင်းသား ရဟန်းရှင်လူ ကျောင်းသားပြည်သူတွေရဲ့ စွန့်လွှတ်ပေးဆပ်ရမှုတိုင်းဟာ အချည်းအနှီး ဖြစ်သွားတယ်ဆိုတာ မရှိပါဘူး။ အညတရ အာဇာနည်အားလုံးရဲ့ အသက်ဘဝ ပေးဆပ်ရမှု အားလုံးရဲ့ အသီးအပွင့် အကျိုးကျေးဇူးတွေကတော့ စစ်အာဏာရှင်ဆန့်ကျင်ရေး တော်လှန်သန္ဓေစိတ်ဓာတ်၊ ယုံကြည်ချက်၊ ခံယူချက်တွေကို သွေးကူမျိုးပွားလို့ လက်ဆင့်ကမ်းလာနိုင်ခဲ့ခြင်း ရလဒ်‌တွေပါပဲ။

သာဓကကိုပြရရင်၊ ၁၉၆၂ ခုနှစ် ဆဲဗင်းဂျူလိုင် အရေးအခင်းမှာ အသက်ပေးသွားရတဲ့‌ ကျောင်းသူ ကျောင်းသားတွေရဲ့ ဖိနှိပ်မှုမခံလိုစိတ်၊ မတရားမှုကို ခေါင်းငုံ့မခံတတ်တဲ့ စိတ်ဓာတ်၊ အမှန်တရားကို အသက်ထက်မြတ်နိုးစိတ်တွေဟာ နှောင်နှစ်တွေမှာ ဖြစ်ပွားခဲ့တဲ့ မှိုင်းရာပြည့် အရေးအခင်း၊ ဦးသန့်အရေးအခင်းမှာ ပါဝင်ဆင်နွှဲကြတဲ့ ကျောင်းသူကျောင်းသားတွေထံ ဝတ်မှုန်ကူးသလို လက်ဆင့်ကမ်း ရောက်လာခဲ့ကြတာ မဟုတ်လား။

အဲဒီနောက် ကမ္ဘာကျော်ခဲ့တဲ့ ရှစ်လေးလုံး လူထုအရေးတော်ပုံကြီးနဲ့တကွ ရွှေဝါရောင်တော်လှန်ရေး စတဲ့ သမိုင်းအဆက်ဆက်မှာလည်း ကျဆုံးခဲ့ရတဲ့ အာဇာနည် ပြည်သူ အထောင်အသောင်းရဲ့ တော်လှန်ရေးဝိညာဉ်သ‌န္ဓေမျိုးစေ့တွေဟာ အခုနောက်ဆုံးပိတ် စစ်အာဏာရှင်စနစ်ကို မြေမြှုပ်သင်္ဂြိုဟ်ပစ်မယ့် ၂၁ ရာစု မြန်မာ့နွေဦး တော်လှန်ရေးကြီးမှာတော့ အရှိန်အဟုန်ကြီးမားစွာ တော်လှန်ရေးအောင်လံကို အမြင့်ဆုံး လွှင့်ထူနေကြတာ မဟုတ်ပါလား။

အဲ့သလိုပါပဲ စစ်အခွင့်ထူးခံ အသိုင်းအဝိုင်းရဲ့ ရမ်းကားစုတ်ပဲ့တဲ့ ယုတ်မာမှုတိုင်းဟာလည်း ဘယ်တော့မှ မေ့ပျောက်သွားမှာ မဟုတ်သလို သူတို့ကျူးလွန်တဲ့ အကုသိုလ် ဒုစရိုက်တွေဟာ သူတို့နောက်ကို ထက်ကြပ်မကွာ လိုက်ပါခြောက်လှန့်ရုံသာမက ဒီဘဝတင်မက သံသရာဘဝ အဆက်ဆက် အခွင့်အခါသင့်တိုင်း ပြန်လည်ပေးဆပ်ကြရမှာ ဖြစ်ပါတယ်။

ဒီဆောင်းပါးကို နိဂုံးချုပ်ရရင်တော့ စစ်မိစ္ဆာအခွင့်ထူးခံ အသိုင်းအဝိုင်းတွေ ကျူးလွန်သမျှ ရမ်းကားယုတ်မာမှု‌တိုင်းဟာ ပြည်သူတွေကို ကြောက်လန့် နောက်ဆုတ်မသွား‌စေဘဲ နှစ်ဖက်သွားဓားပမာ သူတို့ကို ဖျက်ဆီးပစ်ဖို့ ပြည်သူ့တော်လှန်ရေးအတွက်‌ တွန်းအားပေး လောင်စာများအဖြစ်၊ တန်ဖိုးမဖြတ်နိုင်တဲ့ ခေတ်ပြောင်းစွမ်းအားတွေအဖြစ် အသွင်ပြောင်းနေပြီ ဖြစ်ပါကြောင်း။

မင်းကောင်းချစ်

3 weeks Ago

September 1, 2022

မန္တလေးသပိတ်အင်အားစုအဖွဲ့ဝင် ၄ ဦးကို စစ်ကောင်စီက ထောင်ဒဏ်များ ချမှတ်

မန္တလေးမြို့မှာ ချီတက်ဆန္ဒပြ လှုပ်ရှားမှုတွေ လုပ်နေတဲ့ မန္တလေးသပိတ်အင်အားစုအဖွဲ့ဝင် ၄ ဦးအား အကြမ်းဖက်စစ်ကောင်စီရဲ့ ထောင်တွင်းတရားရုံးကနေ ထောင်ဒဏ်တွေ အသီးသီး မတရားချမှတ်ထားတယ်လို့ သိရပါတယ်။

မန္တလေးသပိတ်အင်အားစုအဖွဲ့ဝင် ကိုကျော်သီဟစိုးကို အကြမ်းဖက်စစ်အုပ်စုက သြဂုတ် ၃၁ ရက်က ထောင်တွင်းတရားရုံးမှာ ရုံးထုတ်ပြီး ထောင်ဒဏ် ၁၀ နှစ်ချမှတ်ခဲ့တယ်လို့ မန္တလေးသပိတ်အင်အားစုက ထုတ်ပြန်ထားပါတယ်။

ကိုကျော်သီဟစိုးဟာ ၂၀၂၁ ခုနှစ် ဩဂုတ် ၁၆ ရက်နေ့က ဖမ်းဆီးခံခဲ့ရပြီး ပုဒ်မ ၅၂ (ခ)၊ ပုဒ်မ ၅၀၅ ကတို့နဲ့ တရားစွဲဆိုခံခဲ့ရကာ ပုဒ်မ - ၅၂ (ခ) အတွက် ထောင်ဒဏ် ၇ နှစ် နဲ့  ပုဒ်မ ၅၀၅ - က အတွက် ထောင်ဒဏ် ၃ နှစ်တို့ကို သီးခြားကျခံရမှာဖြစ်ပါတယ်။

ကိုကျော်သီဟစိုးဟာ စုစုပေါင်း ထောင်ဒဏ် ၁၀ နှစ်အပြင် နောက်ထပ် ပုဒ်မ ၅၀၅ - က အတွက်လည်း ထပ်မံရင်ဆိုင်ရဦးမယ်လို့ သိရပါတယ်။

ဒါ့အပြင် မန္တလေးသပိတ်အင်အားစုအဖွဲ့ဝင်များဖြစ်ကြတဲ့ ကိုဟိန်းမင်းဇော်၊ ကိုကျော်စိုးမိုးနဲ့ မဂျာဆိုင်းအောင် တို့ကိုလည်း စက်တင်ဘာ ၁ ရက်က ထောင်တွင်းတရားရုံးမှာ ပုဒ်မ ၅၀၅ - က နဲ့ ထောင်ဒဏ် ၃ နှစ်စီ မတရား အမိန့်ချခံထားရပါတယ်။

အကြမ်းဖက်စစ်အုပ်စုနဲ့ အပေါင်းအပါတွေဟာ မန္တလေးသပိတ်အင်အားစုအဖွဲ့ဝင်တွေကို မတရားတဲ့ အမိန့်တွေနဲ့ ထောင်ဒဏ်ချမှတ်မှုအပေါ် အပြင်းအထန်ကန့်ကွက်ကြောင်း မန္တလေးသပိတ်အင်အားစုက ထုတ်ပြန်ထားပါတယ်။

ဒါ့အပြင် မတရားဖမ်းဆီးခံနိုင်ငံရေး အကျဥ်းသားသူရဲကောင်းတွေနဲ့ အကျဉ်းချခံ ဓမ္မဘက်တော်သားတွေကို ခြွင်းချက်မရှိ ပြန်လွှတ်ပေးဖို့ကိုလည်း မန္တလေးသပိတ်အင်အားစုက တောင်းဆိုထားပါတယ်။

3 months Ago

အကြမ်းဖက်စစ်ကောင်စီဩဇာခံ ယဉ်ကျေးမှုဝန်ထမ်း အယောက် ၁၈၀ ခန့်ကို NUG အမည်ပျက်စာရင်းသွင်း ထုတ်ပယ်

အကြမ်းဖက်စစ်ကောင်စီဩဇာခံ သာသနာရေးနှင့် ယဉ်ကျေးမှုဝန်ကြီးဌာနက ဒုတိယညွှန်ကြားရေးမှူးနဲ့ လက်ထောက်ညွှန်ကြားရေးမှူး ရာထူးတွေ အပါအဝင် ဝန်ထမ်းအယောက် ၁၈၀ နီးပါးကို ပြည်သူ့သစ္စာဖောက်တွေအဖြစ် သတ်မှတ်၊ အမည်ပျက်စာရင်းသွင်းပြီး ဝန်ထမ်းအဖြစ်မှ ထုတ်ပယ်လိုက်ကြောင်း အမျိုးသားညီညွတ်ရေးအစိုးရ (NUG) က ကြေညာပါတယ်။

NUG အစိုးရ ပြည်ထောင်စုဝန်ကြီးချုပ် မန်းဝင်းခိုင်သန်းက စက်တင်ဘာ ၁ ရက် ဒီကနေ့ရက်စွဲနဲ့ လက်မှတ်ရေးထိုး ထုတ်ပြန်လိုက်တာဖြစ်ပြီး ဝန်ကြီးဌာနအနေနဲ့ နိုင်ငံ့ဝန်ထမ်းတွေကို အကြမ်းဖက်စစ်ကောင်စီ လက်အောက်မှာ ဆက်လက်တာဝန်မထမ်းဆောင်ဘဲ ဓမ္မဘက်မှ ရပ်တည်ကာ ပြည်သူနဲ့ တသားတည်းဖြစ်စေဖို့ အမိန့်အာဏာဖီဆန်ရေးလှုပ်ရှားမှု (CDM) မှာ ပါဝင်ကြဖို့ အကြိမ်ကြိမ် ဖိတ်ခေါ် ကမ်းလှမ်းခဲ့ပြီးဖြစ်တယ်လို့ ဆိုပါတယ်။

ဒါ့အပြင် NUG အစိုးရ ဝန်ကြီးချုပ်ရုံးအနေနဲ့လည်း CDM လှုပ်ရှားမှုမှာ ပါဝင်ခဲ့ကြတဲ့ ဝန်ကြီးဌာန မဖွဲ့ရသေးတဲ့ ဌာနအသီးသီးမှ နိုင်ငံ့ဝန်ထမ်း သူရဲကောင်းတွေရဲ့ လူမှုဖူလုံရေး၊ လုံခြုံဘေးကင်းရေးနဲ့ ဖိအားကင်းစင်ရေးတို့အတွက် အလေးထား ဆောင်ရွက်နေတယ်လို့ ဆိုပါတယ်။

ဒါကြောင့် တရားမဝင် အာဏာသိမ်းစစ်ကောင်စီရဲ့ လက်အောက်မှာ ဆက်လက် တာဝန်ထမ်းဆောင်နေပြီး CDM ဝန်ထမ်းတွေကို ဖိအားပေးတာ၊ ခြိမ်းခြောက်တာ၊ ရာထူးမှ ထုတ်ပယ်တာ၊ ဝန်ထမ်းအဖြစ်မှ ထုတ်ပစ်တာ၊ တရားစွဲဆိုတာတွေနဲ့ ဥပဒေနဲ့အညီ ပြန်ဆပ်ရန် မလိုတော့တဲ့ လစာချေးငွေတွေကို အတင်းအဓမ္မ ပြန်လည်ပေးဆပ်ခိုင်းတာတွေ စတဲ့ အမျိုးမျိုးသော ဖိနှိပ်မှုတွေကို ကျူးလွန်နေတဲ့ သာသနာရေးနှင့် ယဉ်ကျေးမှုဝန်ကြီးဌာန (ယဉ်ကျေးမှု)လက်အောက်က ဝန်ကြီးရုံး(ယဉ်ကျေးမှု)၊ ရှေးဟောင်းသုတေသနနှင့် အမျိုးသားပြတိုက်ဦးစီးဌာန၊ သမိုင်းသုတေသနနှင့် အမျိုးသားစာကြည့်တိုက်ဦးစီးဌာနတွေက ဖော်ပြပါဝန်ထမ်းတွေကို အမည်ပျက်စာရင်းသွင်းလိုက်ပြီး ဝန်ထမ်းအဖြစ်မှ ထုတ်ပစ် (Dismiss) လိုက်တယ်လို့ ဖော်ပြထားတာပါ။

အရင်ကလည်း NUG အစိုးရအနေနဲ့ အကြမ်းဖက်စစ်ကောင်စီလက်အောက်မှာ ဆက်လက် တာဝန်ထမ်းဆောင်နေပြီး ပြည်သူနဲ့ တသားတည်း မရပ်တည်ကြတဲ့ အကျင့်ပျက် သစ္စာဖောက် ဝန်ထမ်းတွေစာရင်းကို ဝန်ကြီးဌာနတွေအလိုက် ဖော်ပြပြီးတော့ အမည်ပျက်စာရင်းသွင်း ဝန်ထမ်းအဖြစ်ကနေ ထုတ်ပယ်တာတွေ လုပ်ဆောင်နေတာကို တွေ့ရပါတယ်။

မြန်မာနိုင်ငံမှာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်မှစတင်ကာ စစ်ကောင်စီက နိုင်ငံတော်အာဏာကို သိမ်းယူခဲ့တဲ့ ကာလဟာ ၁ နှစ်ခွဲကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး ကဏ္ဍအသီးသီးမှာ အဘက်ဘက်က ကျဆင်းနေခဲ့ပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြပါတယ်။

အမျိုးသားညီညွတ်ရေးအစိုးရကတော့ ပြီးခဲ့တဲ့ ၂၀၂၁ ခုနှစ်၊ စက်တင်ဘာ ၇ ရက်မှာ စစ်အာဏာရှင်ဆန့်ကျင်ရေး ခုခံတွန်းလှန်စစ် စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန် တိုက်ဖျက်ကြဖို့ ကြေညာခဲ့ပြီး နိုင်ငံတဝန်း စစ်ကောင်စီတပ်တွေနဲ့ တိုင်းရင်းသား လက်နက်ကိုင်တပ်တွေ၊ ဒေသခံ ပြည်သူ့ကာကွယ်ရေးတပ်တွေကြား တိုက်ပွဲတွေလည်း ပြင်းထန်နေပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ်ပြန်ချက်အရ လက်ရှိအချိန်ထိ စစ်တပ်က အကြမ်းဖက်ပစ်ခတ် သတ်ဖြတ်မှုကြောင့် အပြစ်မဲ့ကျဆုံးပြည်သူ ၂,၂၆၀ နီးပါးနဲ့ မတရား ဖမ်းဆီးထိန်းသိမ်းခံရသူပေါင်း ၁၅,၃၀၀ နီးပါးထိ ရှိခဲ့ပြီလို့ သိရပါတယ်။

3 months Ago
More News
Up