အကြမ်းဖက်စစ်ကောင်စီ

September 13, 2021

တိုကျိုရှိ မြန်မာသံရုံးမြေကို ရောင်းစားရန် အကြမ်းဖက်စစ်ကောင်စီ ကြိုးစားနေ

ဂျပန်နိုင်ငံ၊ တိုကျိုမြို့တော်၊ နဂဝမြို့မှာရှိတဲ့ မြန်မာသံရုံးမြေကို အာဏာသိမ်း စစ်ကောင်စီအကြမ်းဖက်အဖွဲ့က နောက်ထပ်ပိုင်းရောင်းစားဖို့ စီစဉ်နေတယ်လို့ ခိုင်လုံတဲ့သတင်ရင်းမြစ်တွေကနေ သိရှိရပါတယ်။

“ ဒီမြေကြီးက ဘယ်ဗမာအစိုးရမှဝယ်ခဲ့တာတော့မဟုတ်ပါဘူး။ စစ်ကြိုခေတ်က ဗမာကုန်သည်တယောက်က ဝယ်ခဲ့တာကို စစ်ပြီးတော့ ဦးနုအစိုးရက သိမ်းလိုက်တာဖြစ်တယ်။ အခုလို တရားဝင်အစိုးရလည်းမဟုတ် စစ်အာဏာသိမ်းအုပ်စုက အခုလိုရောင်းချမယ်ဆိုရင် ဂျပန်အစိုးရအနေနဲ့တားဆီးသင့်တယ်”လို့  မြန်မာ့အရေးဆောင်ရွတ်နေသူ ဒေါက်တာကျော်တင့်က ပြောပါ တယ်။

တိုကျိုသံရုံးမြေကို ဦးနေဝင်းလက်ထက် ၁၉၈၈ ခုနှစ်ကလည်း ပထမအကြိမ်အဖြစ် မြေနေရာခွဲ ရောင်းချခဲ့စဉ်ကာလကလည်း မိမိအနေနဲ့ ဒေါ်အောင်ဆန်းစုကြည်ကို အသိပေးကာ ဂျပန်အစိုးရမှ တားဆီးပေးဖို့ ကြိုးစားခဲ့ကြပေမယ့် ဂျပန်အစိုးရကမတားဆီးခဲ့ပေးတော့ မအောင်မြင်ခဲ့ဘူးလို့ ထိုစဉ်က ဂျပန်နိုင်ငံမှာ မြန်မာအရေးဆောင်ရွက်ခဲ့ပြီး  လက်ရှိ အမေရိကန်မှာနေထိုင်သူ ဒေါက်တာ ကျော်တင့်က ဒီဗွီဘီကို ပြောပါတယ်။

စစ်တပ်အာဏာသိမ်းတာကို ထောက်ခံကြောင်း ဂျပန်မီဒီယာတွေမှာ အတိအလင်းထုတ်ဖော်ပြောကြားနေသူ ဂျပန်-မြန်မာအသင်းဥက္ကဋ္ဌ မစ္စတာဝါတနဘေးဟာလည်း စစ်ကောင်စီခေါင်းဆောင်တွေနဲ့ ဆွေးနွေးဖို့ စက်တင်ဘာ ၁၀ ရက်က မြန်မာနိုင်ငံကို သွားရောက်ခဲ့ပြီး အခုလို သံရုံးမြေရောင်းချမယ့်ကိစ္စ သူပါဝင်ပတ်သက်မှာကို ဂျပန်ရှိမြန်မာနိုင်ငံသားတွေက စိုးရိမ်နေကြပါတယ်။

ဂျပန်နိုင်ငံမှာ နှစ်ပေါင်း ၄၀ ကျော်နေထိုင်သွားတဲ့ မြန်မာသွားဆရာဝန်တယောက်က “အရင်ပထမရောင်းတုန်းက စျေးကမဆိုးပါဘူး။ ဂျပန်မှာ အခုချိန်က မြေစျေးတွေ ကျနေလို့ အခုအချိန်ရောင်းရင် ထက်ဝက်စျေးပဲရမယ်။ ကျနော်တောင်ပြီးခဲ့တဲ့လက ပေါက်စျေးထက် တဝက်ချရောင်းခဲ့ရတယ်” လို့ ဒီဗွီဘီကို ပြောပါတယ်။

ခုလို သံရုံးမြေရောင်းချမယ့်ကိစ္စနဲ့ ပတ်သက်လို့ တိုကျိုမြိုရှိ မြန်မာသံရုံးကိုဖုန်းဆက်ခေါ်ပေမယ့် ဖုန်းမကိုင်တဲ့အတွက် အကျိုးအကြောင်း မသိရသေးပါဘူး။

ပထမ တကြိမ်ရောင်းခဲ့စဉ်က ဂရမ်မြေအရှုပ်အရှင်းကြောင့် ကြန့်ကြာခဲ့ပြီး ဝယ်ယူသူ ဂျပန်စီးပွါးရေးလုပ်ငန်းရှင်ကို မြန်မာနိုင်ငံမှာ စီးပွားရေးအခွင့်အလမ်းတွေ ပေးခဲ့ကာ လက်ရှိ အချိန်ထိမြန်မာနိုင်ငံမှာ ဆက်လက်လုပ်ကိုင်နေ တယ်လို့လည်း စုံစမ်းသိရှိရပါတယ်။

ကမ္ဘာအနှံ့မှာရှိတဲ့ မြန်မာသံရုံးပေါင်း ၄ဝ ထဲမှာ ၁၈ နိုင်ငံမှာ ကိုယ်ပိုင်မြေ ရှိပြီး ၂၂ နေရာ ကတော့ ငှားရမ်း ဖွင့်ထားရတယ်လို့ ဖြစ်တယ်လို့ နိုင်ငံခြားရေး ဝန်ကြီးဌာနက ၂၀၁၄ ခု က လွှတ်တော်မှာရှင်းပြခဲ့ဖူးပါတယ်။ 

သံရုံးတွေထဲမှာ ကာလ ပေါက်စျေးအရ ထိုင်းနိုင်ငံ ဘန်ကောက်မြို့မှာ ပိုင်ဆိုင်မှု ဒေါ်လာသန်း ၁၃ဝဝ ကျော်၊ အိန္ဒိယ နယူးဒေလီက သံရုံးက ဒေါ်လာသန်း ၄ဝဝ ကျော်၊ ဂျပန်နိုင်ငံ တိုကျိုမြို့က သံရုံးက ဒေါ်လာသန်း ၂၅ဝ နီးပါးဖြစ်တယ်လို့ ထိုစဉ်က နိုင်ငံခြားရေး ဝန်ကြီးဌာန ဒုဝန်ကြီး ဦးတင်ဦးလွင်က အမျိုးသားလွှတ်တော် အမတ် ဒေါက်တာ အေးမောင်က မေးမြန်းခဲ့ရာမှာ ဖြေကြားခဲ့ပါတယ်။

4 days Ago

September 7, 2021

“သင်္ကြန်အမြောက် တဒိုင်းဒိုင်းပစ်နေတာ….” အကြမ်းဖက်စစ်ကောင်စီပြောခွင့်ရ ဇော်မင်းထွန်း

အမျိုးသားညီညွတ်ရေးအစိုးရ NUG က စက်တင်ဘာ ၇ ရက် ဒီကနေ့မှာ တွန်းလှန်စစ်ကြေညာပြီးနောက်ပိုင်းမြေပြင်မှာတိုက်ပွဲတွေမရှိဘဲ တည်တည်ငြိမ်ငြိမ်ဖြစ်နေတယ်လို့ မြဝတီရုပ်မြင်သံကြားကနေ အကြမ်းဖက်စစ်ကောင်စီ ပြောခွင့်ရသူ ဗိုလ်ချုပ်ဇော်မင်းထွန်းက ပြောဆို လိုက်ပါတယ်။

လက်တွေ့မြေမြင်မှာတော့ ဒီကနေ့မနက်ကတည်းက  KNU တပ်မဟာ ၄ နယ်မြေတို့မှာ တိုက်ပွဲဖြစ်ပွားခဲ့သလို၊ ကယားပြည်နယ်နဲ့ မြန်မာပြည်အလယ်ပိုင်း စစ်ကိုင်းတိုင်း၊ ချင်းပြည်နယ်၊ မကွေးတိုင်းတို့မှာလည်း ထိတွေ့တိုက်ပွဲတွေရှိနေတာပါ။

အမျိုးသားညီညွတ်ရေးအစိုးရရဲ့စစ်ကြေညာချက်နဲ့ပတ်သက်ကြီး ဗိုလ်ချုပ်ဇော်မင်းထွန်းက "အကြမ်းဖက်အဖွဲ့အဖြစ်ကြေညာထားတဲ့ CRPH၊ NUG၊ PDF တွေဟာ ဖေဖော်ဝါရီလကတည်းက သင်္ကြန်အမြောက်ပေါ့ဗျာ။ တဒိုင်းဒိုင်းပစ်နေတာ။ ပြည်ဖျက်မီဒီယာတွေကလည်း ဘေးကနေပြီးတော့ တက်ညီလက်ညီဝိုင်းလှော်ကြတဲ့ဟာပေါ့နော်။ ဒီနေ့ NUG က ကြေညာချက်ထုတ်နေတာကိုလည်းတွေ့ရပါတယ်။ ပြည်ဖျက်မီဒီယာတွေကလည်း ဘယ်နားမှာ တိုက်ပွဲဖြစ်နေပြီ၊ စားနပ်ရိက္ခာတွေ အလုအယက်သွားဝယ်နေကြပြီတို့ ဒါတွေ ထုတ်လွှင့်နေတာ တွေ့ရပါတယ်။ ဒါတွေက သူတို့ရဲ့လုပ်ရိုးလုပ်စဉ်တွေပါပဲ"လို့ ပြောပါတယ်။

လက်တွေ့မြေပြင်မှာတော့ ပြည်သူတွေက စားနပ်ရိက္ခာပြတ်လပ်မှာ၊ တိုက်ပွဲတွေဖြစ်လာရင် အခြေခံလိုအပ်ချက်တွေပြတ်လပ်မှာကို စိုးရိမ်တာတွေရှိနေပါတယ်။

အခု စက်တင်ဘာလမှာ ကုလသမဂ္ဂ အထွေထွေညီလာခံအစည်းအဝေးရှိတဲ့အတွက် နိုင်ငံတကာအာရုံစိုက်မှုကိုပြန်ရအောင် NUG က စစ်ကြေညာတဲ့လုပ်ဆောင် ချက်ကိုပြုလုပ်တာလို့လည်း ဗိုလ်ချုပ်ဇော်မင်းထွန်းကပြောပါတယ်။

“နံပါတ်တစ်အချက်က စက်တင်ဘာ ၁၄ ရက်နေ့မှာ ကုလသမဂ္ဂညီလာခံကျင်းပမှာဖြစ်တဲ့အတွက် သူတို့လုပ်ရပ်တစ်ခုပြနိုင်အောင် လုပ်ငန်းတစ်ခုပြနိုင်အောင် လုပ်ဆောင်တာပဲဖြစ်တယ်။ နံပတ် ၂ အချက်က ယခင်တုန်းကတော့ မိုင်းထောင် မိုင်းခွဲလုပ်တာတွေ သူတို့လုပ်ဆောင်တယ် တိုင်းပြည်မငြိမ်မသက်ဖြစ်အောင်လုပ်ဆောင်တယ်။ အဲ့လိုလုပ်ဆောင်တာတွေဟာ အေးချမ်းတည်ငြိမ်ချင်တဲ့ တာဝန်သိပြည်သူလူထုရဲ့ပူးပေါင်းပါဝင်မှုကြောင့် ဖော်ထုတ်ဖမ်းဆီးရမှုတွေ များစွာရှိခဲ့တယ်။ အဲ့ဒါတွေများလာတော့ ကျဆုံးမှုဘက်ပိုင်းကို ရောက်လာတာ သူတို့သိတယ်။ ဒါကြောင့်မို့ နိုင်ငံတကာအာရုံစိုက်မှု အရှိန်ပြန်မြှင့်လာရေးအတွက် လုပ်ဆောင်တာပဲဖြစ်ပါတယ်။"

လက်တွေ့မြေပြင်မှာတော့ တိုင်းနဲ့ပြည်နယ်အသီးသီးက PDF တွေဟာ စစ်ကောင်စီနဲ့ ဒလန်တွေကိုစတင်ရှင်းလင်းမယ်လို့ ကြေညာထားသလို စစ်ကောင်စီလက်အောက်ခံ အုပ်ချုပ်ရေးမှူးတွေ၊ Non CDM ဝန်ထမ်းတွေကိုလည်း လုပ်ငန်းခွင် ဝင်တာကိုရပ်ဆိုင်းဖို့ သတိပေးထားပါတယ်။

စက်တင်ဘာ ၇ ရက် ဒီနေ့ကစပြီး  စစ်အာဏာရှင်ဆန့်ကျင်ရေး ခုခံ တွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက်စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလက ကြေညာထားပါတယ်။

1 week Ago
More News
Up