အကျဉ်းဦးစီးဌာန

December 30, 2018

အကျဉ်းဦးစီးဌာနက ပြန်စွန့်လွှတ်သည့် လယ်မြေများ လုံခြုံရေးဧရိယာထဲပါနေ၍ စိုက်ပျိုးခွင့်မရ

ကရင်ပြည်နယ်၊ ဘားအံမြို့နယ်ထဲမှာ အကျဉ်းဦးစီးဌာနက သိမ်းယူထားတဲ့ လယ်ယာမြေတချို့ကို ပြန်စွန့်လွှတ်ပြီး လုပ်ပိုင်ခွင့်လက်မှတ်လည်း ရရှိထားပေမယ့် လုံခြုံရေး ဧရိယာထဲမှာ ပါနေတာကြောင့် စိုက်ပျိုးခွင့်မရဘူးဖြစ်နေတယ်လို့ လယ်သမားတွေက ပြောပါတယ်။ ဘားအံမြို့နယ်၊ လှာကဒေါင်၊ လှာကမြင်နဲ့ လက္ခဏကျေးရွာအုပ်စုတို့က မြေဧက ၈၀၀ လောက်ကို ပြီးခဲ့တဲ့ ၂၀၀၀ ခုနှစ်လောက်ကစပြီး သိမ်းယူထားခဲ့တာပါ။ ဒီမြေတွေထဲက လက္ခဏရွာမှာပဲ စိုက်ပျိုးမွေးမြူရေးနဲ့ အသက်မွေးမှု အတတ်သင်တန်းကျောင်းက မြေနည်းနည်းမှာ စိုက်ပျိုးရေးလုပ်ပြီး သုံးစွဲထားတာကြောင့် တခြားမြေအားလုံးက မြေလွတ်တွေ ဖြစ်တယ်လို့ လယ်သမားတွေက ပြောပါတယ်။ ဒီမြေတွေကို ပြန်ပေးဖို့၊ လျော်ကြေးပေးဖို့ လယ်ယာမြေနဲ့ အခြားမြေများ သိမ်းဆည်းခံရမှုများ ပြန်လည်စိစစ်ရေး ကော်မတီကို စာနဲ့တင်ပြတဲ့အခါ ၉၁ ဧက ကို ပြန်ပြီး စွန့်လွှတ်ပေးခဲ့ပါတယ်။ “၂၀၁၆ မှာ ပြန်စွန့်လွှတ်တယ်။ ၂၀၁၈ မှာ လယ်သမားတွေကို အပ်နှံတယ်။ ဒီထဲမှာ လယ်ယာမြေ လုပ်ပိုင်ခွင့် ရထားသူတွေရဲ့ လယ် ၇၁ ဧက ကျော်ပါတယ်။ ဒါပေမယ့် ဒီလယ်တွေဟာ အကျဉ်းဦးစီးဌာနရဲ့ လုံခြုံရေးဧရိယာ ကိုက် ၄၀၀ ထဲမှာ ပါနေတာကြောင့် ဆိုပြီး စိုက်ပျိုးခွင့်မရဘူး” လို့ လယ်သမားတယောက်ဖြစ်တဲ့ စောခင်လှမြိုင်က ပြောပါတယ်။ စွန့်လွှတ်ဖို့ ကျန်နေသေးတဲ့ ဧက ၇၀၀ ကျော်ကိုလည်း စိုက်ပျိုးလုပ်ကိုင်တာ မရှိဘဲထားတယ်လို့ သူက ဆိုပါတယ်။ လယ်သမားတွေက ဗဟို မြေသိမ်းစိစစ်ရေးကော်မတီနဲ့ ပြည်ထဲရေး ဝန်ကြီးတို့ဆီ စာတွေပေးပို့ တိုင်ကြားပြီးနောက် ပြီးခဲ့တဲ့ ဒီဇင်ဘာ လဆန်းပိုင်းမှာတော့ မြို့နယ် မြေစစ်ကော်မတီက လယ်သမားတချို့ကို ခေါ်ယူတွေ့ဆုံ စစ်ဆေးခဲ့ပါတယ်။ မြို့နယ် အုပ်ချုပ်ရေးမှူး ဦးဆွေထက်အောင်က “ဒီကိစ္စကို ခရိုင်ကို တင်ပေးထားပါတယ်။ အခုကတော့ ဘယ်သူ့ကိုပေးမယ်၊ မပေးဘူးဆိုတာ ကျနော် မပြောနိုင်ပါဘူး” လို့ ပြောပါတယ်။ ၂၀၁၇ ခုနှစ် သြဂုတ်လအထိ ဗဟိုကော်မတီအပါအဝင် သက်ဆိုင်ရာ မြေသိမ်းမှု စိစစ်ရေး ကော်မတီအရပ်ရပ်ဆီကို တိုင်ကြားစာအမှုတွဲပေါင်း ၅၀၀၀ ကျော်ရောက်ခဲ့ပြီး အခု အစိုးရလက်ထက်မှာ မြေဧကပေါင်း ၄ သိန်းလောက်ကို တောင်သူတွေဆီ ပြန်လွှဲပေးနိုင်ခဲ့တယ်လို့ လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေး ဗဟိုကော်မတီ တွဲဖက်အတွင်းရေးမှူး ပြည်ထဲရေးဝန်ကြီးဌာန အမြဲတမ်းအတွင်းဝန် ဦးတင်မြင့်က ပြောဆိုထားပါတယ်။
3 years Ago

December 13, 2018

ကျိုက်မရော အကျဉ်းထောင်သစ်တွင် အကျဉ်းသား ၆၀ ကျော် စတင်ထိန်းသိမ်း

မွန်ပြည်နယ်၊ ကျိုက်မရောမြို့နယ်၊ ရေတွင်းကုန်းကျေးရွာအနီးမှာ ဆောက်လုပ်နေတဲ့ ကျိုက်မရောအကျဉ်းထောင်သစ်မှာ အကျဉ်းသားကျပ်တည်းတဲ့ အကျဉ်းထောင်တွေက အကျဉ်းသား ၆၀ ကျော်ကို စတင်လက်ခံ ထိန်းသိမ်းထားတယ်လို့ မွန်ပြည်နယ် အကျဉ်းဦးစီးဌာနက ပြောပါတယ်။ လက်ရှိ အကျဉ်းသား ၁၀၀၀ ဆန့် (က) အဆင့် မော်လမြိုင်အကျဉ်းထောင်ဟာ နှစ်ပေါင်း ၁၀၀ ကျော် သက်တမ်းရှိနေပြီး လက်ခံထားတဲ့ အကျဉ်းသားဦးရေမှာလည်း ၂၀၀၀ ဝန်းကျင် ရှိနေတဲ့အတွက် ခံနိုင်ဝန်ထက် နှစ်ဆများပြားနေတာကြောင့် ကျိုက်မရောအကျဉ်းထောင်ကို အကျဉ်းသားတွေ လွှဲပြောင်းထိန်းသိမ်းဖို့ စီစဉ်နေတာပါ။ မွန်ပြည်နယ် အကျဉ်းဦးစီးဌာနမှ ပြည်နယ်ဦးစီးမှူး ဦးလင်းဗိုလ်နောင်က “သတ်မှတ်ထားတာတော့ အကျဉ်းသား ၁၀၀၀ လောက် ထားမယ်ပေါ့။ ဒါပေမယ့် နောက်ထပ် အကျဉ်းသားတွေ ထပ်ထားလို့ရှိရင် အဆင်သင့်ဖြစ်နေအောင်၊ လုပ်ငန်းလည်ပတ်နိုင်အောင်လို့ အခုဆို အကျဉ်းသားထားထားတာ ၆၀ ကျော်လောက် ရှိသွားပြီ။ ထောင်ကတော့ မဖွင့်သေးဘူး။ ထောင်ဖွင့်ခွင့်ကျပြီဆိုရင် အကျဉ်းသားကျပ်တည်းနေတဲ့ ထောင်တွေက အကျဉ်းသားတွေကို ပြောင်းရွှေ့မှာဖြစ်တဲ့အတွက် သူတို့လာရင် အဆင်သင့်ဖြစ်အောင်လို့ အကျဉ်းသား ၆၀ ကျော်လောက် ထားထားပါတယ်” လို့ ပြောပါတယ်။ လက်ရှိမှာ ကျိုက်မရောအကျဉ်းထောင်သစ်ဟာ ပင်မအဆောက်အဦ အပါအဝင် အကျဉ်းသားအိပ်ဆောင်၊ မိလ္လာစနစ်နဲ့ ရေဖြန့်ဝေမှုစနစ်တွေလည်း ပြီးစီးပြီဖြစ်တဲ့အတွက် အကျဉ်းသားတွေ နေရေးထိုင်ရေး၊ စားရေးသောက်ရေး အဆင်ပြေနေပြီလို့ ဆိုပါတယ်။ “ကိုယ်တို့က ဘဏ္ဍာရေးနှစ်အလိုက် ရတဲ့ ဘတ်ဂျက်ငွေအပေါ် မူတည်ပြီး တည်ဆောက်နေတာ ဖြစ်တဲ့အတွက် တနှစ်တည်းနဲ့ အကုန်အပြီး လုပ်တာမျိုးတော့ မဟုတ်ဘူး။ တနှစ်ကို ၅ မျိုး၊ ၆ မျိုးလောက် ဆောင်ရွက်တယ်။ တခြားထောင်တွေ ကျပ်တည်းမှုကို ဖြေလျော့ပေးတဲ့အနေနဲ့ ကျိုက်မရောထောင်မှာ အကျဉ်းသားတွေ လက်ခံဆောင်ရွက်နေပြီ။ ကျိုက်မရောအကျဉ်းထောင်က ၉၀ ရာခိုင်နှုန်းလောက်တော့ ပြီးသွားပြီ။ ထောင်ကြီးတခုလုံးကတော့ ထားလို့ရတယ်။ အဲ့ဒီမှာ ကျန်တဲ့ လမ်းလေးတွေ ဖောက်ထားပြီးတော့ ခင်းဖို့၊ အကျဉ်းထောင်ပတ်လမ်းအပြင်က ဝန်ထမ်းလိုင်းခန်းလေးတွေမှာ မီးတပ်ဆင်ဖို့တွေ နည်းနည်းလေး ကျန်သေးတယ်။ ကျိုက်မရော-မော်လမြိုင် လမ်းမကြီးနဲ့ ကျိုက်မရော အကျဉ်းထောင် ဆက်သွယ်တဲ့ လမ်းခင်းဖို့လေးတွေ၊ ဒါလေးတွေပဲကျန်တော့တယ်။” ကျိုက်မရောအကျဉ်းထောင်သစ်ဟာ အကျဉ်းသား ၁၀၀၀ ဆန့် (က) အဆင့် အကျဉ်းထောင်ဖြစ်ပြီး ၂၀၁၂-၂၀၁၃ ဘတ်ဂျက်နှစ်ကတည်းက စတင်တည်ဆောက်ခဲ့ကာ မြေဧက ၂၅၆ ဒသမ ၆၆ ကျယ်ဝန်းတယ်လို့ မွန်ပြည်နယ်အကျဉ်းဦးစီးဌာနမှ သိရပါတယ်။ သတင်း၊ ဓာတ်ပုံ - အာကာမင်း
3 years Ago
Up