အက်ရ်ှလေကိုးလ်

February 5, 2019

ချဲလ်ဆီးနည်းပြ ဆာရီအပေါ် စိတ်ရှည်ပေးရန် အက်ရ်ှလေကိုးလ် ပြော

ချဲလ်ဆီးအသင်းအနေနဲ့ နည်းပြဆာရီအပေါ်မှာ စိတ်ရှည်ပေးဖို့လိုတယ်လို့ နောက်ခံလူဟောင်း အက်ရ်ှလေကိုးလ်က ပြောကြားသွားပါတယ်။ စကိုင်းစပေါ့ရဲ့ မန်းဒေးနိုက်ဖွတ်ဘော အစီအစဉ်မှာ အက်ရ်ှလေကိုးလ်က ပြောကြားလိုက်တာပါ။ အီတလီနည်းပြ ဆာရီဟာ ဘုန်းမောက်ကို ၄ ဂိုးပြတ် ရှုံးနိမ့်မှုကြောင့် ထုတ်ပယ်ခံရမယ်လို့ ရေးပန်းစားခဲ့ပေမယ့် ဟတ်ဒါဖီးလ်နဲ့ပွဲမှာ နိုင်ပွဲပြန်ရခဲ့လို့ ဖိအားလျော့ခဲ့တာ ဖြစ်ပါတယ်။ အီတလီနည်းပြ ဆာရီရဲ့ အကောင်းဆုံးအချိန်ရောက်ဖို့ အချိန်လိုအပ်ပြီး တချိန်မှာတော့ စိတ်လှုပ်ရှားစရာကောင်းတဲ့ အီတလီကစားဟန်ကို ယူဆောင်လာနိုင်မယ်လို့ ထင်ကြောင်း အက်ရ်ှလေကိုးလ်က ပြောကြားသွားတာပါ။ ဒါ့အပြင် ချဲလ်ဆီးအသင်းအနေနဲ့ အောင်မြင်မှုရချင်တယ်ဆိုရင် ဟာဇက်ကို ဒဏ်ရာမရအောင် ကာကွယ်သွားဖို့လိုပြီး ဟာဇက်က ပွဲတိုင်းမှာ အကောင်းဆုံး ကစားနိုင်သူ ဖြစ်တယ်လို့ အက်ရ်ှလေကိုးလ်က ချီးကျူးပြောကြားသွားခဲ့ပါတယ်။ အသက် ၃၈ နှစ်ရှိ အင်္ဂလန်နောက်ခံလူ အက်ရ်ှလေကိုးလ်ဟာ ၂၀၁၄ ခုနှစ်မှာ ချဲလ်ဆီးကနေ ထွက်ခွာပြီးနောက်ပိုင်း ရိုးမား၊ အယ်လ်အေဂလက်ဆီ အသင်းတွေမှာ ဆက်ကစားခဲ့ပါတယ်။ အဲဒီနောက် အခုနှစ် ဇန်နဝါရီကမှ အသင်းဖော်ဟောင်း လမ်းပတ် ကိုင်တွယ်နေတဲ့ ချန်ပီယံရှစ်ကလပ် ဒါဘီအသင်းဆီ ပြောင်းရွှေ့ကစားနေတာ ဖြစ်ပါတယ်။
3 years Ago

January 25, 2019

ယခုနှစ် ဘောလုံးရာသီအကုန်တွင် အက်ရ်ှလေကိုးလ် အနားယူတော့မည်

အင်္ဂလန်လက်ရွေးစင် ကစားသမားဟောင်း အက်ရ်ှလေကိုးလ်က ဒီနှစ် ဘောလုံးရာသီအကုန်မှာ ဘောလုံးကစားတာကနေ အနားယူတော့မယ်လို့ ပြောပါတယ်။ အသက် ၃၈ နှစ်အရွယ် ဘယ်နောက်ခံလူ အက်ရ်ှလေကိုးလ်ကို ချန်ပီယံရှစ် ဒါဘီကလပ်က အငှားစာချုပ်နဲ့ ခေါ်ယူထားတာပါ။ သူ့ကို ချဲလ်ဆီး အသင်းဖော်ဟောင်းနဲ့ ဒါဘီနည်းပြဖြစ်တဲ့ လမ်းပတ်က ခေါ်ယူလိုက်တာပါ။ ကိုးလ်ဟာ ပြီးခဲ့တဲ့နှစ်မှာ အမေရိကန် မေဂျာလိဂ်ကလပ် လော့စ်အိန်ဂျလိစ်ဂလက်စီ အသင်းမှာ ကစားခဲ့ပါတယ်။ သူဟာ အင်္ဂလန်အသင်းအတွက်တော့ ပွဲပေါင်း ၁၀၇ ပွဲ ကစားပေးထားပါတယ်။ ကိုးလ်ဟာ အာဆင်နယ်နဲ့အတူ ကစားသမားဘဝ စတင်ခဲ့ပြီး ပရီးမီးယားလိဂ်ဖလား ၂ ကြိမ်၊ အက်ဖ်အေဖလား ၃ ကြိမ် ရယူခဲ့ပါတယ်။ ဘယ်နောက်ခံလူ အက်ရ်ှလေကိုးလ်ဟာ ချဲလ်ဆီးနဲ့အတူ ချန်ပီယံလိဂ်ဖလားနဲ့ ယူရိုပါလိဂ်ဖလားတွေ ရရှိခဲ့ပါတယ်။
3 years Ago
Up