ဟောလိဝုဒ်မင်းသား

April 17, 2020

ရွှေကမ္ဘာလုံးဆုရ ဟောလိဝုဒ်မင်းသားကြီး Brian Dennehy နှလုံးရောဂါဖြင့် ကွယ်လွန်

ရွှေကမ္ဘာလုံးဆုရ ဝါရင့်ဟောလိဝုဒ်သရုပ်ဆောင်မင်းသားကြီး Brian Dennehy ဟာ ဧပြီလ ၁၅ ရက်နေ့က နှလုံးရောဂါနဲ့ ကွယ်လွန်သွားခဲ့ပါတယ်။ အသက် ၈၁ နှစ်အရွယ် မင်းသားကြီးဟာ အမေရိကန်နိုင်ငံ၊ ကွန်နက်တီကပ်ပြည်နယ် ကမ်းခြေမြို့တမြို့ဖြစ်တဲ့ နယူးဟေးဗင်မြိူ့က နေအိမ်မှာ ကွယ်လွန်သွားခဲ့တာဖြစ်ပြီး ကိုရိုနာဗိုင်းရပ်စ်နဲ့ ဆက်နွှယ်မှုမရှိဘူးလို့ သမီးဖြစ်သူက ပြောပါတယ်။ အနုပညာလောကမှာ နှစ်ပေါင်း ၅၀ ကျော် ဖြတ်သန်းခဲ့တဲ့ မင်းသားကြီးဟာ နာမည်ကြီး ရုပ်ရှင်ကားပေါင်းများစွာမှာ ပါဝင်သရုပ်ဆောင်ခဲ့တာဖြစ်ပြီး ပထမဆုံး ရမ်ဘိုရုပ် ရှင်ကားဖြစ်တဲ့ ၁၉၈၂ ခုနှစ်မှာ ထွက်ရှိခဲ့တဲ့ First Blood အပါအဝင် Gorky Park (1983) ၊  Silverado (1985) ၊ Cocoon (1985) ၊ F/X (1986) ၊ Presumed Innocent (1990) ၊ Romeo + Juliet (1996) ၊ Knight of Cups (2015) စတဲ့ ရုပ်ရှင်ကားတွေမှာ ဇာတ်ရုပ်ပုံစံမျိုးစုံနဲ့ ပါဝင်ခဲ့သူ ဖြစ်ပါတယ်။ ရွှေကမ္ဘာလုံးဆု ချီးမြှင့်ခံခဲ့ရတဲ့ ရုပ်ရှင်ကတော့ ၂၀၀၁ ခုနှစ်အတွက် Death of a Salesman ရုပ်ရှင်ကားမှာ ဇာတ်ကောင် Willie Loman အဖြစ် ပြောင်မြောက်စွာ သရုပ်ဆောင်ခဲ့မှုအတွက် ချီးမြှင့်ခံခဲ့ရတာပါ။ ရုပ်ရှင်မှာသာမက တခြားသော ရုပ်သံစီးရီးစ်တွေအတွက် ချီးမြှင့်တဲ့ အမ်မီဆု ၆ ဆုနဲ့ တိုနီဆု ၂ ဆုရရှိခဲ့သူ မင်းသားကြီးဟာ ၂ ကြိမ်လက်ထပ်ခဲ့ပြီး ကွယ်လွန်ချိန်မှာတော့ သားသမီး ၃ ယောက်နဲ့ မြေး ၅ ဦး ကျန်ရှိခဲ့ပါတယ်။ လတ်တလောမှာတော့ မင်းသားကြီးရဲ့ နာရေးသတင်းအတွက် အနုပညာအသိုင်းအဝိုင်းက မိသားစုနဲ့အတူ နှမြောတသ စိတ်မကောင်းဖြစ်ရကြောင်း မှတ်ချက်တွေ ရေးနေကြပါတယ်။ မင်းသားကြီးနဲ့ အတူတွဲသရုပ်ဆောင်ခဲ့တဲ့ ရမ်ဘိုမင်းသားကြီး စတားလုံးကလည်း တကယ့်ကို ပြောင်မြောက်တဲ့ သရုပ်ဆောင်တယောက်ဖြစ်ပြီး First Blood ရုပ်ရှင်မှာ ရမ်ဘိုအဖြစ် ရုပ်လုံးကြွလာစေဖို့ အများကြီး ကူညီပေးခဲ့ကြောင်း၊ အနုပညာရှင် ကြယ်တပွင့်ကို ဆုံးရှုံးလိုက်ရပြီဖြစ်ကြောင်း တွစ်တာလူမှုကွန်ရက်ပေါ်မှာ ဖော်ပြထားခဲ့ပါတယ်။ သရုပ်ဆောင်မင်းသမီးကြီး Mia Farrow ကတော့ သူ့ရဲ့ ခွေးကလေးကို Brian Dennehy က ပွေ့ချီထားခဲ့တဲ့ အမှတ်တရ ဓာတ်ပုံတပုံကို မျှဝေထားခဲ့ပြီး သူ့ဘဝမှာ တန်ဖိုးထားရသူ အနည်းစုထဲက မင်းသားကြီးထွက်ခွာသွားရတဲ့ သတင်းက ဝမ်းနည်းစိတ်မကောင်းဖြစ်ရကြောင်းနဲ့ ဒီပုံလေးကိုတော့ Love Letters ရုပ်သံရိုက်ကူးရေးနောက်ကွယ်မှာ ရိုက်ကူးထားတဲ့ ပုံလေးတပုံဖြစ်ကြောင်း ဖော်ပြခဲ့ပါတယ်။  
12 months Ago

February 6, 2020

ဟောလိဝုဒ်မင်းသားကြီး ကာ့ခ်ဒေါက်ကလပ် ကွယ်လွန်

ဟောလိဝုဒ်မင်းသားကြီး ကာ့ခ်ဒေါက်ကလပ်ဟာ ဖေဖော်ဝါရီ ၅ ရက်က အသက် ၁၀၃ နှစ်အရွယ်မှာ ကွယ်လွန်ခဲ့တယ်လို့ သားဖြစ်သူ မိုက်ကယ်ဒေါက်ကလက်စ်က ပြောကြားပါတယ်။   ကာ့ခ်ဒေါက်ကလပ်ဟာ နှစ်ပေါင်း ၇၀ အတွင်း ဟောလိဝုဒ်ရုပ်ရှင် ဇာတ်ကား ၉၀ ကျော်မှာ ပါဝင်သရုပ်ဆောင်ခဲ့ပါတယ်။  အဲဒီရုပ်ရှင်တွေထဲက "Spartacus" (စပါတာကပ်)  နဲ့ "The Vikings" ဇာတ်ကားတွေကြောင့် ဒေါက်ကလပ်စ်ဟာ  ၁၉၅၀ နဲ့ ၁၉၆၀ ဝန်းကျင် ရုံတင်ဝင်ငွေ အကောင်းဆုံး မင်းသားတလက်ဖြစ်ခဲ့ပါတယ်။  ဟောလိဝုဒ်လောကမှာ ၁၉၅၀ ဝန်းကျင်ကာလ ကွန်မြူနစ်လှုပ်ရှားမှုနဲ့ အဆက်သွယ်ရှိသူတွေကို အလုပ်အကိုင်မပေးတဲ့ ဟောလိဝုဒ် အမည်ပျက်စာရင်း အယူအဆကို တိုက်ဖျက်ရာမှာလည်း ဒေါက်ကလပ်စ်ဟာ အဓိကအခန်းကဏ္ဍကနေ ပါဝင်ခဲ့ပါတယ်။  ဒေါက်ကလပ်စ်က သူဟာ ရုပ်ရှင်ရိုက်ရတာထက် အဲဒီလိုလုပ်ရတာကို ပိုဂုဏ်ယူတယ်လို့ ပြောခဲ့ဖူးပါတယ်။  ဒေါက်ကလပ်စ်ဟာ ၁၉၄၉ ခုနှစ်က  "Champion" ဇာတ်ကား ၊ ၁၉၅၂ ခုနှစ်မှာ "The Bad and the Beautiful" ဇာတ်ကားနဲ့ "Lust for Life." ဇာတ်ကားတို့မှာ အကယ်ဒမီဆုအတွက် လျာထားခံရပေမယ့် “တစ်သက်တာထူးချွန်ဆု” သာလျှင် သူရဲ့ တခုတည်းသော အော်စကာဆု ဖြစ်ခဲ့ပါတယ်။  ၁၉၉၆ ခုနှစ် အသက် ၈၀ အရွယ်မှာတော့ သူဟာ  လေသင်တုန်းဖြတ်ခဲ့ပြီး စကား ပီပီသသ မပြောဆိုနိုင်တော့ဘဲ မျက်နှာအာရုံကြောတွေလည်း ထိခိုက်ပျက်စီးခဲ့ပါတယ်။  ၂၀၁၅ ခုနှစ်မှာတော့ သူရဲ့ ၉၉ နှစ်ပြည့်မွေးနေ့ အထိမ်းအမှတ်အဖြစ် ဒေါက်ကလပ်စ်ဟာ ဖျော်ဖြေရေးလောကရဲ့ အယ်ဇိုင်မားဝေဒနာရှင်တွေအတွက် စင်တာဆောက်လုပ်ဖို့  အမေရိကန် ဒေါ်လာ ၁၅ သန်းကို ရုပ်ရှင်နဲ့ ရုပ်မြင်သံကြား ရန်ပုံငွေအဖွဲ့ထံ လှူဒါန်းခဲ့တယ်လို့ ရိုက်တာသတင်းအရ သိရပါတယ်။   
1 year Ago
Up