ဟောင်ကောင်

November 22, 2022

ဟောင်ကောင် သတင်းစာဝန်ထမ်းဟောင်း ၆ ဦး ပြည်ပအင်အားစုနှင့် ပူးပေါင်းလျှို့ဝှက်ကြံစည်ခဲ့ဟု ဝန်ခံ

ဟောင်ကောင်မှာ ဒီမိုကရေစီလိုလားတဲ့ Apple Daily သတင်းစာရဲ့  ဝန်ထမ်းဟောင်း ၆ ဦးဟာ အကြီးမားဆုံးသော အမျိုးသားလုံခြုံရေးကိစ္စတခုဖြစ်တဲ့ ပြည်ပအင်အားစုတွေနဲ့ ပူးပေါင်းလုပ်ဆောင်ဖို့ လျှို့ဝှက်ကြံစည်ခဲ့ကြောင်း နိုဝင်ဘာ ၂၂ ရက်မှာ အပြစ်ဝန်ခံခဲ့ပါတယ်။

အဲဒီ ၆ ဦးဟာ သတင်းစာပိုင်ရှင်ဟောင်း အမှုဆောင်အရာရှိချုပ်ဖြစ်ခဲ့သူ ချောင်ကင်ဟွန်၊ နောက်ပိုင်း ဒစ်ဂျစ်တယ် Apple Daily ရဲ့ တွဲဖက်ထုတ်ဝေသူဟောင်း ချန်ဖီးမန်၊ အယ်ဒီတာချုပ်ဟောင်း ရိုင်ယန်လော၊ အမှုဆောင်အယ်ဒီတာချုပ်ဟောင်း လမ်မန်ချုံး၊ အင်္ဂလိပ်ပိုင်းထုတ်ဝေမှု အယ်ဒီတာချုပ် ဖုန်းဝေကောင်းနဲ့ အယ်ဒီတာ့အာဘော် စာရေးဆရာ ယန်းကျန့်ချီတို့ ဖြစ်ပါတယ်။

သူတို့ဟာ ပြည်ပနိုင်ငံ သို့မဟုတ် အဖွဲ့အစည်းတွေကို ပိတ်ဆို့အရေးယူမှုတွေ ချမှတ်ဖို့ တောင်းဆိုတာနဲ့ ၂၀၂၀ ဇူလိုင်လကနေ ၂၀၂၁ ခုနှစ် ဇွန်လအတွင်း ဟောင်ကောင်နဲ့ တရုတ်အစိုးရတွေကို ဆန့်ကျင်တဲ့ တခြားရန်လိုတဲ့ လှုပ်ရှားမှုတွေမှာ ပါဝင်ဖို့ မီဒီယာသူဌေးကြီး ဂျင်မီလိုင်နဲ့ တခြားသူတွေကို ပူးပေါင်းကြံစည်မှုနဲ့ အပြစ်ရှိကြောင်း ဝန်ခံခဲ့ပါတယ်။

သူတို့ ၆ ယောက်အပြင် တရားမဝင် စုဝေးမှုမှာ ပါဝင်မှုနဲ့ ပြစ်ဒဏ်ချမှတ်ခံရပြီးနောက် ထောင်ကျနေပြီဖြစ်တဲ့ ဂျင်မီလိုင်တို့ကို ပေကျင်းက ၂၀၂၀ ခုနှစ်မှာ ချမှတ်ထားတဲ့ လုံခြုံရေးဥပဒေသစ်အရ တရားစွဲဆိုထားပါတယ်။

1 week Ago

June 23, 2022

ဟောင်ကောင်တွင် ကေဘယ်ကြိုးတံတား မီးလောင်

ကမ္ဘာ့ဘဏ္ဍာရေးအချက်အချာ ဟောင်ကောင်မှာ ကေဘယ်ကြိုးတံတားတစင်း  မီးလောင်မှုဖြစ်ပြီး ဇွန် ၂၂ ရက်က အိမ်ခြေ ၂၀,၀၀၀ လောက် လျှပ်စစ်မီး ပြတ်တောက်ခဲ့ပါတယ်။

မြောက်ပိုင်းခရိုင် ယွမ်လောင်က ကေဘယ်ကြိုးတံတားတစင်း ဇွန် ၂၁ ရက် ည ၇ နာရီမှာ မီးလောင်ခဲ့တယ်လို့ လျှပ်စစ်ဓာတ်အား ဖြန့်ဖြူးရေးကုမ္ပဏီ CLP Power က ပြောပါတယ်။

ဒါကြောင့် လျှပ်စစ်သုံးစွဲသူ ၁၆၀,၀၀၀ ဝန်းကျင်လောက် ဓာတ်အားပြတ်တောက်ခဲ့ပေမဲ့ ထိခိုက်ဒဏ်ရာရသူတော့ မရှိဘူးလို့ ကုမ္ပဏီက ပြောပါတယ်။

ဆေးရုံတွေနဲ့ မီးရထားလမ်းတွေ အပါအဝင် မရှိမဖြစ်လိုအပ်တဲ့ ဝန်ဆောင်မှုတွေအတွက် လျှပ်စစ်ဓာတ်အား ပြန်ရထားပြီးပေမဲ့ ကျန်နေတဲ့ သုံးစွဲသူ အိမ်ခြေ ၂၀,၀၀၀ လောက်ကို လျှပ်စစ်ဓာတ်အား ပြန်ဖြန့်ဖြူးပေးဖို့ နောက်ထပ်နှစ်ရက် လိုမယ်လို့ ကုမ္ပဏီက ကြေညာချက် ထုတ်ပြန်ထားပါတယ်။

ဒီမတော်တဆမှုနဲ့ပတ်သက်ပြီး စုံစမ်းစစ်ဆေးဖို့ မြို့တော်အစိုးရကို တောင်းဆိုထားကြပါတယ်။ ဒေသတွင်းမှာ စာသင်ကျောင်း ဒါဇင်ပေါင်းများစွာ လျှပ်စစ်မီးပြတ်တောက်ခဲ့လို့ ဇွန် ၂၂ ရက်က အတန်းတွေ ရပ်ထားဖို့လိုတယ်လို့ ပညာရေးဗျူရိုက ပြောခဲ့ပါတယ်။

5 months Ago
More News
Up