ဟိုင်းကြီးကျွန်းတွင် မသင်္ကာဖွယ် စက်လှေ ၂ စီး ကပ်လာသဖြင့် ဒေသခံများ ရုတ်ရုတ်သဲသဲဖြစ်

October 26, 2016

ဟိုင်းကြီးကျွန်းတွင် မသင်္ကာဖွယ် စက်လှေ ၂ စီး ကပ်လာသဖြင့် ဒေသခံများ ရုတ်ရုတ်သဲသဲဖြစ်

ဧရာဝတီတိုင်း၊ ဟိုင်းကြီးကျွန်းမြို့ရှိ ဖောင်ဒိုးရွာအနီးကို မသင်္ကာဖွယ် စက်လှေ ၂ စီး ကပ်လာတဲ့အတွက် ဒေသခံတွေ ရုတ်ရုတ်သဲသဲ ဖြစ်ခဲ့တယ်လို့ မြို့နယ်အုပ်ချုပ်ရေးမှူး ဦးသက်လွင်ဦးက ပြောပါတယ်။ မနေ့ညပိုင်းက ဖြစ်ပွားခဲ့တာဖြစ်ပြီး ဘယ်သူဘယ်ဝါတွေပါတဲ့ စက်လှေ ဖြစ်ကြောင်းတော့ မသိရဘူးလို့လည်း သူက ပြောပါတယ်။ “ဖောင်ဒိုးရွာဘက်မှာ မသင်္ကာစရာ စက်လှေ ဆိုပြီးတော့ ရွာသားတွေက တွေ့ကြတယ်။ အဲ့ဒီစက်လှေ ၂ စီးက ကမ်းကို ကပ်လာသလို ဖြစ်တယ်။ သို့သော်လည်း ကမ်းမှာရှိတဲ့လူတွေကို မြင်ပြီးတော့ ပြန်ခွာသွားတယ်။ အဲ့ဒီကစပြီးတော့ မနက် ၃ နာရီလောက်အထိပေါ့၊ ကမ်းခြေတလျှောက်မှာ ရှိနေကြတာပေါ့။” ဟိုင်းကြီးကျွန်း မြို့အုပ်ချုပ်ရေးအဖွဲ့တွေနဲ့ ရဲတပ်ဖွဲ့ဝင်တို့လည်း တညလုံးနီးပါး စောင့်ကြည့်ခဲ့ကြပေမယ့် စက်လှေတွေက ပင်လယ်ရေနက်ထဲမှာရှိနေလို့ မီးရောင်တဖျတ်ဖျတ်ပဲ မြင်ရတယ်လို့လည်း ပြောပါတယ်။ ဟိုင်းကြီးကျွန်းမှာ မုန်တိုင်းပြီးခါစ ငါးဖမ်းထွက်တဲ့ စက်လှေတွေလည်း ဖြစ်နိုင်တယ်၊ သူတို့ကို အောက်တိုဘာ ၂၅ ရက်အထိ ငါးထွက် မဖမ်းဖို့ တားထားတယ်လို့လည်း ဆိုပါတယ်။ ဟိုင်းကြီးကျွန်းအနီး မသင်္ကာဖွယ် စက်လှေတွေ့တာ ဒါ ပထမဆုံးဖြစ်ပြီး ရခိုင်၊ မောင်တော်မှာ လတ်တလောဖြစ်ပွားနေတဲ့ အကြမ်းဖက်တိုက်ခိုက်မှု ဖြစ်ရပ်ကြောင့် ဟိုင်းကြီးကျွန်း ဒေသခံတွေဟာ သို့လော သို့လောနဲ့ စောင့်ကြည့်နေတဲ့ အခြေအနေလည်း ဖြစ်ပါတယ်။ ဟိုင်းကြီးကျွန်းမြို့ အုပ်ချုပ်ရေးမှူး ဦးသက်လွင်ဦးကတော့ ကျွန်းမှာ ရေတပ်ဌာနချုပ်ရှိပြီး ညပိုင်း ကင်းလှည့်စောင့်ကြပ်တာတွေလည်း မပြတ် လုပ်နေတယ်လို့ ပြောပါတယ်။
5 years Ago
Up