ဟီရိုရှီးမား

August 9, 2022

နျူကလီးယားလက်နက် အသုံးမပြုရေး ကတိပြုရန် ကုလအတွင်းရေးမှူးချုပ် တောင်းဆို

နျူကလီးယားလက်နက်တွေကို ပထမဆုံး အသုံးမပြုရေး ကတိကဝတ်ပြုကြဖို့ ဂျပန်နိုင်ငံကို အလည်အပတ်ရောက်နေတဲ့ ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်က နျူကလီးယားလက်နက်ပိုင်ရှင် နိုင်ငံတွေကို သြဂုတ် ၈ ရက်မှာ တောင်းဆိုလိုက်ပါတယ်။

ကမ္ဘာ့ပထမဆုံး အဏုမြူဗုံးကြဲချမှု ၇၇ နှစ်မြောက် အထိမ်းအမှတ်အဖြစ် သြဂုတ် ၆ ရက်က ကျင်းပတဲ့ ဟီရိုရှီးမား ငြိမ်းချမ်းရေး အောက်မေ့ဖွယ် အခမ်းအနားကို တက်ရောက်ပြီး နှစ်ရက်အကြာမှာ ကုလသမဂ္ဂ အကြီးအကဲက တိုကျိုမြို့တော်က သတင်းစာရှင်းလင်းပွဲအတွင်း ခုလို တောင်းဆိုလိုက်တာပါ။

ဆယ်စုနှစ်ချီ အချိန်ကြာခဲ့ပြီးတဲ့နောက် နျူကလီးယား ထိပ်တိုက်ရင်ဆိုင်မှု အန္တရာယ် ပြန်ဖြစ်လာခဲ့ပြီလို့လည်း သူက ပြောပါတယ်။

ဥရောပရဲ့ အကြီးဆုံး နျူကလီးယား ဓာတ်အားပေးစက်ရုံဖြစ်တဲ့ ယူကရိန်းနိုင်ငံထဲက ဇာပိုရစ်ချ်ဇီယာစက်ရုံကို ရုရှားကပစ်ခတ်ခဲ့တဲ့ သတင်းတွေကို တုံ့ပြန်ရင်း နျူကလီးယားစက်ရုံကို တိုက်ခိုက်တာဟာ အသေခံဗုံးခွဲမှုပဲလို့ ဂူတာရက်စ်က ပြောပါတယ်။

အခြေအနေကို ဝင်စစ်ဆေးနိုင်ဖို့ နိုင်ငံတကာ အဏုမြူစွမ်းအင်အေဂျင်စီ (IAEA) ကို ခွင့်ပြုပေးဖို့ လိုအပ်တယ်လို့လည်း ဂူတာရက်စ်က ပြောပါတယ်။

ကိုရီးယားကျွန်းဆွယ်မှာ နျူလက်နက်တွေ ပြန့်ပွားမှုကို လျှော့ချဖို့ အဓိက ဦးတည်ချက်အဖြစ် ကိုရီးယားကျွန်းဆွယ် ‘အပြည့်အဝ’ နဲ့ ‘နောက်ကြောင်းပြန်မဆုတ်နိုင်တဲ့’ နျူကလီးယား ကင်းစင်ရေးကို မီးမောင်းထိုးပြခဲ့ပြီး ကမ္ဘာလုံးဆိုင်ရာ လက်နက်ဖျက်သိမ်းရေးက နောက်ပြန်ဆုတ်သွားတယ်လို့လည်း ဂူတာရက်စ်က ပြောခဲ့ပါတယ်။

4 months Ago

August 6, 2022

အဏုမြူဗုံးကြဲခံရသည့် ၇၇ နှစ်မြောက်အထိမ်းအမှတ် ဟီရိုရှီးမားမြို့တွင် ကျင်းပ

ဂျပန်နိုင်ငံ ဟီရိုရှီးမားမြို့မှာ သြဂုတ် ၆ ရက်က ကမ္ဘာ့ပထမဆုံး အဏုမြူဗုံးကြဲချခံရတဲ့ ၇၇ နှစ်မြောက် အထိမ်းအမှတ်အဖြစ် မြို့လယ်ခေါင်ရှိ ငြိမ်းချမ်းရေးပန်းခြံမှာ ခေါင်းလောင်းထိုး ကျင်းပခဲ့ပါတယ်။

၁၉၄၅ ခုနှစ် မကုန်ခင်မှာ လူပေါင်း ၁၄၀,၀၀၀ ကျော် သေဆုံးခဲ့ရတဲ့ ဗုံးခွဲမှု နှစ်ပတ်လည်အခမ်းအနားကို ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် အပါအဝင် တာဝန်ရှိသူတွေအပြင် ထောင်နဲ့ချီတဲ့ ပြည်သူတွေလည်း အခမ်းအနားကို ပူးပေါင်းပါဝင် တက်ရောက်လာခဲ့ပါတယ်။  

ဟီရိုရှီးမားကို လာမယ့်နှစ်မှာ ကျင်းပမယ့် ဂျီဆဲဗင်း ထိပ်သီးအစည်းအဝေးနေရာအဖြစ် ရွေးချယ်ထားတဲ့ ၀န်ကြီးချုပ် ဖူမီယို ခိရှိဒါ့ က နျူကလီးယား လက်နက်တွေကို စွန့်လွှတ်ဖို့ ကမ္ဘာကို တောင်းဆိုခဲ့ပါတယ်။ 

“အခုဆိုရင် နျူကလီးယားလက်နက် အသုံးပြုမှုဟာ တကယ့်ပြဿနာဖြစ်လာပါပြီ။ နျူကလီယား လက်နက် သုံးစွဲမှုကြောင့် ကြောက်စရာဖြစ်ရပ်ဆိုးတွေကို ဘယ်တော့မှ ထပ်မလုပ်ကြဖို့ ဟီရိုရှီးမားမြို့ကနေ ကမ္ဘာ့ပြည်သူတွေကို ကျယ်ကျယ်လောင်လောင် မေတ္တာ ရပ်ခံ ချင်ပါတယ်” လို့ ပြောသွားပါတယ်။ 

ကုလသမဂ္ဂအတွင်းရေးမှူးချုပ်ကလည်း ရုရှားက ယူကရိန်းကို ကျူးကျော်လာပြီးနောက် လက်နက် ပြိုင်ဆိုင်မှုအသစ်ကို သတိပေးလိုက်ပါတယ်။ 

“နျူကလီးယားလက်နက် ၁၃,၀၀၀ နီးပါးဟာ ကမ္ဘာတဝန်းက လက်နက်တိုက်တွေမှာ ရှိနေပါတယ်။ ပြင်းထန်တဲ့နူကလီးယားအကြောင်း တိုးတိုးတိတ်တိတ်အသံတွေနဲ့ အကျပ်အတည်းတွေက ခပ်မြန်မြန်ကို ပျံ့နှံ့လာနေပြီး အရှေ့အလယ်ပိုင်းကနေ၊ ကိုရီးယားကျွန်းဆွယ်အထိ၊ ရုရှားက ယူကရိန်းကို ကျူးကျော်တဲ့အထိ ပျံ့လာနေတယ်” လို့ ဂူးတားရက်စ်က ပြောပါတယ်။ 

၁၉၄၅ ခုနှစ် သြဂုတ်လ ၆ ရက် မနက် ၈ နာရီ ၁၃ မိနစ်မှာ အမေရိကန် B-29 စစ်လေယာဉ် အီနိုလာဂေးဟာ "Little Boy" လို့ နာမည်ပြောင်ပေးထားတဲ့ ဗုံးတလုံးကို ကြဲချပြီး လူဦးရေ ၃ သိန်းခွဲလောက် ရှိတဲ့ ဟီရိုရှီးမားမြို့ကို ချေမှုန်းပစ်ခဲ့တာပါ။ 

နောက်ပိုင်းမှာလည်း ဒဏ်ရာတွေ၊ ဓာတ်ရောင်ခြည်ဆိုင်ရာ ရောဂါဝေဒနာတွေကြောင့် လူထောင်ပေါင်းများစွာ သေဆုံးခဲ့ရပါတယ်။ 

သြဂုတ် ၉ ရက်မှာ နာဂါဆာကီကို အမေရိကန်စစ်တပ်က အဏုမြူဗုံးကြဲချမှုကြောင့် လူ ၇၅,၀၀၀ ကျော် သေဆုံးခဲ့ရတဲ့ ဟီရိုရှီးမားကပ်ဆိုးကြီး ဖြစ်ပါတယ်။ 

နောက် ၆ ရက်အကြာမှာတော့ ဂျပန်နိုင်ငံဟာ လက်နက်ချပြီး ဒုတိယကမ္ဘာစစ်ကို အဆုံးသတ်ခဲ့ပါတယ်။ 

4 months Ago
More News
Up