ဟိုပင်မြို့နယ်

July 5, 2022

ဟိုပင်မြို့နယ်တွင် CDM ကျောင်းဆရာအပါအဝင် အမျိုးသား ၄ ဦးအား စစ်ကောင်စီတပ်က ရိုက်နှက်ဖမ်းဆီး

ကချင်ပြည်နယ် ဟိုပင်မြို့နယ်က ငါးမိုင်ကျေးရွာမှာ ဇူလိုင် ၄ ရက် နေ့လယ်ပိုင်းက  CDM ကျောင်းဆရာတဦးအပါအဝင် အမျိုးသား ၄ ဦးကို စစ်ကောင်စီတပ်က ရိုက်နှက်ဖမ်းဆီးခဲ့တယ်လို့ ဒေသခံတွေက ပြောပါတယ်။

ဟိုပင်အခြေစိုက် ခလရ (၄၀) က စစ်ကောင်စီတပ်ဖွဲ့ဝင်တွေဟာ  CDM ကျောင်းဆရာတဦးအပါအဝင် အမျိုးသား ၁ ဦးအား PDF နဲ့ ပတ်သက်တယ်ဆိုပြီး ရိုက်နှက်ဖမ်းဆီးခေါ်ဆောင်သွားတာလို့ ဒေသခံတွေက ပြောပါတယ်။

“နေ့လယ် ၁ နာရီလောက်က ခလရ ၄၀ က စစ်သား ၈၀ လောက်ရွာထဲဝင်လာပြီး တအိမ်ဝင်တအိမ်ထွက် စစ်ဆေးတယ်။ CDM ကျောင်းဆရာနဲ့ ရွာက အမျိုးသား ၃ ဦးကို PDF နဲ့ ဆက်သွယ်လို့ဆိုပြီး ရိုက်နှက်ဖမ်းခေါ်သွားတယ်” လို့ ဒေသခံတဦးက ပြောပါတယ်။

ဖမ်းဆီးခံရသူတွေကတော့ CDM ကျောင်းဆရာ ကိုဇော်ထက်အောင်၊ ရွာသား ကိုမျိုးအောင်၊ ကိုမောင်ဇော်နဲ့ အမည်မသိတဦးတို့ဖြစ်ပြီး ကိုဇော်ထက်အောင်ကတော့ ရိုက်နှက်စစ်ဆေးခံရတဲ့ ဒဏ်ရာတွေကြောင့် အသက်အန္တရာယ်စိုးရိမ်ရတယ်လို့ ဆိုပါတယ်။

သူတို့ ၄ ဦးအား စစ်ကောင်စီတပ်က ဘယ်နေရာမှာ ဖမ်းဆီးထားတယ်ဆိုတာ မသိရသေးဘူးလို့ ဒေသခံတွေက ပြောပါတယ်။

ဟိုပင်မြို့နယ် တကွင်းကျေးရွာမှာလည်း ပြီးခဲ့တဲ့ စက်တင်ဘာ ၁၄ ရက်က  စစ်ကောင်စီတပ်ဖွဲ့ဝင် အင်အားအလုံးအရင်းနဲ့ ဝင်ရောက်လာပြီး လူငယ် ၁၀ ဦးထက်မနည်းကို ဖမ်းဆီးခေါ်ဆောင်သွားခဲ့ပါသေးတယ်။

7 months Ago

September 16, 2021

ဟိုပင်မြို့နယ်တွင် ကလေးငယ်များအပါအဝင် ပြည်သူ ၁၂ ဦးကို စစ်တပ်ကဖမ်းဆီး

ကချင်ပြည်နယ်၊ ဟိုပင်မြို့နယ်မှာ ကလေးငယ်တွေအပါအဝင် ဒေသခံ ပြည်သူ ၁၂ ယောက်ကို စစ်တပ်က ဖမ်းဆီးသွားတယ်လို့ ဒေသခံတွေက ပြောပါတယ်။

စက်တင်ဘာ ၁၄ ရက် ညနေပိုင်းနဲ့ ညသန်းခေါင်အချိန်က ဖမ်းခံလိုက်ရတာဖြစ်ပြီး သဲဂုဏ်ရွာက မိသားစုလိုက်အပါအဝင် ၈ ယောက် ဖမ်းခံရတယ်လို့ သိရပါတယ်။

“ည ၁၂ နာရီကျော်မှာ လာဖမ်းတာ။ ဦးမိုးရယ်၊ သူ့မိန်းမရယ်၊ ၉ နှစ်အရွယ် သူ့သားလေးရယ် ဖမ်းခံရတယ်။ ဦးမောင်နိုင်းမှာလည်း ၁၆ နှစ်နဲ့ ၁၃ နှစ်အရွယ် သား နှစ်ယောက်ပါ ဖမ်းခံရတယ်။ နောက် ခြေတဖက်မသန်တဲ့ ဦးငြိမ်းချမ်းဦး၊ စိုင်းလွင်မျိုးဆိုတော့ အားလုံးပေါင်း ရှစ်ယောက်ပါ။ ဘာကြောင့် ဖမ်းသွားမှန်းလည်း မသိသေးဘူး။ ဘယ်မှာဖမ်းထားမှန်းလည်း မသိသေးဘူး” လို့ သဲဂုဏ်ရွာ ဒေသခံတယောက်က ပြောပါတယ်။

စက်တင်ဘာ ၁၄ ရက်နေ့ ညနေပိုင်းက ဟိုပင်မြို့နဲ့ တကွင်းရွာကြားမှာရှိတဲ့ တပ်ရင်း ၄၀ နားမှာ ပစ်ခတ်ပေါက်ကွဲတာတွေဖြစ်ခဲ့တယ်လို့ ဒေသခံတွေက ပြောပါတယ်။ ဘာကြောင့်ဖြစ်မှန်းမသိရပေမဲ့ လမ်းသွားလမ်းလာ လူငယ် ၄ ယောက်ကို စစ်တပ်က ဖမ်းဆီးသွားပါတယ်။

“ပစ်ခတ်တာတွေဖြစ်ပြီး မိုးကောင်းက စစ်ကူလာတယ်။ ဟိုပင်တကွင်းရွာက ကောင်လေးက သူ့အမေဆန်တိုဟူးရောင်းလို့သွားကြိုတာ ဖမ်းခံရတယ်။ နောက် သုံးယောက်ကတော့ ဟိုပင်ကပါ။ တယောက်က မြဇေယျာရပ်ကွက်က၊ ကျန်တဲ့ နှစ်ယောက်ကတော့ ဘယ်ရပ်ကွက်လဲ မသိသေးဘူး။ သူတို့ကိုတော့ တပ်ရင်း ၄၀ မှာ ဖမ်းထားတယ်လို့ သိရတယ်” လို့ ဒေသခံတယောက် ပြောပါတယ်။

ပြီးခဲ့တဲ့ လကလည်း သဲဂုဏ်ရွာမှာ ကွမ်းသီးလာဝယ်တဲ့ ဧည့်သည်တွေနဲ့ အိမ်ရှင် အပါအဝင် လူ ၁၄ ယောက်ကို စစ်တပ်က ဖမ်းဆီးသွားပြီး နောက်ပိုင်းမှာ ပြန်လွှတ်ပေးခဲ့ပါတယ်။

ဇူလိုင် ၄ ရက်ကလည်း သဲဂုဏ်ရွာက ဘုန်းကြီးကျောင်းကို စစ်တပ်က ဝင်စီးပြီး ကျောင်းထိုင်ဘုန်းကြီးကျောင်းကို ကြိုးတုပ်ရိုက်နှက်ခဲ့ပါသေးတယ်။ ဒီမတိုင်ခင်ကလည်း ကျောင်းကို ဝင်ရောက်ရှာဖွေတာတွေ လုပ်ခဲ့တယ်လို့ ဒေသခံတွေက ပြောပါတယ်။

“ရွာကသေးသလောက် ဒလန်ကပေါတယ်။ ဘာကြောင့်မှန်းမသိဖမ်းခံနေရတာ။ ခုဆို လူတချို့လည်း ရှောင်နေကြရတယ်။ အားလုံးကလည်း စိုးရိမ်နေကြတာပါ။ မလုံခြုံတော့ဘူး” လို့ ဒေသခံ တယောက် ပြောပါတယ်။

1 year Ago
Up