ဟိုပင်မြို့တွင် အ၀ီစိတွင်းတူးရာမှ ဂက်စ်များ ပန်းထွက်နေ

June 3, 2018

ဟိုပင်မြို့တွင် အ၀ီစိတွင်းတူးရာမှ ဂက်စ်များ ပန်းထွက်နေ

  ကချင်ပြည်နယ် မိုးညှင်းခရိုင် ဟိုပင်မြို့ မြကျွန်းသာရပ်ကွက်မှာ အဝိစိတွင်း တူးဖော်ရာမှ ဇွန် ၂ ရက်နေ့က ဂက်စ်တွေ ပန်းထွက်နေတယ်လို့ မျက်မြင်တွေ့ရှိသူတွေက ပြောပါတယ်။ ဟိုပင်မြို့ မြကျွန်းသာရပ်ကွက် နယ်မြေ (၅) အိမ်အမှတ်၅/၄၇ ဦးဝင်းကြည်ရဲ့ နေအိမ်မှာ တွေ့ရှိခဲ့တာလို့ လုံခြုံရေးဆိုင်ရာ အကြီးအကဲတဦးက ပြောပါတယ်။ “၃၁ ရက်နေ့က စတူးတာ။ နေ့က ၂ ရက်နေ့မှာ နည်းနည်းစတွေ့တာ။ အနက်ပေ ၂၀၀ လောက်မှာ စတွေ့တာ ။ ဒီကနေ့ကျတော့ တော်တော်များတယ် ပန်းထွက်နေတာ။” ဂက်စ်တွေ ပန်းထွက်နေတဲ့ နေရာနဲ့ အနီးဝန်ကျင်က လူတွေကိုတော့ ဘေးအန္တရာယ် ကင်းရှင်အောင် ပြောင်းရွှေ့ပေးနေတယ်လို့ ဟိုပင်မြို့ အထွေထွေအုပ်ချုပ်ရေးမှူး ဦးစိုးမိုးအောင် က ပြောပါတယ်။ အခုလို မြေအောက်ကနေ ဓာတ်ငွေ့တွေ ပန်းထွက်နေတာနဲ့ ပတ်သက်လို့ ခရိုင် အုပ်ချုပ်ရေးကို တင်ပြထားပြီး ပြည်နယ်အစိုးရကိုလည်း တင်ပြထားပြီး ဖြစ်တယ်လို့ ဆိုပါတယ်။ “ကျနော်တို့ အနေနဲ့ကတော့ သက်ဆိုင်အဆင်ဆင့်ကို တင်ပြထားပြီးပါပြီ။ အန္တရာယ် မဖြစ်အောင် အနီးပတ်ဝန်းကျင်က လူတွေကိုလည်း ရွှေ့ပြောင်းပေးထားပါတယ်” လို့ အထွေထွေ အုပ်ချုပ်ရေးမှူးက ဆက်လက်ပြောဆိုခဲ့ပါတယ်။ ဇော်မိုးထက် (ဖားကန့်)
4 years Ago
Up