သွေးချင်းတို့ရဲ့ပွဲတော်ဆီ ပွဲတော် ဖော်ဝါရီလ ၁ ရက်နေ့စတင် ဖွင့်လှစ်မည်

February 2, 2020

“သွေးချင်း”ဆိုသည့်အနက် ဒေါ်အောင်ဆန်းစုကြည် ထုတ်ဖော်

ပြည်ထောင်စုမြန်မာနိုင်ငံအတွင်း နေထိုင်သူအားလုံးရဲ့ စိတ်ထဲက သဘောချင်း တူညီမှ၊ တစိတ်တည်းတဝမ်းတည်းဖြစ်မှ တကယ့် “သွေးချင်း” လို့ ခေါ်နိုင်မယ်လို့ နိုင်ငံတော်ရဲ့အတိုင်ပင်ခံပုဂ္ဂိုလ်ဒေါ်အောင်ဆန်းစုကြည့်က အနက်ဖွင့်ဆိုလိုက်ပါတယ်။ ဇန်နဝါရီ ၁ ရက် ညနေပိုင်းက ရန်ကုန်မြို့ ကျိုက္ကဆံအားကစားကွင်းမှာ ကျင်းပတဲ့ “သွေးချင်းတို့ရဲ့ပွဲတော်ဆီ ၂၀၂၀” ဖွင့်ပွဲ အခမ်းအနားမှာ အခုလို အသိပေး ပြောဆိုလိုက်တာပါ။ “သွေးချင်းလို့ ဆိုတဲ့အခါမှာ တူညီတဲ့သွေး၊ တူညီတဲ့သွေးဆိုတာ တကယ်တော့ သွေးကြောတွေထဲမှာ စီးဆင်းနေတဲ့ သွေးတွေကို ပြောတာ မဟုတ်ပါဘူး။ ကျမတို့ စိတ်ထဲကနေ စီးဆင်းနေတဲ့သွေးကို ပြောတာပါ။ ဆိုလိုချင်တာဟာ စိတ်ထဲက သဘောချင်းဟာ တူညီမှ၊ တစိတ်တည်း တဝမ်းတည်း ဖြစ်မှ တကယ့်သွေးရင်းတွေ ဖြစ်နိုင်မှာပါ။ အကြောထဲမှာ စီးဆင်းနေတဲ့သွေးက ဘယ်လိုပဲတူတူ တစိတ်တည်း တဝမ်းတည်း မဟုတ်ဘူးဆိုရင် ကျမတို့ကိုယ်ကျမတို့ သွေးချင်းလို့ ခေါ်နိုင်မှာ မဟုတ်ပါဘူး။” အတိုင်ပင်ခံပုဂ္ဂိုလ်က ပြည်ထောင်စုအတွင်းမှာ မတူညီတဲ့ လူမျိုး၊ မတူတဲ့ဘာသာစကား၊ မတူတဲ့ ကိုးကွယ်မှုတွေ ရှိပေမယ့် စည်းလုံးညီညွတ်စွာ နေရေးကို ဦးတည်ကြရမှာ ဖြစ်တဲ့အပြင် အားလုံးဟာ ပြည်ထောင်စုသားချင်းများ ဖြစ်တာနဲ့အညီ ဒီပြည်ထောင်စု၊ ဒီမြေ၊ ဒီရေကို ချစ်မြတ်နိုးပြီး ငြိမ်းချမ်းရေး၊ ညီညွတ်ရေး၊ တိုးတက်ဖွံ့ဖြိုးမှုနဲ့ သာယာခိုင်မာတဲ့ ပြည်ထောင်စုတခု တည်ဆောက်ရေးကို တန်ဖိုးထားကြဖို့ အင်မတန်အရေးကြီးတယ်လို့ ဆက်လက်သတိပေး ပြောဆိုခဲ့ပါတယ်။  “တိုင်းရင်းသားညီအစ်ကိုမောင်နှများနဲ့ စုစည်းပြီးတော့ ပြည်ထောင်စုမှာ ငြိမ်းချမ်းရေးရဖို့  ကြိုးစားမှုကိုလည်း ဝိုင်းဝန်းပြီးတော့ ကူညီကြပါ၊ ထောက်ခံကြပါ”လို့လည်း အတိုင်ပင်ခံပုဂ္ဂိုလ်က မေတ္တာရပ်ခံခဲ့ပါတယ်။  အရောင်အသွေးစုံ တိုင်းရင်းသားတွေ ပေါင်းစုပြီး တိုင်းရင်းသားများ ဖွံ့ဖြိုးတိုးတက်ဖို့ တဖက်တလမ်းက အထောက်အကူဖြစ်စေမယ့် ဒီလိုပွဲတော်ကို ကျင်းပကြတာ အင်မတန်မှ သင့်တော်အားရစရာ ဖြစ်ပါတယ်လို့ ဖွင့်ပွဲအခမ်းအနားမှာ မှတ်ချက်ပြုခဲ့ပါတယ်။ ဇန်နဝါရီ ၁ ရက်ကနေ ၇ ရက်အထိ ကျင်းပမယ့် အခုပွဲတော်ဟာ မြန်မာနိုင်ငံရဲ့ တောတောင်ရေမြေအလှနဲ့ ယဉ်ကျေးမှု ဓလေ့ထုံးစံတွေ တန်ဖိုးထား ထိန်းသိမ်းလာစေဖို့၊ တိုင်းရင်းသားများရဲ့ ရိုးရာအဝတ်အထည်တွေ၊ ဒေသထွက်ကုန်တွေကို နိုင်ငံတွင်းသာမက တခြားနိုင်ငံတွေမှာပါ သိရှိပြီး နိုင်ငံတကာ ဈေးကွက်တွေဆီကို တင်ပို့နိုင်ဖို့နဲ့ ငြိမ်းချမ်းရေးကို အထောက်အကူပြုနိုင်မယ် စတဲ့ ရည်ရွယ်ချက်တွေနဲ့ တိုင်းရင်းသားလူမျိုးတွေရဲ့ ရိုးရာယဉ်ကျေးမှုနဲ့ ခရီးသွားလုပ်ငန်း မြှင့်တင်နိုင်ဖို့ စတဲ့ ရည်ရွယ်ချက်တွေနဲ့ ကျင်းပနေတာပါ။   “သွေးချင်းတို့ရဲ့ပွဲတော်ဆီ ၂၀၂၀” ဖွင့်ပွဲ အခမ်းအနားကို အတိုင်ပင်ခံပုဂ္ဂိုလ်နဲ့အတူ ဒုတိယသမ္မတ ဦးဟင်နရီဗန်ထီးယူ၊ ပြည်ထောင်စုဝန်ကြီးတွေ၊ ဒုတိယဝန်ကြီးတွေ၊ ငြိမ်းချမ်းရေးကော်မရှင်ဥက္ကဋ္ဌ၊ တိုင်းဒေသကြီးနဲ့ ပြည်နယ်ဝန်ကြီးချုပ်တွေ၊ နိုင်ငံခြားသံရုံးများမှ သံအမတ်ကြီးတွေ၊ သံရုံး တာဝန်ရှိသူတွေ၊ ကုလသမဂ္ဂ လက်အောက်ခံ အဖွဲ့အစည်းတွေက ဌာနေကိုယ်စားလှယ်တွေ၊ မြန်မာနိုင်ငံ တိုင်းရင်းသားလုပ်ငန်းရှင်များအသင်းနဲ့ တိုင်းဒေသကြီးနဲ့ပြည်နယ်တိုင်းရင်းသား လုပ်ငန်းရှင်များအသင်းတွေက ဥက္ကဋ္ဌတွေနဲ့ တာဝန်ရှိသူတွေ တက်ရောက်ခဲ့ကြပါတယ်။
2 years Ago

February 1, 2020

သွေးချင်းတို့ရဲ့ပွဲတော်တွင် ကယားရိုးရာ တံခွန်တိုင် စိုက်ထူမှု ကယားလီဖုလူငယ်အဖွဲ့ ကန့်ကွက်

ရန်ကုန်မြို့မှာ ကျင်းပပြုလုပ်တဲ့ သွေးချင်းတို့ရဲ့ပွဲတော်ဆီ ပွဲတော်မှာ ကယားရိုးရာ ကေ့ထျိုးဘိုး (ခေါ်) တံခွန်တိုင် စိုက်ထူလိုက်တဲ့အပေါ် ကယားလီဖုလူငယ်အဖွဲ့က ကန့်ကွက်ကြောင်း ထုတ်ပြန်လိုက်ပါတယ်။  ကေ့ထျိုးဘိုးပွဲတော်ဟာ ကယားလူမျိုးတို့ရဲ့ ရှေးပဝေသဏီကပင် လက်ဆင့်ကမ်းကျင်းပလာခဲ့တဲ့ ရိုးရာ ဓလေ့ပွဲတော်ဖြစ်ပြီး နှစ်စဉ် မတ်လနဲ့ ဧပြီလအတွင်းမှာ သာ ကျင်းပလေ့ရှိပါတယ်။  အခုလို အချိန်အခါမဟုတ် စိုက်ထူတဲ့အပြင် အဲဒီတံခွန်တိုင်ကို ပြန်လည်နုတ်ယူ ရွှေ့ပြောင်းစိုက်ထူမယ့်အပေါ်  ရိုးရာဓလေ့နဲ့ ဆန့်ကျင်နေတဲ့အတွက် အခုလို ကန့်ကွက်ရတာလို့ ကယားလီဖုလူငယ်အဖွဲ့ ဥက္ကဋ္ဌ ခူးတလေပိုးရယ်က ပြောပါတယ်။  အဓိက က ၃ ချက်ရှိတယ်။ ပထမအချက်က သူ့ရဲ့အချိန်အခါ မဟုတ်ဘူးပေါ့နော်။ မတ်လ ဒုတိယအပတ်၊ တတိယပတ်လောက်မှ စတယ်၊ ပြီးတော့ ဧပြီလေပေါ့၊ အဲလို လုပ်လေ့ရှိတယ်။ နောက်တချက် ကျနော်တို့ ရိုးရာ ကေ့ထျိုးဘိုးက ကျနော်တို့ စိုက်လိုက်ပြီဆိုရင် ပူဇော်ပသတာတွေ လုပ်လုပ်၊ မလုပ်လုပ် စိုက်လိုက်ပြီဆိုရင် ပြန်နုတ်လို့ မရဘူး။ နုတ်ရိုးထုံးစံမရှိဘူး။ နောက်တခုက ကေ့ထျိုးဘိုး စိုက်ထူဖို့အတွက် ဦးဆောင်ပြင်ဆင်ရတဲ့ နတ်ဆရာတွေရယ်၊ လူထုတချို့ရယ်၊ ကျနော်တို့ ဒီတွေ့ဆုံညှိနှိုင်းပြီးတော့မှ မလုပ်ဖို့ ပြောတယ်။ ဒါပေမဲ့ အဲဒါကို လျစ်လျူရှုပြီးတော့ ဖြစ်အောင် လုပ်တာပေါ့။” ဒီလိုအချိန်အခါမဟုတ်ဘဲ ကေ့ထျိုးဘိုး စိုက်ထူတဲ့အပေါ် ကယားလူထုတွေအနေနဲ့ မကောင်းတဲ့ အခြေအနေ၊ ပြဿနာတစုံတခု ဖြစ်လာမှာကို စိုးရိမ်ကြောင်းလည်း ပြောပါတယ်။  “ကျနော်တို့ရဲ့ စိုးရိမ်မှုက ဘာလဲဆိုရင် ကျနော်တို့ရဲ့ ရိုးရာယဉ်ကျေးမှုလို့ ပြောတဲ့အခါမှာ ကျနော်တို့ကို promote လုပ်ပေးမယ်ဆိုရင် ရိုးရာအတိုင်းပဲ လုပ်ပေးတာက ပိုပြီးတော့ ကောင်းပါတယ်။ အစဉ်အလာမဟုတ်ဘဲနဲ့ ဒီလိုမျိုး လုပ်တာကတော့ လမ်းကြောင်းလွဲတယ်လို့ ပြောချင်တာပေါ့။  သူ့အချိန်အခါနဲ့ လုပ်ရတယ်။ မလုပ်လို့ရှိရင်တော့ ကျနော်တို့က စိုးရိမ်မှုရှိတယ်။ ဘာဖြစ်မလဲ ဆိုတာကတော့ ကျနော်တို့တော့ သေချာပြောလို့မရဘူး။ အရင်တုန်းက ရွာထဲမှာ အချိန်အခါမဟုတ် မောင်းထုရင်တောင်မှ တခါတလေ ရွာထဲမှာ ပြဿနာတစုံတရာ တက်ခဲ့ဖူးတာ ရှိတာပေါ့နော်။ အဲလိုမျိုးဖြစ်ခဲ့လို့ ကျနော်တို့ လူကြီးပိုင်းတွေရော၊ လူငယ်ပိုင်းတွေကော စိုးရိမ်မှုရှိလို့ ကျနော်တို့ ဒီကိစ္စကို ပြောရတာပေါ့နော်။ အဓိက ပြဿနာတခုခု ဖြစ်လာမှာကို ကျနော်တို့ စိုးရိမ်တာပေါ့။ အခုပြည်နယ်အဆင့် လုပ်တယ်ဆိုတော့ ကျနော်တို့ ပြည်နယ်အတွက် နိမိတ်မကောင်းဘူးလို့ ပြောလို့ရတာပေါ့။” ဒီကနေ့ စတင်ကျင်းပတဲ့ ဒုတိယအကြိမ်မြောက်  “သွေးချင်းတို့ရဲ့ပွဲတော်ဆီ” ပွဲတော်ကို ကယားပြည်နယ်က ဦးဆောင်ပြုလုပ်တာဖြစ်ပြီး ကယားပြည်နယ်ရဲ့ ရိုးရာ ကေ့ထျိုးဘိုး (ခေါ်) တံခွန်တိုင်ကို ဖွင့်ပွဲအခမ်းအနားမှာ စိုက်ထူတာ ဖြစ်ပါတယ်။
2 years Ago
Up