သံအမတ်ကြီး ဦးကျော်မိုးထွန်း

December 2, 2021

ကုလသမဂ္ဂတွင် မြန်မာအတွက် ကိုယ်စားပြုသူရွေးချယ်မှု ဆိုင်းငံ့၊ သံအမတ်ကြီး ဦးကျော်မိုးထွန်း ဆက်လက်တာဝန်ယူမည်

ကုလသမဂ္ဂမှာ မြန်မာနိုင်ငံအတွက် ကိုယ်စားပြုမယ့်သူနေရာအတွက် ဆုံးဖြတ်မယ့် အစီအစဉ်ကို ကုလသမဂ္ဂရဲ့ စိစစ်ရွေးချယ်ရေး ကော်မတီ (Credentials Committee) က ဆိုင်းငံ့လိုက်တဲ့အတွက် လက်ရှိ ကုလသမဂ္ဂဆိုင်ရာအမြဲတမ်းကိုယ်စားလှယ် မြန်မာသံအမတ်ကြီး ဦးကျော်မိုးထွန်းက  မြန်မာနိုင်ငံ ကိုယ်စားလှယ်အဖြစ် ဆက်လက် တာဝန်ယူခွင့်ရမှာ ဖြစ်ပါတယ်။ 

အဖွဲ့ဝင် ၉ ဦး ပါဝင်တဲ့ ကုလသမဂ္ဂရဲ့ စိစစ်လက်ခံရေး ကော်မတီမှာ ကိုယ်စားပြုခွင့် လျှောက်ထားမှုတွေထဲက ဆွေးနွေးရာမှာ အာဖဂန်နစ္စတန်နဲ့ မြန်မာတို့နဲ့ ပတ်သက်ပြီး ဆုံးဖြတ်ချက် မချပဲဆိုင်းငံ့လိုက်တာဖြစ်ပါတယ်။

ဒါကြောင့် အာဖဂန်နစ္စတန်မှာ တကျော့ပြန် အာဏာရခဲ့တဲ့ တာလီဘန်တွေရော၊ မြန်မာ အာဏာသိမ်းစစ်ကောင်စီပါ   ကုလသမဂ္ဂမှာ  နိုင်ငံကို ကိုယ်စားပြုခွင့်မရ ဖြစ်သွားပါတယ်။ 

“ဒီ ၂ နိုင်ငံအတွက် ကိုယ်စားပြုမယ့်သူ နေရာအတွက် ဆုံးဖြတ်မယ့် အစီအစဉ်ကို ရွှေ့ဆိုင်းဖို့ ဆုံးဖြတ်လိုက်တယ်”လို့ ကော်မတီ အလှည့်ကျ ဥက္ကဋ္ဌ ကုလသမဂ္ဂဆိုင်ရာ ဆွီဒင်သံအမတ်ကြီးက နယူးယောက် ကုလသမဂ္ဂ ရုံးချုပ်မှာ  ဒီဇင်ဘာ ၁ ရက်မှာ သတင်းထောက်တွေကို ပြောခဲ့ပါတယ်။  

Credentials Committee မှာတော့ ကုလသမဂ္ဂ လုံခြုံရေး ကောင်စီမှာ ဗီတိုအာဏာပိုင်တဲ့ အမေရိကန်၊ တရုတ်၊ ရုရှားတို့အပြင် ဟားမား၊ ဘူတန်၊ ချီလီ၊ နမီဘီးယား၊ ဆီရာလီယွန်းနဲ့ ဆွီဒင်နိုင်ငံတို့လည်း ပါဝင်ကြတာပါ။

ကုလသမဂ္ဂ ကိုယ်စားလှယ်နေရာတွေနဲ့ ပတ်သက်တဲ့ အစီရင်ခံစာတွေကို အထွေထွေညီလာခံထံ ဒီနှစ်မကုန်ခင် တင်ပြရမှာ ဖြစ်ပါတယ်။

6 days Ago

October 20, 2021

သံအမတ်ကြီး ဦးကျော်မိုးထွန်း Freedom Award ဆုလက်ခံရယူ

၂၀၂၁ ခုနှစ်အတွက်  John S.McCain  Freedom Award  ဆုချီးမြှင့်ပွဲ အခမ်းအနားကို အောက်တိုဘာ ၁၉ ရက်က အမေရိကန်ပြည်ထောင်စု ဝါရှင်တန်ဒီစီမှာကျင်းပရာမှာ  ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း တက်ရောက်လက်ခံရယူခဲ့ပါတယ်။ 

ဒီဆုကို ဝါရှင်တန်အခြေစိုက် International Republican Institute (IRI)က ဒီမိုကရေစီ လွတ်လပ်ခွင့်တွေအတွက် ကမ္ဘာတဝန်းက ကြိုးပမ်းသူတွေကို နှစ်စဉ်ရွေးချယ်  ချီးမြှင့်တာဖြစ်ပါတယ်။ 

ဒီနှစ်အတွက် ဆုရရှိခဲ့တဲ့ ဒီမိုကရေစီသူရဲကောင်းတွေကတော့ လစ်သူယေးနီးယား ဝန်ကြီးချုပ် အင်ဂရီဒါဆီမိုနီတာ၊ မြန်မာသံအမတ်ကြီး ဦးကျော်မိုးထွန်း၊ ဘယ်လာရုစ်နိုင်ငံရေးအကျဉ်းသားများအတွက် ညှိနှိုင်းဆောင်ရွက်ရေးကောင်စီကိုယ်စားလှယ် တက်ဆီရာနာခိုမစ်ချ်နဲ့ ကျူးဘားနိုင်ငံက Grammy ဆုရအနုညာရှင် ဝီလီချီရီနိုတို့ ဖြစ်ပါတယ်။

ဦးကျော်မိုးထွန်းဟာ ဖေဖော်ဝါရီ ၁ ရက် မြန်မာနိုင်ငံမှာ စစ်တပ်က အာဏာသိမ်းတာကို လက်မခံဘဲ ဒီမိုကရေစီရေး လှုပ်ရှားသူတွေနဲ့ ပူးပေါင်းခဲ့တဲ့အတွက် IRI က ဆုချီးမြှင့်ဖို့ ဆုံးဖြတ်ခဲ့တာ ဖြစ်ပါတယ်။

သံအမတ်ကြီး ဦးကျော်မိုးထွန်းဟာ စစ်အာဏာသိမ်းပြီးနောက် ဖေဖော်ဝါရီ ၂၆ ရက်နေ့က ကျင်းပတဲ့ ကုလသမဂ္ဂအထွေထွေညီလာခံမှာ အန်အယ်လ်ဒီဦးဆောင်တဲ့  အရပ်သားအစိုးရကို ကိုယ်စားပြုပြီး မြန်မာပြည်သူတွေနဲ့ အတူရပ်တည်ကြောင်း သတ္တိရှိရှိပြောဆိုခဲ့တာပါ။ 

သူ့ရဲ့မိန့်ခွန်းအဆုံးမှာလည်း  ပြည်သူသာ အဓိက အရေးတော်ပုံ အောင်ရမည်ဆိုပြီး လက်သုံးချောင်းထောင်ကာ  မြန်မာပြည်တွင်းက စစ်အာဏာရှင်ဆန့်ကျင်တဲ့ မြန်မာပြည်သူတွေနဲ့ အတူရပ်တည်ကြောင်း ပြသသွားခဲ့တာဖြစ်ပါတယ်။

Freedom Award ဆုကို ၁၉၉၅ ခုနှစ်ကတည်းကစတင်ပြီး ကမ္ဘာတဝန်းက သန်းနဲ့ချီတဲ့ပြည်သူတွေရဲ့  ဒီမိုကရေစီရေး၊ လွပ်လတ်ခွင့်နဲ့ လူသား လွတ်မြောက်ရေးတို့အတွက် တိုးတက်ရာတိုးတက်ကြောင်း လုပ်ဆောင်နေသူတွေကို ဂုဏ်ပြုတဲ့အနေနဲ့ ပေးအပ်တာဖြစ်ပါတယ်။

အရင်က ဒီဆုကို အမေရိကန်သမ္မတဟောင်း ရော်နယ်ရေဂင်၊  သမ္မတဟောင်း ဂျော့ချ် အိတ်ချ်ဒဗလျူဘွတ်ရှ်၊  သမ္မတဟောင်း ဂျော့်ချ် ဒဗလျူဘွတ်ရှ်၊ လိုက်ဘေးရီးယားသမ္မတ အယ်လန်ဂျွန်ဆင်ဆာလစ်ဖ်၊ ငြိမ်းချမ်းရေနိုဘယ်လ်ဆုရှင် ဒေါ်အောင်ဆန်းစုကြည်နဲ့ အမေရိကန် နိုင်ငံခြားရေးဝန်ကြီးဟောင်း ဟင်နရီကစ်ဆင်ဂျာ စသူတို့လည်းရရှိခဲ့ဖူးပါတယ်။ 

ပြီးခဲ့တဲ့ ၂၀၂၀ ပြည့်နှစ်အတွက် ဆုကိုတော့ အမေရိကန် နိုင်ငံခြားရေးဝန်ကြီး မိုက်ခ်ပွမ်ပေအို၊  ဟောင်ကောင်ပြည်သူတွေနဲ့ ဘယ်လာရုစ် ဒီမိုကရေစီရေးလှုပ်ရှားသူ ၃ ဦးတို့ ရရှိခဲ့ပါတယ်။

2 months Ago
More News
Up