သံလွင်မြစ်

April 19, 2021

သံလွင်မြစ်အတွင်း ထိုင်းကုန်စည်လှေ ၃ စီးကို မြန်မာစစ်တပ်ကပစ်ခတ်

ထိုင်းနိုင်ငံ မြောက်ပိုင်း မယ်ဟောင်ဆောင်ခရိုင် မဲ့စရိန်းမြို့နယ်ရှိ သံလွင်မြစ်ထဲမှာ ထိုင်းလူမျိုးပိုင် ကုန်တင်လှေ ၃ စီး မြန်မာစစ်တပ်ရဲ့  ပစ်ခတ်တာခံရတယ်လို့ အာဆီယံနယူးစ်သတင်းမှာ ဖော်ပြပါတယ်။ 

ဆွပ်မွေးမြို့နယ် မဲ့ဆာမ်လက်ရွာသားပိုင် ထိုင်းစက်လှေ ၃ စီးဟာ ပြီးခဲ့တဲ့ ဧပြီ ၁၇ ရက်နေ့က သူတို့ရွာနဲ့ ၂၅ ကီလိုမီတာလောက်ရှိတဲ့ အူသူးထရွာဘက်ကို ကုန်ပစ္စည်းသွားပို့အပြီး အပြန် မဲ့စရိန်းမြို့နယ် မဲ့ခုန်းအုပ်စု မဲ့တာဖန်ကျေးရွာအနီးရောက်တော့ မြန်မာစစ်တပ်က ဟိုဘက်ကမ်းကနေ လှမ်းပစ်လိုက်တာလို့  စက်လှေပိုင်ရှင် ရွာသား ၁ ဦးက သတင်းထောက်တွေကို ပြောပါတယ်။ 

အဆိုပါ မြန်မာတပ်ဟာ မဲ့တာဖန်ရွာနဲ့ မျက်နှာချင်းဆိုင် တာ့ကဝင်းအခြေစိုက် ခမရ ၃၄၀ ခြေမြန်တပ်ကဖြစ်ကြောင်း၊ လှေ ၃ စီးလုံးအပစ်ခံရတဲ့အနက် ၁ စင်းမှာ လှေရဲ့ ညာဘက် ဝမ်းဗိုက်ကို ဖောက်ထွက်သွားတဲ့အတွက် လှေကိုတော့ ကမ်းစပ်ထိမောင်းနှင်လာနိုင်ပြီး ထိခိုက်ဒဏ်ရာ ရသူလည်း မရှိဘူး လို့ ဆိုပါတယ်။ 

    သံလွင်မြစ်ကြောင်းရဲ့ အဆိုပါနေရာတဝိုက်မှာ မြန်မာစစ်တပ်ရှိနေတဲ့အတွက် အသွားအလာ သတိထားကြဖို့ ကေအဲန်ယူ ကရင်အမျိုးသားအစည်းအရုံးတပ်က ဒီမတိုင်ခင်က သတိပေးခဲ့ဖူးပါတယ်။

 ကူးသန်းသွား’လာကြတဲ့လှေတွေအနေနဲ့ မြန်မာကူးတို့ဆိပ်မှာ လာရောက်သတင်းပေးဖို့ မြန်မာတပ်ဘက်ကလည်း ထုတ်ပြန်ထားပေမဲ့ ထိုင်းရွာသားတွေကတော့ သူတို့ သွားနေ တဲ့ရေလမ်းအပိုင်းဟာ ထိုင်းဧရိယာထဲမှာမို့ သတင်းမပို့ရကြောင်း၊ သူတို့လှေတွေကို ခြောက်လှန့်သတိပေးတဲ့အနေနဲ့ ပစ်ခတ်တာဖြစ်နိုင်တယ်လို့ လှေပိုင်ရှင်ရွာသားတွေက ပြောပါတယ်။ 

    ဆုပ်မွေးမြို့နယ် မဲ့ဆာမ်လက်ရွာရှိ သံလွင်မြစ်ကမ်းနဘေးမှာ ပြီးခဲ့တဲ့ မတ်လ ၂၀ ရက်နေ့က မြန်မာစစ်တပ်ကိုပို့ပေးဖို့ ဆန်အိတ် ၇၀၀ နဲ့ ဆီ ၅၀ ပုံးရောက်ရှိလာပြီး ကေအန်ယူတပ်က ဟန့်တားထားတဲ့အတွက် ထိုင်းဘက်ခြမ်းကို ပြန်သယ်ခဲ့ရပါတယ်။

8 months Ago

October 5, 2019

သံလွင်မြစ်အတွင်း စည်းကမ်းမဲ့ မြစ်သဲကျောက်ထုတ်ယူမှု‌ စိစစ်ပေးရန် တောင်းဆို

သံလွင်မြစ်အတွင်း စည်းကမ်းမဲ့ မြစ်သဲကျောက် စုပ်ယူနေမှုတွေ‌‌ကြောင့် မြစ်ထိန်းကမ်းပါး ပြိုကျမှုတွေ ဖြစ်ပေါ်နေတဲ့အတွက် မြစ်သဲကျောက် စုပ်ယူ လုပ်ကိုင်နေတာတွေကို ပြန်လည်စိစစ်ပေးဖို့နဲ့ ပွင့်လင်းမြင်သာအောင် ချပြပေးဖို့ ဒေသခံတွေက တောင်းဆိုနေကြပါတယ်။ ကရင်ပြည်နယ်၊ လှိုင်းဘွဲ့မြို့နယ်၊ ရွှေဂွန်းကျေးရွာမှာ မြစ်ကမ်းပါး‌ပြိုကျမှု‌ကြောင့် ကမ်းထိန်းနံရံ‌တွေ ပြိုကျခဲ့တဲ့အပြင် လူနေအိမ်တချို့ပါ ရွှေ့ပြောင်းဖယ်ရှားခဲ့ရတာတွေ ရှိ‌ခဲ့တဲ့အတွက် အခုလို တောင်းဆိုနေကြတာပါ။ သံလွင်မြစ်အတွင်း စည်းကမ်းမဲ့ မြစ်သဲကျောက် စုပ်ယူနေမှုတွအပြင် ရေလမ်းကြောင်း ပြောင်းလဲမှုနဲ့ မိုးသည်းထန်းစွာ ရွာသွန်းမှုတွေကြောင့် နှစ်စဉ် မြစ်ကမ်းပါးပြိုကျမှုတွေနဲ့ ကြုံတွေ့နေရတာပါ။ လှိုင်းဘွဲ့မြို့နယ်၊ ရွှေဂွန်းကျေးရွာနေ မစုတာက “ဘယ်နေရာတွေကတော့ဖြစ် မြစ်သဲကျောက်စုပ်ခွင့်ပြုထာ‌ေတယ်။ ဘယ်နေရာကတော့ဖြစ် ဒီကျေးရွာကို ထိခိုက်နိုင်တဲ့ အနေအထားရှိလို စုပ်ခွင့်မပြုထားဘူးဆိုတဲ့ အပိုင်းလေးတွေကို ပွင့်လင်းမြင်သာစွာနဲ့ ‌ဒေသခံတွေကို ချပြစေချင်တယ်”လို့ ပြောပါတယ်။ ကရင်ပြည်နယ် ရေအရင်းအမြစ်နှင့်မြစ်ချောင်းများ ဖွံ့ဖြိုးတိုးတက်ရေးဦးစီးဌာန၊ ပြည်နယ်ဦးစီးမှူး ဦးသိန်းလင်းက “ကျနော်တို့က မျှခြေဖြစ်အောင် အကုန်လုံး တွက်ချက်တယ်။ တကယ်တမ်း လုပ်တဲ့အခါကျမှသာ ဒီစုပ်တဲ့လှေတွေက ရေမရှိတော့ဘူးဆိုရင် ကမ်းကပ်ပြီး စုပ်တာတို့ ရှိတာပေါ့”လို့ ပြောပါတယ်။ လှိုင်းဘွဲ့မြို့နယ်၊ ရွှေဂွန်းကျေးရွာ(ရွာသစ်၃)၊ ကိုရွှေလှအောင်က ”ကျနော့်အနေနဲ့ ပြောရရင် သဘာဝဘေးအန္တရာယ်လည်း ပါတယ်။ လူတွေ လုပ်တာလည်း ပါတယ်။ လူတွေကြောင့် ဆိုရင် မြစ်ကမ်းနဲ့ နီးတဲ့နေရာမှာ ခဲ၊ သဲ၊ စုပ်လို့” လို့ ပြောပါတယ်။ ရွှေဂွန်းကျေးရွာ မြစ်ကမ်းထိန်းနံရံ တည်ဆောက်ရေးအတွက် ကရင်ပြည်နယ်အစိုးရက ၂၀၁၆ ဘဏ္ဍာနှစ်မှာ ပေ ၂၀၀ နဲ့ ၂၀၁၇ ဘဏ္ဍာနှစ်မှာ ပေ ၃၈၀ ကို တည်ဆောက်ပေးခဲ့ပါတယ်။ မြစ်ကမ်းပါး ပြိုကျမှုကြောင့် ဘေးအန္တရာယ်ဆိုင်ရာ စီမံခန့်ခွဲရေးဦးစီဌာနက ထိခိုက် ပျက်စီးမှု‌‌တွေအတွက် ထောက်ပံ့မှုတွေရှိပေမယ့် ပြေင်းရွှေ့ခဲ့ရတဲ့ လူနေအိမ် ၆ လုံးအတွက် သက်ဆိုင်ရာက မြေနေရာ စီစဉ်ဆောင်ရွက်ပေးတာတွေ မရှိဘူးလို့လည်း ပြော‌င်းရွှေ့ခဲ့ရသူတွေက ပြောပါတယ်။ မြစ်ကမ်းပါး ပြိုကျမှုတွေအတွက် မြစ်ထိန်းနံရံတည်ဆောက်ရေး အခုနှစ်ဘတ်ဂျက်မှာ တင်ပြတောင်းခံထားတာ မရှိပေမယ့် ပိုမိုဆိုးဝါးမှုမရှိအောင် ပြည်နယ်အစိုးရထံ တင်ပြပြီး ညှိနှိုင်းဆောင်ရွက်ပေးသွားမယ်လို့ တာဝန်ရှိသူက ပြောပါတယ်။ ရဲမင်းခေါင်
2 years Ago
Up