သံတွဲမြို့

November 25, 2022

မတရားသင်းဆက်သွယ်မှုဖြင့် တရားစွဲခံရသည့် သံတွဲမြို့ရခိုင့်အားမာန်ကားဂိတ်ပိုင်ရှင်ကို ရုံးထုတ်

ရခိုင်ပြည်နယ်၊ သံတွဲမြို့ရှိ ရခိုင့်အားမာန်ကားဂိတ်ပိုင်ရှင်လည်းဖြစ် တေးရေးဆရာလည်းဖြစ်တဲ့ ဦးစန်းကို ကို နိုဝင်ဘာ ၂၄ ရက်က သံတွဲမြို့နယ်တရားရုံးမှာ ရုံးထုတ်ခဲ့တယ်လို့ မိသားစုဝင်တွေက ပြောပါတယ်။ 

ဦးစန်းကို ကို ရက္ခိုင့်တပ်တော်(အေအေ) နဲ့ ဆက်စပ်တယ်ဆိုပြီး မတရားအသင်းဆက်သွယ်မှု ဥပဒေပုဒ်မ ၁၇(၁)နဲ့ အမှုဖွင့်ကာ တရားစွဲဆို တင်ပို့ခဲ့တာပါ။

မိသားစုဝင်တဦးက "သူကို ဖမ်းသွားတာ တစ်လရှိပြီ။ အောက်တိုဘာ ၂၃ ရက်က ဖမ်းသွားတာ။ နိုဝင်ဘာ ဒုတိယအပတ်မှာ သံတွဲရဲ့စခန်းမှာ ပုဒ်မ ၁၇(၁)နဲ့ အမှုဖွင့်တယ်။ နိုဝင်ဘာ ၂၄ ရက်မှာ ရုံးထုတ် စစ်ဆေးတယ်။"လို့ ​ပြောပါတယ်။

စစ်ဆေးစရာ ရှိသည်ဟုဆိုကာ ကိုစန်းကို ကို  သူရဲ့နေအိမ်မှ ငပလီအခြေစိုက် ခလရ-၅၅ကို ဖမ်းဆီးသွားပြီး ဗိုလ်ကြီးရဲလင်းထွန်းက တရားလိုလုပ် အမှုဖွင့်ခဲ့တယ်လို့ သိရပါတယ်။

ကိုစန်းကို ကို ဖမ်းဆီးပြီးနောက် နိုဝင်ဘာ ၁၂ ရက်မှာ သံတွဲခရိုင်အထွေထွေ အုပ်ချုပ်ရေးမှူးရုံး မှတဆင့် သံတွဲမြို့မော်တော်ယာဉ်လုပ်ငန်းပေါင်းစုံထိန်းသိမ်းရေးကြီးကြပ်မှုကော်မတီ(မထသ)ထံ ညွှန်ကြားခဲ့ရာက ရခိုင်အားမာန်ကားဂိတ်ကို ရပ်နားခဲ့ရတယ်လို့  မိသားစုဝင်တွေက​​ ဆိုပါတယ်။

ရခိုင့်အားမာန်ယာဉ်လိုင်းဟာ ရခိုင်ပြည်နယ်က သံတွဲ၊ တောင်ကုတ်၊ မြောက်ဦး၊ စစ်တွေနဲ့ ကျောက်ဖြူမြို့နယ်တွေကို ပြေးဆွဲနေသည်မှာ  ၁၀ ခန့် ရှိနေပြီလို့ ယာဉ်လိုင်းတွေက ပြောပါတယ်။ 

ရခိုင်ပြည်နယ်အတွင်း စစ်ကောင်စီတပ်နဲ့ ရက္ခိုင့်တပ်တော်(AA)တို့ကြား တကျော့ပြန် တိုက်ပွဲ ဖြစ်ပွားပြီးနောက် စစ်တပ်က အေအေနဲ့ ဆက်စပ်တဲ့ ရခိုင်လုပ်ငန်းရှင်တွေနဲ့ ရခိုင်ဒေသခံတွေကို  သံသယနဲ့ ဖမ်းဆီးစစ်ဆေးနေတာပါ။

2 months Ago

November 21, 2022

ရခိုင်ပြည်နယ်၊ သံတွဲတွင် ငပလီကမ်းခြေဆောင်းဦးပွဲတော်ဖွင့်ပွဲကျင်းပ

ရခိုင်ပြည်နယ်မြောက်ပိုင်းမှာ ရက္ခိုင့်တပ်တော်(အေအေ)နဲ့ စစ်ကောင်စီတပ်တွေနဲ့ အပြင်းအထန်တိုက်ပွဲဖြစ်ပွားလို့ ရခိုင်ပြည်သူထောင်သောင်းချီ စစ်ဘေးဒုက္ခခံစားနေရချိန် သံတွဲမြို့နယ်မှာတော့ ငပလီကမ်းခြေဆောင်းဦးပွဲတော်ဖွင့်ပွဲကို  နိုဝင်ဘာ ၂၁ ရက် ဒီနေ့ မနက်  ကျင်းပခဲ့တယ်လို့  ပလီဒေသခံတွေထံက သိရပါတယ်။

ပွဲတော်ကျင်းပရေးတာဝန်ရှိသူတစ်ဦးက  "ဒီနှစ်မှာတော နိုင်ငံရေး၊ စစ်ရေး မတည်ငြိမ်မှုတွေရှိနေတဲ့အတွက် ၁ ရက်ပဲပြုလုပ်ကြတာ။ အရင်နှစ်တွေကဆို ၅ ရက်အထိ ပြုလုပ်ကျင်းပကြတယ်။ အဓိက ကျင်းပရတဲ့ရည်ရွယ်ချက်က ငပလီကို ပြည်တွင်းနဲ့ ပြည်ပက ခရီးသွားဧည့်သည်တွေ လာရောက် လည်ပတ်ချင်လာအောင်ရည်ရွယ်ပြီး ငပလီကမ်းခြေ ဆောင်းဦးပွဲတော်ဖွင့်ပွဲကို နှစ်စဥ်ကျင်းပလာရတာ"လို့ ပြောပါတယ်။

အခုလို ဆောင်းဦးပွဲတော်ကျင်းပရတာဟာ ပြည်တွင်း၊ ပြည်ပ ခရီးသွား ပြည်သူတွေကို ပိုမိုဆွဲဆောင်ဖို့နဲ့  ဒေသခံပြည်သူတွေရဲ့ အကျိုးစီးပွားအဆင်ပြေစေဖို့ ရည်ရွယ်ချက်နဲ့ လုပ်ဆောင်တာလို့လည်း ဒေသခံတွေက ပြောပါတယ်။

ငပလီဒေသခံတစ်ဦးက "ငပလီဒေသခံအများစုက ခရီးသွားတွေများများလားရောက်လည်ပတ်ရင် များများဝင်ငွေရကြပါတယ်။ အဲ့ဒါကြောင့် ဆောင်းရာသီမှာ ခရီသွားတွေများများ လာကြဖို့မျော်လင့်နေကြတာပါ။"လို့  ဆိုပါတယ်။

ပွဲတော်ဖွင့်ပွဲကို မနက် ၆ နာရီက စတင်ကျင်းပရာမှာ  စက်ဘီးစီးအဖွဲ့က   ငပလီမြို့ မဇင်ရပ်ကွက်ကနေ သံတွဲမြို့အထိ စက်ဘီးအလှစီးကာ ကွင်းဖွင့်ခဲ့ပြီးနောက် ငပလီမြို့ရှိ ပါရာဒိုင်းစ် ဟိုတယ်မှာ ဖွင့်ပွဲအခမ်းအနားကို ဆက်လက်ပြုလုပ်ခဲ့​ကြတာပါ။

စစ်တပ်အာဏာသိမ်းတဲ့ ၂၀၂၁ ခုနှစ်က ငပလီကမ်းခြေဆောင်းဦးပွဲတော်ကို ၅  ရက်တိုင်တိုင် ကျင်းပခဲ့ပေမဲ့ အခုနှစ်မှာ နိုဝင်ဘာ ၂၁ ရက် တစ်ရက်တည်းသာ ကျင်းပတာဖြစ်ပြီး အဆိုပါပွဲမှာ သဲပန်းပုအလှပြတာ၊ စက်ဘီးအလှစီးတာ၊ ကပြဖြေဖျော်တာ၊ ချောတိုင်တက်၊ လွန်ဆွဲ၊ ဘောလီဘောပြိုင်ပွဲ၊ စက်ဘီးစီးပြိုင်ပွဲတို့ကို ထည့်သွင်း ကျင်းပကြပါတယ်။

2 months Ago
More News
Up