ကရင်ပြည်နယ်၊ သံတောင်မြို့သစ် ၁၃ မိုင်မှာ စစ်ကောင်စီတပ်နဲ့ ပြည်သူ့ကာကွယ်ရေး တပ်ဖွဲ့တို့အကြား တိုက်ပွဲဖြစ်ပွားခဲ့ပြီးနောက် စစ်ကောင်စီက ဒေသခံတွေရဲ့ နေအိမ် ၈ လုံးကို မီးရှို့ဖျက်ဆီးခဲ့တယ်လို့ သံတောင် PDF တပ်ဖွဲ့က ထုတ်ပြန်ထားပါတယ်။

သံတောင်မြို့အတွင်း စစ်ကြောင်းထိုးလာတဲ့ စစ်ကောင်စီတပ်ဟာ ဒေသပြည်သူ့ကာကွယ်ရေး တပ်ဖွဲ့ကို ပိတ်ဆို့တိုက်ခိုက်ဖို့ ထွက်လာချိန် မနေ့ ဖေဖော်ဝါရီ ၂၁ ရက် မနက် ၁၀ နာရီကျော်လောက်မှာ ထိပ်တိုက်ရင်ဆိုင်တိုက်ပွဲ ဖြစ်ပွားခဲ့တာပါ။

နှစ်ဖက်ပစ်ခတ်တိုက်ခိုက်မှုအတွင်း စစ်ကောင်စီတပ်သား ၅ ဦး သေဆုံးခဲ့ပြီး တချို့ ထိခိုက်ဒဏ်ရာ ရရှိခဲ့တဲ့အတွက် စစ်ကောင်စီတပ်ဖွဲ့ဝင်တွေဟာ သံတောင်မြို့ ရပ်ကွက် ၅ ရှိ ပြည်သူတွေရဲ့ နေအိမ်တွေကို မီးရှို့ခဲ့တာလို့ ဆိုပါတယ်။

ဖေဖော်ဝါရီ ၂၀ ရက် ညနေ ၃ နာရီကျော်ကလည်း Thandaung PDF အဖွဲ့က သံတောင်မြို့သစ်ရှိ ထွေအုပ်ရုံးကို စနိုက်ပါ၊ ၇၉၊ လက်နက်ငယ်တွေနဲ့ ပစ်ခတ်တိုက်ခိုက်ခဲ့ရာ ထွေအုပ်ရုံးမှ ဒုတိယညွှန်ကြားရေးမှူး သေဆုံးပြီး စစ်ကောင်စီတပ်သား ၂ ယောက် ထိခိုက်ဒဏ်ရာ ရရှိခဲ့တယ်လို့ သံတောင် PDF က သတင်းထုတ်ပြန်ထားပါတယ်။

ဖေဖော်ဝါရီ ၄ ရက်နေ့ကလည်း သံတောင်မြို့ ပြည်သူ့ဆေးရုံရှေ့မှာ ဘောဂလိဘက်ကနေ ပြန်လာတဲ့ စစ်ကောင်စီယာဥ်တန်းကို မိုင်းဆွဲပစ်ခတ်တိုက်ခိုက်ခဲ့ရာ ၃၆ ဦး သေဆုံးပြီး ၂၀ ကျော် ဒဏ်ရာရခဲ့တယ်လို့ ထုတ်ပြန်ပါတယ်။

ပြီးခဲ့တဲ့ ၂၀၂၂ ခု နိုဝင်ဘာလကုန်ပိုင်းကစပြီး အခု ၂၀၂၃ ခု ဖေဖော်ဝါရီ ၂၁ ရက်အထိ သံတောင် ပြည်သူ့ကာကွယ်ရေးတပ်ဖွဲ့ရဲ့ တိုက်ခိုက်မှုကြောင့် စစ်ကောင်စီတပ်သား ၅၅ ဦး သေဆုံးပြီး အယောက် ၄၀ လောက် ဒဏ်ရာရရှိကြောင်း ထုတ်ပြန်ထားပါတယ်။

ကရင်ပြည်နယ်၊ သံတောင်မြို့သစ် (၁၃ မိုင်)၊ ကားလမ်းဘေးမှာ အကြမ်းဖက်စစ်အုပ်စုကို ထောက်ခံပြီး သတင်းပေးဒလန်လို့ လူသိများတဲ့ အမျိုးသားတယောက် စက်တင်ဘာ ၁၉ ရက် ညနေ ၆ နာရီကျော်လောက်က သေနတ် ၃ ချက်ထိမှန် သေဆုံးခဲ့တယ်လို့ ဒေသခံတွေဆီက သိရပါတယ်။

သတင်းပေးအဖြစ် လူသိများသူ ဦးဝဏ္ဏဆိုသူဟာ သံတောင်မြို့သစ် မြိုလယ်ကောင် ကားလမ်းဘေးမှာ အမည်မသိ သေနတ်သမားက သေနတ်နဲ့ ၃ ချက် ပစ်ခတ်ခဲ့တဲ့အတွက် သံတောင်ကြီး ပြည်သူ့ဆေးရုံကို ပို့ဆောင်စဥ် သေဆုံးခဲ့တာပါ။

သေဆုံးသူဟာ ဆိုင်ကယ်ပြင်ဆိုင်လုပ်ငန်း လုပ်ကိုင်နေသူဖြစ်ပြီး  ဆန္ဒပြလူငယ်တွေကို ဖိအားလိုက်ပေးနေသူတစ်ဦး ဖြစ်သလို လူထုလှုပ်ရှားမှု ဆန္ဒပြပွဲတစ်ခုမှာ လူငယ်တစ်ဦးကို သေနတ်နဲ့ ပစ်ခတ်ခဲ့​သေးတယ်လို့ သေဆုံးသူနဲ့ နီးစပ်သူတဦးက ပြောပါတယ်။

“သူက စစ်တပ်ထောက်ခံတဲ့သူ။ လှုပ်ရှားမှုလုပ်တဲ့သူတွေကို ဖိအားလိုက်ပေးတယ်။ သူ့ကို တခါပစ်ပြီးပြီ။ ခြေထောက် ထိသွားတယ်။ အခုတခါတော့ မြို့ထဲမှာပဲ ဝင်ပစ်လိုက်တော့ သေသွားတယ်။”

ဖြစ်စဥ်ဖြစ်ပွားပြီးနောက်ပိုင်း အကြမ်းဖက်စစ်ကောင်စီတပ်တွေ ရောက်ရှိလာပြီး စစ်ဆေးစုံစမ်းတာ၊ လုံခြုံရေးတင်း​ကျပ်တာတွေ လုပ်ဆောင်နေပါတယ်။