သံတမန်

November 8, 2020

ဒီမိုကရေစီလမ်းကြောင်းပေါ် နောက်ထပ် ဆက်တက်လှမ်းနေသည့် မြန်မာကို ချီးကျူးဟု အမေရိကန် သံတမန်ပြော 

စိန်ခေါ်မှုအခက်အခဲတွေ အများကြီးရှိနေပေမဲ့ ဒီမိုကရေစီလမ်းကြောင်းပေါ်ကို နောက်ထပ် ဆက်ပြီး တက်လှမ်းနေတဲ့ မြန်မာပြည်သူတွေကို ချီးကျူးတယ်လို့ မြန်မာနိုင်ငံဆိုင်ရာ အမေရိကန် သံရုံးယာယီတာဝန်ခံ ကွမ်ကတ်နိုက ပြောပါတယ်။ ဒီကနေ့ မြန်မာနိုင်ငံတဝန်းမှာ ကျင်းပတဲ့ ၂၀၂၀ အထွေအထွေရွေးကောက်ပွဲနဲ့ပတ်သက်ပြီး သံရုံးရဲ့ လူမှုကွန်ရက်စာမျက်နှာမှာ သတင်းထုတ်ပြန်ပြောကြားလိုက်တာပါ။ မြန်မာနိုင်ငံရဲ့ ဒီမိုကရေစီ အသက်ဝင်နေတာတွေ့ရတာ ကောင်းမွန်လှပါတယ်လို့လည်း အမေရိကန် သံရုံးယာယီတာဝန်ခံက ပြောပါတယ်။     သံရုံးယာယီတာဝန်ခံ ကွမ်ကတ်နိုဟာ မြန်မာနိုင်ငံအခြေစိုက် အမေရိကန် နိုင်ငံတကာဖွံ့ဖြိုးရေးအေဂျင်စီဌာနေ ညွှန်ကြားရေးမှူး အဲလာဂရပ်ဘ်နဲ့အတူ ရန်ကုန်မြို့အတွင်းက မဲရုံတွေကို လည်ပတ်ကြည့်ရှုခဲ့တယ်လို့လည်း ဆိုပါတယ်။ ဓာတ်ပုံ-USEMBASSY
5 months Ago

August 8, 2020

မြန်မာနှင့်နီကာရာဂွါနိုင်ငံတို့ သံတမန်အဆက်အသွယ် ထူထောင်

မြန်မာနိုင်ငံဟာ ၁၂၄ ခုမြောက် သံတမန်အဆက်အသွယ်နိုင်ငံတခု ထူထောင်လိုက်တယ်လို့ နိုင်ငံခြားရေးဝန်ကြီးဌာနက ကြေညာပါတယ်။ နီကာရာဂွါသမ္မတနိုင်ငံနဲ့ မြန်မာနိုင်ငံတို့ဟာ ကုလသမဂ္ဂ ပဋိညာဉ်စာတမ်းပါမူကြီးတွေ၊ အပြည်ပြည်ဆိုင်ရာဥပဒေတို့ကို အခြေခံပြီး သံတမန် ဆက်ဆံရေးနဲ့ ကောင်စစ်ဆက်ဆံရေးဆိုင်ရာ ဗီယင်နာကွန်ဗင်းရှင်းတို့နဲ့အညီ ပူးပေါင်းဆောင်ရွက်ဖို့ သြဂုတ် ၆ ရက်မှာစပြီး နှစ်နိုင်ငံအကြား သံအမတ်ကြီးအဆင့်နဲ့ သံတမန်အဆက်အသွယ် ထူထောင်ကြတာလို့ ဆိုပါတယ်။ သံတမန်အဆက်အသွယ် ထူထောင်သည့် ပူးတွဲကြေညာချက်ကို ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးဟောက်ဒိုဆွမ်းနဲ့ ကုလသမဂ္ဂဆိုင်ရာ နီကာရာဂွါအမြဲတမ်းကိုယ်စားလှယ် သံအမတ်ကြီး H.E. Mr. Jaime Hermida Castillo တို့ဟာ ၂၀၂၀ နယူးယောက်မြို့၊ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်အဖွဲ့ရုံးမှာ လက်မှတ် ရေးထိုးခဲ့ကြတာပါ။ နီကာရာဂွါနိုင်ငံဟာ မြောက်အမေရိကတိုက်ရဲ့ တောင်ဘက်စွန်းက နိုင်ငံငယ်တခုဖြစ်ပြီး ပစိဖိတ်သမုဒ္ဒရာနဲ့ ကာရစ်ဘီယံပင်လယ်ကြားမှာတည်ရှိပါတယ်။
8 months Ago
Up