သံတမန်

May 19, 2022

ယူကရိန်းစစ်ပွဲအောင်နိုင်ရေး ကူညီရန် သံတမန်အနေဖြင့် ရှက်ဖ်ချင်ကို တာဝန်ယူ

ယူကရိန်း ဂန္ထဝင်တိုက်စစ်မှူး ရှက်ဖ်ချင်ကိုဟာ အမိနိုင်ငံရဲ့ စစ်ပွဲအောင်နိုင်ရေးအတွက် ကူညီထောက်ပံ့မှုတွေ ပြုလုပ်ဖို့ သံတမန်တဦးအနေနဲ့ တာဝန်ယူသွားမှာ ဖြစ်ပါတယ်။

ချဲလ်ဆီး၊ အေစီမီလန်နဲ့ ဒိုင်နမိုကိယက်ဗ် တိုက်စစ်မှူးဟောင်းဟာ ကူညီထောက်ပံ့မှုတွေ ပြုလုပ်မယ့် ယူနိုက်တက် ၂၄ အဖွဲ့ရဲ့ သံတမန်တဦးအနေနဲ့ တာဝန်ယူဖို့ လက်မှတ်ရေးထိုးခဲ့တာပါ။

ရှက်ဖ်ချင်ကိုဟာ သူနေထိုင်တဲ့ လန်ဒန်ကနေ ကိယက်ဗ်အထိ သွားရောက်ပြီး ယူကရိန်းသမ္မတ ဇလန်းစကီးနဲ့လည်း တွေ့ဆုံဆွေးနွေးခဲ့ပါတယ်။

ယူကရိန်းနိုင်ငံ ကာကွယ်ရေး၊ မိုင်းရှင်းလင်းရေး၊ ဆေးဝါးထောက်ပံ့ရေး၊ အခြေခံအဆောက်အအုံတွေနဲ့ သက်ဆိုင်ရာ ကဏ္ဍတွေမှာ ကူညီပေးသွားမှာ ဖြစ်ပါတယ်။

လန်ဒန်ရှိနေအိမ်မှာလည်း ယူကရိန်း စစ်ဘေးရှောင် ကလေးငယ် ၁၅၀ လောက်ကို လက်ခံခိုလူံခွင့်ပေးထားတယ်လို့ သိရပါတယ်။

ယူကရိန်းဘောလုံးအသင်းအတွက် နှစ်ပေါင်းများစွာ ကစားခဲ့ပြီး ကူညီပေးခဲ့သလို နိုင်ငံတွင်းမှာ စစ်ပွဲပေါ်ပေါက်လာတဲ့ အချိန်မှာလည်း ကူညီပေးချင်ပြီး စစ်ဘေးသင့် ပြည်သူတွေအတွက် အလှူငွေတွေလည်း ထည့်ဝင်လှူဒါန်းနိုင်ကြောင်း ရှက်ဖ်ချင်ကိုက အသိပေးသွားခဲ့ပါတယ်။

7 months Ago

April 26, 2022

ကြားကာလပညာရေး တော်လှန်ရေးကျောင်း FOEIM က သရုပ်ဆောင်ဒေါင်းကို သံတမန်ခန့်အပ်

အမျိုးသားညီညွတ်ရေးအစိုးရ (NUG) နဲ့ ချိတ်ဆက်ကာ ကြားကာလပညာရေးအတွက် ဖွင့်လှစ်နေတဲ့ အခမဲ့အခြေခံပညာအဖွဲ့အစည်းတခုဖြစ်တဲ့ Free Online Educational Institution Myanmar (FOEIM) က သရုပ်ဆောင်မင်းသား ဒေါင်းကို သံတမန်အဖြစ် ဧပြီ ၂၆ ရက်က စတင်ပြီးတော့ ခန့်အပ်လိုက်တယ်လို့ ထုတ်ပြန်ပါတယ်။

FOEIM  ဟာ နွေဦးတော်လှန်ရေး ကာလမှာ အခြေခံပညာ ကျောင်းသား၊ ကျောင်းသူတွေကို အွန်လိုင်းနဲ့ မြေပြင်မှတဆင့် စဉ်ဆက်မပြတ် ပညာရေးပေးကာ ကြားကာလ ပြည်သူ့ပညာရေး ယန္တရားကို ဖော်ဆောင်နေတဲ့ လူထုအဖွဲ့ အစည်းတခု၊ ဒါမှမဟုတ် တော်လှန်ရေးကျောင်းတခုဖြစ်တယ်လို့ ဆိုပါတယ်။

လတ်တလောမှာတော့ FOEIM ကနေ အခုနှစ် ၂၀၂၂-၂၀၂၃ ပညာသင်နှစ်အတွင်း ကျောင်းသားသစ်တွေ ခေါ်ယူသွားမှာဖြစ်ကာ ကျောင်းအပ်လက်ခံသွားမယ့် ရက်တွေနဲ့ စတင်တက်ရောက်ရမယ့် ရက်တွေကို ထုတ်ပြန်ထားတာကိုလည်း တွေ့ရပါတယ်။

ပြီးခဲ့တဲ့ ၂၀၂၁-၂၀၂၂ ပညာသင်နှစ်မှာ FOEIM ဟာ ကျောင်းသား၊ ကျောင်းသူတွေကို အွန်လိုင်းကတဆင့် ကြားကာလ အခြေခံပညာရေးကို စဉ်ဆက်မပြတ် ရရှိအောင် အခမဲ့ ပညာရေးရရှိစေဖို့ အစွမ်းကုန်ကြိုးစားခဲ့သလို၊ အခုလာမယ့် ပညာသင်နှစ်မှာလည်း အွန်လိုင်းကသာမက မြေပြင်မှာပါ စဉ်ဆက်မပြတ်ပညာရေးပေးစွမ်းနိုင်ဖို့ ကြိုးစားအကောင်အထည်ဖော်နေတယ်လို့ ဆိုပါတယ်။

ဒါကြောင့်မို့ FOEIM အနေနဲ့ ကြားကာလ အွန်လိုင်းပညာရေးနဲ့ ကြားကာလ မြေပြင်ပညာရေးဆိုပြီးတော့ ၂ မျိုးခွဲကာ သင်ရိုးသတ်မှတ်ပုံ၊ သင်ကြားရေးနဲ့ တတ်မြောက်မှုစစ်ဆေးခြင်းသတ်မှတ်ပုံတို့ကို ရေးဆွဲကာ ပိုမိုကောင်းမွန်တဲ့ ပညာ ရေးစနစ်ဖြစ်ပေါ်စေဖို့လည်း ကြိုးစားနေတယ်လို့ ဆိုပါတယ်။

8 months Ago
More News
Up