နယူးဇီလန်နိုင်ငံမှာ သေနတ်ကိုင်ဆောင်ခွင့် တင်းကျပ်တဲ့အပေါ် နိုဝင်ဘာလ ၃၀ ရက်နေ့က သေနတ်ကိုင်ဆောင်သူများအဖွဲ့တဖွဲ့က ဆန့်ကျင် ဆန္ဒပြခဲ့ပါတယ်။
ဝန်ကြီးချုပ် ဂျက်စင်ဒါအာဒန်ရဲ့ သေနတ်ကိုင်ဆောင်မှု ထိန်းချုပ်ရေး ကြိုးပမ်းချက်တွေဟာ ကမ္ဘာတဝန်း ချီးကျူးမှုကို ရရှိပေမယ့် ပြည်တွင်းမှာတော့ သူဟာ အတိုက်အခံအမျိုးသားပါတီ၊ သေနတ်ကိုင်ဆောင်ခွင့် ကြိုးပမ်းတဲ့အဖွဲ့တွေနဲ့ သာမန်ပြည်သူတွေရဲ့ ဝေဖန်မှုတွေကို ရင်ဆိုင်နေရပါတယ်။
ပြီးခဲ့တဲ့ စက်တင်ဘာလက တင်သွင်းခဲ့တဲ့ သေနတ်ကိုင်ဆောင်မှု ဥပဒေကြမ်းနဲ့ ပတ်သက်လို့ အက်ရှ်ဘာတန်နဲ့ ခရိုက်ချက်မြို့တွေမှာ သေနတ်ကိုင်ဆောင်သူ အယောက် ၅၀ လောက်က ‘အန္တရာယ် ကင်းပါစေ၊ သေနတ်ကိုင်ဆောင်ခွင့် ဥပဒေကြမ်းကို ပယ်ဖျက်ပါ’ ဆိုတဲ့ ပိုစတာကတ်တွေကိုင်ပြီး ဆန္ဒပြပွဲတွေ လုပ်ခဲ့ပါတယ်။
ပါလီမန်ကို တင်သွင်းထားတဲ့ ဥပဒေကြမ်းသစ်မှာ တခြားအပြောင်းအလဲတွေ အပါအဝင် မှတ်ပုံတင်လုပ်တာနဲ့ သေနတ်ပိုင်ရှင်တွေကို စိစစ်တာတွေ ပါဝင်ပါတယ်။
ပြီးခဲ့တဲ့ ဧပြီလတုန်းက နယူးဇီလန် ပါလီမန်ဟာ ဆီမီးအော်တိုမက်တစ်သေနတ်တွေ အသုံးပြု ဖြန့်ချိတာကို ထိန်းချုပ်တဲ့ ဥပဒေတွေကို တညီတညွတ်တည်းနီးပါး အတည်ပြု ပြဋ္ဌာန်းခဲ့ပါတယ်။
2 years Ago
