သီပေါ

May 20, 2019

သီပေါတွင် ရွာသား ၁ဦး မိုင်းနင်းမိ

ရှမ်းပြည်မြောက်ပိုင်း သီပေါမြို့နယ် နားမခေါ်ကျေးရွာအုပ်စု တွန်ကျိုင်းရွာမှာ ဒီနေ့မနက်က ရွာသားတဦး မိုင်းနင်းမိပြီး  ဒဏ်ရာရသွားပါတယ်။ တွန်ကျိုင်းရွာသား စိုင်းအဲန် (အသက် ၂၀ နှစ်) ဆိုသူမှာ ဒီနေ့မနက်စောစောက ယာ ခင်းထဲ အလုပ်သွားလုပ်စဉ် လမ်းမှာ မိုင်းနင်းမိခဲ့တာလို့ နားမခေါ်ရွာသားတဦးက ဒီဗွီဘီကို ပြောပါတယ်။ “ဒီမနက် တောင်ယာသွားရင်း နင်းမိတယ်လို့ ရွာထဲမှာ ပြောနေကြတယ်။ အသေးစိတ်တော့မသိရဘူး၊ ဒဏ်ရာဘယ်လောက်ကြီးလဲတော့ မသိဘူးခင်ဗျ။” ဒီကိစ္စနဲ့ ပတ်သက်ပြီး သီပေါ နယ်စည်းမခြားပရဟိတအဖွဲ့ ဥက္ကဋ္ဌ ကိုမျိုးက “ သူတို့ရွာ ကလူတွေက ထော်လဂျီနဲ့ နားမခေါ်ရွာဆီ ခေါ်လာတယ်၊ အဲဒီကနေ ကျနော်တို့အဖွဲ့ ကားနဲ့ သီပေါဆေးရုံကို ခေါ်လာပါတယ်ခင်ဗျ။ ဒဏ်ရာက ဘယ်ဘက်ပေါင်ရင်းနဲ့ ဘယ်ဘက်ခြေ သလုံးကိုထိတယ်။ လူနာက သတိလည်း ကောင်းနေပါတယ်။ ဒဏ်ရာက အသက်အန္တရာယ် စိုးရိမ်စရာမရှိပါဘူး။” လို့ ပြောပါတယ်။ အဆိုပါ နားမခေါ် တွန်ကျိုင်းကျေးရွာဘက်မှာ ဒီနှစ်ဆန်းပိုင်းက ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော် (RCSS/SSA) နဲ့ ရှမ်းပြည်တိုး တက်ရေးပါတီ/ရှမ်းပြည်တပ်မတော် SSPP/SSA တပ်ဖွဲ့တွေကြား  တိုက်ပွဲဖြစ်ပွားခဲ့လို့ ရွာသားတွေ ရာနဲ့ချီ နားမခေါ်စစ်ရှောင်စခန်းမှာ လာရောက်ခိုလှုံခဲ့ရပါတယ်။ အဲဒီနောက်ပိုင်း တပ်နှစ်ဘက် အပစ်ခတ်ရပ်ကြောင်း ကြေညာပြီး စစ်ရှောင်ရွာသားတွေလည်း ဧပြီ ၃ ရက်နေ့ကတည်းက နေအိမ်အသီးသီးပြန်ကုန်ပြီဖြစ်တယ်လို့ သိရပါတယ်။ ဒါပေမယ့်  ဘယ်အဖွဲ့က မြှုပ်ထားမှန်းမသိတဲ့ မိုင်းစတွေ ကျန်နေလို့ တခါတရံ တောင်ယာလုပ်ဖို့ သစ်ရွက်ခြောက်တွေ မီးရှို့ရင် မြေကြီးထဲက မိုင်းတွေ ပေါက်ကွဲကြောင်း၊ အခန့် မသင့်ရင် နင်းမိတတ်လို့ အထူးသတိထားနေရတယ်လို့ နားမခေါ်ရွာသားက ပြောပါတယ်။ ဓာတ်ပုံ- Shar Htat Paing
2 years Ago

November 23, 2018

သီပေါတွင် ရှမ်းတပ် ၂ ဖွဲ့ တိုက်ပွဲဖြစ်၊ ၄ တန်းကျောင်းသား ၁ ဦးအပါအ၀င် ၃ ဦးသေဆုံး

ရှမ်းပြည်မြောက်ပိုင်း သီပေါမြို့နဲ့ ၂၅ မိုင်ခန့်အကွာ စယ်ခန်ကျေးရွာအုပ်စု  နားလော့ရွာမှာ ဒီကနေ့မနက် ၅ နာရီလောက်က ရှမ်းပြည်တပ်မတော် တောင်ပိုင်းနဲ့ မြောက်ပိုင်းတပ်ဖွဲ့တွေ ထိတွေ့ ပစ်ခတ်မှု ဖြစ်ပွားတာကြောင့် ၄ တန်းကျောင်းသား ၁ ဦးအပါအ၀င် ၃ ဦးသေဆုံးပြီး ၂ ဦး ဒဏ်ရာရခဲ့ပါတယ်။ ရွာနားမှာ သေနတ်သံတွေ ကြားရတာကြောင့် ရွာသားတွေဟာ အထိတ်တလန့် ထွက်ပြေးစဉ် ထိမှန်ဒဏ်ရာရခဲ့ကြတာလို့ နားလော့ရွာသူ နန်းခမ်းလောင်က ဒီဗွီဘီကို ပြောပါတယ်။ “ကျမက နေမကောင်းလို့ နားမခေါ်ရွာကို ရောက်နေတာ။ ဒီမနက်အစောကြီး မောင်လေး ဖုန်းဆက်ပြောတယ်။ ရွာမှာတိုက်ပွဲဖြစ်ပြီး လူ ၃ ယောက်သေတယ်၊ ၂ ယောက်ဒဏ်ရာ ရတယ်တဲ့။ သူတို့က ထော်လာဂျီကားနဲ့ ထွက်ပြေးမလို့လုပ်တုန်း လက်နက်ကျည်ကျလာတယ်။ ရှမ်းတပ် အချင်းချင်း ပစ်တယ်လို့ ပြောတယ်။ သေသွားတဲ့ ၃ ယောက်မှာ ၂ ယောက်က ပွဲချင်းပြီး၊ နောက်တယောက်က စယ်ခန်က ဆေးဆရာဆီ ခေါ်သွားရင်း စယ်ခန်ရွာရောက်မှ ဆုံးသွားတာ။” သေဆုံးသူ ရွာသား ၃ ဦးမှာ စိုင်းဆန်ကူ (၃၀ နှစ်)၊ စိုင်းလှိုင်းဟန် (၁၃နှစ်၊ စတုတ္ထ တန်းကျောင်းသား)၊ စိုင်းနောင့် (၂၅ နှစ်) တို့ဖြစ်ပြီး ဒဏ်ရာရသူမှာ ဆရာမ နန်းမွန်း (၂၂ နှစ်) နဲ့ စိုင်းအောင်မိုင်း ၂၄ နှစ်တို့ ဖြစ်တယ်လို့ ရွာသူကပြောပါတယ်။           ဒဏ်ရာရသူတွေကို ဘယ်ဆေးရုံခေါ်သွားတယ်ဆိုတာတော့ မသိရဘူးလို့ ဆိုပါတယ်။ ဒီကိစ္စနဲ့ ပတ်သက်ပြီး ရှမ်းပြည်တပ်မတော် RCSS/SSA ပြောခွင့်ရ ဗိုလ်မှူးစိုင်းဦးက          “ကနေ့မနက် ၅ နာရီကျော်လောက်က ကျနော်တို့ တပ်ဖွဲ့နဲ့ sspp တပ်တို့ နားလော့ရွာမှာ တိုက်ပွဲဖြစ်တယ်။ ကြာချိန်ကတော့ မိနစ် ၂၀ လောက်ပဲ။ ဖြစ်စဉ် အသေးစိတ်ကိုတော့ မသိရသေးပါဘူး၊ ကျနော်တို့ဘဘက်ကတော့ ဘယ်တော့မှ အရင်စပြီး မပစ်ဘူး။ အရင်လကလည်း ကျနော်တို့ တပ်ဖွဲ့တွေ ရှိတဲ့ဘက်ကို လာပစ်တာခံရလို့ ပြန်ပစ်ရတယ်။ ဒီမနက် ရွာသား ၃ ယောက်သေဆုံး၊ ၂ ယောက်ဒဏ်ရာရတယ်လို့လည်း သိရတယ်။ အသေးစိပ်အခြေနေတွေ မေးနေတုန်းပါခင်ဗျ။” ဒွိုင်တိုင်းလျန်းအခြေစိုက် RCSS/SSA ရှမ်းတပ်ဟာ အစိုးရနဲ့ အန်စီအေ (တနိုင်ငံလုံး အပစ်ခတ်ရပ်စဲရေးသဘောတူစာချုပ်) ကို လက်မှတ်ရေးထိုးထားပြီး ၀မ်ဟိုင်းအခြေစိုက် SSPP/SSA ကတော့ အန်စီအေစာချုပ်ကို လက်မှတ်မထိုးရသေးဘဲ မြောက်ပိုင်း မဟာမိတ်တပ်ဖွဲ့ဝင်ဖြစ်တာကြောင့် အားလုံးပါဝင် လက်မှတ်ထိုးရေးမူအတိုင်း သွားနေပါတယ်။ RCSS/SSA တပ်ဖွဲ့ဝင်တွေဟာ အန်စီအေလက်မှတ်ထိုးပြီးတဲ့နောက် မြောက်ပိုင်းဘက်ကို ၀င်ရောက်လှုပ်ရှားတာကြောင့် တိုက်ပွဲဖြစ်ရတာလို့ SSPP/SSA ဘက်က စွပ်စွဲထားပြီး RCSS/SSA ကတော့ သူတို့ဟာ အရင်ကတည်းက  မြောက်ပိုင်းမှာရှိနေသလို ရှမ်းပြည်တပ်မတော်အနေနဲ့ ရှမ်းပြည်ရဲ့ ဘယ်ဒေသမဆို သွားခွင့်ရှိရမယ်လို့ ပြောဆိုပါတယ်။ အိမ်ခြေပေါင်း ၇၀ လောက်ရှိတဲ့ နားလော့ရွာမှာ ပြီးခဲ့တဲ့လကလည်း တိုက်ပွဲဖြစ်လို့ နားအုံရွာဘက်ကို ရွာသားတွေ ထွက်ပြေးတိမ်းရှောင်ခဲ့ရဖူးပြီး ဒီတခေါက်မှာလည်း ထွက်ပြေးတိမ်းရှောင်ကြရဦးမှာ သေချာကြောင်း၊ ဒီအချိန်ဟာ ပြောင်းဆွတ်ချိန်၊ ကောက်ရိတ်ချိန်ဖြစ်တဲ့အတွက် စစ်ပြေးရှောင်နေရလို့ သီးနှံတွေ အချိန်လွန်သွားမှာကို စိုးရိမ်နေကြတယ်လို့ နားလော့ရွာသူ နန်းခမ်းလောင်က ပြောပါတယ်။ ဓာတ်ပုံ - Num Tai Parn Mai
 
3 years Ago
More News
Up