သီရိလင်္ကာကမ်းလွန်

June 3, 2021

သီရိလင်္ကာကမ်းလွန်ပင်လယ်ပြင်၌ ဓာတုပစ္စည်းတင်သင်္ဘော နစ်မြုပ်

သီရိလင်္ကာနိုင်ငံရဲ့ အနောက်ဘက်ကမ်းရိုးတန်းဒေသ ကမ်းလွန်ပင်လယ်ပြင်မှာ ဓာတုပစ္စည်းတွေ တန်ချီပြီး တင်လာတဲ့ ကုန်သင်္ဘောတစီး နစ်မြုပ်ခဲ့တယ်လို့ အစိုးရနဲ့ ရေတပ်က ဇွန် ၂ ရက်မှာ ပြောပါတယ်၊

ဒါဟာ သီရိလင်္ကာနိုင်ငံအတွက် အဆိုးဆုံး ပင်လယ်ပြင်ဆိုင်ရာ ကပ်ဘေးတွေထဲက တစ်ခုလို့ ရိုက်တာသတင်းဌာနက ဖော်ပြပါတယ်။ 

သင်္ဘောရဲ့ နောက်ပိုင်းစွန်းက ပင်လယ်ကြမ်းပြင်ကို ထိခဲ့လို့ သင်္ဘောကို ရေနက်ပိုင်းထဲအထိ ဆွဲသွားဖို့ ကြိုးပမ်းအားထုတ်မှုတွေကို ရပ်ထားခဲ့ရတယ်လို့ ရေတပ် ပြောခွင့်ရက ပြောပါတယ်။

စင်ကာပူနိုင်ငံမှာ မှတ်ပုံတင်ထားတဲ့ MV X-Press Pearl ကုန်သင်္ဘောဟာ နိုက်ထရစ် အက်စစ် ၂၅တန် တခြားဓာတုပစ္စည်းတွေ အလှကုန်တွေ အပါအဝင် ကုန်သေတ္တာ ၁၄၈၆ ခု သယ်လာခဲ့ တာပါ။

သီဟိုဠ်ကျွန်းရဲ့ အနောက်ဘက်ကမ်းရိုးတန်းမှာ ကျောက်ဆူးနုတ်နေတုန်း မေ ၂၀ ရက်မှာ မီးလောင်ခဲ့ ပါတယ်။

အာဏာပိုင်တွေက မီးငြှိမ်းသတ်ဖို့ ကြိုးစားခဲ့ပေမဲ့ ဓာတုပစ္စည်းတွေပါတဲ့ မီးလောင်နေတဲ့ ကုန်သေတ္တာတွေ သင်္ဘောကုန်းပတ်ပေါ်ကနေ ပြုတ်ကျခဲ့တယ်လို့ ရေတပ်က အရင်လက ပြောခဲ့ပါတယ်။ 

တန်ချီတဲ့ ပလတ်စတစ်ကျည်စေ့တွေဟာ ခုတော့ သီရိလင်္ကာ ကမ်းရိုးတန်းတလျှောက် ငါးသယံဇာတ ကြွယ်ဝတဲ့ ဒေသအတွင်း မျောပါနေတာပါ။ 

ဆယ်စုနှစ်တွေအတွင်း အဆိုးဆုံး သဘာဝပတ်ဝန်းကျင်ဆိုင်ရာ အကြပ်အတည်းတွေ ထဲက တစ်ခုကို ဖန်တီးခဲ့သလိုပဲလို့ ပညာရှင်တွေက ပြောပါတယ်။

ဒီဖြစ်ရပ်ကြောင့် ကမ်းခြေကို သန့်ရှင်းရေးလုပ်ဖို့ စစ်သည် ရာချီ တပ်ချထားခဲ့သလို ကီလိုမီတာ ၈၀ ရှည်တဲ့ ကမ်းရိုးတန်းတလျှောက် ငါးဖမ်းခွင့်ကို တားမြစ်ပိတ်ပင်ခဲ့လို့ ငါးဖမ်းလှေ အစီးရေ ၅၆၀၀ လောက် ထိခိုက်ခဲ့ပါတယ်။

8 months Ago

October 15, 2020

သီရိလင်္ကာကမ်းလွန်တွင် မီးလောင်ခဲ့သည့်ရေနံတင်သင်္ဘောကပ္ပတိန်ကို ဒေါ်လာ ၆ သောင်းခွဲ ဒဏ်ရိုက်

သီရိလင်္ကာကမ်းလွန်မှာ မီးလောင်ခဲ့တဲ့ MT New Diamond ရေနံတင်သင်္ဘောကြီးရဲ့ ကပ္ပတိန်ကို အောက်တိုဘာ ၁၄ ရက်မှာ  သီရိလင်္ကာရူပီးငွေ သန်း  ၂၀ (အမေရိကန် ဒေါ်လာ  ခြောက်သောင်းခွဲ ) ဒဏ်တပ်လိုက်ပါတယ်။  စက်တင်ဘာလအစောပိုင်းက သင်္ဘောအင်ဂျင်ခန်း ပေါက်ကွဲမှုကနေ မီးလောင်ခဲ့ပြီးနောက် ဂရိနိုင်ငံသား ကပ္ပတိန် ဆတီရော့ ဆီးယပ်စ်ဟာ ပေါ့ဆမှုနဲ့ ပတ်ဝန်းကျင် ညစ်ညမ်းမှု စွဲချက်တွေကို ရင်ဆိုင်ရပါတယ်။  ကူဝိတ်က  ရေနံစည် ၂ သန်းတင်လာတဲ့  MT New Diamond ကနေ ရေနံစီးကြောင်း  နှစ်ခု ကျန်ရစ်ခဲ့ပါတယ်။  သီရိလင်္ကာအာဏာပိုင်တွေက  မီးလောင်နေတဲ့ ရေနံတင်သင်္ဘောကို ယူအေအီးနိုင်ငံအထိ ဆက်သွားခွင့် ပြုခဲ့ပါတယ်။  အဲဒီမှာ သင်္ဘောပေါ် က ရေနံတွေကို တခြားသင်္ဘောဆီ ပြောင်းတင်ပြီး  အိန္ဒိယဆိပ်ကမ်းကို ဆက်ပို့ခဲ့တယ်လို့ အာဏာပိုင်တွေက ဆိုပါတယ်။  သင်္ဘောမီးကို ကူညီငြှိမ်းသတ်ပြီး ဘေးအန္တရာယ်မဖြစ်အောင် ကူညီခဲ့တဲ့အတွက် New Diamond သင်္ဘောပိုင်ရှင်တွေက သီရိလင်္ကာအစိုးရကို ရူပီးငွေ သန်း ၄၂၀ ( အမေရိကန် ဒေါ်လာ  ၂ ဒသမ ၂၇ သန်း ) ပေးဖို့ သဘောတူထားပါတယ်။  အဲဒီငွေကြေးကို သီရိလင်္ကာ ရေတပ်၊ လေတပ်၊ ဆိပ်ကမ်း အာဏာပိုင်နဲ့ ရေကြောင်း ပတ်ဝန်းကျင်အာဏာပိုင်အဖွဲ့ (MEPA) တို့ပေးခဲ့တဲ့ ဝန်ဆောင်မှုတွေအတွက်တောင်းခံတာပါ။   လက်ရှိမှာတော့ ရေနံတင်သင်္ဘော New Diamond ဟာ မော်လဒိုက်ရေပိုင်နက်မှာ ရောက်ရှိနေတယ်လို့ သီရိလင်္ကာရေတပ် ပြောခွင့်ရ ပုဂ္ဂိုလ်က ဆိုပါတယ်။ 
1 year Ago
Up