သီရိလင်္ကာ

September 6, 2022

သီရိလင်္ကာတွင် ဖွဲ့စည်းပုံပြင်ဆင်ရေးဥပဒေကြမ်း မကြာခင်အတည်ပြုနိုင်

သီရိလင်္ကာနိုင်ငံမှာ သမ္မတရဲ့လုပ်ပိုင်ခွင့်အာဏာကို ဖြတ်တောက်မယ့် ဖွဲ့စည်းပုံပြင်ဆင်ရေး ဥပဒေကြမ်းဟာ သီတင်းပတ်အနည်းငယ်အတွင်း  ဥပဒေဖြစ်လာနိုင်တယ်လို့ နိုင်ငံခြားရေးဝန်ကြီး အလီဆာဘရီက စက်တင်ဘာလ ၅ ရက်မှာ ပြောပါတယ်။

ဒီပြင်ဆင်ချက်ဟာ "အားလုံး ပါ၀င်တဲ့အုပ်ချုပ်ရေးကို ပြန်ယူဆောင်လာမယ်လို့လည်း နိုင်ငံခြားရေးဝန်ကြီးက သတင်းထောက်တွေကို ပြောခဲ့ပါတယ်။ 

ဒီပြင်ဆင်ချက်မှာ အုပ်ချုပ်ရေး တိုးတက်စေဖို့၊ လူ့အခွင့်အရေး မြှင့်တင်ဖို့၊ အစိုးရအဖွဲ့အစည်းတွေရဲ့ စာရင်းစစ် ကြီးကြပ်မှု တိုးမြှင့်ဖို့နဲ့ အကျင့်ပျက် ခြစားမှုတိုက်ဖျက်ရေး စုံစမ်းစစ်ဆေးမှုတွေကို အားကောင်းလာစေဖို့ ဖွဲ့စည်းပုံအခြေခံ ဥပဒေကောင်စီနဲ့ လွတ်လပ်တဲ့ကော်မရှင် ၉ ခုကို ဖွဲ့စည်းမှာ ဖြစ်ပါတယ်။

ဥပဒေကြမ်းကနေ ဥပဒေဖြစ်လာဖို့ လွှတ်တော်ထဲမှာ ထောက်ခံမဲ အများစုဖြစ်တဲ့ အမတ်နေရာ သုံးပုံနှစ်ပုံ လိုအပ်ပါတယ်။ နိုင်ငံရဲ့ဆယ်စုနှစ်တွေအတွင်း အဆိုးရွားဆုံး ဘဏ္ဍာရေး အကျပ်အတည်းကြောင့် ဖြစ်လာတဲ့ မငြိမ်မသက်မှုတွေကို တွန်းလှန်ဖို့နဲ့ တည်ငြိမ်ရေးကို အထောက်အကူ ဖြစ်စေဖို့ အဆိုပြုထားပါတယ်။ 

4 weeks Ago

September 3, 2022

ပြည်ပြေးသမ္မတဟောင်း ဂိုတာဘာယာရာဂျာပါ့ခ်ဆာ သီရိလင်္ကာသို့ ပြန်ရောက်လာ

သမိုင်းတလျှောက် အဆိုးဝါးဆုံး စီးပွားပျက်ကပ်နဲ့ကြုံရပြီး ပြည်သူတွေရဲ့ ဆန္ဒပြမှုကြောင့် နိုင်ငံကနေထွက်ပြေးသွားခဲ့ရတဲ့  သမ္မတဟောင်း  ဂိုတာဘာယာ ရာဂျာပါ့ခ်ဆာဟာ ၇ ပတ်အကြာမှာ သီရိလင်္ကာကို ပြန်လည်ရောက်ရှိလာပါတယ်။

ရာဂျာပါ့ခ်ဆာ လေယာဉ်ကနေဆင်းလာတာနဲ့တပြိုင်နက် ဝန်ကြီးတွေနဲ့ နိုင်ငံရေးသမားတွေက ပန်းကုံးတွေနဲ့ ကြိုဆိုခဲ့ကြတာကြောင့် အတိုက်အခံသမားတွေက သူ့ကြောင့် နိုင်ငံပျက်စီးရတယ်လို့ ပြောနေကြပေမယ့် နိုင်ငံတွင်းမှာ သူ့ရဲ့ ဩဇာသက်ရောက်ဆဲပဲဆိုတာ ပြသနေပါတယ်။

သီရိလင်္ကာမှာ မကြုံစဖူး စီးပွားပျက်ကပ်ကြောင့် ပြည်သူတွေ လနဲ့ချီ ဆန္ဒပြခဲ့ကြကာ သမ္မတအိမ်တော်ကို ဝင်ရောက်စီးနင်းခဲ့ပြီးနောက် ရာဂျာပါ့ခ်ဆာဟာ ဇူလိုင်လလယ်မှာ စစ်တပ်ပိုင်လေယာဉ်နဲ့ပဲ မော်လဒိုက်နိုင်ငံကို ထွက်ပြေးသွားခဲ့ပြီးနောက် စင်ကာပူကို ထပ်မံသွားရောက်ခဲ့ပါတယ်။

စင်ကာပူကို ရောက်ရှိပြီးနောက် ရာထူးကနေ နုတ်ထွက်ကြောင်းနဲ့ နိုင်ငံကိုပြန်လာနိုင်ဖို့ လက်ရှိဝန်ကြီးချုပ်အဖြစ် တာဝန်ထမ်းဆောင်နေသူ ရာနေးလ်ဝစ်ကရာမန်ဆင်းဂ်ဆီကို အသနားခံစာ ပို့ဆောင်ခဲ့တယ်လို့ သိရပါတယ်။ 

စင်ကာပူကနေ ထိုင်းနိုင်ငံကို ထပ်မံသွားရောက်ပြီး ဟိုတယ်တခုမှာ အကျဉ်းသားတယောက်လို နေနေရတာကို စိတ်ပျက်ပြီး သီရိလင်္ကာကိုသာ ပြန်ချင်ကြောင်း ရာဂျာပါ့ခ်ဆာက ပြောခဲ့ပါတယ်။ 

အသက် ၇၃ နှစ်အရွယ် သမ္မတဟောင်းဟာ ၅၂ ရက်ကြာပြည်ပြေးခရီးစဉ်ကို အဆုံးသတ်ခဲ့ပြီးနောက် နိုင်ငံကို ပြန်ရောက်လာတာပါ။ သူ့ကိုကာကွယ်ဖို့အတွက် စစ်သားတွေနဲ့ ကွန်မန်ဒိုရဲတွေပါဝင်တဲ့ လုံခြုံရေးတပ်ဖွဲ့သစ်တခု ဖွဲ့စည်းထားတယ်လို့ သိရပါတယ်။ 

တချိန်က အာဏာရှိခဲ့တဲ့ ရာဂျာပါ့ခ်ဆာမိသားစုတွေကို ကာကွယ်ပေးနေတယ်ဆိုပြီး လက်ရှိဝန်ကြီးချုပ် ဝစ်ကရာမန်ဆင်းဂ်ကို အတိုက်အခံနိုင်ငံရေးသမားတွေက စွပ်စွဲအပြစ်တင်ကြပါတယ်။

သီရိလင်္ကာရဲ့ အခြေခံဥပဒေအရ ရာဂျာပါ့ခ်ဆာနဲ့ သူ့အစ်ကို သမ္မတဟောင်း မဟင်ဒါ အပါအဝင် သမ္မတဟောင်းတွေကို သက်တော်စောင့်၊ အသုံးပြုဖို့ယာဉ်နဲ့ နေစရာအိမ်တွေ ထောက်ပံ့ပေးထားပါတယ်။

ရာဂျာပါ့ခ်ဆာဟာ သမ္မတအဖြစ်မှနုတ်ထွက်ပြီးဖြစ်တာကြောင့် သမ္မတဟောင်းတဦးအနေနဲ့ ရထိုက်တဲ့အခွင့်အရေးတွေ ပယ်ဖျက်ပြီးသားဖြစ်ကြောင်းနဲ့ ၂၀၀၉ ခုနှစ်က နာမည်ကြီး သတင်းစာအယ်ဒီတာ လာဆန်သာဝစ်ကရာမာတုန်ဂါကို လုပ်ကြံမှုအပါအဝင် ရာဇဝတ်မှုအ မြောက်အမြားနဲ့ သူ့ကို ဖမ်းဆီးဖို့ ဖိအားပေးသွားမယ်လို့ လူ့အခွင့်အရေးလှုပ်ရှားသူတွေက ပြောပါတယ်။

သီရိလင်္ကာလူငယ်သတင်းထောက်များအစည်းအရုံးရဲ့ ပြောရေးဆိုခွင့်ရှိသူကလည်း “သူအခုလိုပြန်လာတာကို ကျနော်တို့က သဘောကျတယ်။ သူကျူးလွန်ခဲ့တဲ့ပြစ်မှုတွေအတွက် အပြစ်ပေးဖို့ ဆောင်ရွက်လို့ရတာပေါ့” လို့ပြောပါတယ်။

လာဆန်သာဝစ်ကရာမာတုန်ဂါကိုလုပ်ကြံသတ်ဖြတ်မှု၊ ၂၀၀၉ ခုနှစ်ပြည်တွင်းစစ်ကာလအပြီး တမီလ်အကျဉ်းသားတွေကိုကို နှိပ်စက်ညှဉ်းပန်းမှုတို့နဲ့ ဂိုတာဘာယာ ရာဂျာပါ့ခ်ဆာနဲ့ မဟင်ဒါ ရာဂျာပါ့ခ်ဆာတို့ကို အမေရိကန်ပြည်ထောင်စု ကယ်လီဖိုးနီးယားပြည်နယ်မှာ တရားစွဲထားပါတယ်။

1 month Ago
More News
Up