သာပေါင်း

February 17, 2022

သာပေါင်းမြို့နယ်တွင် ဒုရဲအုပ် ၁ ဦး မိမိကိုယ်ကိုယ် သေနတ်ဖြင့်ပစ်ပြီး အဆုံးစီရင်

ဧရာဝတီတိုင်း၊ သာပေါင်းမြို့နယ်မှာ ပြီးခဲ့တဲ့ရက်ပိုင်းက ဒုရဲအုပ်တယောက်ဟာ မိမိကိုယ်ကိုယ် ခြောက်လုံးပြူးသေနတ်နဲ့ ပြန်ပစ်ပြီး အဆုံးစီရင်ခဲ့တယ်လို့ သိရပါတယ်။

အဆုံးစီရင်ခဲ့တဲ့ ဒုရဲအုပ်ဟာ လှေကြီးတက်ရွာက စက္ကူပျော့ဖက်စက်ရုံမှာ ရဲကင်းမှူးလုပ်နေတဲ့ အသက်ကြီး ဒုရဲအုပ်ဖြစ်ပြီး သူ့ရဲ့ရက်လည်ကိုတော့ ဖေဖော်ဝါရီလ ၁၆ ရက်နေ့က ပြုလုပ်ခဲ့တယ်လို့ ဒေသခံတဦးက ပြောပါတယ်။

“အသက်ကတော့ ကြီးနေပြီး အဲ့ဒုရဲအုပ်က သဘောကောင်းတယ်။ သိသလောက်တော့ သူက ရွာကို တော်တော် ကာကွယ်ပေးခဲ့တာရှိတယ်။ အဖမ်းအဆီးခံရတာမများအောင် သူတတ်နိုင်သလောက် ကွယ်ပေးခဲ့တယ်။ ဘယ်လို ဖြစ်ပြီး အဆုံးစီရင်သွားတယ်ဆိုတာတော့မသိဘူး”လို့ ဒေသခံတဦးက ပြောပါတယ်။

သေဆုံးခဲ့တဲ့ ဒုရဲအုပ်ဟာ စစ်တပ်အာဏာသိမ်းပြီးနောက်ပိုင်း သက်ကြီးပင်စင်တင်ခဲ့ပေမဲ့ အထက်က ပင်စင်ချမပေးတာကြောင့် စိတ်ညစ်ပြီး ခုလို့ အဆုံးစီရင်သွားတာဖြစ်နိုင်တယ်လို့ ရဲတပ်ဖွဲ့ဝင်တွေက သုံးသပ် ပြောဆိုပါတယ်။

ဧရာဝတီတိုင်းမှာ ၂၀၁၉ ခုနှစ်ကလည်း မြောင်းမြမြို့နယ်အတွင်းက နယ်မြေရဲစခန်းမှူး ရဲအုပ်တယောက် မိမိကိုယ်ကို သေနတ်နဲ့ပစ်သတ်ပြီး အဆုံးစီရင်မှုဖြစ်ခဲ့သေးတယ်လို့ ရဲတပ်ဖွဲ့က သိရပါတယ်။

10 months Ago

September 25, 2021

သာပေါင်းတွင် အောက်ဆီဂျင်စက်ရုံတည်ဆောက်ရေး စစ်ကောင်စီက ငွေကြေးအဓမ္မကောက်နေ

ဧရာဝတီတိုင်း၊ သာပေါင်းမြို့နယ်ထဲက ကျေးရွာတွေကို အောက်ဆီဂျင်စက်ရုံတည်ဆောက်ဖို့အတွက် အကြောင်းပြကာ စစ်ကောင်စီက ငွေအတင်းအဓမ္မကောက်ယူတာတွေ ပြုလုပ်နေတယ်လို့ သိရပါတယ်။

စစ်ကောင်စီရဲ့ သြဇာခံကျေးရွာအုပ်ချုပ်ရေးမှူးတွေက ကျေးရွာ အုပ်စု ၁ စုကို ၁၅ သိန်းကနေ သိန်း ၂၀ အထိရအောင် ကောက်ယူနေတာကြောင့် စားဝတ်နေရေးမပြေလည်သူတွေပါ မဖြစ်မနေ ပေးနေရတယ်လို့ ဒေသခံတွေက ပြောပါတယ်။

လုံခြုံရေးအရအမည်အဖော်လိုတဲ့ သာပေါင်းဒေသခံတဦးက "အရင်ကဆို သဒ္ဒါသလောက်ထည့်ခိုင်းတာ ဘာလုပ်လုပ် အဲ့ပုံစံသွားတာ။ ခုက ခေတ်ကမကောင်းတဲ့ကြားထဲ အေးဓားမြတိုက်သလို ပုံစံဖြစ်နေတယ်။ ရှိတဲ့သူလည်း ထည့်၊ မရှိသူလည်းထည့်ဆိုတဲ့ ပုံစံကြောင့် တချို့ဆို စားဖို့မရှိတဲ့ကြားက ကြောက်လို့ ပိုက်ဆံချေးထည့်ပေးရတာတွေရှိတယ်” လို့ ပြောပါတယ်။

ကျေးရွာအုပ်စု ၁ စုကို ၁၅ သိန်းကနေ သိန်း ၂၀ ကြားရရှိဖို့အတွက် ကျေးရွာအုပ်ချုပ်ရေးမှူးတွေနဲ့ စစ်တပ်သတင်းပေးတွေပေါင်းပြီး အိမ် ၁ အိမ်ကို ၃ ထောင်ကနေ စက်လှေနဲ့ စျေးဆိုင်ရှိရင် ၅ သောင်း စတဲ့နှုန်းထားတွေခွဲပြီး ကောက်ခံနေတာလို့ ဆိုပါတယ်။

ဧရာဝတီတိုင်းအတွင်းကမြို့နယ်တွေမှာ ဒေသခံပြည်သူတွေ စုပေါင်းအလှူငွေနဲ့ရရှိလာတဲ့ အောက်ဆီဂျင်စက်ရုံတွေကိုလည်း စစ်ကောင်စီက လိုက်လံထိန်းချုပ်ထားတယ်လို့ သိရပါတယ်။

1 year Ago
More News
Up