သာစည်ဘူတာ

March 31, 2021

ဧပြီ ၁ ရက်နေ့ မီးရထားပြန်ထွက်ရန် သာစည်ဘူတာ CDM ဝန်ထမ်းများ ဖိအားပေးခံနေရ

မန္တလေးတိုင်း သာစည်မြို့ သာစည်ဘူတာက  CDMဝန်ထမ်းတွေကို ဧပြီ ၁ရက်နေ့မှာ မီးရထားထွက်နိုင်ဖို့  အာဏာသိမ်း စစ်အုပ်စုက ဖိအားပေးနေတယ်လို့ မီးရထားဘူတာ ဝန်ထမ်းတစ်ဦးက ပြောပါတယ်။

"မနေ့က မီးရထားပို့ဆောင်ရေးဌာနစိတ်က ဝန်ထမ်း ၄ ဦးကို မြို့နယ်စစ်ကောင်စီက ခေါ်တယ်၊ ဧပြီလ ၁ ရက်နေ့မှာ အောင်ပန်း ကလောဘက် ရထားထွက်နိုင်အောင်လုပ်ရမယ် ပြောတယ်၊ ပို့ဆောင်ရေး ဝန်ထမ်း ၁၅၀ ကျော်က CDMလုပ်နေကြတာ အဲဒီကို ရုံပိုင်အဆင့်ရှိတဲ့ ဝန်ထမ်းတွေကို ခေါ်ပြီး ဖိအားပေးတယ်၊ ဘူတာ အရာရှိကြီးတွေကတော့ ပုန်းရှောင်နေကြတယ်။ ရတဲ့ဝန်ထမ်းနဲ့ လုပ်မယ်တဲ့ မီးရထားမှာ သူအပိုင်းနဲ့သူ အရေးပါတယ် ဖြစ်သလိုလုပ်ရင် ဒုက္ခရောက်ကုန်လိမ့်မယ်"လို့ ပြောပါတယ်။

သာစည်ဘူတာမှာ မီးရထားဝန်ထမ်း ၅၀၀ ကျော်ရှိနေပြီး CDMလုပ်တဲ့ မီးရထားဝန်ထမ်းတွေကို မတ်လ ၃၁ ရက် နောက်ဆုံးထားပြီး ဝန်ထမ်းအိမ်ရာကနေ စစ်အုပ်စုက ဖယ်ရှားခိုင်းထားပါတယ်။

မတ်လ ၂၆ ရက်နေ့ကတည်းက CDM မီးရထားဝန်ထမ်းတွေဟာ ဝန်ထမ်းအိမ်ရာတွေက ဖယ်ရှားပေးခဲ့ပါတယ်။ နေထိုင်စားသောက်ရေး အခက်အခဲရှိပေမယ့် စစ်အာဏာရှင်လက်အောက် အလုပ်မလုပ်ချင်တာကြောင့် အဆုံးအထိ CDM လုပ်သွားမယ် လို့ သိရပါတယ်။

2 weeks Ago

March 28, 2021

သာစည်ဘူတာက CDM မီးရထားဝန်ထမ်းများ စားဝတ်နေရေး အခက်အခဲရှိနေ

မန္တလေးတိုင်း သာစည်မြို့မှာ အာဏာဖီဆန်တဲ့ CDM လုပ်နေတဲ့ မြန်မာ့ မီးရထားဝန်ထမ်းတွေဟာ အာဏာသိမ်းစစ်အုပ်စုရဲ့ ဖိအားပေးမှုတွေအမျိုးမျိုးအောက်ကနေ   အခက်အခဲတွေကို ရင်ဆိုင်ရင်း  CDM ဆက်လုပ်နေကြပါတယ်။

CDM မီးရထားဝန်ထမ်းတစ်ဦးက"မီးရထားအိမ်ရာက  မတ်လ ၃၁ ရက်နေ့ နောက်ဆုံး ဖယ်ပေးပါ စာလာကပ်တယ် ၂၆ရက်နေ့ကတည်းက ဖယ်ပေးလိုက်တယ်။ စားသောက်နေထိုင်ရေး အားလုံး ပြည်သူတွေက အကူအညီပေးပါတယ်။ စစ်တပ်က CDMပျက်သွားအောင်လုပ်နေတာ ကျနော်တို့က အခက်အခဲတွေကြားက CDMဝန်ထမ်းအဖြစ် ဆက်လက်ရပ်တည်နေတာပါ။ ရေရှည်အတွက်တော့ အတော်ရုန်းကန် ရင်ဆိုင်ရမှာပါ" လို့ ပြောပါတယ်။

CDMဝန်ထမ်းအမျိုးသမီးတစ်ဦးက"နေရထိုင်ရတာ အခက်အခဲရှိပါတယ်။ စစ်အာဏာရှင်အလိုမရှိပါဘူး။  အဲဒါကြောင့် အဲဒီအခက်အခဲတွေ ရင်ဆိုင်ရင်း ပြည်သူနဲ့ အတူတူ စစ်အာဏာရှင်ကို CDNလုပ်ရင်း တော်လှန်သွားမှာပါ"လို့ ပြောပါတယ်။

သာစည်ဘူတာဟာ မီးရထားလမ်းဆုံ ဘူတာတစ်ခုဖြစ်ပါတယ်။ ရှမ်းပြည်နယ်ဘက်တက်မယ့် ရထားတွေကို သာစည်ဘူတာကပဲ တက်ရပါတယ်။ 

သာစည်ဘူတာ မီးရထားဝန်ထမ်းအိမ်ရာမှာ  မီးရထားဝန်ထမ်း ၅၀၀ကျော် ဟာ မိသားစုတွေနဲ့အတူနေထိုင်ကြပါတယ်။

အလုပ်ပြန်မဝင်ရင် မီးရထားအိမ်ရာကနေ  မတ်လ ၃၁ရက် နောက်ဆုံးထား ဖယ်ပေးရမယ်လို့ စစ်ကောင်စီက  စာလာကပ်လို့ မီးရထားဝန်ထမ်းနဲ့ မိသားစုတွေဟာ မတ်လ ၂၆ ရက်နေ့ကတည်းက ဘုန်းတော်ကြီးကျောင်းတွေဆီ ခိုလှုံနေထိုင်နေကြပါတယ်။

    မြန်မာနိုင်ငံတဝန်းမှာ မီးရထားဝန်ထမ်းတွေအားလုံးနီးပါးက အာဏာသိမ်းစစ်ကောင်စီကို လုံးဝလက်မခံဘဲ CDM လုပ်နေတာကြောင့် မီးရထားသယ်ယူပို့ဆောင်ရေးလုပ်ငန်းတွေ အားလုံးလိုလို ရပ်ဆိုင်းနေတာဖြစ်ပါတယ်။ 

2 weeks Ago
Up