သာစည်

September 1, 2021

ဝမ်းတွင်း၊ သာစည်နှင့်ပျော်ဘွယ်တို့တွင် ရေကြီးရေလျှံ၊ ပြည်သူ ၁၀၀၀ ကျော် ရွှေ့ပြောင်းထားရ

မန္တလေးတိုင်း ဝမ်းတွင်း၊ သာစည်နဲ့ ပျော်ဘွယ်မြို့နယ်တို့မှာ မိုးရွာသွန်းမှုများတာကြောင့် ရေကြီးရေလျှံဖြစ်ပြီး ပြည်သူ ၁၀၀၀ ကျော် ရွှေ့ပြောင်းထားရသလို လမ်းတံတားတွေလည်း ပျက်စီးကုန်တာကြောင့် သွားလာရ ခက်ခဲနေကြတယ်လို့ ဒေသခံတွေက ပြောပါတယ်။

မိုးရွာမှုများပြီး ရေကြီးရေလျှံတာကြောင့် သြဂုတ် ၃၁ ရက်ကစပြီး မိတ္ထီလာခရိုင် ဝမ်းတွင်းမြို့နယ်မှာ ရေဘေးသင့်ပြည်သူ ၁၀၀၀ ကျော်လောက်ကို ဌာနဆိုင်ရာတွေက နေရာရွှေ့ပြောင်းပေးထားပြီး ပရဟိတအဖွဲ့တွေက သောက်ရေနဲ့ စားစရာတွေ ဝေငှပေးနေတယ်လို့ ဒေသခံတဦးက ပြောပါတယ်။

ဒါ့အပြင် သြဂုတ် ၂၈ ရက်ညကစပြီး သြဂုတ်လ ၃၁ ရက်အထိ ညတိုင်းလို မိုးရွာသွန်းပြီး ရေတိုက်စားတာကြောင့် လမ်းတံတားတွေ ပျက်စီးနေတယ်လို့ မြို့ခံတဦးက ပြောပါတယ်။

“သာစည်ဘက်မှာတော့ ကြို့ပင်သာရွာ၊ ဝမ်းသာရွာ၊ ဟံဇားရွာ၊ ကျေးရွာချင်းဆက် လမ်းပေတစ်ရာကျော်လောက် ရေတိုက်စားပျက်စီးပြီး တံတားတစ်ခုရဲ့ ချဉ်းကပ်လမ်တွေ ပျက်စီးကုန်တယ်။ ဝမ်းတွင်းဘက်က တမာကုန်းရွာတံတားချဉ်းကပ်လမ်း ပေ ၄၀ လောက် ပျက်သွားတယ်။ လတ်တလောတော့ ရေတွေစီးနေဆဲပဲ သွားလာရေး အခက်အခဲရှိတာပေါ့။ ဌာနဆိုင်ရာတွေ ပရဟိတတွေကလည်း ချက်ချင်းလိုရောက်လာပြီး အကူအညီပေးကြပါတယ်။"

မန္တလေးတိုင်း ရမည်းသင်းခရိုင် ပျော်ဘွယ်မြို့နယ်မှာလည်း သြဂုတ် ၃၁ ရက်နေ့က မိုးသည်းထန်စွာ ရွာသွန်းတာနဲ့ ဆည်ရေလွှတ်ချိန် တိုက်ဆိုင်ပြီး သီးပင်ကျေးရွာက အနိမ့်ပိုင်း နေအိမ်တွေထဲ ရေဝင်ရောက်နေပြီး နေအိမ် ၂လုံး ​မျောပါသွားတယ်လို့ မြို့ခံတွေက ပြောပါတယ်။

ရေဝင်ရောက်တဲ့ နေအိမ်တွေကို ပျော်ဘွယ်မြို့နယ်သန္ဓေမီးသတ်တပ်ဖွဲ့နဲ့ အရန်မီးသတ်တပ်ဖွဲ့ဝင်တွေက ကူညီဆောင်ရွက်ပေးနေပြီး လူထိခိုက်မှုမရှီဘူးလို့ သိရပါတယ်။

3 weeks Ago

ဝမ်းတွင်းနှင့် သာစည်တွင် မိုးရွာသွန်းမှုများသဖြင့် လူနေအိမ်နှင့် ယာခင်းများ ရေနစ်မြုပ်

မန္တလေးတိုင်း၊ မိတ္ထီလာခရိုင်၊ ဝမ်းတွင်းမြို့နယ်နဲ့ သာစည်မြို့နယ်မှာ  သြဂုတ် ၃၀ ရက်ညက မိုးရွာသွန်းမှုများသဖြင့် သြဂုတ် ၃၁ ရက်မနက်ပိုင်းက လူနေအိမ်နဲ့ ယာခင်းတွေ ရေနစ်မြုပ်ခဲ့ပါတယ်။

ဒေသခံတစ်ဦးက "ညက တစ်ညလုံး လိုလို မိုးတွေရွာနေတယ်။ ဒီနေ့မနက်ရောက်တော့ အိမ်တွေထဲကို ၂ ပေကျော်ကျော်လောက် ရေတွေဝင်လာတယ်။ ငရုတ်ခင်းတွေထဲလည်း ရေဝင်တယ်။ ပျက်စီးဆုံးရှုံးမှုတော့  ခန့်မှန်းလို့ မရသေးဘူး"လို့ ပြောပါတယ်။

သာစည်မြို့နယ်က ဥသျှစ်ကုန်းရွာ၊ ဝမ်းသာရွာ၊ ဟံဇားရွာ၊ ဒဟတ်တောရွာတွေရဲ့ ယာခင်းတွေကို ရေထု ၂ ပေကျော်ကျော်လောက် ဝင်ရောက်ခဲ့ပါတယ်။

ဝမ်းတွင်းမြို့နယ်က လျှော်ပင်ရွာနဲ့ မြို့ပေါ်ရပ်ကွက်တချို့က  လူနေအိမ် ၁၇၀ ကျော်လောက်ကို ရေထု ၃ ပေလောက်ဝင်ခဲ့ပြီး ဌာနဆိုင်ရာတွေ ပရဟိတအဖွဲ့အစည်းတွေက ရေဝင်အိမ်တွေရဲ့ မိသားစုတွေကို နေရာပြောင်းရွေ့ပေးထားရပြီး အစားအစာထောက်ပံပေးနေတယ်လို့ သိရပါတယ်။

ဝမ်းတွင်းမြို့နယ်နဲ့ သာစည်မြို့နယ်တွေမှာ  သြဂုတ် ၃၀ ရက်ည ၉ နာရီလောက်ကစပြီး သြဂုတ် ၃၁ ရက်မနက်အထိ မိုးရေချိန်လက်မ ၂ လက်မ မှ ၃ လက်မအတွင်း မိုးရွာသွန်းခဲ့တယ်လို့လည်း သိရပါတယ်။

3 weeks Ago

July 3, 2021

သာစည်တွင် ကိုဗစ်ရောဂါကြောင့် အသက် ၇၀ ကျော်အဘွားအိုတစ်ဦး သေဆုံး

မန္တလေးတိုင်း၊ သာစည်မြို့နယ် တမာကုန်းရွာနေ အသက် ၇၀ ကျော် အဘွားအိုတစ်ဦး ဇူလိူင် ၃ ရက်နေ့က ကိုဗစ်-၁၉ ကြောင့် သေဆုံးပြီး ဝမ်းတွင်းမြို့က ဘဏ်ဝန်ထမ်းအမျိုးသားတစ်ဦးနဲ့ ၂ လအရွယ် သမီး ကူးစက်ခံခဲ့ရတယ်လို့ ပရဟိတအကျိုးဆောင်တစ်ဦးက ပြောပါတယ်။

“သာစည်မှာ ဘိလပ်မြေစက်ရုံဝန်ထမ်းတွေနဲ့ တရားစခန်းတစ်ခုက ကူးစက်ဖြစ်ပွားတာက ၇၃ ဦးအထိရှိသွားပြီ။ ကူးစက်မှုနှုန်း သိပ်မြန်တယ်။ ကိုဗစ်စည်းမျဉ်းတွေကို လိုက်နာပေးကြပါ။” 

မိတ္ထီလာဆေးရုံ သီးသန့်ဆောင်မှာ ကိုဗစ်လူနာ ၁၈ ဦး၊ မလှိူင်ဆေးရုံမှာ ၁၄ ဦးနဲ့ ဝမ်းတွင်းဆေးရုံမှာတော့ ၁၆ ဦးအနက် ၃ ဦး ပျောက်ကင်းသွားပြီဖြစ်ပြီး သာစည်ဆေးရုံမှာတော့ ကိုဗစ်လူနာ ၇၃ ဦး ရှိနေပါတယ်။

မိတ္ထီလာခရိုင် ၄ မြို့နယ်မှာ ဇွန်လ ၈ ရက်က ကိုဗစ်-၁၉ စတင်တွေ့ရှိခဲ့ပြီး တစ်လအတွင်း ကိုဗစ်ရောဂါဖြစ်ပွားသူ ၁၂၁ ဦးအထိ ဖြစ်လာပါတယ်။ ထိစပ်သူတွေကိုတော့ သက်ဆိုင်ရာမြို့နယ် အားကစားခန်းမတွေမှာ ထားရှိတယ်လို့ သိရပါတယ်။

3 months Ago
More News
Up