သရက်ချောင်း

October 4, 2021

သရက်ချောင်းတွင် တိုက်ပွဲဖြစ်၊ စစ်တပ်က နေအိမ်များကို ဖျက်ဆီးပြီး ပစ္စည်းများယူဆောင်

တနင်္သာရီတိုင်း၊ သရက်ချောင်းမြို့နယ်၊ တောင်ပြောက်တိုက်နယ်အတွင်းက ကျွဲခြံရွာ ဘုန်းကြီးကျောင်းမှာ တပ်စွဲထားတဲ့ စစ်တပ်နဲ့ ဒေါင်းမင်းစစ်ဆင်ရေးအဖွဲ့ (TYC-PDF) တို့ အောက်တိုဘာ ၃ ရက်နေ့ မနက် ၄ နာရီခွဲက တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

“စစ်တပ်ဘက်က လက်နက်ကြီး လက်နက်ငယ်တွေနဲ့ ဆက်တိုက်ပစ်တယ်။ အိမ်တွေကိုလည်း မီးရှို့သွားတယ်။ ကျနော်တို့ ရှောင်နေတဲ့နေရာကတောင် ရွာထဲက မီးခိုးလုံးကြီးတွေ တက်လာတာ မြင်ရတယ်။ ရွာထဲက နေအိမ်တွေကို ဖျက်ဆီးပြီး ပစ္စည်းတွေ ပိုက်ဆံတွေလည်း ယူသွားကြတယ်။ ကျနော်တို့မှာ မနက်ကတည်းက ပြေးကြရတာ” လို့ ဒေသခံတစ်ဦးက ပြောပါတယ်။

တိုက်ပွဲမှာ စစ်ကောင်စီဘက်က ၅ ယောက်ထက်မနည်း သေဆုံး၊ ၅ ယောက် ဒဏ်ရာရရှိခဲ့ပြီး PDF ဘက်ကတော့ နှစ်ဦး ထိခိုက်ဒဏ်ရာရ ရှိခဲ့တယ်လို့ သိရပါတယ်။

အဖွဲ့ခေါင်းဆောင်တစ်ဦးက “ဒီနေ့တိုက်ပွဲမှာ သူတို့ဘက်က လက်နက်ကြီးတွေနဲ့ ပစ်ပေမဲ့ ကျနော်တို့ဘက်က လက်လုပ်သေနတ်တွေနဲ့ပဲ အများဆုံးခုခံရတယ်။ ဒီနေ့ တိုက်ပွဲ အခြေအနေကြောင့် စစ်ကောင်စီဘက်က အင်အားဖြည့်လာနိုင်ခြေရှိလို့ PDF အဖွဲ့ဝင်တွေရဲ့ လုံခြုံရေး စိုးရိမ်ရနိုင်တယ်။ ဒါပေမဲ့ ကျနော်တို့ဘက်က မသေမချင်း ခုခံတိုက်ခိုက်သွားမှာပါ” လို့ ပြောပါတယ်။

ပြီးခဲ့တဲ့ စက်တင်ဘာ ၃၀ ရက်နေ့ကလည်း တောင်ပြောက်တိုက်နယ် ဝင်းကဖော်ရွာမှာ စစ်တပ်နဲ့ ဒေါင်းမင်းစစ်ဆင်ရေးတို့ ထိတွေ့တိုက်ပွဲ ဖြစ်ခဲ့ပြီး စစ်ကောင်စီဘက်က လူနေအိမ်တွေကို မီးရှို့တာ၊ လုယက်တာအပြင် အသက် ၅၀ ကျော် လူကြီး ၁ ယောက်၊ လူလတ်လူငယ် ၃ ယောက်ကို ရိုက်နှက် ဖမ်းဆီးသွားတယ်လို့ ဒေသခံတွေက ပြောပါတယ်။

2 months Ago

September 30, 2021

သရက်ချောင်းတွင် စစ်​ကောင်စီတပ်က အပြစ်မဲ့ပြည်သူ ၁ ဦး၏ နေအိမ်ကို မီးရှို့ဖျက်ဆီး

တနင်္သာရီတိုင်း ထားဝယ်ခရိုင် သရက်​ချောင်းမြို့နယ်၊ သဲ​ချောင်းကြီးရွာ​မှာ အပြစ်မဲ့ ပြည်သူတဦးရဲ့ ​နေအိမ်ကို စစ်ကောင်စီတပ် အင်အား ၂၀ လောက်က စက်တင်ဘာ ၂၉ ရက်ည ၁၂ လောက်မှာ မီးရှို့ဖျက်ဆီးခဲ့ကြတယ်လို့ ဒေသခံတွေက ပြောပါတယ်။

စစ်ကောင်စီတပ်တွေဟာ သဲချောင်းကြီးရွာမှာ ညဘက် PDF ပုံစံ အရပ်ဝတ်တွေနဲ့ သွားလာလှုပ်ရှားနေကြပြီး နေအိမ်တွေမှာ ဝင်ရောက် ရှာဖွေတာတွေ ပြုလုပ်နေတာလို့ ဆိုပါတယ်။

ဒေသခံတဦးက “PDF တွေပုံစံနဲ့ ရွာမှာ သူတို့က လိုက်ပြီး သွားလာလှုပ်ရှားနေကြတာ။ မနေ့ညကလည်း ဒလန်သတင်းပေးကြောင့် ဘာမှအပြစ်မရှိတဲ့ ကိုဝင်းလှိုင်ဦးနဲ့မချိုလွင်​ထွေးတို့ရဲ့ နေအိမ်ကို အကြောင်းမဲ့ မီးရှို့သွားကြတယ်။”

စစ်ကောင်စီတပ်တွေဟာ နေအိမ်အပြင် အိမ်နဲ့ကပ်လျက် ဆောက်ထားတဲ့ ပရိ​ဘောဂအလုပ်ရုံ​ကိုလည်း မီးရှို့ဖျက်ဆီးပစ်ခဲ့ကြပြီး ဒီနေ့မနက် ၃ နာရီ  လောက်မှာ ထွက်ခွာသွားကြတယ်လို့ ဆိုပါတယ်။

ဒါ့အပြင် ကျေးရွာအတွင်းက ကားတစီးနဲ့ ဆိုင်ကယ်တစီးကိုလည်း စစ်ကောင်စီတပ်က သိမ်းဆည်းသွားကြတယ်လို့ သိရပါတယ်။

စစ်ကောင်စီတပ်တွေက အဲဒီနေအိမ်ကို ဘာကြောင့် မီးရှို့ဖျက်ဆီးခဲ့တယ်ဆိုတာ မသိရကြောင်း၊ လက်ရှိမှာ မီးရှို့ခံရတဲ့ အိမ်ရှင်လင်မယားအပါအဝင် ကျေးရွာတွင်းက ပြည်သူအချို့ ထွက်ပြေးတိမ်းရှောင်နေကြတယ်လို့ ဒေသခံက ပြောပါတယ်။ 

ထားဝယ်ခရိုင် သရက်ချောင်းမြို့နယ်မှာ စစ်အာဏာရှင် ဆန့်ကျင်ရေး နေ့စဉ်ဆိုသလို ဆန္ဒပြနေကြတာပါ။

2 months Ago
Up