သဘာဝဘေးစီမံခန့်ခွဲမှု ဥပဒေ

November 1, 2021

နိုင်ငံတော်အတိုင်ပင်ခံပုဂ္ဂိုလ်အပေါ် သဘာဝဘေးစီမံဥပဒေဖြင့် တရားစွဲထားသည့်အမှု တရားရုံး၌ ဆက်စစ်ဆေး

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စစ်ကောင်စီက တရားစွဲဆိုထားတဲ့ သဘာဝဘေးဆိုင်ရာစီမံခန့်ခွဲမှု ဥပဒေ ပုဒ်မ၊ ပို့ကုန်သွင်းကုန်ဥပဒေပုဒ်မနဲ့ ဆက်သွယ်ရေးဥပဒေပုဒ်မ အမှုသုံးခုစလုံးကို နေပြည်တော်မှာ နိုဝင်ဘာ ၁ ရက်က ဆက်လက်စစ်ဆေးခဲ့တယ်လို့ တရားရုံးနဲ့နီးစပ်သူတွေဆီက သိရပါတယ်။

သဘာဝဘေးဆိုင်ရာ ဥပဒေပုဒ်မအမှုအတွက် ဒေါ်အောင်ဆန်းစုကြည်ကိုယ်တိုင် သက်သေခံချက်ပြင်ဆင်ပြီး တရားရုံးမှာ ထွက်ဆိုခဲ့တယ်လို့ သိရပါတယ်။ ရုံးချိန်းမတိုင်ခင်မှာ ရှေ့နေအဖွဲ့နဲ့ဆွေးနွေးတိုင်ပင်ပြီး  သက်သေခံချက်ကို ပြင်ဆင်ထွက်ဆိုခဲ့တာဖြစ်ပါတယ်။

ပို့ကုန်သွင်းကုန်ဥပဒေပုဒ်မနဲ့ ဆက်သွယ်ရေးဥပဒေပုဒ်မနှစ်ခုအတွက် ပြန်ခေါ်သက်သေ ဗိုလ်မှူးတစ်ယောက်၊ ဗိုလ်ကြီးနှစ်ယောက်၊ တပ်ကြပ်ကြီးတစ်ယောက်၊ ရဲမှူးတစ်ယောက်တို့ကို တရားရုံးမှာ အပြန်အလှန်စစ်မေးတာတွေဆောင်ရွက်ခဲ့ပါတယ်။

ပြန်ခေါ်သက်သေ ၅ ယောက်ဟာ ဒေါ်အောင်ဆန်းစုကြည်ကို နေပြည်တော်နေအိမ်မှာ ဖေဖော်ဝါရီ ၁ ရက်နေ့မနက်က  စတင်ထိန်းသိမ်းရာမှာ ကိုယ်တိုင် ပါဝင်ခဲ့တဲ့သူတွေဖြစ်ပါတယ်။ 

ဒီအမှုသုံးမှုအတွက် နိုဝင်ဘာ ၈ ရက်နေ့မှာရုံး ချိန်းပြန်ခေါ်ထားပြီး ဆက်လက်စစ်ဆေးသွားဖို့ ရှိနေပါတယ်။ 

စစ်ကောင်စီက နိုင်ငံတော်အတိုင်ပင်ခံပုဂ္ဂိုလ်ကို စွဲဆိုထားတဲ့ အမှု စုစုပေါင်း ၁၁ မှုအထိရှိနေတာကြောင့် ရုံးချိန်းတွေကို နှစ်ပတ်တစ်ခါခေါ်ပေးဖို့ နိုင်ငံ့ခေါင်းဆောင်တွေရဲ့ ရှေ့နေတွေက တရားရုံးကို တင်ပြခဲ့ပေမယ့် တရားရုံးက ပယ်ချခဲ့ပါတယ်။

3 months Ago

November 19, 2020

နွားထိုးကြီးမြို့ရှိ ပုဂ္ဂလိကဆေးခန်းပိုင်ရှင် ၁ ဦးကို သဘာဝဘေးစီမံခန့်ခွဲမှု ဥပဒေဖြင့်အမှုဖွင့်

မန္တလေးတိုင်းဒေသကြီး၊ နွားထိုးကြီးမြို့ အမှတ် ၈ ရပ်ကွက်မှာဖွင့်လှစ်ထားတဲ့ ပိတောက်ဝါ ပုဂ္ဂလိက ဆေးခန်းပိုင်ရှင်ကို သဘာဝဘေးစီမံခန့်ခွဲမှု ဥပဒေပုဒ်မ ၃၀(က)နဲ့ အမှုဖွင့်အရေးယူ ထားတယ်လို့ မြို့မရဲစခန်းက သိရပါတယ်။ အမှုမှာ မြင်းခြံမြို့နယ်မှ ကိုဗစ်-၁၉ ပိုးတွေ့လူနာ  အမျိုးသမီးတစ်ဦးကို အောက်တိုဘာ ၂၁ ရက်မှ အောက်တိုဘာ ၂၇ ထိ အဆိုပါ ဆေးခန်းမှာကုသပေးခဲ့တဲ့အတွက် လူနာနဲ့ ထိတွေ့ခဲ့တဲ့ ဆေးခန်းပိုင်ရှင် ဒေါက်တာ ကျော်ကိုကိုနဲ့ အကူသူနာပြုတစ်ဦးကို နိုဝင်ဘာ ၂ ရက်အထိ ကွာရန်တင်းဝင်ခိုင်းခဲ့ကာ ဆေးခန်းလုပ်ငန်းတွေ ဆောင်ရွက်ခြင်းမပြုဖို့ သက်ဆိုင်ရာက တားမြစ်ထားခဲ့ပါတယ်။ ဒါပေမဲ့ ဆေးခန်းမှာ ပြင်ပလူနာ လက်ခံတာ၊ ဆေးခန်းရှိ လူနာတွေကို နေရပ်ပြန်လည်စေလွှတ်တာ၊ ဆေးပေးတာစတဲ့ ဆေးကုသရေးလုပ်ငန်းတွေ ဆက်လက် ဖွင့်လှစ်ဆောင်ရွက်နေကြောင်း သတင်းပေး တိုင်ကြားလာတဲ့အတွက် သတ်မှတ်စည်းကမ်းလိုက်နာမှု မရှိတာကြောင့် ဒေါက်တာကျော်ကိုကို ကို နိုဝင်ဘာ ၁၇ ရက်နေ့မှာ နွားထိုးကြီးသဘာဝဘေးစီမံခန့်ခွဲမှု ကော်မတီက အမှုဖွင့် အရေးယူခဲ့တာ ဖြစ်ပါတယ်။ နွားထိုးကြီးအမှတ် ၈ ရပ်ကွက်ရှိ ပိတောက်ဝါဆေးခန်းဟာ ပုဂ္ဂလိကဆေးရုံအဖြစ် အဆင့်မြှင့်တင်ထားပြီး အတွင်းလူနာတွေနဲ့ အပြင်လူနာတွေ လက်ခံဆောင်ရွက်နေစဉ်  အခုလို အမှုဖွင့် အရေးယူ ခံရတာ ဖြစ်ပါတယ်။ သတင်း- ဇာဇာမောင်(CJ)
1 year Ago
Up