သဘာဝဘေး

July 27, 2021

မွန်ပြည်နယ်၌ ရေကြီး၊ တောင်ပြိုမှုကြောင့် ၂ ဦးသေဆုံး၊ ဒေသခံ ၁၀၀၀ ကျော် သဘာဝဘေးဒဏ် ခံစားနေရ

မွန်ပြည်နယ်မှာ ရေကြီး၊ တောင်ပြိုမှုကြောင့်  ဒေသခံပြည်သူ  ၁၀၀၀ ကျော် သဘာဝဘေးဒဏ် ခံစားခဲ့ရပြီး၊  ၂ ဦး သေဆုံးသွားကာ ရေဘေးသင့် ပြည်သူတွေကို အာဏာသိမ်း စစ်ကောင်စီဘက်က ကူညီတာမရှိလို့ ပြည်သူမှ ပြည်သူ့သို့ အချင်းချင်း ကူညီနေရတယ်။ 

ဇူလိုင် ၂၅ ရက်နဲ့ ၂၆ ရက်အတွင်း ၂ ရက် ဆက်တိုက် ရွာသွန်းခဲ့တဲ့ မိုးကြောင့် မွန်ပြည်နယ်တဝန်း ကျိုက်ထိုမြို့နယ်ကလွဲပြီး ကျန်မြို့နယ် ၉ မြို့နယ်မှာ ရေကြီးတာ ၊ တောင်ပြိုတာတွေ ဖြစ်ပေါ်ခဲ့ပါတယ်။  

ဇူလိုင် ၂၆ ရက်နေ့ ညနေပိုင်းမှာတော့ ပေါင်မြို့နယ် မိုးနှိုင်းရပ်ကွက်နဲ့ ချောင်းဆုံမြို့နယ် ကဒါ၊ ကွမ်ရိုက်၊ တော်ကနာ ကျေးရွာတွေမှာ တောင်ပြိုမှု ဖြစ်ပေါ်ခဲ့တာပါ။

တောင်ပြိုမှုကြောင့် နေအိမ် ၆ လုံးထက်မနည်း ထိခိုက်ပျက်စီးခဲ့ကာ ပေါင်မြို့နယ်က ပြည်သူ ၁ ဦး နဲ့ ချောင်းမြို့နယ်က ပြည်သူ ၁ ဦး ၊ စုစုပေါင်း ၂ ဦး သေဆုံးခဲ့ပါတယ်။

လက်ရှိမှာတော့ ရှာဖွေ ကယ်ဆယ်တာတွေ လုပ်ဆောင်ပေမယ့် တောင်ပြိုတဲ့မြေ ပျော့ဝင်လာလို့ ကယ်ဆယ်ရေးလုပ်ငန်းတွေ ယာယီရပ်ဆိုင်းထားတယ်လို့ ချောင်းဆုံမြို့နယ် မီးသတ်ဦးစီးဌာန တာဝန်ရှိသူ တစ်ဦးက ပြောပါတယ်။

ဒီကနေ့ ဇူလိုင် ၂၇ ရက်နေ့မှာတော့ ရေးအနည်းငယ် ပြန်လည် ကျဆင်းခဲ့ပေမယ့် ကယ်ဆယ်ရေးစခန်းတွေနဲ့ နေအိမ်တွေမှာ ရေဘေးသင့်ပြည်သူတွေ ၁၀၀၀ ကျော် ခိုလှုံနေရဆဲ  ဖြစ်ပါတယ်။ လက်ရှိမှာတော့ ပြည်နယ်တစ်ခုလုံးမှာ ယာယီကယ်ဆယ်ရေးစခန်း ၆ ခုထက်မနည်း ဖွင့်လှစ်ထားပါတယ်။

ရေဘေးသင့်ပြည်သူတွေရဲ့ စားရေးသောက်ရေးနဲ့ နေရေးထိုင်ရေးကို အာဏာသိမ်း ထားတဲ့ စစ်ကောင်စီက ကူညီပေးတာမရှိဘဲ လူမှုကယ်ဆယ်ရေးအဖွဲ့တွေနဲ့ ပြည်သူတွေ စုပေါင်းပြီး ဆောင်ရွက်ပေးနေရပါတယ်။

ရေဘေးသင့် ပြည်သူတွေကို စစ်ကောင်စီက ကူညီထောက်ပံ့တာ မတွေ့ရသေးသလို လာရောက် ကြည့်ရှုတာ မရှိဘူးလို့ ရေဘေးသင့်ပြည်သူတစ်ဦးကပြောပါတယ်။

အခုအခါ မွန်ပြည်နယ်ရဲ့ မော်လမြိုင်၊ ကျိုက်မရော၊ ရေး၊ ပေါင်၊ ချောင်းဆုံ၊ မုဒုံမြို့နယ်တို့မှာ ရေ အနည်းငယ် ပြန်လည် ကျဆင်းလာခဲ့ပေမဲ့ တချို့နေရာတွေမှာ ရေ ကျဆင်းသွားခြင်း မရှိသေးပါဘူး။

မွန်ပြည်နယ်ရဲ့ ကားလမ်းမတွေမှာတော့ ရေပြန်လည် ကျဆင်းသွားတဲ့အတွက်ကြောင့် ပုံမှန်အတိုင်း သွားလာလို့ ရနေပြီ ဖြစ်ပါတယ်။

မွန်ပြည်နယ်ဟာ ရေကြီး၊တောင်ပြိုတာအပြင် ကိုဗစ်တတိယလှိုင်းကို တခြားတိုင်းနဲ့ပြည်နယ် နည်းတူ အကြီးအကျယ်ခံစားနေရသလို နေ့စဉ် သေဆုံးသူတွေလည်း ဆက်တိုက်မြင့်တက်လာနေပါတယ်။

ရေကြီးနေတာကြောင့် နေအိမ်မှာ ကုသနေရင် သေဆုံးသွားတဲ့ ကိုဗစ်အတည်ပြုလူနာတွေ ကယ်ထုတ်ရာမှာ အခက်အခဲမျိုးစုံ ရင်ဆိုင်နေရတယ်လို့ ရာမညလူမှုကယ်ဆယ်ရေးအဖွဲ့ တာဝန်ရှိသူ တစ်ဦးကပြောပါတယ်။

မွန်ပြည်နယ်ဟာ အခုနောက်ပိုင်းမှာ ကိုဗစ်အတည်ပြုလူနာတွေ နေ့စဉ်နဲ့အမျှ တွေ့ရှိလာနေသလို နေအိမ်မှာ ကြိတ်ပြီး ကုသရင် သေဆုံးသွားတဲ့ ကိုဗစ်အတည်ပြုလူနာတွေလည်း တရက်ကို ဆက်တိုက်မြင့်နေပါတယ်။ 

မွန်ပြည်နယ်မှာတစ်ရက်ကို ကိုဗစ်လူနာ ၄၀ ကျော် သေဆုံးနေပြီး ဒေသခံ ပြည်သူတွေဟာ ကိုဗစ်တတိယလှိုင်းနဲ့အတူ သဘာဝဘေးဒဏ်ကိုပါရင်ဆိုင်နေရတာဖြစ်ပါတယ်။

2 months Ago

January 25, 2021

ဧရာဝတီတိုင်းတွင် ၁ နှစ်အတွင်း သဘာဝဘေးကြောင့် လူဦးရေ ၁၃၀၀ဝ ကျော် ဘေးသင့်ခဲ့

ဧရာဝတီတိုင်းအတွင်းရှိ မြို့နယ်တွေမှာ ပြီးခဲ့တဲ့ ၂၀၂၀ ပြည့်နှစ်အတွင်း သဘာဝဘေး အန္တရာယ်ဖြစ်ပွားမှုကြောင့် လူဦးရေ ၁၃၀၀၀ ကျော်ဘေးသင့်ခဲ့တယ်လို့ တိုင်းဒေသကြီး သဘာဝဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနက သိရပါတယ်။

ဧရာဝတီတိုင်းမှာ ၂၀၂၀ ခုနှစ်အတွင်း ဘေးအန္တရာယ်ဖြစ်ပွားမှု စုစုပေါင်း ၅၂၆ ကြိမ်ထိရှိခဲ့ကာ အဲ့ဒီအထဲမှာ အများဆုံးကတော့ မြစ်ကမ်းပါးပြိုကျမှု ၁၆၄ ကြိမ်နဲ့  လေပြင်းတိုက်ခတ်မှု ၁၉၈ ကြိမ် ဖြစ်တယ်လို့ သိရပါတယ်။

တိုင်းဒေသကြီးဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန ညွှန်ကြားရေးမှူး ဦးစဝီလီဖရန့်က “ဘေးအန္တရာယ်ကျရောက်တဲ့ အထဲမှာ အဆိုးဆုံးကတော့ မြစ်ကမ်းပါးပြိုကျတာက တော်တော်ဆိုးတယ်။ တချို့ရွာတွေဆို ကမ်းပြိုလို့ ပြောင်းလာတယ်၊ အဲ့နေရာမှာ ထပ်ကမ်းပြိုတာမျိုးတွေ ရှိတယ်။ အဲ့လိုမျိုး ကမ်းပြိုပြီဆိုရင်တော့ ပြောင်းရွှေ့ရတဲ့ နေအိမ်တွေကို ဌာနအနေနဲ့ ထောက်ပံ့ပေးပါတယ်”လို့ ပြောပါတယ်။

ဟင်္သာတခရိုင်အတွင်းက ကျေးရွာ ၁ ရွာမှာ ကမ်းပြိုလို့ မြေနေရာ အသစ်ရှာပြီး ရွှေ့ပြောင်းလာပေမယ့် နောက်ထပ် ကမ်းပြိုတဲ့ဘေးအန္တရာယ်နဲ့ ရင်ဆိုင်နေရလို့ ရွှေ့ပြောင်းဖို့စရိတ် မတတ်နိုင်တော့လို့ ဌာနအနေနဲ့ တိုင်းအစိုးထံတင်ပြပြီး ရွှေ့ပြောင်းပေးဖို့ စီစဥ်နေရတယ်လို့ ဆိုပါတယ်။

ဧရာဝတီတိုင်းမှာ ၂၀၂၀ ပြည့်နှစ်အတွင်း သဘာဝဘေးအန္တရာယ်ကျရောက်မှုကြောင့် ဘေးသင့်ခဲ့တဲ့ လူဦးရေ ၁၃၅၁၃ ဦးအတွက် အရေးပေါ်ကယ်ဆယ်ရေးပစ္စည်းတွေ၊ ၁ ပတ်စာ စားနပ်ရိက္ခာနဲ့ အိမ်ဆောက်ပစ္စည်းဖိုးတွေကို ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနက ထောက်ပံ့ပေးခဲ့တယ်လို့ သိရပါတယ်။

ဧရာဝတီတိုင်းအတွင်း မြစ်ကမ်းပါးပြိုကျမှုတွေမှာတော့ ဟင်္သာတခရိုင်အတွင်းက ကြံခင်းနဲ့ ဇလွန်မြို့၊ မအူပင်ခရိုင်က ညောင်တုန်းနဲ့ ပန်းတနော်မှာ အဖြစ်များတယ်လို့ သိရပါတယ်။

သဘာဝဘေးအန္တရာယ်ဖြစ်ပွားမှုကြောင့် ဧရာဝတီတိုင်းမှာ သေဆုံးသူ ၄၃ ဦးရှိပြီး ဒဏ်ရာရရှိသူ ၂၂ ဦးရှိတယ်လို့ တိုင်းဒေသကြီးဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန မှတ်တမ်းတွေအရ သိရပါတယ်။

မင်းထက်မုန်း (ပုသိမ်)

8 months Ago
More News
Up