သင်တန်းဆင်းလက်မှတ်ရှိ သူနာပြုများကို

May 23, 2017

သင်တန်းဆင်းလက်မှတ်ရှိ သူနာပြုများကို ပြည်ပနိုင်ငံများကို ပြန်လည်စေလွှတ်ရန် ဆောင်ရွက်

အလုပ်သမားဝန်ကြီးဌာနနဲ့ ကျန်းမာရေးဝန်ကြီးဌာနတို့ အတူပူးပေါင်းပြီး သင်တန်းဆင်းလက်မှတ် ရှိတဲ့ သူနာပြုတွေကို ပြည်ပနိုင်ငံတွေ ပြန်လည်စေလွှတ်ဖို့ ဆောင်ရွက်နေတယ်လို့ အလုပ်သမား ဝန်ကြီးဌာနက တာဝန်ရှိသူတဦးက ပြောပါတယ်။ အခုလိုမျိုး သင်တန်းဆင်းလက်မှတ်နဲ့ ပြန်လည်စေလွတ်တာဟာ သာမန်အလုပ်သွားလုပ်မယ့် အလုပ်သမားထက်စာရင် မြန်မာနိုင်ငံမှာ ကတည်းက စနစ်တကျနဲ့ သင်တန်းပေးပြီးသား အလုပ်သမားတွေကို စေလွှတ်တာက ပိုပြီးကောင်းမွန်တာကြောင့် ကျန်းမာရေးဝန်ကြီးဌာနနဲ့အတူ ပူးပေါင်းကာ သူနာပြုလက်မှတ်ရပြီးသား ဝန်ထမ်းတွေကို စေလွှတ်ဖို့ စီစဉ်နေတာပါ။ အလုပ်သမားဝန်ကြီးဌာနက အမြဲတန်းအတွင်းဝန် ဦးမျိုးအောင်က “အဓိကပြည်ပနိုင်ငံတွေမှာရှိတဲ့ သက်ကြီးရွယ်အိုတွေကို ပြုစုစောင့်ရှောက်ရမှာဖြစ်ပြီး သူနာပြု သင်တန်းကျောင်းဆင်းတွေဖြစ်ရင် ပိုကောင်းတယ်လို့ပြောပါတယ်။ ပြည်ပကိုမပို့ခင်လည်း မြန်မာနိုင်ငံတွင်းမှာလည်း စနစ်တကျ သင်တန်းတွေ ပေးသွားမှာဖြစ်ပြီး ကျွမ်းကျင်ဝန်ထမ်းတွေအတွက် အလုပ်အကိုင်အခွင့်အရေး တွေနဲ့ ပိုမိုကောင်းမွန်လာဖို့ ရည်ရွယ်ထားတယ်”လို့ ပြောပါတယ်။ ပြည်ပအလုပ်အကိုင်ရှာဖွေရေးအေဂျင်စီ လုပ်ကိုင်နေသူတဦးက “ပြည်ပကိုအများဆုံးသွားရောက် အလုပ်လုပ်ကိုင်တဲ့သူတွေထဲမှာ ပြင်ပသူနာပြု သင်တန်းကျောင်းတွေကနေ အသိအမှတ်ပြု လက်မှတ်တွေနဲ့ သွားရောက်အလုပ်လုပ်ကိုင်တဲ့ အမျိုးသမီး အလုပ်သမားတွေလည်း အများဆုံးဖြစ်တယ်”လို့ ပြောပါတယ်။ ၂၀၁၇ ခုနှစ် ဖေဖော်ဝါရီလအတွင်း ပြည်ပကို တရားဝင်အလုပ်သွားရောက်လုပ်ကိုင်သူ ၄၁၈၄ ကျော်နဲ့ ပြည်တွင်းအလုပ်နေရာ ၁၆၅၁၁ ကျော်ကို အလုပ်သမားဝန်ကြီးဌာနက အလုပ်အကိုင် ခန့်အပ်ပေးခဲ့နိုင်တယ်လို့ သိရပါတယ်။
4 years Ago
Up