ဝိုင်းမော်

July 28, 2022

ဝိုင်းမော်တွင် ပြည်သူ့စစ်စခန်း တိုက်ခိုက်ခံရပြီးနောက် စစ်ကောင်စီက ပိတ်ဆို့စစ်ဆေး

ကချင်ပြည်နယ်၊ ဝိုင်းမော်မြို့၊ ဝူယန်လီဆူ ပြည်သူ့စစ်စခန်းတခု  စီးနင်း တိုက်ခိုက်ခံရပြီးနောက် ဇူလိုင် ၂၈ ရက် မနက်ပိုင်းက ဝိုင်းမော်မြို့တွင်းရှိ မီးပွိုင့်မှာ စစ်ကောင်စီလက်အောက်ခံ စစ်သားတွေနဲ့ ရဲတွေက ဖြတ်သန်းသွားလာနေတဲ့ ပြည်သူတွေကို တင်းကျပ်စွာ စစ်ဆေးနေတယ်လို့ ဒေသခံတွေက ပြောပါတယ်။

‌မြို့ခံတဦးက “စစ်သားနဲ့ ရဲတွေ ၁၀ ယောက်‌ကျော်လောက်ရှိမယ်၊ လမ်းသွားလမ်းလာတွေကို စစ်နေတာ။ ဖုန်းတွေစစ်တယ်၊ ဆိုင်ကယ်စီးလာတဲ့သူတွေကိုလည်း စစ်တယ်” လို့ ပြောပါတယ်။

ဒီနေ့မနက် ၂ နာရီဝန်းကျင်က ဝူယန်လီဆူပြည်သူ့စစ်စခန်းကို ကေအိုင်အေ၊ PDF တပ်ဖွဲ့တွေက သွားရောက်ပစ်ခတ်တိုက်ခိုက်ရာ ပြည်သူ့စစ်ဘက်က ၆ ယောက်လောက် သေဆုံးပြီး အယောက် ၂၀ ထက်မနည်း ထိခိုက်မှုရှိခဲ့တယ်လို့ ဒေသတွင်း သတင်းရင်းမြစ်တွေက ဆိုပါတယ်။

4 months Ago

ဝိုင်းမော်မြို့နယ် ပြည်သူ့စစ်စခန်းအား ကေအိုင်အေ တိုက်ခိုက်ဖျက်ဆီး

ကချင်ပြည်နယ်၊ ဝိုင်းမော်မြို့နယ် ဝူယန်ကျေးရွာမှာ အခြေချထားတဲ့ စစ်ကောင်စီလက်အောက်ခံ လီဆူပြည်သူ့စစ်စခန်းကို ဇူလိုင် ၂၈ ရက် မနက် ၂ နာရီလောက်မှာ တိုက်ခိုက်ဖျက်ဆီးလိုက်တယ်လို့ ကေအိုင်အေ အရာရှိတဦးက ဒီဗွီဘီကို ပြောပါတယ်။

“ဦးရွှေမင်း ဦးဆောင်တဲ့ ဒူးလေးလီဆူပြည်သူ့စခန်းကို ဒီမနက်အစောပိုင်း တိုက်ခိုက်ဖျက်ဆီးလိုက်ပြီ။ လက်နက်တွေလည်း သိမ်းထားတယ်။ တချို့က ထွက်ပြေးသွားတယ်။ ပြည်သူ့စစ်စခန်းပဲ မဟုတ်ဘူး၊ ဝိုင်းမော်မြို့နယ်တလျှောက် စစ်ကောင်စီ စစ်သားတွေကို မောင်း‌ထုတ်ခဲ့တာ ဖြစ်ပါတယ်။”

တိုက်ခိုက်မှုဖြစ်စဉ်အတွင်း စစ်ကောင်စီလက်အောက်ခံ ပြည်သူ့စစ်စခန်းက ၁၀ ယောက် သေဆုံးခဲ့တယ်လို့ ဆိုပါတယ်။

ဝူယန်လီဆူပြည်သူ့စစ်စခန်းကို ကချင်လွတ်လပ်ရေးတပ်မတော် (ကေအိုင်အေ) ဘက်က လက်နက်ကြီး၊ လက်နက်ငယ်တွေနဲ့ တိုက်ခိုက်ခဲ့တာလို့ တိုက်ပွဲဖြစ်ရာအနီးနေ ရွာခံတဦးက ပြောပါတယ်။

“လက်နက်ကြီးသံတွေကြားလို့ လန့်ပြီး အိပ်ရာတောင်နိုးတယ်။ ဝူယန်‌မှာရှိတဲ့ ပြည်သူ့စစ်စခန်းကို လာတိုက်တာ။ ဒီစခန်းက ရွာလယ်မှာ ရှိတာလေ။ နာရီကြည့်တော့ မနက် ၂ နာရီရှိနေပြီ၊ ၃ လောက်မှာတော့ ငြိမ်သွားတယ်။”

ကေအိုင်အေ ထိန်းချုပ်နယ်မြေဖြစ်တဲ့ တပ်မဟာ ၅ နယ်မြေကို စစ်ကောင်စီဘက်က ဇူလိုင်လအတွင်း အကြိမ်ကြိမ်ထိုးစစ်ဆင်ရာမှာ လီဆူပြည်သူ့စစ်အဖွဲ့က လမ်းပြဦးဆောင်ခဲ့တာလို့ ဆိုပါတယ်။

ဦးရွှေမင်း ဦးဆောင်တဲ့ လီဆူပြည်သူ့စစ်တပ်ဖွဲ့ဟာ ဝိုင်းမော်မြို့နယ်အတွင်း မူးယစ်ဆေး အရောင်းအဝယ် ပြုလုပ်သူတွေကို ဖမ်းဆီးတဲ့ ကေအိုင်အေ အရာရှိတဦးကိုလည်း ပြီးခဲ့တဲ့ ဇွန်လက ဖမ်းဆီးသတ်ဖြတ်ခဲ့တယ်လို့ သိရပါတယ်။

ဇူလိုင် ၁၀ ရက်က စတင်ဖြစ်ပွားခဲ့တဲ့ ဝိုင်းမော်မြို့နယ် နန်ဇော်ယန်တိုက်ပွဲမှာလည်း ဦးရွှေမင်းရဲ့ လီဆူပြည်သူ့စစ်က စစ်ကောင်စီနဲ့ပူးပေါင်းပြီး ကေအိုင်အေကို တိုက်ခိုက်ခဲ့တာဖြစ်ပြီး တိုက်ပွဲအတွင်း အကျအဆုံးများတာကြောင့် စစ်ကောင်စီဘက်က ဂျက်လေယာဉ်နဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။

4 months Ago

July 19, 2022

နန်ဇော်ယန်ဒေသတွင် တိုက်ပွဲများ ဆက်ဖြစ်

ကချင်ပြည်နယ်၊ ဝိုင်းမော်မြို့နယ်၊ နန်ဇော်ယန်ဒေသမှာ ဇူလိုင် ၁၉ ရက်အထိ တိုက်ပွဲတွေ ဆက်ဖြစ်နေတယ်လို့  ဝိုင်းမော်မြို့နယ် ဒေသခံထံက သိရပါတယ်။

နန်ဇော်ယန်ဒေသမှာ ဇူလိုင် ၁၀ ရက်ကစလို့ စစ်ကောင်စီနဲ့ ပြည်သူ့စစ်ပူးပေါင်းတပ်ဖွဲ့တွေ စစ်ကြောင်းထိုးလာတာကြောင့် တိုက်ပွဲတွေ စတင်ဖြစ်ပွားခဲ့ပြီး ဇူလိုင် ၁၉ ရက်အထိ တိုက်ပွဲတွေ ဖြစ်ပွားနေဆဲဖြစ်တယ်လို့ ပြောပါတယ်။ 

နန်ဇော်ယန်ဒေသမှာ စစ်ကောင်စီနဲ့ ပြည်သူ့စစ်ပူးပေါင်းတပ်ဖွဲ့တွေက ဇွန်လဆန်းပိုင်းကနေ စစ်ရေးလှုပ်ရှားလာတာကြောင့် KIA စခန်းချထားတဲ့ ကာကင်းစခန်းတွေကို နောက်ဆုတ်ခဲ့ပေမဲ့ စစ်ကောင်စီပူးပေါင်းတပ်ဖွဲ့တွေက အင်အားအများအပြားနဲ့ ထိုးစစ်ဆင်နေတာကြောင့် တိုက်ပွဲတွေ ဖြစ်ပွားနေတာပါ။

စစ်ကောင်စီပူးပေါင်းတပ်ဖွဲ့ဟာ နန်ဇော်ယန်ကျေးရွာဟောင်းကနေ နောက်ဆုတ်ပေးခဲ့တဲ့ KIA တပ်ဖွဲ့တွေနောက် လိုက်လံတိုက်ခိုက်နေဆဲဖြစ်ပါတယ်။ 

စစ်ကောင်စီတပ်ဖွဲ့တွေနဲ့ ပူးပေါင်းလှုပ်ရှားနေတဲ့ ဝူယန်ခြေစိုက်ပြည်သူ့စစ်တပ်ဖွဲ့တွေဟာ အရင်က ကချင်လွတ်မြောက်ရေးတပ်မတော်မှာ တာဝန်ထမ်းဆောင်ခဲ့ဖူးတဲ့သူတွေလည်း ပါဝင်နေပြီး နယ်မြေ မကျွမ်းကျင်တဲ့ စစ်ကောင်စီတပ်သားတွေအတွက်လည်း အကူအညီဖြစ်စေတယ်လို့ မြေပြင်နဲ့ နီးစပ်တဲ့သတင်းရင်းမြစ်ကနေသိရပါတယ်။

တိုက်ပွဲတွေရက်ရှည်လာတာကြောင့် တောင်ယာ၊ လယ်ရာစိုက်ပျိုးရေးလုပ်ကိုင်နေတဲ့ ပြည်သူတွေ ဆန်၊ စပါးစိုက်ပျိုးချိန် နောက်ကျမှာ စိုးရိမ်တာကြောင့် တချို့သော ပြည်သူတွေက ရပ်ကွက်အုပ်ချုပ်ရေးမှူးတွေကနေ ထောက်ခံစာယူပြီး သွားလာ စိုက်ပျိုးနေရတာတွေ ရှိတယ်လို့ လည်း ဝိုင်းမော်မြို့နယ်က ပြည်သူတစ်ဦးက ပြောပါတယ်။

4 months Ago
More News
Up