ဝါးလက်မှု

November 24, 2021

ဝါးလက်မှု အမှတ်တရ ပစ္စည်းများ ပြည်တွင်းဈေးကွက်ကိုသာ အားထားရောင်းချနေရ

ပြည်ပခရီးသွားတွေ ရပ်နားထားရတဲ့အချိန်ဖြစ်တာကြောင့် မန္တလေးက ဝါးလက်မှု အမှတ်တရပစ္စည်း အရောင်းဆိုင်တွေအနေနဲ့ ပြည်ပဈေးကွက် တင်ပို့မှုရပ်နားထားရပြီး ဈေးကွက်ပျက်သလောက်နီးပါးဖြစ်နေတယ်လို့ ဝါးလက်မှုအမှတ်တရ ပစ္စည်းအရောင်းဆိုင်တွေက သိရပါတယ်။

ပြည်တွင်းဈေးကွက်မှာ စားသောက်ဆိုင်၊ ဟိုတယ်၊ အိမ်တွင်းအလှဆင်တဲ့ နေရာတွေမှာ အဓိက ထားပြီး ပစ္စည်းတွေကို မှာယူကြလေ့ရှိပြီး ၂၀၂၀ ပြည့်နှစ်နောက်ပိုင်းမှာ ပြည်ပဈေးကွက် တင်ပို့ရမှု မရှိသလောက်နည်းလာတာကြောင့် ပြည်တွင်းဈေးကွက်ကိုပဲ အားထားရောင်းချပေးနေရတယ်လို့ ပြောပါတယ်။

ဝါးလက်မှု အမှတ်တရ ပစ္စည်းအရောင်းဆိုင်ပိုင်ရှင် ကိုချမ်းမြေ့က “အရင်တုန်းကတော့ ဒါတွေက ဘယ်လိုမျိုး Market ကို ဦးတည်လဲဆိုတော့ အရင်တုန်းကကျတော့ နိုင်ငံခြားသားဈေးကွက်တို့ သဘောကျကြတဲ့အခါကျတော့  သူတို့တွေကို အဓိက တားဂတ်ထားတယ်၊ ပြည်တွင်း Market မှာဆိုရင် စားသောက်ဆိုင်တွေတို့၊ ဟိုတယ်တို့ ပြီးတော့ ဒီကရေးရှင်း လုပ်ရတာ သဘောကျတဲ့သူတွေပေါ့ အဲ့လိုလူမျိုးတွေကို ကျနော်တို့က တားကတ်ထားတယ်ဗျ။ Market က နှစ်မျိုးကွဲသွားတယ်ခင်မျ။ ၂၀၂၀ နောက်ပိုင်းကျတော့ ခရီးသွားလုပ်ငန်းက နည်းနည်းအေးသွားတဲ့အခါကျတော့ Local Market ကိုပဲ ကျနော်တို့က ဦးတည်ရတော့တာပေါ့နော်၊ အဲ့ဒီတော့ နိုင်ငံခြားဈေးကွက်က ပျက်သလောက်နီးပါး ဖြစ်သွားတာပေါ့” လို့ ပြောပါတယ်။

ကိုဗစ်ကာလမှာ သယ်ယူပို့ဆောင်ရေးအဆင်မပြေမှုတွေရှိခဲ့ပြီး အမေရိကန်နိုင်ငံကို တင်ပို့ရမယ့် ဆန်ကောပန်းချီတွေ တင်ပို့နိုင်ဖို့ နှောင့်နှေးမှုတွေ ဖြစ်ခဲ့တယ်လို့ ဝါးလက်မှုလုပ်ငန်းပညာရှင် ဘိုးသိကြားမင်းအနုပညာလုပ်ငန်းမှ ဝါးလက်မှုပညာရှင် ဦးဝင်းမောင်ငြိမ်းက ပြောပါတယ်။

လက်ရှိအချိန်အထိ လေယာဉ်၊ သင်္ဘော စတဲ့ ဘယ်ကနေ တင်ပို့ရမလဲ ဆိုတာတွေကို စဉ်းစားနေရတာကြောင့် နှောင့်နှေးမှုတွေဖြစ်ပေါ်ပြီး အမြန်ဆုံးပို့ဆောင်နိုင်ဖို့ ကြိုးစားနေရတယ်လို့ ဆိုပါတယ်။

ဦးဝင်းမောင်ငြိမ်းက “ကိုဗစ်ပထမလှိုင်း၊ ဒုတိယလှိုင်း၊ တတိယလှိုင်းစသည်တို့ နဲ့ ကျနော်တို့သယ်ယူပို့ဆောင်မှု အခန်းကဏ္ဍတွေမှာ နည်းနည်းလေး အဖုအထစ်လေးတွေရှိတာနဲ့ အားလုံးကိုဗစ်ပြီးစီးသွားတဲ့အချိန်မှပဲ ဆက်လုပ်ကြဖို့အဲလိုရှိပါတယ်။ အမေရိကန်နိုင်ငံနယူးယောက်မြို့က အင်ဂျင်နီယာတစ်ဦးကတော့ ကျနော်ထုတ်လုပ်တဲ့ပစ္စည်းတွေကို သူဆောက်တဲ့အဆောက်အဦတွေမှာ သင့်လျော်တယ်၊ ကြိုက်လှပါတယ်ဆိုပြီးတော့ ကျနော့ကို ဝါးမီးအိမ်တွေဦးစားပေးပြီးတော့ မှာကြားပါတယ်။ နောက်ထပ် ကျနော်တို့ မြန်မာ့ (ထရက်ဒီရှင်နယ်)တွေပါတဲ့ ဆန်ကောပန်းချီ၊ နောက်တခါ သူတို့ အမေရိကန်နိုင်ငံရဲ့ အ မှတ်အသားတွေပါတဲ့ ဆန်ကောပန်းချီတွေကိုလည်း သူတို့လိုချင်ပါတယ်လို့ မှာယူမှုရှိပါတယ်။ အဲဒါတွေ လည်း  ကျနော်က အချိန်အတိုင်းအတာပေးပြီးတော့ ပြုလုပ်နေရပါတယ်။ ကိုဗစ်နဲ့ဆိုတော့ သင်္ဘောနဲ့သယ်ဆောင်မှုကိစ္စ၊ လေယာဉ်နဲ့ သယ်ဆောင်မှုကိစ္စတွေကြောင့်မို့ နည်းနည်းလေးတော့ နှောင့်နှေးမှုဖြစ်ပါတယ်။ သို့သော် သူတို့ဆီကိုရောက်အောင် အမြန်ဆုံးပို့ဖို့ စီစဉ်နေပါတယ်။ နောက် သူတို့ ကြိုက်တဲ့ ဒီဇိုင်းတွေကိုလည်း ကျနော်ရွေးချယ်နေပါတယ်။” လို့ ပြောပါတယ်။

မြန်မာနိုင်ငံက ဝါးလက်မှု လုပ်ငန်း ပညာရှင်တွေအနေနဲ့ နိုင်ငံတကာက နည်းပညာတွေကို မှီငြမ်းပြီး ဝါးလူ့အသုံးအဆောင်ပစ္စည်းတွေကို ဖန်တီးထုတ်လုပ်ခဲ့ကြတာလို့ သိရပါတယ်။

ပြည်တွင်းဈေးကွက်မှာတော့  မင်္ဂလာခန်းမတွေ၊ စားသောက်ဆိုင်တွေ၊ ကော်ဖီဆိုင်တွေမှာ အလှပစ္စည်းတွေအဖြစ် ချိတ်ဆွဲထားတာ ပိုမိုသုံးစွဲလာကြတယ်လို့ သိရပါတယ်။

2 months Ago

November 23, 2021

မန္တလေး ဝါးလက်မှု အာလိန်မီးအိမ် မှာယူမှု များပြားလာ

မန္တလေးမြို့ စွန့်ဦးတီထွင်ဝါးလက်မှု လုပ်ငန်းမှာ  ပြည်တွင်းဈေးကွက်အတွင်း အာလိန်မီးအိမ်တွေ လူကြိုက်များ မှာယူမှုများပြားလာတယ်လို့ ဘိုးသိကြားမင်းအနုပညာလုပ်ငန်း(Grand Indra Arts) က ပြောပါတယ်။

အာလိန်မီးအိမ်တွေကို အရင်က မျက်နှာကြက် ချိတ်ဆွဲဒီဇိုင်းတွေ တီထွင်ခဲ့ပြီး လက်ရှိမှာတော့ မှာယူမှုအပေါ်မူတည်ပြီး ချိတ်ဆွဲနိုင်တဲ့ ပုံစံအမျိုးမျိုးကို တီထွင်ထုတ်လုပ်ပေးနိုင်ခဲ့တာကြောင့်အခုလို မှာယူမှုများပြားလာတာလို့ ဆိုပါတယ်။ 

ကမ္ဘာ့ဈေးကွက်အတွင်းမှာလည်း အခုလို ဒီဇိုင်းတွေကို ဝါးပစ္စည်းဈေးကွက်အတွင်းမှာ မရှိသေးတဲ့အတွက် လူကြိုက်များလာတာလို့ ဘိုးသိကြားမင်းအနုပညာလုပ်ငန်း ဝါးလက်မှုပညာရှင် ဦးဝင်းမောင်ငြိမ်းက  ပြောပါတယ်။

“လက်ရှိ မြန်မာနိုင်ငံမှာတော့ ဒီနှစ်ကုန်ခါနီးအပိုင်းမှာ ကျနော့်ရဲ့ ကိုယ်ပိုင်ဒီဇိုင်းဖြစ်တဲ့ ဒေါင်းလန်းရယ်၊ မြန်မာ့ရိုးရာနှီးသမိုင်းဝင်ပုံစံကျ နည်းစနစ်ကျကျ မြန်မာ့ဒိုင်းလန်းကလပ်ရယ်၊ ကျနော်ထုတ်လုပ်တဲ့ မီးအိမ်အာလိန်လေးတွေပေါ့နော် အာလိန်အဆင့်လေးတွေရယ် ဒါလေးတွေကို မှာယူမှုများပြားပါတယ် အကြိုက်ချင်းလည်း သူတို့တူညီကြပါတယ်။ ဒါလေးတွေက မီးထွက်ပြီးတော့ အလှအပ သူတို့ခံစားကြတဲ့အခါမှာ မြန်မာနိုင်ငံမှာတင်မကဘူး ကမ္ဘာမှာပါ ဒီ ပုံစံလေးတွေမရှိသေးဘူးပေါ့နော်။ ကျနော့်နည်း ကျနော့်ဟန်နဲ့ပေါ့နော် ဆန်းသစ်ထားတဲ့အရာ အမြင်ဆန်းတယ်ဆိုပြီးတော့ ပစ္စည်းကိုပဲ မှာယူမှုတွေက တော်တော်များပြားပါတယ်။”

ဈေးနှုန်းတွေကတော့ ပြုလုပ်ချက် သေသပ်မှု အရည်အသွေး နဲ့ မှာယူမှုဈေးနှုန်းပေါ်မူတည်ပြီး သောင်းကျော်တန်ကနေ သိန်းကျော်တန်အထိ အမျိုးမျိုး ရှိတယ်လို့ သိရပါတယ်။ 

ပြည်ပ တင်ပို့နိုင်ဖို့အတွက် နိုင်ငံတကာ ဝါးပညာရှင်တွေရဲ့ စမ်းသပ်မှုကို ခံနိုင်တဲ့အထိ ပြုလုပ်သွားမှာဖြစ်ပြီး နိုင်ငံတကာ ဈေးကွက်အထိ ထိုးဖောက်နိုင်အောင် ဆောင်ရွက်သွားမယ်လို့ ဆိုပါတယ်။

မြန်မာ့ဝါးပညာ ကမ္ဘာကို ရင်ပေါင်တန်းတိုင်ဖို့အတွက် တီထွင် ဖန်တီးမှုတွေ ပြုလုပ်သွားမှာဖြစ်သလို နိုင်ငံတဝန်းက ဝါးလက်မှုလုပ်ငန်းရှင်တွေ ပူးပေါင်းပြီး ဝါး မြန်မာ့လက်မှုအနုပညာတွေစုပေါင်း ပြသမယ့် ပြတိုက်တစ်ခုဖြစ်ဖို့လည်း ကြိုးစားနေကြတယ်လို့ ဦးဝင်းမောင်ငြိမ်းက ပြောပါတယ်။ 

“မြန်မာ့ရဲ့ဝါးပညာ ကမ္ဘာကိုရင်ပေါင်တန်းနိုင်ဖို့ မြန်မာ့ရဲ့ ဝါးလက်မှုပစ္စည်း ဝါးထုတ်ကုန်ပစ္စည်း ဝါးနဲ့ပက်သက်တဲ့ ကျနော်တို့ အဆင့်မြင့်တွေနဲ့ အလှကုန်ပစ္စည်းတွေလည်း ရှိပါတယ်။ ဒါတွေလည်း နိုင်ငံတကာ ဈေးကွက်ရရှိဖို့ ပြည်တွင်းမှာဝါးပေါ်မူတည်ပြီးတော့ အလုပ်အကိုင်အခွင့်အလမ်းတွေလည်း ရရှိဖို့ ဒါတွေလည်း ကျနော်ရဲ့  ရည်မှန်းချက်ဖြစ်ပါတယ်။ မြန်မာပြည်တစ်ဝန်းလုံးမှာ ကျနော်တို့ ဝါးလောကကဏ္ဍကို ဖော်ထုတ်မြှင့်တင်ပေးခဲ့တဲ့ မိတ်ဆွေတွေပူးပေါင်းပြီး ကမ္ဘာကလေးစားရတဲ့ မြန်မာ့ဝါးလက်မှု အနုပညာတွေ မြန်မာ့ရိုးရာ မှတ်တမ်းတွေရှိတဲ့ စုံလင်သောပြတိုက်ကြီးဖြစ်ဖို့ ကျနော်တို့ ရည်မှန်းချက်အနေနဲ့ ဆက်လက်ပြီးကြိုးစားနေပါတယ်။ နေ့စဉ်နဲ့အမျှ နိုင်ငံတကာလက်ခံနိုင်တဲ့ နိုင်ငံတကာ နည်းစနစ်နဲ့အညီ၊ နိုင်ငံတကာကလေးစားရတဲ့ နည်းစနစ်တွေနဲ့ ဒီဇိုင်းသစ်တွေပုံစံသစ်တွေ နည်းပညာတွေ  Research လုပ်ပြီးတော့ သုတေသနပြုပြီးတော့ နေ့စဉ်နဲ့အမျှလက်ရှိထုတ်လုပ်နေပါတယ်။”

ပြည်တွင်းမှာတော့ အာလိန်မီးအိမ်မျိုးစုံကို ဟိုတယ်နဲ့ စားသောက်ဆိုင်လုပ်ငန်းရှင်တွေနဲ့ အိမ်တွင်းအလှဆင် လုပ်ငန်းတွေက အကြိုအော်ဒါ မှာယူမှုတွေရှိနေတယ်လို့ သိရပါတယ်။ ဝါးမီးအိမ်တွေကို ပြည်ပကို တင်ပို့ရောင်းချနိုင်ဖို့အတွက်လည်း ဆောင်ရွက်သွားမယ်လို့ ဆိုပါတယ်။

2 months Ago
Up