ဝါးခယ်မ

January 9, 2022

ဝါးခယ်မတွင် ဆေးမလောက်၍ တစ်ရွာကို လူ ၂၀ နှုန်းသာ ကိုဗစ်ကာကွယ်ဆေး ထိုးခွင့်ရ

ဧရာဝတီတိုင်း၊ ဝါးခယ်မမြို့နယ်မှာ စစ်ကောင်စီက ကိုဗစ်-၁၉ ကာကွယ်ဆေးထိုးပေးမယ်ခေါ်ပြီး ကျေးရွာ တရွာကို လူ ၂၀ လောက်သာ ထိုးပေးနေတယ်လို့ သိရပါတယ်။

ကိုဗစ်ကာကွယ်ဆေး မဖြစ်မနေထိုးရမယ်၊ မထိုးရင် ဒဏ်ငွေ ၅ သိန်းပေးဆောင်ရမယ် ခြိမ်းခြောက်ပြောဆိုတာကြောင့် ရွာသွားတွေက ကာကွယ်ဆေးထိုးဖို့သွားချိန်မှာ ဆေးမလောက်တာကြောင့် တရွာကို လူ ၂၀ ခန့်သာ ထိုးပေးတာလို့ ဒေသခံတွေက ပြောပါတယ်။

“သွားရတာတော်တော်ဝေးတယ်၊ ရွာမှာလာထိုးပေးတာမဟုတ်ဘူး။ သူတို့ထိုးပေးတဲ့နေရာကို သွားရတာ တချို့ကလည်း ဒဏ်ငွေမဆောင်နိုင်လို့ ထိုးဖို့လာရတာ၊ ဟိုရောက်တော့ ဆေးက မလောက်ဘူး။ အဲ့တော့ ခွဲတမ်း နဲ့ တရွာကို ၂၀ ထိုးပေးတာ ကျန်တဲ့သူတွေ ဒီအတိုင်းပြန်ရတာ” လို့ ဒေသခံတဦးက ပြောပါတယ်။

ဒဏ်ငွေဆောင်ရမယ် ထောင်ချမယ်ဆိုတဲ့ ခြိမ်းခြောက်မှုတွေကြောင့် ဆေးထိုးဖို့သွားချိန်မှာ ဆေးမလောက်လို့ မထိုးရဘဲ ပြန်လာရတာ ၂ ကြိမ်ထိရှိပြီလို့ သီလချောင်းကျေးရွာအုပ်စု သီလချောင်း၊ အုန်းပင်ချောင်း၊ မရင်အေး၊ ဘလေး၊ ဘလောင် ရွာသားတွေက ပြောဆိုပါတယ်။

ဝါးခယ်မမြို့နယ်အတွင်းက ကျေးရွာတွေအတွက် ဒီဇင်ဘာလ ၁၄ ရက်နေ့နဲ့ ဒီဇင်ဘာလ ၂၃ ရက်နေ့တွေမှာ ဆေး ၂ ကြိမ်ထိုးပေးတာဖြစ်ပြီး ၂ ကြိမ်လုံးမှာ ဆေးမလုံလောက်တာကြောင့် တရွာ ၂၀ ပဲ ထိုးခဲ့ရတယ်လို့ သိရပါတယ်။

2 weeks Ago

December 2, 2021

ဝါးခယ်မတွင် NLD ရပ်ကျေးဥက္ကဋ္ဌအပါအဝင် ဒေသခံ ၄ ဦးကို စစ်ကောင်စီဖမ်းဆီး

ဧရာဝတီတိုင်း၊ ဝါးခယ်မမြို့နယ်မှာ ဒီဇင်ဘာ ၁ ရက် ညပိုင်းက   အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) ပါတီရဲ့ ရပ်ကျေးဥက္ကဋ္ဌ အပါအဝင်  ဒေသခံပြည်သူ ၄ ယောက်ကို စစ်ကောင်စီတပ်သားတွေက ဖမ်းဆီးသွားပါတယ်။ 

သရွတ်မြိုက်ကျေးရွာမှာ နေထိုင်တဲ့ အန်အယ်လ်ဒီရပ်ကျေး ဉက္ကဋ္ဌ ဦးအောင်လှသန်း၊ သူ့ရဲ့သားမက် ကိုရှိုင်းထက်ကျော်၊ ကိုနေလင်းနဲ့ ကိုငပုတို့ကို  ည ၁၀ နာရီကျော်လောက်မှာ စစ်ကောင်စီတပ်သား အင်အား ၃၀ ကျော်လောက်က နေအိမ်တွေမှာ ဝင်ရောက်ဖမ်းဆီးသွားတာလို့ ဒေသခံတွေက ပြောပါတယ်။ 

“ကိုအောင်လှသန်းကို ပြီးခဲ့တဲ့ ၅ ရက်လောက်ကတည်းက  ဘယ်မှမသွားနဲ့ အိမ်မှာနေရမယ်လို့ အမိန့်ပေးထားတာ အခုတော့ သူ့သားမက်ကိုရော  သူ့ကိုရော တခါတည်း ဖမ်းသွားတာ”လို့ ဒေသခံတဦးက ပြောပါတယ်။

ဝါးခယ်မမြို့နယ်မှာ နိုဝင်ဘာလကုန်ပိုင်းကစတင်ကာ အန်အယ်လ်ဒီပါတီဝင်တွေကို ဆက်တိုက်ဖမ်းဆီးနေပြီး လွန်ခဲ့တဲ့ ၅ ရက်ကလည်း မြို့နယ် အတွင်းရေးမှူးဟောင်း ဦးအောင်ကြွယ်ကို စစ်ကောင်စီတပ်သားတွေက  ဖမ်းသွားတယ်လို့ ဆိုပါတယ်။

ဝါးခယ်မမြို့နယ်မှာ စစ်တပ်အာဏာသိမ်းပြီးနောက်ပိုင်း မတရားဖမ်းဆီးခံရသူ အယောက်  ၅၀ ကျော်ထိရှိလာပြီဖြစ်တယ်လို့ သိရပါတယ်။

2 months Ago
More News
Up