ဝရမ်းထုတ်

June 26, 2021

စစ်အာဏာသိမ်းမှုဆန့်ကျင်ခဲ့သည့် ရဲ ၂ ဦး၏ဖခင် ဝရမ်းထုတ်ခံရ

စစ်တပ်အာဏာမှုကိုဆန့်ကျင်လို့ ထောင်ဒဏ် ၁ နှစ်စီ ပြစ်ဒဏ် ချမှတ်ခံခဲ့ရတဲ့ ကြံခင်းက ရဲဝန်ထမ်း ၂ ဦးရဲ့ ဖခင်ကို အကြမ်းဖက်စစ်ကောင်စီက ထပ်မံဝရမ်းထုတ်လိုက်တယ်လို့ သိရပါတယ်။

ထောင်ဒဏ် ၁ နှစ်စီချမှတ်ခံရတဲ့ ရဲ ၂ ဦးရဲ့ ဖခင်ဖြစ်သူကို နိုင်ငံတော်ဆူပူအောင်လုပ်တယ်ဆိုပြီး မတ်လပိုင်းက စတင်ကာ ဖမ်းဝရမ်းထုတ်ခဲ့တာလို့ ဖခင်ဖြစ်သူ ဦးသန့်စင်က DVB ကိုပြောပါတယ်။

"ဘာနဲ့ထုတ်တယ်ဆိုတာ သေချာမသိရဘူး ကျနော်လည်း သား ၂ ယောက်ထောင်ကျပြီးကတည်းက ရှောင်နေရတာ မတ်လကစပြီး ဝရမ်းထုတ်ထားတယ်လို့ မိတ်ဆွေတွေကပြန်ပြောတယ်၊ ဒါက မိသားစုကိုပါ အငြှိုထားပြီး ဒုက္ခရောက်အောင်လုပ်တာလို့မြင်ပါတယ်''လို့ ပြောပါတယ်။

သား ၂ ယောက်ကို ထောင်ချတဲ့အပြင် မိသားစုကိုပါ ဝရမ်းထုတ်ပြီး ဒုက္ခရောက်အောင် စစ်အာဏာရှင်တွေက ပြုလုပ်နေပေမယ့် ဒီမိုကရေစီ မရမခြင်း စစ်အာဏာရှင်ကို အဆုံးထိတော်လှန်သွားမယ်လို့ ဆိုပါတယ်။

စစ်အာဏာရှင်ကိုဆန့်ကျင်ခဲ့လို ထောင်ဒဏ် ၁ နှစ်စီချမှတ်ခံခဲ့ရတဲ့ ရဲ ၂ ဦးကိုလည်း မိခင်ဖြစ်သူက သွားတွေ့ချိန်မှာ ၈ ကြိမ်မြောက်တဲ့အထိ သား ၂ ဦးနဲ့ တွေ့ခွင့်မရအောင် အကြမ်းဖက်စစ်ကောင်စီဘက်က ပြုလုပ်ထားတယ်လို့ သိရပါတယ်။

ဝရမ်းထုတ်ခံထားရတဲ့ ရဲဝန်ထမ်း ၂ ဦးရဲ့ ဖခင်ဟာ စစ်တပ်အာဏာမသိမ်းခင်အချိန်ထိ ကျေးရွာအုပ်ချုပ်ရေးမှူး တာဝန်ထမ်းဆောင်ခဲ့သူဖြစ်သလို စစ်အာဏာသိမ်းမှုအပြီး ရာထူးကနေ နုတ်ထွက်ခဲ့သူလည်းဖြစ်ပါတယ် ။

သားအကြီးဖြစ်တဲ့ ရဲတပ်သား သူရိန်လင်းက ရဲလုပ်သက် ၇ နှစ်ရှိနေပြီး သားအငယ်ရဲဒုတပ်ကြပ် တာရာလင်းက ရဲလုပ်သက် ၄ နှစ်ရှိနေဖြစ်ကာ ဒုရဲအုပ်စာမေးပွဲဖြေဆိုဖို့အတွက် ဖောင်တင်ထားသူလည်း ဖြစ်ပါတယ်။

ခုလို အာဏာရှင်စနစ် အလိုမရှိ၊ အာဏာရှင်ဖိနှိပ်မှု ပြည်သူဘက်က ကာကွယ်မယ့်အကြောင်း စာတင်တာနဲ့ ပတ်သက်ပြီး ကြံခင်းမြို့မ ရဲစခန်းမှာ ရဲတပ်ဖွဲ့ဝင် ၂ ဦးကို ရဲစည်းကမ်းထိန်းသိမ်းရေးဥပဒေနဲ့ အရေးယူခဲ့တာလို့ သိရပါတယ်။

5 months Ago

March 9, 2021

သံတွဲနှင့်ငပလီက လူငယ် ၂ ဦးကို ဖမ်းဝရမ်းထုတ်ပြီး ရဲနှင့်စစ်တပ်က လိုက်လံဖမ်းဆီး

သံတွဲမှာ စစ်အာဏာရှင်အလိုမရှိကြောင်း မြို့ပတ်ပြီး ငြိမ်းချမ်းစွာစုဝေးလှည့်လည် ဆန္ဒပြလို့ ဖမ်းဝရမ်းထုတ်ခံထားရသူ ၂ ‌ယောက်ကို မနေ့ညက ရဲနဲ့ စစ်တပ်က သူတို့အိမ်တွေမှာ လာရှာတယ်လို့ မိသားစုဝင်တွေက ပြောပါတယ်။

သံတွဲမြို့နယ်နဲ့ ငပလီမြို့ အုပ်ချုပ်ရေးမှူးတို့က တရားလိုပြုကာ ဖမ်းဝရမ်းထုတ်ခံထားရသူတွေကတော့ သံတွဲမြို့နေ ကိုဇေယျာထွန်းနဲ့ ငပလီမြို့၊ ဂျိတ်တောရပ်ကွက်နေ ကိုဟန်မျိုးသူရိန်တို့ပဲ ဖြစ်ပါတယ်။ 

သူတို့ကို သံတွဲမြို့နဲ့ ငပလီမြို့ဆန္ဒပြတာတွေမှာ ဦးဆောင်ခဲ့သူတွေလို့ယူဆပြီး အခုလို ဖမ်းဝရမ်းထုတ် လိုက်လံဖမ်းဆီးနေတာလို့ ဆန္ဒပြရာမှာ ပါဝင်ခဲ့တဲ့ သံတွဲမြို့ခံ လူငယ်တယောက်က ပြောပါတယ်။

ကိုဟန်မျိုးသူရိန်ကတော့ သူ့အနေနဲ့ သံတွဲမြို့မှာ ပထမဆုံးအဖမ်းခံခဲ့ရတဲ့ ဆန္ဒပြသူတယောက် လွတ်မြောက်ဖို့ ကြိုးစားပေးခဲ့တာနဲ့ မြပြင်မှာ ဆန္ဒပြမယ်လို့ ကြားတာကြောင့် သွားရောက်ကြည့်ရှုခဲ့တာလို့ ဆိုပါတယ်။

သူတို့ကို ဖမ်းဝရမ်းထုတ်ခဲ့ပြီးတဲ့နောက်ပိုင်းမှာလည်း သံတွဲမြို့မှာ လမ်းပေါ်ထွက်ဆန္ဒပြတာတွေ၊ စစ်အစိုးရအလိုမရှိကြောင်း ကန့်ကွက်လှုပ်ရှားတာတွေ ဆက်ဖြစ်နေတာပါ။

ဖေဖော်ဝါရီ ၁၆ ရက်နေ့က ဆန္ဒပြနေတုန်း ရဲတွေက လူစုခွဲဖို့ မပြောခင်မှာ မိန်းကလေး ၁ ယောက်၊ လူငယ် အမျိုးသား ၂ ယောက်တို့ကို ဖမ်းဆီးခဲ့ပြီး သူတို့ကို လွှတ်ပေးဖို့ ရဲစခန်းနားမှာ လူတွေစုရုံးတောင်းဆိုကြတုန်း မုန့်တွေ၊ ရေတွေ ပေးဝေခဲ့တဲ့ သက်ကြီးပိုင်း အမျိုးသားတယောက်ကိုလည်း ထပ်ပြီး ဖမ်းဆီးခဲ့ပါတယ်။ 

အဖမ်းခံထားရသူ ၄ ယောက်ဟာ ဒီနေ့အထိ မိသားစုဝင်တွေနဲ့ တွေ့ခွင့်မရသေးသလို ရုံးထုတ်ခွင့်လည်း မရသေးလို့ ဥပဒေက ပေးထားတဲ့ အခွင့်အရေးတွေ ဘာတခုမှ မရသေးပါဘူး။

ဒါ့အပြင် ဆန္ဒပြနေသူတွေကို ရဲက ကားနဲ့ဖြတ်တိုက်လို့ ရဲကားကို လက်သီးနဲ့ ထိုးခဲ့သူ တယောက်ကတော့ အာမခံနဲ့တရားရင်ဆိုင်နေရပါတယ်။

ဒါပေမဲ့ သံတွဲမြို့နဲ့ ငပလီမှာ စစ်အာဏာရှင်ထောက်ခံကြောင်း ဆန္ဒပြပွဲ နှစ်ကြိမ်လုပ်ခဲ့ရာမှာ စစ်တပ်နဲ့ ရဲက ဝန်းရံပေးခဲ့ပြီး အဖမ်းခံရတာလည်း တယောက်မှ မရှိခဲ့ပါဘူး။

9 months Ago
Up