ဝမ်းနည်းခြင်းအထိမ်းအမှတ်

October 7, 2022

ထိုင်းမူကြိုကျောင်းပစ်ခတ်မှုတွင် သေဆုံးသွားခဲ့ရသူများအတွက် ဝမ်းနည်းခြင်းအထိမ်းအမှတ် နိုင်ငံတော်အလံ တိုင်တဝက်လွှင့်ထူ

ကလေးငယ်တွေအပါအဝင် လူပေါင်း ၃၇ ယောက် သေဆုံးခဲ့ရတဲ့ ထိုင်းနိုင်ငံ၊ နောင်ဘိုလမ်းဖူးခရိုင်၊ ဥထိုင်းဆဝမ် မူကြိုကလေးထိန်းကျောင်း ပစ်ခတ်မှုမှာ သေဆုံးသွားခဲ့ရသူတွေအတွက် ဝမ်းနည်းခြင်းအထိမ်းအမှတ် အနေနဲ့ ထိုင်းတနိုင်ငံလုံး ဒီကနေ့ အောက်တိုဘာ ၇ ရက်မှာ နိုင်ငံတော်အလံကို တိုင်ဝက်ထိ လျှော့ချလွှင့်ထူခဲ့ပါတယ်။

ဒီကနေ့မနက်မှာ သေဆုံးသူရဲ့ မိဘဆွေမျိုးနဲ့ မြို့သူမြို့သားတွေရော ဌာနဆိုင်ရာ အသီးသီးကပါ လွမ်းသူ့ပန်းခွေတွေ လာချကြပြီး ထိုင်းတော်ဝင်မိသားစု ကိုယ်စားလှယ်တော်တွေကလည်း အခမ်းအနားနဲ့ ပန်းခွေလာချသွားပါတယ်။

ထိခိုက်ဒဏ်ရာရသူတွေကို ဆေးကုသဖို့ ထိုင်းဘုရင်နဲ့ မိဖုရားက လူနာရှင်အဖြစ်ခံယူပြီး သေဆုံးသူ မိဘဆွေမျိုးတွေအတွက် နစ်နာကြေးတွေလည်း ပေးအပ်သွားမယ်လို့  မင်းတိုင်ပင်အမတ် ဗိုလ်ချုပ်ကြီး စူလာယုဒ်ကျူးလားနွန်းက ဆေးရုံမှာ ဒဏ်ရာရလူနာတွေကို လာရောက်အားပေးစဉ် ပြောကြားခဲ့ပါတယ်။

ဘုရင်နဲ့ မိဖုရားလည်း ဒီကနေ့ညနေပိုင်းမှာ သေဆုံးဒဏ်ရာရသူရဲ့ မိသားစုဝင်တွေကို   ကိုယ်တိုင် လာရောက်တွေ့ဆုံအားပေးဖို့ ရှိနေတယ်လို့ 3PlusNews သတင်းမှာ ဖော်ပြပါတယ်။  အလားတူ ထိုင်းဝန်ကြီးချုပ် ပရာယုဒ် ကျန်အိုးချားလည်း လာရောက်မှာ ဖြစ်ပါတယ်။

ထိုင်းတရားရေးဝန်ကြီးဌာန အနေနဲ့လည်း ရာဇဝတ်မှု ဓားစာခံဖြစ်ရသူတွေအတွက် ထောက်ပံ့ကြေး ရန်ပုံငွေကနေ သေဆုံးဒဏ်ရာရသူအတွက် တယောက်ကို ဘတ် ၁၁၀,၀၀၀ လာရောက်ထောက်ပံ့ပေးမှာဖြစ်ကြောင်း၊ ကျူးလွန်သူဘက်ကတော့ ထောက်ပံ့ကြေး လုံးဝရရှိမှာ မဟုတ်ဘူးလို့ ပြောပါတယ်။

ဒီပစ်ခတ်သတ်ဖြတ်မှုမှာ ဒဏ်ရာရပြီး ဆေးရုံရောက်လာသူ ၁၀ ယောက်ရှိတဲ့အနက် ၃ ယောက် ဆေးရုံမှဆင်းသွားပြီဖြစ်ပြီး ကျန် ၇ ယောက်က အသက်အန္တရာယ် မစိုးရိမ်ရတော့ကြောင်း၊ သူတို့ဟာ သေနတ်ထိမှန်ဒဏ်ရာနဲ့ ဓားခုတ်ခံရတဲ့ ဒဏ်ရာတွေ ရခဲ့တာလို့ ဆေးရုံမှာ သွားရောက်သတင်းယူနေတဲ့ သတင်းထောက်တွေက ပြောပါတယ်။

ကျူးလွန်သူ ရဲဝန်ထမ်းဟောင်းဟာ ပထမဆုံး မူကြိုကျောင်းရှေ့မှာ ထမင်းထိုင်စားနေတဲ့ ဝန်ထမ်းတယောက်နဲ့ ၁၂ နှစ်အရွယ် ကလေးတယောက်ကို သေနတ်နဲ့အရင်ပစ်ပြီး ကျောင်းခန်းထဲမှာ သေနတ်နဲ့လည်းပစ် ဓားနဲ့လည်း ထိုးသတ်ခဲ့ရာမှာ အသက်  ငါးနှစ်အောက် ကလေးငယ် ၂၂ ယောက်နဲ့ မူကြိုဆရာမ နှစ်ယောက်လည်း ပွဲချင်းပြီး သေဆုံးသွားပါတယ်။

ဒါ့အပြင် ဆရာမတယောက်ဟာ ကိုယ်ဝန် ၈ လ လွယ်ထားပြီး နောက်လမှာ မွေးဖွားတော့မှာ ဖြစ်ပါတယ်။ အပြင်မှာ ပစ်ခတ်သံကြားလို့ ဆရာမတွေက ကျောင်းတံခါးတွေ ပိတ်ထားလိုက်ပေမဲ့ ပစ်ခတ်သူက တံခါးကို သေနတ်နဲ့ပစ်ခတ်ဖောက်ခွဲပြီး ဝင်လာခဲ့တာလို့ ဆိုပါတယ်။

ပစ်ခတ်ချိန်မှာ ကလေးတွေဟာ နေ့ခင်း အိပ်မောကျနေချိန်ဖြစ်ပြီး ကံကောင်းတဲ့ ကလေးတယောက်ကတော့ စောင်ကို ခေါင်းမြီးခြုံပြီးအိပ်နေလို့ သေနတ်သမားက သေပြီအထင်နဲ့ ထားခဲ့တာကြောင့် အဆိုပါကလေးငယ်တယောက်သာ အသက်ဘေးက လွတ်မြောက်ခဲ့ပါတယ်။

သေနတ်သမားဟာ သူ့သားကို အဲဒီကျောင်းမှာ အပ်နှံထားပြီး အရင်က ကလေးကို လာကြိုလာပို့တိုင်း ဆရာမတွေကို ယဉ်ကျေးရိုသေစွာ ဆက်ဆံကြောင်း၊ သူ့သားကတော့ ကျောင်းမတက်တာ တလလောက်ရှိပြီဖြစ်ပြီး အဲဒီနေ့က ကျောင်းကို ဘာဖြစ်လို့ရောက်လာပြီး ဘာလို့ အဲလိုလုပ်သွားတာကို စဉ်းစားမရသလို လုံးဝလည်း ထင်မထားဘူးလို့ ဆရာမက သတင်းထောက်တွေကို ပြောပါတယ်။

သေနတ်သမားဟာ ကျောင်းထဲမှာ ပစ်ခတ်ပြီးနောက် ၃ ကီလိုမီတာလောက်ဝေးတဲ့ သူ့အိမ်ကိုပြန်ခဲ့ရာ အပြန်လမ်းမှာ တွေ့သမျှ ဆိုင်ကယ်တွေ ဝင်တိုက်ကာ တွေ့ကရာလူတွေကို ပစ်ခတ်ခဲ့ပါတယ်။ ဆိုင်ကယ်လဲကျသွားချိန် သူက ကားပေါ်ကဆင်းလာပြီး မသေသေအောင် သေနတ်နဲ့ ထပ်ပစ်ခဲ့သေးတယ်လို့ မျက်မြင်တွေက ပြောပါတယ်။

အဲဒီလမ်းတလျှောက်မှာ ထိခိုက်ဒဏ်ရာရသူ ၁၀ ယောက်လောက်ရှိပြီး တချို့က ဆေးရုံရောက်မှ ဆုံးသွားပါတယ်။

သူဟာ လမ်းမှာ ပစ်ခတ်ပြီးနောက် အိမ်ထဲမဝင်ခင် အိမ်ဘေးမှာ သူ့ကားသူ မီးရှို့လိုက်ပြီး အိမ်ထဲက ဇနီးနဲ့ ၂ နှစ်အရွယ်သားလေးကို ပစ်ခတ်ကာ နောက်ဆုံး သူ့ကိုယ်သူပြန်ပစ်ပြီး အဆုံးစီရင်သွားပါတယ်။ ဒီဖြစ်ရပ်မှာ ရဲတွေက သူ့နောက်ကို လိုက်လံဖမ်းဆီးချိန် သွားဝိုင်းထားတဲ့ အချိန်တွေမှာ ဖြစ်ခဲ့တာပါ။

ဒီကိစ္စနဲ့ပတ်သက်ပြီး ထိုင်းအမျိုးသားရဲတပ်ဖွဲ့က မနေ့ညက သတင်းစာရှင်းလင်းရာမှာ သေဆုံးသူ စုစုပေါင်း ၃၈ ဦးရှိသွားပြီလို့ ရဲချုပ်ကြီး ဒမ်းရုန်းဆဒ်က ပြောပါတယ်။

ကျူးလွန်သူဟာ ရဲတပ်ကြပ်အဆင့်ရှိ ပန်းယားခမ်းလပ် (၃၄ နှစ်) ဖြစ်ပြီး ဒီနှစ်ဆန်းပိုင်းက မူးယစ်ဆေးဝါး လက်ဝယ်တွေ့ရှိမှုနဲ့ ဝန်ထမ်းအဖြစ်မှ ရပ်စဲခံထားရသလို လက်ရှိလည်း တရားရုံးမှာ အမှုရင်ဆိုင်နေရဆဲပဲလို့ ဆိုပါတယ်။

ပစ်ခတ်မှုကျူးလွန်တဲ့မနက်မှာ တရားရုံးအမှုချိန်းကို သွားခဲ့ပြီး တရားသူကြီးက အောက်တိုဘာ ၇ ရက်နေ့မှာ လာဖို့ ထပ်ချိန်းဆိုထားတယ်လို့ ဆိုပါတယ်။

အခုလိုဖြစ်သွားရတာဟာ ကျူးလွန်သူမှာ စိတ်ဖိစီးမှုတွေရှိနေပြီး မူးယစ်ဆေး သုံးစွဲထားတာကြောင့်လည်း ဖြစ်နိုင်တယ်လို့ ရဲတပ်ဖွဲ့က ကနဦး သုံးသပ်ပါတယ်။

သူ့ကိုယ်ထဲမှာ မူးယစ်ဆေးပမာဏ ဘယ်လောက်သုံးစွဲထားလဲ ဆိုတာကို ဆရာဝန်တွေ ဓာတ်ခွဲပြီးမှ အတည်ပြုနိုင်ကြောင်း၊ တခြားအကြောင်းအချက်တွေမှာလည်း သက်ဆိုင်ရာ မိဘဆွေမျိုးတွေ ပူပင်သောကရောက်နေချိန်မို့ ဘာမှ စစ်ဆေးမေးမြန်းလို့ မရနိုင်သေးဘူးလို့ ရဲချုပ်ကြီးက ပြောသွားပါတယ်။

ကျူးလွန်သူဟာ အထက်တန်းကျောင်းသားဘဝကတည်းက မူးယစ်ဆေးစသုံးခဲ့တယ်လို့ တရားရုံးမှာ ဖွင့်ဟဝန်ခံထားကြောင်း တချို့သတင်းတွေမှာ ဖော်ပြပေမဲ့ မိခင်ဖြစ်သူကတော့ သူ့သားဟာ ထိုင်းအရှေ့မြောက်ပိုင်းကို တာဝန်ကျတဲ့အချိန်မှ သုံးစွဲတာ သိရတယ်လို့ ပြောပါတယ်။

မိခင်က စိတ်ကြွဆေးမသုံးဖို့ အတန်တန်တားမြစ်ခဲ့ပေမဲ့ နားမထောင်ခဲ့ကြောင်း၊ သူ့သားဟာ ဒီမတိုင်ခင်ရှေ့က မိန်းမနဲ့လည်း အကြီးအကျယ် ရန်ဖြစ်ထားကြောင်း၊ တရားရုံးကပြန်လာပြီး အမေနဲ့တွေ့တော့ အမေ့ကိုတောင် ကျေးဇူးမဆပ်ရသေးဘူးဆိုတဲ့ စကားကို ထူးထူးဆန်းဆန်း ပြောခဲ့တယ်လို့ ဆိုပါတယ်။

ဒီဖြစ်ရပ်မှာ မိခင်လည်း စိတ်ထိခိုက်လွန်းလို့ မူးမေ့မတတ်ဖြစ်ရကြောင်း၊ သားဖြစ်သူရဲ့ လုပ်ရပ်အတွက် သေဆုံးဒဏ်ရာရသူတွေ အားလုံးကို ဝန်ချတောင်းပန်ကြောင်း ပြောခဲ့ပါတယ်။

ထိုင်းနိုင်ငံမှာ တကြိမ်တခါမှ မဖြစ်ခဲ့ဘူးတဲ့ ဖြစ်ရပ်ဆိုးအတွက် နိုင်ငံခြားသံရုံးတွေ၊ နိုင်ငံတကာ အကြီးအကဲနဲ့ ယူနီဆက်ဖ် လူမှုအဖွဲ့အစည်းတွေကလည်း ဝမ်းနည်းကြောင်းနဲ့ အကြမ်းဖက်လုပ်ရပ် ရှုတ်ချကြောင်း အသီးသီး ထုတ်ပြန်ခဲ့ကြပါတယ်။

PhotoCredit- KhaoSod

ကိုးကား - ThaiPBS / 3PlusNews/ Nation TV / Workpoint News

4 months Ago

June 9, 2021

ကဗျာဆရာခက်သီကျဆုံးခြင်း ၁ လပြည့်​ ဝမ်းနည်းခြင်းအထိမ်းအမှတ် အနက်​ရောင်လှုပ်ရှားမှု

စစ်ကိုင်းတိုင်း၊ ယင်းမာပင်မြို့နယ်နဲ့ ဆားလင်းကြီးမြို့နယ်တို့က ​ကျေးလက်​နေပြည်သူ စု​ပေါင်းသပိတ်စစ်​ကြောင်းဟာ ဒီ​နေ့ ဇွန်လ ၉ ရက်​နေ့က စစ်အာဏာရှင် အမြစ်ပြတ်ဖြုတ်ချ​ရေး သပိတ် ၉၁ ရက်​မြောက်​နေ့အဖြစ် ပြည်သူအင်အား ၂,၀၀၀ ခန့် ဆက်လက်ဆန္ဒပြခဲ့ကြပါတယ်။ 

ဒီက​နေ့ ဆန္ဒ​ဖော်ထုတ်ရာမှာ စစ်အာဏာရှင်​​တော်လှန်​ရေး ကြွေး​ကြော်သံတွေနဲ့ လမ်း​လျှောက်ဆန္ဒပြခဲ့ကြသလို စစ်တပ်ရဲ့လက်ချက်နဲ့ ကျဆုံးခဲ့ရတဲ့ အာဇာနည်သူရဲ​ကောင်း ကဗျာဆရာ ခက်သီ ကျဆုံးခြင်း ၁ လပြည့်​ အထိမ်းအမှတ်အ​ဖြစ် အနက်​ရောင်လှုပ်ရှားမှုကိုလည်း ပြုလုပ်ခဲ့ကြပါတယ်။

အဲဒီ​​နောက် ဆန္ဒပြပြည်သူတွေက ကဗျာဆရာ ခက်သီအတွက် အမှတ်ရကဗျာတွေ ဂုဏ်ပြုရွတ်ဖတ်ခဲ့ကြသလို ကျဆုံးအာဇာနည်သူရဲ​ကောင်းတွေအတွက် ဆု​တောင်းခဲ့ကြတာပါ။

ကဗျာဆရာ ခက်သီ(အမည်ရင်း ဦး​ဇော်ထွန်း) အသက် (၄၅) နှစ်ဟာ ပုလဲမြို့ ဇာတိဖြစ်ပြီး စစ်အာဏာရှင်​တော်လှန်​ရေးလှုပ်ရှားမှု​အတွင်း  ​ရွှေဘိုမြို့မှာ ရှောင်တိမ်း​နေစဉ် မေလ ၈ ရက်​နေ့က အကြမ်းဖက်စစ်တပ်ရဲ့ ဖမ်းဆီးခံခဲ့ရပြီး ​မေလ ၉ ရက်​နေ့မှာ ကျဆုံးခဲ့ရတာ ဖြစ်ပါတယ်။

2 years Ago
More News
Up